2.7%

又講錢，用口語嚟講，行文流暢，零舍醒神。

政經局勢我唔懂，揾啲識嘅網友啦。

睇下自己盤數，似乎冇乜進賬，但係當瀏覽一啲朋友的記載，今年戰績最多負70贏3個，

咁大上大落真係小啲心血都頂唔順。

有時市況太波動，可能一動不如一靜，唔輸已經好好，

加上如果有粒糖，都好滿足﹗

大茶飯既然冇乜落搭，不如講下實有進賬的利息，同鑽研慳錢的空間。

今日去咗唔同的銀行了解人仔的定期息率，我又發覺一樣嘢，

有時快係未必得更多，好似前嗰排，匯豐新人仔資金話做3%，

第日去到又少咗釐息，好彩又限額收現鈔，於是做咗少少定期。

呢排渣打又發功索新資金，一聽都幾震撼，

五年買股票免佣，真係先聲奪人~~誇啦啦﹗

因為我唔係銀行中人，亦唔會同佢哋宣傳，而且細則都複雜，所以唔會詳細講，大致分兩種：

大額新資金或轉去渣打過戶出糧。

呢個世界永遠都係越富有著數越多。

反觀匯豐，除了一大堆不合理收費外，雖然我細細個已經係佢哋的客戶，

唔捨得獅子紅簿仔，但係確是恨鐵不成鋼。

佢趕走小存戶不特止，連所謂卓越理財的優惠都係對大多數人都冇乜用，

正所謂小恩小惠都唔講得上，但係就要鎖實客戶的大量資金，

送嗰啲所謂禮品，用唔著 ，例如某日資商店『Ｑ』蚌，俾我都唔多想要。

古謙送嘢俾人有個原則，係人哋有用同見到份禮物會好開心。
（但係我送唔起高昂消費品，我啲摯愛親朋都係崇尚簡單是美的心態，禮物有限錢）

渣打就唔同，佢對吸大額資金手段大氣，上年就係半年買股票免佣，存得個額越大現金回贈越多，

重惠及介紹人呢招先高，介紹一個$1,000兩個就$3,000。

不過有一點要記住，啲所謂新資金來來回回，限期限額一過，再另覓出路，

因為唔知渣打又會再出乜嘢新招搶客，咁同一筆資金，過一過塘又可以變做新資金取優惠。

有啲死硬派匯豐擁躉醒下啦，勸極都係揮不去那情意結，

股票手續費真係好貴，而且成日唔聲唔聲就扣客戶錢，

今日先聽到隔離理財櫃枱個男人喺度鬧，另外一個女人又怨取自己外幣存款有限額，攞自己錢多咗又要收費，

而我最近兩次去，都聽到隔離個客鬧啲職員。

我對啲從業員好有禮貌唔係因為我滿意間銀行的政策，

而係我深明員工都只係依照規定履行佢哋嘅工作，鬧佢哋係冇用亦唔應該。

管理財務要花心力同時間，一啲都唔係不勞而獲﹗