拆竇

咪睇我而家安安穩穩好似元寳仔咁攤抖,前日物體I放咗我喺銀盤浸腳食嘢時,嘩,妳有冇攪錯呀,攞走我紫色的命根,我個竇呀!

立時我張開雙翼,瘋狂地撲,平時我好憎啲水,為顯示主權,整濕晒胸前,嘢唔食都要同你死過。

紫膠椅呀,我嚟咗呢度咁耐都係守住企住嘅竇呀。

過咗一陣,妳像管家咁喺前臂放住乾毛巾畀我抹腳,放咗我落支龍眼樹枝度,雖然妳已經擺咗呢個樹枝陣喺度一段時間,妳放我時我都有經常作通道行走。

然而,好不安好緊張呀。。。

掹頸領巾毛令我鎮定神經緊張,晚間我聽到物體II話:掹晒啲毛光脫脫冇觀賞價值就唔要你。

物體I陪咗我成個晏晝,跟住攞條長鞋帶畀我(口趙),平時我咬到發脾四時佢就會拎走條帶兼走開,話唔鼓勵我暴躁,今次因為要引開我注意力就繼續畀我搓咬,唔想我掹晒自己啲毛。

佢話咁樣變陣妳見我哋攞擺啲衫同物件出入衣櫃時,若果妳發出不滿聲音就可以圍起布簾,睇唔到就冇咁躁。以前妳咬到布簾,而家呢個距離就冇咁易觸到。

其實妳走動範圍大咗又可以坐喺高木櫈度休息。

物體I最留意係我啲寳貝轟炸中FA~紙。

佢讚我叻,目前為止次次啲C都放中。

今日我整到畀條腳錬cake住,佢今次好快就入嚟救我,唔少得係我會幫口,咬佢同咬條錬,人肉真係好好咬,軟熟又有彈性。

所以有時我無端端都會襲擊佢手指。(舔嘴中,不過舌頭唔夠長)

安樂樣

而家佢餵我食嘢時,幾進取。Well...

 

轉look

有幅太血腥,吮晒腳趾咁,唔上lu。

老公話呢隻初長成,瘦身準備一飛沖天。

 昨日佢第二次去影鳳頭鷹,第一次去係鶵鳥在巢成鳥餵哺,轉眼就大隻咗好多。

本來小石人約多一個舊同事K(喪妻)一齊去影。即係上次由英國體驗生活後回港跟我哋兩公婆飲茶那位,邀請親佢乜嘢都接近係否定答案的人。成日講埋啲生無可戀的輕生說話。一路喺個胡同入面,一般人真係幫佢唔到。

老公之前約佢,不置可否。今次約好咗,天陰落雨唔出席。

小石人同大隻佬(影友兼舊同事)比較熱衷呢項活動就照去,若影唔到當行吓,查實好多時真係未必影到的。

其他同事告知大隻佬,同事K回舊公司打散,成日講啲嘢好灰,又脾氣暴躁,請小石人叫K去睇吓醫生。

(返工都三請再請的,因為申請咗住屋某啲優惠。唔可以過某啲額)

人 生。。。有啲人嘅人生,係好複雜的。

我諗到佢可以試吓搵啲機構提供的喪親輔導、哀傷支援小組,同啲有類似經驗的人互相傾訴吓。

然而,唔通又係好似上次孽戀嗰篇嗰位舊同事,隔上隔由小石人告知有用資訊?小石人都唔知點同K講。尤其K思維係好似一舊化石咁。

親密關係,要雙方都理解,以H字母的方式相處,既可獨立自處亦可互相連結才健康快樂。A字呢,倚在一起,到一邊腳缺失咗另一邊就塌下。兩個人一方先走係極極極高機會,心理準備需要做足和預先規劃才更易面對。雙方有共同信仰信念,有些系統的理念會令人更從容步往另一階段。

當然,到時係點到時先見真章。

續日記:

影完相回來整咗啲嘢畀小石人食,跟住佢再出去轉髮型。佢維持咗原來的髮型好多年了。我預先上網搵咗個款畀佢睇吓鍾唔鍾意。去到間髮型屋,個髮型師問佢係咪諗清楚,"你老婆會唔會接受唔到你轉髮型架?"

呢個較剪人真係了解通達人性,我都見過有啲人及其家人確係接受唔到轉新look。

過程中小石人急不及待傳送轉look相畀我睇:

回家後,我睇睇吓發覺佢新髮型似以下呢個,當然淨係講個髮型唔係個樣。

我哋兩公婆都係其貌不揚的,,,😁😸

收鳶

 有毛放養豬~油畫feel的相,好靚

19XxX唔收鳶18XxX先放貨😁

今朝好忙,繼尋日放咗啲7200餘下的貨,係止賺。

今日沽部份9988,呢隻有排攪。

全沽388,唔想連贏嗰幾皮都化水。

全沽A股中國平安袋幾仟,呢隻好好彩暫時一路都有斬獲。

MPF都清倉港股基金轉回保本。

我的,伺緊機提取趁重有賺就收手先。

老公的,1業績好定2業績好好定3輸返贏咗嗰啲。我揀1

佢哋講的放紙鳶,係唔跌穿某個指數就繼續揸,今次穿19000就要考慮放。我呢,穿一日唔放到續下跌先放。

心理預期,下星期大升返妳沽嗰啲會唔會唔開心呀?

想清楚先做,就唔好再loop嚟loop去。

尋日又睇N+TV,分析部份好多方面,不詳錄。其中講到日Yen,講者約6算買咗600,000港元。

小石人問我哋啲Yen係咪贏緊?

唔係呀,初買入後有贏過幾仟蚊,而家倒輸。

佢話成日"覺得"以為係贏緊添,呢樣又輸,不過我唔識唔好講咁多。

我:係咁架啦,好少能買在最低點。

(我又講吓多咗人去日本旅遊,據電媒標題,態度服務"差咗"。

又會有啲人衝出馬路影富士山打咭釀成險象環生。當局要圍黑色布阻止遊客此行為云云。

遊客係咁多,唔守規矩兼亂丟垃圾。當地人有乜辦法唔厭惡。而且當地匯率降咗咁多,日人購買力被蠶食咁勁,會有幾開心?)

我哋入日Yen嘅價位到目前為止算好好架喇。

年金

 對於一見到數式比較“複雜”就側著35度角頭,擘大口斜視既我等(連小石人),佢而家買嘢都會格吓價,睇吓邊樣買兩件會平啲(我印象中佢以前方便就買-可能呢個感覺唔正確就唔好屈去)。我呢,近期又不停睇有關年金同退休安排嘅youtube片。

尋晚演算咗條幾年前計年金預期可能年利率的片。睇咗分幾鐘,講者話買咗嘅人,政府會每月畀返XX呢個數佢。

咁我停機講:係買咗人的錢,唔係政府畀。

繼續。。。

老公問我:咁你重睇。

講者都係講咗一樣我認為說得唔係好妥嘅一個訊息,我想聽埋呢個人嘅睇法喎。

我知小石人唔諗住買年金,亦曾經叫我都唔好買,但係我要研究吓自身嘅情況,睇多啲其他計算同分析叻嘅人見解,再決定點行。

有位N+TV(叫不鳥)嘅youtuber,對財自、資產處理、退休安排等唔同話題都有涉獵,又會攞啲case嚟實質拆解破障畀觀眾參考。最重要係佢聲稱自己已約兩年前(嗰時約40)已經財自。喺巿況好差時佢賬面曾輸過300萬,當時佢諗係咪要返出嚟打工,佢上有高堂又有老婆同女要養。

(佢係咪真的財自我冇從証實,都係睇返佢講嘅內容我用唔用得著及合唔合理。)

我睇的片s中有兩個Youtuber都有諗到買年金連攞長生津嘅概念。

年金唔計入資產,意指到65時攪到自己資產額合乎取長生津資格。65歲之前買骨灰龕位(意願環保葬,乾手淨腳)也好去旅行也好,用咗突出嚟嘅金額。

歸納咗別人睇法,就我自己的想法如下:

1.我身體、智力、思維方面繼續有冇能力在股海浮沉。

2.可以的當然唔想攞政府津貼,而家每年財赤,香港政府呢個管家又有冇能力可長期派發長生津畀有需要嘅人。人口老化嚴重,政府財政喺呢方面的負擔越嚟越重。

3.年金預計可能利率追唔到通脹。

4.年金係保險“保障”,唔係投資/機,回報利率不可跟買股票收息相比。

思考ing

寨城遊園

 演算法喺Youtube出咗一條兩個幾鐘有關寨城公園的片,位資深導賞員敏叔詳細講咗好多資訊。

小石人話去過幾次這公園影朱背啄花(🐦),從來冇行過個公園,好想再去。

當時冇行都好嘅,有咗一啲基本認識去觀賞更有味道。

呢幅係參考由日本人繪製的剖面圖而成作品。

咁我再喺網上搵到以下有趣原圖:

左上順時針~香腸工場、診所、理髮店、脫衣舞表演。

握手樓,戶與戶之間緊貼而建,居民互不閉戶,皆因閂咗度門其他住戶返唔到屋企。而且裡面亦有好多地下秘密通道,方便住戶們快捷出入。

寨城公園內也有昔日平面圖供參考。

多得敏叔多次敦促園方管事人員,這座建築設計模型才重見天日讓我們有幸觀賞。

公園設計揉合園林景色和寨城獨特歷史,榮獲1993年德國舉辦的國際園藝博覽會設計優異獎。

耗資龐大,全園石春地均由人手舖蓋。

長廊中發現約攝於1920年宋王臺石相片。據述1942-1945日軍佔領香港期間巨石因所在山崗遭炸毀,幸而刻有“宋王臺”三字部份得以保存。

沿長廊見變化多端的漏窗俗稱花牆頭，俱採光、通風和裝飾之作用。

另一個富心思設計係童樂苑,曾有人提議於此處建遊樂場!(在這清優雅緻之地喎!!!!)

最終設計師以無懼風雨侵蝕的青白石製成的十二生肖石雕佈置該處。

雞嘴朝東

牛頭仰天

虎背披甲

羊之美

是項艱巨工程總設計師謝順佳先生於寨城公園內僅餘一、兩件墨寳之一。

大部份已於後期被另一個聲稱園內對聯牌匾刻字有問題的人士決定剷走,包括一塊“心經”石刻都換作其他。

不沽、不高追,放唔放到紙鳶?

前幾日闖進我哋家中的小螳螂。

記得有個前港姐冠軍兼演員曾打電話上恐怖在線,同潘聰講佢住低層,有日有隻好大的螳螂入咗露台,咁高都上到嚟,重唔係鬼故,最終呢個女演員為咗保護個女兒打死咗隻螳螂。

古某住廿樓以上,經常有昆蟲入屋或伏在窗外,見蟋蟀螳螂都有份莫明喜悅,前幾日徒手捕捉咗隻黑蟀放出窗外。慨嘆嗰隻大螳螂真係唔好彩。。。

無驚無險繼"摒棄散戶心態"帖文又過咗十日有多。

如題冇沽冇高追,至於有人成日話的不估頂放紙鳶,試吓做。嘗試唔同的方法可帶來不同體驗。

前日見忍咗咁耐,就開吓啲強積金戶口睇吓,幾開心,因為小石人個戶口比上次結算多咗6位數字。

而我個戶口亦有進賬,因為我好早已唔打工故此累積有限,總結算時未知,而家呢個利潤百份比都可以稱讚自己處理得好。初步計劃食埋呢次升浪就提早領回。

及早提取,慳返啲手續費都好。

股票方面,聽米兄講(我有自己做功課同會負責返自己的買賣決定的,請放心)我今次有入趕交所,暫時帶來滿意的利潤。其他嗰啲價位尚未追得返,不過拉勻追返唔少,又睇吓自己再守得幾耐。

自從B呢巴啦吐感受後,呢十日過得輕鬆好多,又搵唔同嘢分散吓注意力。Utube Utube打機睇戲放FA~

雖然我成日講FA~壞話,不過有隻生物陪我,同埋要照顧佢,可以延緩退化。鬼叫我膚淺,睇見佢咁靚女就墮入美雀陷阱偏我遇上。。。

又整多張小石人影落FA~嘅舊照。

不停嗌咗幾個月,呢幾日無啦啦又撳返著個講嘢mode。
 

九龍城寨

 近期圍繞住呢樣有兩單城中熱話,大家又知唔知曾出土咗呢個牌匾,佢查實係叫九龍寨城。

橫睇豎睇,九龍城寨之圍城,都係一齣值得去戲院觀賞的電影,就問小石人有冇興趣,佢都係向我問嚟問去,似乎唔係前兩次咁一問就應承。

咁我話:"你有興趣就假期一齊去,你唔想睇我會自己一個去睇早場。"

呢齣戲叫好叫座,想有好啲位,一係等遲少少,一係要早啲買飛。

買飛前佢問咗我想要乜嘢位,我答咗之後補句,其實都係睇場戲,我唔會因為你買飛唔啱心水鬧你嘅。又問,你以前細個做"錯嘢"係咪畀人鬧得好甘。佢話係,我又估中佢家人中係邊個好似霸王咁鬧佢。好品性唔想損感情的人就係時時在忍讓。

我通常睇戲都係水過鴨背,佢呢,選片好揀擇,唔係我約佢基本上唔會主動睇戲。對佢有興趣睇的在畫面情節方面好有記憶,今次佢一見王九的武打就話"胯好鬆"。(係細細聲喺我耳邊講)

睇戲期間,後面有啲女人在不停講嘢,隔我兩個位的兄台,兩次叫佢哋唔好再傾偈。

點知啲人唔知係咪條件反射控制唔到把口,小石人兩次望後佢(哋)都繼續咁傾。

完場後,同場加映睇完戲畀人X。

隔兩個位嗰位男士在戲院一著燈,佢就企起轉身望住我哋後面班女人講:

"叫咗你哋唔好再傾偈都係唔聽,要傾出去傾啦。咁X老土。"

我一路望住呢位兄台露出我燦爛笑容。

佢望咗我幾眼繼續:

"人哋隔離左右都係費事話妳哋咋。"

後面重有其中一個女人細細聲駁嘴:

"黐線,唔畀人講嘢咩。"

講返戲:

睇完有興趣的片我會上網搵多啲資料。睇戲前就會留意吓佢值唔值得去戲院觀看。呢齣在還原一比一寨城風貌好仔細,搭出嚟的景係好似lego加轆可以推嚟推去,演員又可以在立體景上打鬥走動,由樓上跌落樓下就算二樓地面係穿窿都唔覺怪。入面士多雪櫃飲品、四仔AV帶、公仔書都係真的。

好多Youtuber都話主角陳洛軍係由內地偷渡嚟,但我印象中佢係由越南偷渡返嚟。咁我查看到一條片,導演鄭保瑞明明親口話佢來自越南。

今日小石人放工,我問佢有冇印象,佢又記得喎。喚醒我記起,陳洛軍被送咗入醫院之後被發現非法入境然後係先送入難民營,再有職員幫佢甄別時話佢有兩條路,一係遣返越南;一係申請去其他國家。

另外原來拍咗好多片,如四仔個角色查實有好多新穎招式拍咗而被剪走咗。王九同大老闆合謀殺人嗰場又係剪走咗。

陳洛軍身世,本來係由案中一警察搵到料告知大老闆的,該警察亦想用呢啲料嚟威脅龍捲風退出寨城,呢啲因為某方面的考量又係剪埋。所以有啲情節如龍捲風點知陳洛軍係故人之子就變成唔知點解佢會知?幾時知?

已經成兩個鐘有多,料又咁豐富真係好難取捨。

兩公婆約會完,之後又有好多共同話題。

FA~之鸚

 舊照佢影,呢幅從影FA~以嚟影得最靚,睇吓眼神幾咁柔和。😁

今日男主人有興趣影吓佢,見親小石人都炸毛刮嘴,唔知邊個買食物回家養我哋,又唔知呢個係救命恩人,救咗妳好多次。

以下嗰啲我影,小石人話呢幅表情得意。

以下攝影能手冇讚

四白眼,精神有冇問題?

公主浸腳,用食物引佢落水,趁佢食緊嘢我做紫膠消毒清潔。

好惡....

摒棄散戶心態

都係同一扇天窗,投射出來是不同的景象,好有趣。

 呢排升巿,說實話係捱得辛苦過跌巿!

何解,之前自己買的貨跌到幾近麻木,堅持,睇啱方向都要有個繼續來來回回跌的漫長過程。

小石人做得好,佢係唔會過問我做緊同做過啲乜。只有我最清楚自攪出嚟的狀態。

今晚B呢巴啦倒晒呢排忍得幾辛苦爆爆爆。我講個情境出嚟問佢,佢賣唔賣?會點決擇。佢從來都冇答得咁爽快:"唔知。"肯定地嗰隻。

一個冇經驗股票買賣的伴侶。佢講妳都唔好信。一切成敗得失由自己承擔。

低位嗰批有賺的貨,買之前都係諗住片水,有微利放咗佢係一早預咗。轉頭再升,都唔會諗喇。

要忍的係千祈唔好再"賤賣"其他喇。現在進入惜貨如金階段。

今次入貨做得差係唔分段,對我嚟講大手直入。又係到接近低位入少少,因為要做風險管理唔可以入得太盡。

要喺股票巿場獲利殊不簡單。

人哋比我哋有耐性,資源知識器材數據都多,睇住我哋嚟食。咁我哋就要忍得先有望等到佢唔開車唔得,然後搭一程~長程?

最怕係啲駕馭唔到大錢買賣投機投資的人去畀意見搏緊大茶飯嘅賭仔/女。嗰啲人就係一般畀人割的散戶心態~驚。最驚時打貨。