家居有計·買賣

卒之解決到厨房窗開關問題。

在裝修大計中我提過,厨房的窗離兩呎位"烏"唔到咁遠。

得咗。

之前有個撈意粉的木厨具,我哋叫佢九陰白骨爪,一鑽就散。

再試呢個冇弧度的鑊鏟(唔好炒的發明)就成功。

又可以廢物利用。

是日買賣:

今日再扯高一棍時又買入多啲7500。

是日賣埋啲月供中移動廿佰幾碎股(清倉)。呢單交易有賺。

小插曲係打電話去銀行s詢問嘢時烏龍一出。我都唔知自己處理股票買賣重可以維持幾耐。

而家啲蝦碌嘢當做笑話一宗咁哈哈哈。

保持思考動腦筋,延緩衰退。

之前寫過:

兩間鋁店都攞到我哋嘅感謝金

 

誰不貪

 記得有個小學同學曾經教我,用一"渣"散紙唔夠數地投入巴士錢箱內搭公車。

人蠢,就唔好走去呃人;正如小石人有道:人蠢,就唔好賭。

拾幾歲時,有次投一個五蚊入巴士錢箱沒有付足夠車資,記憶好似當時重係熱狗。坐上層,咦。。。架巴士停咗,原來個司機上咗嚟上層,同我講:"稱呼,妳入唔夠數。"

而家多謝返佢。一來佢唔怕麻煩告誡我,又為佢間公司監察乘客呃車資行為。

之後我當然唔會再犯。

而家啲人,好多到五十幾六十歲,個樣係唔似佢實際年齡的,如果有做健身護膚保養染埋頭髮,甚至有機會望落後生拾年。

所以憑肉眼幾難判別有冇借用人哋張綠悠咭混水摸魚。

尋日搭小巴見一對男女嘟兩蚊,個司機都有目測望吓佢哋夠唔夠秤。小巴上亦有張貼用這優惠需出示身份證明,哈,司機都應該係發覺太離譜先會去查證。

巴士:而家工作待遇同要求,可能比以前緊張同講求達標,或者會抱多一事不如少一事心態。

況且係政府補貼,冇影響公司利潤,使鬼同佢咁緊張咩。

地鐵同理,特登搵啲人手去抽查係有,但冇誘因特登為樂悠嚟對證件。呃車資就一定要請專人睇到實。

民選議員當然會為長者福利傾斜,隨著人口急速老化,呢瓣選票就更要落力爭取。

對於下年登六的我,都係抱著有當然好,第二日庫房開支太大時,就自然有人要做醜人削減資助。如果冇車資優惠,我就而家搵定錢,幾時都係靠自己最實在。反正我好少出街。有補助確係會有誘因多啲外出。唔出亦冇所謂。

"更新:記起多一樣嘢,小石人有兩個舊同事都已攞樂悠咭,仍返緊工,個樣都係唔似60的。我有位讀文憑時的舊同學都係有咭及重返緊兼職。很多香港人,有份工對佢哋好重要。。。,佢哋都交咗好多年稅。"

我唔使湊孫返學放學,又鍾意瞓到自然醒,自然一定千祈會避開繁忙時間,唔會同上班人士爭上車。請大家放心。☺

誠實~由自己開始做起。

相聚頃刻

 今午約咗中學時的舊同學食晏,佢幫我慶祝生日。

年幾冇見,今次佢面容比上次放鬆返好多了。皆因佢換咗去第二個工作地區,唔使跟住個畀佢好大壓力的上司。

堅持做到大概今年六、七月退休,攞埋一啲佢應得的醫療福利。恭喜佢。

講吓戲經s,昨晚睇咗齣真人真事為藍本的Believe me:The abduction of Lisa McVey,簡短撮咗劇情過佢聽。講吓生活近況天南地北。間越南小店午間幾好生意,要翻枱畀人做多轉。

蔗蝦~得。

在該區內買咗好多不同嘢食。

佢送我去宋皇臺港鐵站,重喺嗰度傾咗幾個字我講吓單法庭案件,殺咗人最終唔使判長年期監禁,重已經放返出嚟重獲自由,以佢做檢察官聽到真係覺得好驚奇。

我提吓鹽喻經,雖然為惡為善不能相抵。作了惡事如平時做得好事多,像兩羹鹽放在湖水中,受起上嚟較能接受。不過,結了惡緣,若不及時悔過誦經迴向,債主總會臨門。

臨走前,佢又派吓自家製過膠美圖,背後有一神教經文。

大家信仰不同,聚會也可以感覺暢快愉悅。

美妙五拾九

 富貴如塵霧裡煙

        禍福隨緣甘接受

                 既然有幸能相遇

                        化作青苗助修心

是日早餐+杯啡~古某擺盆製作。

淘兄,我未做到清心寡慾住呀😄

去片:

Sexy sexy音樂欣賞

本來想去花墟買香草同花畀亞FA~食。後來天陰陰唔去lu。

好彩唧,有地區落晒冰雹咁。

佢又幫我清咗啲雜物~其實要搵吓有冇由舊居攞返開O刀回來家。搵唔到就要買過。

搵返盒旅行裝scrabble,佢唔識都竟然肯陪我玩,抵錫。

過咗幾場雨後佢出去買晚餐。讀唔到佢個腦會喺蛋糕上寫乜嘢字添。

戲肉

法國生蠔兩款

交杯合巹

日本太良~超creamy,食完有啲飽。

日本華漣~清、爽、甜

暖男厨房實況~

新鮮到呢。。。

約會s

~好網友話南瓜子有益過摩登瓜子~
 

近期多咗出街,發覺以前比較樂意外出時就係蜜運期。安多酚擁到出嚟。

前幾日同小石人講,我都有話佢唔似初先同我拍拖時咁。實在,過咗嗰段期間冇咗嗰啲內分泌自然churh唔到咁"恒"。

新探索舊回憶

同啲舊同學去富記嗰日,食完嘢之後我獨個兒去咗由小五開始就搬咗去住的九龍城舊居懷緬。主要係睇視頻見到有介紹一間小舖賣小食,去買嚟試吓。

曾經又喺FB嘅已被絕交的網友(係呀,我好多時都被人絕交的)好耐之前她講過九龍城有啲賣肝菌的地方。嗰日我重買咗祥哥(周兆祥)話對身體好有益的椰棗。

加之有間多年潮洲雜貨舖,見到仍䇄立當中,有光顧兼同售貨女士講:"好開心妳哋仍然繼續經營☺"

佢又笑住咁回:"多啲嚟幫襯"

舊舊居:冇燈摸黑行五層樓,以前隔一陣就有飛機聲(口隆)(口隆)地轟炸。上天台見到不同飛機的白肚,近到想像觸手可及。。。(請留意呢個塗鴉)

好嘞,有日小石人被派去九龍塘做工程,佢話摘日不如撞日,就約咗一齊去富記食多一次。是次試乾炒牛河、椒鹽三鮮、重點醬爆腰潤。

(今日查個墥字:解螞蟻做窩時堆在蟻穴的小土堆)

(之前有好網友問過點解要兩個電話,除咗之前的回答,用兩個電話嚟寫網誌嘅好處係有執筆忘字,有嘢唔知要查就好方便,而家睇文有好多縮寫代號我都唔明的:一二四八查極都唔知點解。可一路同老公午間通訊,有人撳錯視像聊天掣又俏皮地拍吓通訊照😄😁)

食到咁上下,老公話想去九龍城再買椰棗(好甜的~咁好過成日食朱古力嘅)。

唔知人哋幾點收舖喎,我淨係記得間舖有個蕈字。竟然畀我喺網上搵到,見到營業時間,重打電話畀老闆,果然佢答我生意較淡,平時佢比網上的時間早走,有致電佢先的客人,佢會等我哋。

搭小巴去九龍城時,老公講句好普通嘅嘢我都猛咁笑得好雀躍~愛的表現。愛笑的女人最吸引到伴侶。

小石人一買就買晒該舖啲棗存貨,老闆重話我哋專誠趕嚟買嘢,重自動平$20畀我哋。

見老闆說話溫文慢活,解答清楚而繼續想講落去。我話:"近期嚟過買嘢,知道。"(因為我哋唔知另一間賣小食舖仔幾時關舖喇。。。重有我開始攰)

去到小店,真係就閂舖啦,今次啲腐皮乾脆過上次好多~

見到一大堆即係代表新返貨,新鮮啲?

串燒豬肉同個汁,前者腍嫩後者醒胃,醬汁要嚟點白灼蝦都好好味好夾。

搭車走時喺另外一幅牆又有嗰個塗鴉,小石人話係個酒字。我真係冇諗過,佢可能好似Percy Jackson咁懂另一套文明字體,所以對現世通用中英文理解唔同😇呀

昨天我又跟住視頻指引去咗上環食魯菜。事關小石人被指派到嗰區工作。佢話自己係人球。我話咪重好,唔使對住嗰個冇條理又懶又求其嘅科文(即係有篇"3個人都要咁"篇網誌話當小石人係自己人,然而該科文放假就叫小石人問個替工散仔指派工作。都唔緊要,而係嗰位散仔都唔知要做乜的)

而且佢而家的大部份老闆都對小石人非常尊重,冇工程都會搵啲嘢出嚟做留住佢,應該高興有人s欣賞。

舖頭仔,羊肉餃子~得。

Hey,附近有生腰果同生南瓜子賣,人🐦都啱食。

變返唔識講人話

 前兩日disney+有風雲雄霸天下上咗,D+有時上咗II先有前面嗰齣。印象中雄霸天下好睇啲。以前聽講呢件泥菩薩嘅衫,電影美術設計用咗好多心血製成。前因不贅,總之影呢張相傳畀小石人睇。

後來先發現咁橋影咗呢四個字。。。

3月頭同FA~溫馨時刻時,即係放咗佢,佢由紫膠Pan飛嚟我度,跟住我餵食、摸吓佢、唱歌畀佢聽、同佢玩、兩生物靜靜地享受無聲之寧靜。佢突然專注地望實我右手食指,跟住就進擊咬落去。咁就即刻鎖返佢。佢成日細細力之後就開始用力啃我啲肉。

第二日再畀多次機會佢,著晒防禦手套、毛巾手袖都係大力咬到左手食指瘀晒。又迫我加佢監鎖返。

覺得非常沮喪而且束手無策。

因為係喺平靜心情下作出攻擊。

由上年租住屋到2022年6月搬返上家後,直至九月,見佢行為良好,一心想畀多啲自由佢,就日間放佢喺FA~房行飛走。佢可以好長時間一粒元寶仔咁坐喺度唔出聲;有時又自在地居高臨下在高架物上翅毛。然而動物天性就係有地盤主意,越多地方佢活動佢越要霸多啲領土。加上年頭發情期時特別凶悍。

聽到呢度啲噪鵑凌晨同日間都係咁叫,春天喇。

之後又再畀多次機會大家放佢,呢次飛咗出廳,去到厨房想攪袋垃圾,唔畀佢咁做就作勢攻擊我腳指,早有預備的我用祖師爺的棒同佢格👄。咬棒,上棒之後,佢例必沿棒想上我手,今次展翼兼想攻擊我前臂。直情鎖唔返佢去紫膠椅咁狂野。再試第二次先鎖到。

3月8日同朋友聚會後,可能晚間至第二朝比較長時間未餵食或佢因某啲不知名原因,平時食已剝殼生花生,佢係會咬吓先吞,點知佢嗰日搶咗粒1/3粒連殼花生同其他瓜子都係唔咬就吞。當時冇事。

過咗唔記得幾耐,再餵佢食嘢後發現佢頸背部隆起,眼反反成隻呆晒。見到佢咁樣我寧願佢癲雞乸咁惡死咬人。

小石人有上網查吓乜事。之後我又有查。估計係佢嗉囊太脹或有嘢唔消化阻住。小石人話想捉住佢檢查吓佢口腔入面😰,平時冇咁惡時都唔係一定畀我掂。佢對小石人咁敵意簡直係不可能的任務。

網上多篇都係近似的文字資訊,有一篇竟然結尾加一段話劏開佢條頸由嗉囊取出阻塞的物件,話唔好切到血管。😰😰😰😰😰

鸚鵡雀體結構、無菌環境、麻醉份量、傷口縫合、臨床實習唔係活體試驗、有冇專業資格。。。我唔識都諗到一啲起碼要識嘅嘢。

佢平時好憎飲水,次次都嗆親、打乞嗤,嬲到刮晒嘴。近期學得叻咗,飲多咗水。

因上述嗉囊情況,我之後幾日畀少啲嘢佢食,細粒啲的、剪細粒啲花生畀佢,餵佢飲多啲水。暫時留意觀察,唔好餵到咁飽。其實我多數唔會畀飽生果及穀物佢的,因為一飽就玩食物同fing。

暫時情況令人滿意。

近十幾日冇放佢周圍走,狂嗌巨聲又冇再講嘢了。

平時清FA~紙攪到佢啲C就好似搶佢啲寶貝咁,清潔周圍同掃地就"㗅"表示極不滿。最近小石人掃FA~房佢重飛撲去咬他手臂。

佢又變返野鳥FA~。

我真係好鍾意佢。

呢幾日我調息心念,那是"牠的天性"。就要明白同埋唔好用人的標準嚟對佢。隻隻鸚鵡都有唔同個別性及經歷。

如果唔係,以佢前主人本來對佢咁大期望,重幫佢改個嗰個名,要不佢桀驁不馴,又點會捨得放棄佢。

搵吓上年佢咬到我手臂好甘的日期,果然又係3月。

而家佢嗌的時候我哋兩公婆都各自戴耳筒。

小石人話佢幫我哋練菩薩心。

我要對佢既保持警惕又加倍有耐性。

2022年9月24日16:45

與友共聚後感想·一蚊蚊買賣

"慳眼汁就由近兩日操作開始睇,全篇唔睇都冇損失。"

 上星期約舊同學們幫襯富記。以前成日遲到的我,在調息咗內心心結後,除咗早到外重喺出發前預備內在好的能量見人。

Whatapps問她方唔方便早啲上佢嘅畫室。佢未到。為咗唔想好似趨住佢咁就在附近咖啡店買杯啡。

呢間啲樓梯佈局幾特別。

估票買賣有時都似樓上樓梯般上上落落,下風牌時考耐性~可長可短。睇開我呢度寫嘢嘅人,唔知發唔發覺上次呢個人,可以好有耐性咁等相對低位買入又等價位升返但又好冇耐性價差一、兩蚊就走貨。大家都知道咁樣食唔到大茶飯。

失咗上年尾14xxx的低位,又估好快回落就手多多沽貨,咁升咗成8000幾點妳有冇後悔架。

寫賣175時嗰篇散戶操作講咗啦,諗清楚先扑鎚然後行動,所以係唔會懊惱的。就算再案件重演回到當時咪一樣係咁決定。個個都係估估吓架啦。

呢排又再重覆重新思考吓買估票為乜,食百家財的活動,我冇諗住亦冇能力賺到盡,有上有落望僥倖保到轉化去嗰頭前可以夠購買力同老公過此世。

今次見面的兩位友人,如果一提到股票買賣就成日話我投資有道。。。😅都唔解釋咁多了。反正而家年紀到咁上下,多過兩個人的聚會似乎有時都會妳有妳講,佢有佢講。係咪真係接收得清楚互相透過言語想傳遞的訊息,其實多數都唔係好全面。重要嗰頭畀人打斷咗講題,就追唔返之前想講乜。唔係咁爽。

例如有次同一個朋友講:"而家啲時間係倒數緊",咁就畀人"啋",但轉頭佢又話唔想咁長命。下次再見時佢又同另一位朋友喺我面前話到自己幾豁達咁,好睇得開佢亞媽年紀已好大,佢係主要照顧者,佢同佢啲姊妹好睇得開又話自己同家人都畀最優質的陪伴時刻畀佢高堂。然而再較早前的飯局,佢又因為冇留意到佢母腳指有兩粒疑似凍瘡而直言好內疚冇及早發現。

另一位友人聽到就安慰佢唔好咁內疚。我就單刀直入地話:"要佢肯聽人講先得架。"

呢句我諗:"佢不嬲好proud of照顧得以前在職時需要人護理的服務使用者非常好。"

發覺我而家同呢位友人傾談係充滿"被"忌,唔可以暢所欲言。。。

做盛行佢都話唔會問人哋(唔係識好耐的人卦),我諗:"真係唔知有乜咁大件事連問吓人職業都咁難啟齒,我真係好唔明!"

主觀地我覺得佢內心好多嘢--以前現在不同情境情緒都係炒埋晒一碟唔處理但又深信自身好睇得開、為人設想、好好人。佢係好人是事實。

我要:"更克制地閉嘴!"以後可以的話少啲見面。

我自問都係表達得九唔搭八,唔係好有系統講啲唔講啲,起碼都經常內觀吓自體發生啲乜嘢可能的事而去改善修正。

近兩日的操作:

昨天沽清:

386 $4.75(呢隻見鄉下仔前嗰排續入,就擺多一陣,每股賺多約0.2)

多謝網友。

1883$2.9 

2915$4.15

今天沽部份:

2342$1.46

昨天譚生出返嚟喺youtube講估票倉位及不同估票累積沽空數據。我覺得呢啲數據對我好有幫助。

823好彩持貨唔係好多,有500股喺6x出咗。如果有機會再鋤落去就入返啲。

重有啲千年蟹精甚至死咗超大半已停牌的蟹,有啲蝕賣欲低位撈返賺差價,有排拆。

買賣估票係修心活動。

諗計中。。。。

天才呀~

 呢個伸縮架好好用架,唔知由幾時開始個用嚟扣實嘅掣壞咗,放嘢上去就有跌爛危險。

唔好放過讚賞伴侶的機會呀,呢種維修方法我從來冇諗過。

對所愛的人正面真誠鼓勵,佢會更加有動力去做啲對雙方都受益的事情。

當我讚賞他時,佢而家會大方地說:"多謝喎。"

我哋大部份人成長過程都係孭住條荊棘棒,冇讚不特止,一啲就係用惡眼神去令細路停止大人覺得唔鍾意的行為(瞳術?)。我細個時就受過唔少呢啲潛罰,心理威脅。有啲就打;有啲就將自己責任由細路負,譬如有人提過要脫離住公屋而將厚望由兒女讀書叻嚟完成。我聽到覺得超恐怖的。

人類BB自細就喺父母好屈機的狀況下長大,無能力自主,我諗大部份人都係自卑底,有啲表面自大裡面嗰浸亦是自卑。

有時見啲人,明明喺某方面能力已超出中等水平,功夫屬上乘,當別人讚賞她/他時,佢哋嘅反應就係唔識反應,甚至有啲好謙虛咁話唔係,仍需多多學習;有啲就話自己點唔得。。。問心,啲表現行為又唔覺佢哋認為自己唔得。

咁係咪虛偽?

對於平庸的我而言,心裡就皺眉:"咁都話自己做得唔好?"

後來,睇唔同的視頻後又較深層發覺到,可能呢類人,心目中的自己同現實以為的自己有好大距離,心中的鞭不自覺地對自身抽打得最狠。

寫上面一大篇,唔知表達得清唔清楚。

對自己公道啲,係做得好咪大方答句多謝別人的讚賞。

更理想的是,一個人也靜心觀察自己做得好的地方、從具體的優點去讚賞自我。人生才甜甜的繼續再繼續呀。

十分滿分,你畀自己幾多分~

好睇

 呢齣戲似乎啱去戲院一齊睇,講古典音樂聽樂團部份有好的音響效果,見小石人有時都有聽古典。是以聽咗舒琪介紹咗該戲少少就唔聽住,呢齣想入去睇先發掘戲劇內容及情節發展。

昨天一早醒來,等佢醒咗就問佢。。。

經過一輪對答終於答應放工肯去睇。(後來先知原來佢有啲原因。)

佢返工後我就話畀亞FA~知一陣要出街,會晏啲返。通常在我哋外出後FA~都靜靜企喺紫膠椅pan上,天黑就瞓覺,呢方面好好。

攪完一輪網上購票。到通訊約匯合時間時,我話想早啲去攞飛兼搵定地方食嘢,因為齣戲成兩個幾鐘,佢放咗工後要食啲嘢先再在戲院小賣部買杯啡入去一路睇一路嘆,唔使餓住個肚。

是日免強制戴口罩,我哋都不約而同地唔戴,九乘九的人戴,我哋咪相對安全,到第日佢哋唔戴,我哋就戴返😆😸

真係要學習同做吓唔同的新程序,去到戲院喺刷卡攞飛都整咗好耐,因為唔知佢要將咭放的方向與上下。

搵食嚐問吓保安,去到間店舖見咁耐冇人畀餐牌同招呼就問吓人,原來又係已經用緊掃曲落單,個侍應話唔掂再搵佢。好彩之前喺元氣堂食用過好幾次。老公來到食店話上次去旺角食燒烤都係用掃曲的。

食完重有時間偕他去睇食麵湯碗,睇完戲可以去買,終於有自己兩公婆喜歡的食具瓷碗,而家用緊的都係老爺奶奶留低,我哋唔嘥嘢咁用落去。

齣戲頭嗰唔知幾多分鐘,總之覺得好長-------時間,就係有個女人哼嗰幾句歌,畫面就係要觀眾睇製作團隊名稱字幕。

心諗:"瀨嘢"又不時望吓佢的反應。

睇完之後佢話好睇,跟住兩人由昨晚到今朝至午間通訊的話題都係環繞住呢齣戲。

因為齣戲講嘅題材、對話內容都比較複雜同冷門,覺得好唔好睇估計都幾兩極化。我有啲部份睇唔明,要回家再睇影評才更了解。

以同業角度,舒琪就好推崇例如十幾分鐘一take長鏡和一些他從未見過的拍攝手法。

主角演技就算有些地方我不太明白導演想表達的深層信息都會讚嘆她演繹精湛,值得欣賞。