穩住自己的心

天寒地凍時小石人趁放幾日假約咗大隻佬去朗原影雀。回來後都是訴說及兩公婆進而討論政府做完一輪話保育其實將自然生態變咗石屎石屎奪去生物多樣化,規管唔畀普通巿民進入稻田及保護範圍。

係咁架啦,本身政策同辦事的人的思維就唔係真正保育或保持自然生態,只是跟一向做法,例如濕地公園的石屎屋遠距離窄角度觀鳥,會吸引到不同生物的樹林灌木就斬晒佢。

話說回當日佢去完鳥攝後返嚟就開始作病。呢啲時候就係要休息。佢話點解沾寒沾凍似發燒跡象又乏力。

我:唔係咁樣你點會乖乖休息,大隻佬第二日假期再約你去影嘢你會唔會去丫。

我當然知道答案。。。

比原定假期放多一日好好靜心休吓。

呢間公司啲老闆幾有人情味,之前佢哋有個同事中咗風,老闆們去醫院探佢。小石人以前嗰間公司個服務咗十幾年嘅忠心員工(即小石人的老友)突然死咗,嗰間公司兩個老闆冇出席喪禮連乜金花牌都欠奉。啲仍然在職的員工一離開告別儀式無不炒媽拆蟹鬧爆嗰兩個人。

我:生意賺錢生計活動,唔使放太多感情落去。

今次小石人因病請假,現職公司老闆都會問候吓呢個散工,請佢保重身體。

家常講完。

繼上次操作後,個巿上上落落,我只取消了月供中電。因為冇用不完的資金。而且變咗陣買咗日Yen,咁就供少幾期架喇。

近期比較做得好的是$246港交所,究竟個巿在結算日後再掟落去定繼續緩緩上升呢?比著之前一早賺少少就沽。但經過咁耐的逐步沉底,上次盈富同吉利亦係在當時低位反彈,而家由贏變輸然而要改變賺幾粒花生卻追唔返之前的虧損就係要忍耐。

政策。

日Yen carry trade拆倉。

不加息而有心人會繼續作可能減幾多幾多次息。

有人以為升巿就係經濟好。

當多次似出現"常規"時,到大部份人都相信這常態那刻,逆轉可以嚟得好急。

忍耐忍耐再畀耐性,循之前的大綱執行,有變陣係正常,現時的虧損是正常,由贏變輸是正常。

手風順時不意氣風發

逆境時不意志消沉

一日未離開賭枱一切都未有定論。

 

今日又入貨

裝修完間屋咁耐,最近先揀到呢盞我哋兩個都鍾意的燈。之所以可以成為兩公婆~搵到啱嘅先要😁😄

(目立)返幾年前的跌巿買賣,勇字喺心口密密入。如果今次好似上次咁攪法就死X梗。😜

繼8月份搏亞爺有救巿措施兼亞里分拆畀佢套咗一筆之後,忍得好辛苦唔入巿的情況下,之後又攪咗啲乜出嚟呢?

11月份回補返部份之前較高少少位沽出的001 $39.4

同上情況回補2342$0.89

買咗啲7200 $3.264

12月再入2800 $17.07

MPF

將餘下強積金保守基金部份再分40%轉入港股。

今日再入7200 $2.786

20 $1.26

388 $246.0

7226 $3.716,呢隻有一注高位入的。

A股601318中國平安¥39.25

美股前嗰排都係s之前嗰3隻。
 

大生圍~超多圖喎

 

是日主角~鳳頭鸊鷉,幾大隻蝦,哽唔哽得落架?小石人作品

驅趕鸊鷉鶵鳥不准入地盤,幾惡。。。

生化摩打腳~~Wow

重有天地沙鷗翺翔天際。

以下記事圖、片我影:

3/12週日~佢早一日約我去。

瞓醒,突然佢話亞FA~落咗地。之前牠又咬我,所以好多好多日冇放佢,點解會落到地,原來扣住紫膠的縷鎖金屬圈鬆咗。好彩唧,如果出咗街先鬆脫,返到家唔知乜嘢環境,遍地FA~金?佢飛走咗?

佢又乖喎,當刻冇踩到四圍都係,讚!

飲完果菜露出發,佢約咗大隻佬的。

佢哋影相時,好難先搵到一塊石片坐(基本上係坐喺地下,但我知道咁坐法分分鐘再企起身時有困難。)

期間發現好多小白花,結果後係瓜。

紅色以為有毒,上網查吓呢啲原來係食得。

佢影主角時好彩我再搵到一架在陸上翻轉了的船,唔係要企成幾個鐘。

佢影完鳳頭後我哋就一齊行入啲。我行似蝸牛咁慢又影景,佢個雀友自己行先。

呢個位⬆佢重想回程時翻兜影,留耐少少我就大鑊。。。

好似機械人咁,型。

鏡花水日雲湧時。

嚇到我個心離一離。大路上脫。Very big one

佢放低背囊由我看住,速去另一景點影嘢,四望都搵唔到地方坐,已是下午兩三點了,人晃咗一晃,知道自己開始支持唔住。佢一返嚟立時同佢講我要🐎上離開此地,身體不適。

有見唔舒服要早啲出聲,暈X喺度就累人累己。

佢察覺唔到,重想返兜一個景。呢個位我堅持叫佢唔好再影喇,我就頂唔順!

行多一陣,

好好好好彩,竟然咁"橋"有人搭的士直達我哋面前!!!!!

感謝上天。感謝自己之前做對了決定,再延誤就搭唔到呢架救命的士。

跟住轉巴士都係唔使等就有車。

去到食嘢嘅地方休息咗個人舒服晒。

好運留給愛感謝的人。

又完成一次斷食

20/11/2023

由開始斷食嗰一日數到而家大概12日。

斷前覺雙臂內凍冷入肉,好似作感冒癥狀。胃痛。流液。左面頸膊冤痛。

笑唔出。有件事發生咗覺得好無奈(B,暫時唔想講,留個暗號提提自己係乜嘢🌳)。

有唔舒服最好就係內在自我復修。

如以往,一念斷食,胃氣就開咗掣咁不停吐吐吐地清出嚟。好舒服。

最好係去完解首後就斷,因為之後唔夠氣唔夠力推出嚟,隔得耐再有下一次同可能會比較辛苦。今次又係好好,期間去到兩三次。

頭一兩日做到簡單拉筋(hea)。搖機頻密。有用按摩油自按頸肩。沖暖水袋暖身不同部位。

打吓電話叫外賣畀老公做晚餐,叫到啲舖頭人s認得我把聲。或浸定菜等佢返嚟自己煮。

餵到FA~換到花紙。

24/11/2023

約第五日,請老公買青檸畀我,跟住下來每日都有飲青檸水~唔加蜜糖的。

26/11/2023

請老公買薑磨薑汁畀我沖水飲,暖身。內外都可恒氣活血。有屁。

29/11/2023

近期比較開心的事:我的中學同學11月全個月去咗日本,因為佢11月生日前我有問佢幾時方便食飯。佢話等佢12月返港先。佢...成個行程一路影啲好靚嘅相畀我update住。❤❤❤❤❤。

老公28日話下年想同我去日本。

29日重有體力可以上網兌日Yen,趁"抵"換定先囉。

(又有入吓貨~股)

嗰幾日已開始瀏覽不同食嚐舖頭。

30/11/2023

佢買蔗汁畀我飲。之後飲椰青水~好口渴。

今次完全冇守復食原則,過程大部份時間都夠精神,總之冇唔舒服冇掛掉。

期間:

不時有胃痛、畏冷、頸膊酸痛。

排到啡啫喱狀物同清到啲對身體有害的液體。

今日笑得出~

頸肩舒緩了好多~

見到網友們仍常來探我才有動力寫這篇。

 

戴勝

一只在香港很常見的🐦。

動作好快架。

據小石人講,隻雀仔都唔驚人。

然而,一大堆攝友嚇到佢要上樹。

人類,有時啲行為好得人驚。。。

陌生人上鏡😄,老公呢幅捕捉得好好。

週六,佢友約好早呀。去到冇幾耐,佢就msg我話返嚟同我食早餐。

咦,你唔同大隻佬(佢友)一齊食嘢傾吓偈?

原來去到拍咗兩嘢佢友就走了~要去拜山。

過去一星期,最開心的一天係~小石人被指派到隔離座樓度做工程。早上可以瞓晏啲,回家攞工具方便。重可以食老婆預備的愛❤午餐。似以前人去耕田,間屋就喺田邊,慳返好多上班車程同時間。

佢呢間公司,3個老闆合資。

其中一啲老闆對員工幾好架。

記憶中以前啲上司老闆,工程地點越近你家就越唔會編畀你做。硬係將員工互相調派去老遠返工促進公共交通工具流量。

小石人話成間公司,佢開工日數最少,幾好丫,週六日休息吓。趁有精力時預留多啲時間畀自己同陪家人。

前嗰排佢公司請食飯,個老闆重畀咗幾個日期亞小石人揀。對老公十分尊重。席間,有位同事的言論,事後畀老板背後話嗰個人"包拗頸"。似乎呢個人犯咗職場大忌,做人,在某啲人面前某啲場合中更要謹言慎行會好啲。

 

睦鄰

 出前一丁送的動漫咭,唔知有乜用,夾硬要嚟掃刮清理吓亞FA~留喺窗台的瓜子殼。而家佢唔係好鍾意去廳窗台--咭s冇用。

前兩日,兩口子食緊嘢時,聽到門外有啲鑽聲,老公去看過究竟,原來對面乜生喺度開鎖。初先小石人諗住自己唔識開鎖,幫唔到忙就唔好多事。過一陣佢開度門睇吓。乜生就問小石人有冇架生。

前言:呢位年紀有返咁上下的乜生重有揸夜更的士,多年前跟小石人同lift時,佢問小石人係咪三拾幾,小石人話唔止lu,四拾幾了。咁乜生就冇出聲了。

(估:乜生想招小石人做女婿卦,但知道同佢個女年紀相差太遠,就作罷。

Cool:好彩啫😁)

上年乜生有搵小石人幫忙檢查吓佢家中一樣重要東西,事關佢搵過商舖報價,據說啲商舖睇位收幾舊,問咗維修報價大約幾仟蚊。

小石人幫佢代為買材料兼維修,只需畀料錢實報實銷。

之後,乜太有日撳我哋家門鈴,送咗佢朋友種的耕菜同一啲新年炸物答謝。

場景回轉返小石人除咗攞架生畀乜生之外,又幫手拆鎖。個鎖拆到甩皮甩骨都開唔到度大門。

小石人回到家中,我問佢係咪珠鎖。係~就好辦了,整到的機會高好多。

到小石人第二次再回家時。我話不如搵咭涉門邊擦刮開鎖舌。心意雙通,老公今次就係搵呢樣嘢。

咪用得著囉~~⬆事後老公提咗兩次,我哋應該一人放一張呢啲咭喺銀包。

(以前我有個同事有幽閉恐懼症,又係被珠鎖反鎖喺公司厠所入面。尤幸當時度厠所門下方有百頁窗,我可以伸手指畀個同事見到我隻手令佢個心定好多。最後都係用呢招膠咭攪掂。)

第二日,又有人撳我哋屋企鐘仔。

佢去開門之前我同老公講:我估係乜太。

好彩嗰晚浸咗豆之後冇煲糖水啫。

覺得小石人好好心地。

有次我哋郊遊燒野食時,管理處來電話有個亞伯跌咗件衫落我哋當時住處窗外。返到去見到窗外有魚絲釣咗個鈎落嚟~亞伯真係好鍾意件多袋背心🐸,小石人為免亞伯成晚瞓唔著,即時到戶送返畀亞伯,從面容看係非常感激。

論盡教父

 

Happy Friday😎😊

頭先條片出唔到,而家得喇,再嚟睇。

物·事·人

舊同學"畫家",幾拾年前幾個核心會面友人應邀到訪佢家,當日佢開心,畀我哋每人揀一幅佢當係命根畫作。Cool揀咗香港公園。

同九公係同期一對畫作,佢知我想集一套,但佢一路都冇畀我,大概呢一兩年,佢發現九公已爛,咁佢有次話親手托裱完畀我。佢終於諗通咗,畫咗咁多,放喺度有啲已經不起年月洗禮。與其漚爛,不如畀個適合又善待佢畫作嘅人。

講起自己托裱底,我諗佢好proud of自己呢方面瓣瓣皆能。畫展係一手一腳托好啲畫去展覽。

然而,當我同小石人攞幅九公畫去裱時,就畀個老闆鵝咗好多次:"唔好自己整丫嘛,畀師父話,同破壞咗幅畫。"佢叨嘮咗N次後,我忍唔住話畀佢知,幅畫係佢嘅,爛咗,佢要自己裱咗先畀我,我控制唔到,而且佢畀咗第一幅,要過咗幾拾年先畀埋呢幅我,我重可以講乜嘢。"

我當然唔會再提返裱畫事畀"畫家"知,無謂傷人心。

 好多好多年前(幾拾年前喎),讀ptdr時認識的同學。全班幾拾人到現在我真係唔記得大大部份,提起個名都諗唔返起個樣。

呢一兩年,有人發起舉行聚會,Cool核心仍會見面的幾位中當中"畫家"係會參加的。

相信發起人,有人梗係好想見我哋某啲唔露面的人。不厭其煩地托"畫家"通知我哋新近聚會資訊。同類聚會及邀請已經是第三至四次了,今次有幾個時間揀又趨說我們要珍惜。

我唔記得有冇曾經喺呢度講過以下的想法,有都至多係講過一次。

(點解近期經常會提住有冇講過?因為唔想重覆又重覆的不自覺。理想是一次起兩次止,如果做到的話。)

這是我的想法亦已告訴"畫家"多次:"如果係有心繼續做朋友的,也不會等到幾拾年後先聚會喇"

以下心想冇畫公仔出腸內臟:去到聚會講乜呢?對我嚟講呢啲聚會意義全無。我唔想去啲地方要整場擺出江湖笑~cat smile。

老實講,而家就算係核心嗰幾位舊同學,我已經發覺好耐,多過兩至3個人以上,個個年紀有返咁上下,係非常唔專注集中地聽別人們的說話。好多時嘅話題講咗兩句,聽嗰個就會顧住發表自己的偉論,根住原先想講嗰個就係儍仔咁自己口噏噏,越嚟越細聲,根住無癮收聲。(自己試過呢種難受的感覺,我會⬇)

留意住有人有話未講完,到靜咗時就會再問返嗰個人繼續未完的說話。

今次Whatapp又嚟告知大圍聚會時,暫時我一直都冇覆。明知來人係信鴿,但我真係已經表明咗3~4次了。再講我已失去耐性(有時人會語氣唔好,咪係呢啲位)。要講幾多次先聽得明?

別人來說的小事,有啲位我係挖得好入的。鑽緊牛角。一句唔去咪得囉想咁Q多做乜諗。呢個世界就係有我呢種人。試圖明白自己行為上的原因、理念、意義。

核心會見面的,就算有位今次移民美國後將首次回港。我都冇乜興趣外出飯聚。從中自己思想上又發生咗一些微妙變化,人真係好複雜。當然又係喺聚會中觀察到一啲舉動反應說話可能的含意(自我主觀解讀)。

傾談、見面,可能唔係內容,係相聚時的感覺。8/2,當諗起嗰個人/隻雀,有八成係美好感覺同回憶時,繼續下去的動力又大大增加了。

當每次提起想起嗰個人時,多數係不愉快感覺和往事時,我諗係趁關係未惡化到老死不相往來前疏遠,起碼唔會擘面收場,而有的結束又可能係無可避免,一句說話即散的有;日積月累咗好多不滿突然出導火線又有。

現時處理尚待改進嘅人~Cool,咪就係要諗吓因由去脈。

不卑不亢,發覺圈子內不是平等位置,而係位於次等時,真係要考慮離群。

唔好咁熟,保持健康界線,可能係免受傷害的做法。

不過,通常最傷到一個人的,係身邊最信任的人。家人,冇得揀;伴侶,報恩雪怨攞債還債。。。。

觀天文

今晚小石人發現月亮下那顆好光的星星,原來有4粒"東西"成一直線。

 

金星(紅圈)

有個鍾意影嘢嘅伴侶,呢個blog似係佢嘅,漆黑黑的天空,有趣的宇宙。

追悅

今晚位置同影到的顏色重正。

 今年月亮特別靚。

昨晚發現時,本來月前有欄杆,點知佢預備好器材後就爬昇成⬇

昨晚

今晚

冇嘢值得All in

買女人貼身衣物送的,嗰排睇好多野外Solo視頻。

 每逢發生剝花生事件,就係啲網絡發報者、傳播媒體擸高衫袖磨拳擦掌加燃料令個火燒得更加旺時。

有冇去返一些源頭調查吓。

近期單嘢,有人留意到間"公司"網頁聯絡方法係Gmail,真正公司多數會登記專屬電子郵件賬號,尤其"跨國"企業。

有冇負責人資料。少。

睇咁多唔同渠道,有人搵到資料當中只得一個人的"實名"出現過一次。

宣傳攻略揼本。

攪好多大型活動,又牽涉有啲城中有知名度的人。

誤導的公司名稱。

佈局集團(可能只是幾個主腦),一有唔對路就改名。

設法跟不同而又真正做生意的上巿公司扯上關係。

事發呢啲上巿公司做法係立即劃清界線。

而當香港開始有(火羅)味時,台灣(成幢租用寫字樓)、星加坡的辦公地址就火箭速人去留空淨返啲塵。

而香港的疑似"艇仔"s,男的重叫人唔好報警、女的撐到恒鬧爆。

唔通佢哋真心認為呢門"生意"係確信的殷實無呃人?

讀得書多學歷高同會唔會受騙似乎沒有關連。

係律師做生意前對"合作伙伴"背境有幾熟悉?佢哋呢個界別的專業咪係要attention to details。

由富袋攞錢出嚟前只是想著利潤還是有諗吓呢件"搵錢"項目實在"太美好"了,好到會唔會係真架。。。

有冇涉及出咗事都唔敢報警的呢,顏色錢唔見得光。

發生事後,有啲執人口水尾、標題黨的youtubers,畀兩次機會,如果都係咁,之後一見loop出嚟就被Cool即刪。

又進一步深化唔好貪心的信念。

冇嘢值得All in!

以上都是看完視頻s、報導得嚟的幾手後資訊,唔可以盡信。不能保證該些資料是真的。

唔好貪心就係真嘅。

慳時間·留嚟做喜歡事

 記憶中提過一次,我哋係融洽地處理家務事(大部份佢做😁😄)。

唔趕嘅,有能量做就做,唔做就由佢。

呢輪一齊睇吓煮嘢食視頻,佢似乎開始有啲興趣煮餸仔(我哋好少食飯,屋企亦冇電飯煲)。

近期煮餸時佢有問我使唔使幫手。

以前,煮嘢有好多步驟諗(唔識同未建立到系統),,煮食用具唔似而家咁方便先進夠使(中三時完全唔識,放學後需要煮飯,買餸、用火水爐+一個爐頭整2餸1湯,整得好慢),,,

人大咗有段時間,操刀煮嘢時別人唔敢埋身,因為面口唔好睇又比較忟憎。而家留意到有呢種情況加之做得多咗純熟啲,煮少少嘢,冇咁大脾氣。(拍拖同新婚時面容會好好多。)

是以,有些情況下,有冇人幫妳係自己造成。

我攞住刀佢敢行埋嚟,感情好好。。。

單操(一個人整)保持一隻手係乾同乾淨(講過),做定啲乾手時處理的步驟:預備醬汁,放定啲鹽抹蒸魚身,放定啲抹紙吸魚同蠔生料的多餘水份。就唔使手經常濕立立再掂啲物件,尤其是要乾身儲存物。

<以前有個有錢親戚問我啲魚點樣處理先唔水撈撈,佢哋使慣工人所以唔會知呢啲竅門技巧。>

洗蠔有人幫手放粟粉,係順暢好多的。佢想幫手時會自動埋位,好合拍。

昨晚佢第一次溝獻汁,之後老婆煮香茅乾蔥薑蒜蠔(唷,唔記得留份蔥畀呢味添)。蒸魚見過我整,由蒸焗爐攞成品出嚟倒走啲水,好幫得手。

繼續轉變煮嘢時語氣同面口好啲。

有次佢攝錄我處理銀行嘢好專注個樣,Cool睇返。。。吓,覆舟嘴。咁樣落去唔多掂,要改。

正題😁😄

皇宮開完大食會的感覺,就係用洗碗碟機幫輕吓之時,此時不用待何時,機器係要耐唔耐用吓,況且專屬洗碗劑都唔躉得耐,受潮一舊舊。

家居要乾爽乾爽。重要嘅事。

以上內容有啲亂,時序記憶冇乜整理。睇得明,你/妳哋好嘢👍👍👍👍👍

微距影微縮~好戲在後頭

美妙光影
 

好多人,圍住呢件作品,又有個人帶定電筒仔照住打燈嚟影。Cool覺得有啲煩,冇等。

當日原來小石人帶咗兩部相機,一部裝微距鏡,一部影人。寫網誌時問佢,佢解釋完一輪我都唔係好明,大致上係佢部機手持不用打燈都可以有呢個效果。😁

雜貨舖淨係影個招牌、揮春、鐘。意念超可愛。

兩幅合併出來的。人物高度又配合到,絕。呢幅係戲棚內,我諗,未必有人咁影,叻。

啲椅s放喺車架入面冇人敢坐。我行咗入去坐就會有人陸續填滿其他座位架喇。

睇呢類型展覽,兩個人都喜歡的活動~佢問我點知有呢個節目,唔知架,有blog友寫咪知囉。

至10月17日。

同一樣的事物,每個人看到、感受到、聚焦點都不一樣。

嗰個商場高高掛咗隻大恐龍,又攞吓唔同角度,好似隻嘢作勢咬行人個頭。

上二樓龍做背景,Cool扮吓好驚咁。

囡囡行到攰就會有公公、爸爸抱,見到個約5歲嘅小女孩成個人拑住個老豆(卦),扭抱。。。個男人童真的笑容,Cool忍唔住都拍咗。😄