幾拾年手製銅器店年終結業

 約兩星期前看視頻知道呢個消息,

就問小石人有冇興趣買返個。

事關此舖附近一間似相當出名的粥舖多年都係向佢哋訂做銅煲整魚粥。皆因銅傳熱快,該粥舖試過其他內地製品都沒有香港老字號做得咁出色。

上星期小石人去開旺角,就趕喺下午6點銅店收舖前去到。點知閘上貼上休息一星期字條,又有另一張紙由一客人貼上搵佢哋修理個煲。

白行。

今個週一小石人致電該店冇人接聽。

今天午間同我通訊時話打通了,亦問咗重有賣畀嗰間粥舖嗰種煲,不過佢哋收下午4點。

咁為有我即時裝身出🐎。

去到該店,只見一個亞伯在替客人修理緊個煲。

於是我問個在店內聽電話的另一個亞伯。

佢哋係兩兄弟。

我:"阻你一陣,想買x記粥舖嗰種銅煲。"

一伯:"冇架喇。"

我:"我哋頭先打過嚟話有,你哋話今日收4點所以我由遠處趕過嚟。"

一伯:"冇架喇。"

只見店內的貨品真的所餘冇幾,有兩位顧客在目視那些東西。

當時我心想什麼大家都應該估到。

"係你哋話有我先趕過嚟。。。"

替客人修理煲的那位亞伯完成手頭工作。

咁我又唔心息又再問此伯一次。

二伯:"有呀。"

<之前應該都係佢接電話了,如果係一伯接小石人的電話,我哋肯定買唔到個煲。>

後記:小石人話接電話答佢的人都有遲疑一陣先答"有"。

佢隨隨由舖面走進內室。出來時手執單柄銅煲。

搵佢修煲嗰位客人好驚訝地說:"乜重有!佢讓畀妳!"

我就速速磅水。

臨走前好似聽到一伯話:"呢個女人好熟面口。"

散戶操作^^

今朝又有魚鱗雲,次次都要飛邊烘底,張相若留返啲建築物會有趣好多。

近水平線見太陽初昇之美,我咁鍾意色彩斑斕,只可同愛伴共享。

是日終於有操作:

沽175 同9988

呢注係上次升咗唔走被套的嗰注。175 $11.×近期呢次係第2次機會,上次係流星般一閃即逝。

再升會唔會揼心口呀?

唔會,想清楚先做,次次都諗嚟諗去咪好唔得閒😆

多啲時間搵吓樂事笑吓好過啦。

我發覺數得埋手指的幾個友人,個個都唔想講多句,覆OK 謝謝

疫情 限制 實在太太太耐了。

我平時都係深居簡出,對我影響唔大,喜交誼的人就疲累鬱鬱然。

所以我呢排網友講一句我答十句,帶返旺呢度個場(笑),出文密啲,開心快遞😉

 

佢唔係one person bird

以前鍾意食提子,呢兩日食半粒就發出不滿的聲音。

唔畀得佢食咁飽。。

曾經好多次食飽咗就fing頭,整到啲生果肉同汁四圍都係。

好憎飲水,之前一見個有水金屬罐時瞳孔立時收細又惡又fing水,可能因為經常飲水時嗆親同埋嘴痕。

我預先輕聲同佢講:"飲少少啦,唔鍾意就唔飲,唔使發出不滿聲音。"

裝少量水在容器內,打斜逐少逐少餵。近期佢仍然飲好少水,好的方面係態度好咗。唔飲就自己行開。

得咗😁

"你要對小石人先生好啲,雙頭🐎車照顧你先隱陣啲。"

我成日陪伴又諗不同活動,帶佢逗留不同景點遊玩睇風景及畀不同物料佢探索,兼只鬧冇罰佢。接受佢發脾氣,嘗試了解和推測背後原因。FA~對我好啲係正常。

因初先佢大大聲狂嗌,小石人有罰過佢,所以佢對小石人唔友善同有戒心。

我跟小石人講,要時間陪伴,例如一齊看風景,令佢習慣主人喺佢附近,喜歡我哋喺佢附近。

而家佢喺窗台,我擺前臂在佢附近,有時會好似小朋友喺遊樂場玩咁,耐唔耐就爬上我手。

有時想獨隻兒,就唔好騷擾佢。

禁區就堅持唔畀佢去。有時佢態度唔好就會嚴厲鬧佢或行開唔理佢一陣。鬧完轉頭佢情緒平靜時就柔聲解釋畀佢知原因。😄

如果佢上咗手突然磨嘴發脾氣,就要安靜地將佢甩離開手,唔好即時鬧。好早前試過瀨嘢,畀佢擔住前臂整到我瘀咗一大片,其實兩個都好驚。。。

而家,有時佢需要與另一生物親密互動,啃手指吐反芻物,我就放鬆對手滿足佢。。。。太肉緊就要制止。

讓鸚鵡主動來找主人,我做到了。

今個月打颱風當日,亞FA~都有飛上小石人的前臂。咁我提返老公,其實亞FA~對你都好好丫。

老公話:影住佢就唔講,呢段係用窗簾半遮個電話拍的。

尋日老公同影友去鳥攝,畀啲朋友睇,大家一齊開心笑。

自從FA~嚟咗我哋度,真係多咗好多樂趣,動多咗腦筋去佈局乃至處理唔同事情。
 

最有價值家庭成員生辰

佢話請一日假,我話請夠兩日連放三日。

老公今早到街巿買料等我煲湯畀佢飲。

畀某人知道你唔係等住份工啲糧開飯都好。。。佢話冇咁諗,只是呢度街巿,放工後啲湯料販已收檔。

我小器啲,我係咁諗。😋

食完早餐歇一陣就開始每種料用薑蔥汆水。煲煲煲煲煲。

用消費券買的急凍翅解凍再放入蒸焗爐兩個鐘。未夠腍,就用上湯餵多大半小時。

老公曾同我講話用濃湯寶😵

今朝至下午傾咗好耐偈。

人 營營役役 係需要畀時間自己休息 沉澱思緒,將唔舒服的感覺認清楚兼表達。每次放下唱針,講完諗完有正面訊息方為舒緩心中鬱結之上上策。理想的狀況是不要留於每次想起都給自己二度三度輪迴度的傷害。<買賣股票輸咗錢同理>

當在提起某件覺得不悅事情時,像訴說別人的故事~就成功喇。

恭喜晒😄

前幾日 佢返工,我哋午間通訊時,送咗呢個gif畀佢,而家不同地方啲管工變晒雞窺蛇咁監察著。

夫妻經常互相扶持 心靈伴侶 夫復何求。

0.78磅 $692.6 我哋分兩次食,買的當日間店舖做緊優惠,購1000蚊Q蚌實畀$900,即時可用此特惠無需等下次幫襯先得。

 

3個人都要咁

 老公買給晚間仍睇嘢聽嘢的人用的。~無線耳筒~

* *

話說小石人在家中主理裝修事宜到接近尾聲時,就有位工作上識咗好耐的P君串針引線同佢老闆提起小石人可到職工作,嗰間公司有三個老闆,其中兩個當小石人喺Y舊公司做科文時有跟過佢。呢兩個人又曾喺某間世襲下一代的公司做咗好耐,後來因頂唔順啲老細s的做事作風而另起爐灶L公司。咁橋小石人在上一年有喺世襲公司服務過,間公司最尾幾個月重拖欠薪金,又細眉細眼地一粒普通零件都計嚟計去,叫料又唔足,做成工程經常是工人等物資而企晒喺度,本身人工就係咁嘥法。嗰啲領兵嘅科文,冇料兼忌才。

初期,小石人在呢間L公司做得好開心,兩個老闆都對佢客氣又尊重。雖然,呢間公司規模小,有時投標接唔到新項目前,佢哋都會盡力畀其他嘢做留住小石人。

後期未開到工程都有禮貌地叫小石人休息。

咁老公悠閒地過咗差不多一個月。

世襲公司內一位友人又向小石人招手,與此同時L公司又叫定小石人開工,好似係待有新工程就由佢主理該項目怕卦。

老公比較喜歡L公司,亦唔計較佢日薪比同行畀得少,最重要是工作開心。

如上,佢哋未接到新工程架,就安排小石人跟P喺某地盤開工。初先都有講有笑。到亞P前嗰排請咗兩日假同佢老婆行山,佢同小石人講,P休息期間,問另外一個散工每天做什麼工作就得。

到P放假當天,那個散工其實都唔係好知要分配乜嘢工作。及後P放假後中咗招,要在家休息等回陰,工作仍是由該散工分配。

到P痊癒復工,小石人問P當天工作安排時,佢又係叫小石人問嗰個散工。

又係一啲人搵每日做乜的工程。有次小石人話搵個散工問下下樣做乜時,呢個亞P又話:"問我都得"

最奇怪的是。。。。亞P問小石人點解唔講嘢,係咪同老婆嗌咗交。

小石人:"梗係唔係啦。"

昨天,該散工同小石人講,叫小石人跟某樣嘢時要搵埋佢一齊處理。

P又同小石人講:"我當你係自己人架。"

!!!!!!

佢哋呢間公司喺呢單嘢上係得3個員工架咋,重要其中兩個係散工。

主人愛妳·妳愛主人嗎?

下午約4點鐘 佢喜歡倚窗睇風景。你家附近有冇一戶人有隻紅色鸚鵡在對面窗呢?

 研究咗亞FA~九個月,有時佢都仍然會大力咬我的,有時又會忟憎用👄刮紫膠椅。想上我手唔願我離開時又咬實我手指或者用佢爪拑實我啲肉,唔肯放。。痛就梗係痛,尋晚我要用另一隻手掹開佢個口。

無論幾黐纒,都需要自己做好防禦。因為唔知佢幾時心情唔好或突發唔知為乜唔滿意,佢有時自己都唔知自己想點的。

今日好開心,佢識得咁樣😸。。

好不容易·跌到四點

 今日下午突然跌得急成咁。。。

又係要分散注意力的時候了。

唔搏住lu....

*  *  

以下家事,冇興趣睇的讀者s可慳返眼汁。

昨日下午出咗去屯門見吓姨甥女。事關佢Whattapps提到要下次回港先再見到面後加一個扁👄表情符號。似乎又真係好想見吓我。

唔去食肆可以到公園或沙灘相聚。本來諗住整少少嘢畀佢食,後來因為提早咗日子見,我未夠體力攪咁多嘢,加之見面當朝佢住緊的地方又係要強檢。同樣問題問返我會唔會繼續見?

我平日都是自己在家,我哋唔驚(受感染)。

1.唔講其他屋企人是非。

2.執返好多佢細個時在我家住時同佢公公 婆婆 我一齊影的相畀返佢。

3.封大利事畀佢。

人,臨死前要處理好的其中一樣嘢,就係自己啲相,呢啲嘢只對自己有"意義"。其他可能有人懷念又另當別論。

唔食嘢啦,高風險感染高危活動。全程兩個人冇接觸兼戴住口罩,我戴埋女超人面罩。

一見到佢時,只見佢不自覺地愁眉深鎖。即時提吓佢,放鬆吓面部表情。

原來有段時間,姨甥女逢星期六日就係以淚洗面,因為湊唔掂個大仔,佢哋亦發現佢個仔唔似其他同齡兒童發展,同佢哋個家庭醫生講,個醫生就係問佢哋係咪懷疑個仔有過度活躍症,又打唔打算食藥(佢哋又唔係醫生點知咁多?)總之問過個家庭醫生幾次,嗰個醫生都冇幫佢哋做轉介進一步了解佢個仔發生乜嘢事。。後來因為要認真處理姨甥女情緒狀況,轉接年初時就發現佢個6歲大仔有自閉症~高效能但社交方面出現唔似普通人的情況。打晒全班同學兼打埋老師。唔識辨別人們的眉頭眼額等。據講,佢哋的行為表現背後是有原因。現時接受言語治療師協助,不是教導講嘢,而是社交訓練。

佢講個仔啲行為,我覺得都同亞FA~似晒。

1.一件事情,教極轉頭都係唔記得同第一次教一樣。

2.唔識拿捏對人的力度。有時大力到可能會整親人。

3.佢個仔會不自覺地笑同好high,但又唔係開心而轉頭就會失控。

我隻雀會"無端端"失控地狂嗌。

唔係講緊笑話。。。

我應對的方法就係不動怒地接受。<前期好似顛婆咁惡同鬧,經過約半年後我諗通咗。勞氣完全冇用。>又會成日好肉麻咁同亞FA~講"主人愛妳"

當然姨甥女的處境係複雜同艱巨好多好多。

傾咗兩個幾鐘,臨道別時佢話相聚時間過得好快。(見佢面容都輕鬆咗啲。)

心中祝福佢一切安好。

後記:小石人工作地點的同事呢兩日相繼確診。好彩老公係帶生果同蛋返工作午餐,避免咗外出午膳受感染的風險。

出擊·啄中就走

前嗰排佢因攝雀鏡頭壞咗,就轉玩微距。金絲貓好多款又靚。

 今日將上次買入的賣清,又鬆走少少蟹貨。

175 2800 7200 7226 9988

結算前抽高轉倉再掟過都有可能。

唔走如又似前一注被套就少咗現金再轉身了。

鬥志/智旺盛中。

換碼 入貨 再撚雀

 ~今朝美景~

忍忍忍忍忍,做其他嘢分散注意力。

上次跌一仟點,入貨,反彈又沽返啲,多咗兩件蟹。。。

又再忍,今日跌一仟點,沽咗啲又入咗啲。

巿況咁差重入,係咪儍架。

低買高賣嘛。

留返幾粒子彈,下個位用。

保持心情開朗先合河車。

斷食~今次只能做7日(更新2)

唔知邊位網友咁有心,翻閱我上年四月的破紀錄斷食網誌。Thx.

我睇返原來同今次的反應大同小異。

Day1(14/10/22) 身體如常,重可以煮晚餐畀老公食。

可以放亞FA~在FA房走動。

我有便便(正)。

Day2 老公問我有冇放亞FA~,我話冇能力處理。

因為要清埋啲菜同餸料,晚上只能完成一半晚餐,其他佢自己攪掂。

攰。

Day3 冇精神,有嗝氣,左面胸口乸得緊。

是日週日,老公放假但約咗雀友去西貢影嘢。

未出門前放咗FA~一陣。

佢同朋友食完晚餐先回家,幾好丫。有自己的活動。

Day4 胃唔舒服,反胃 有痰擁擁貢。今日冇放亞FA~

Day5 唔掂喇,亞FA~唔滿足只是耐唔耐我坐喺佢面前探佢。暴躁 磨👄得厲害 一上唔到我手就行開,嬲。唔開心。養寵物要陪佢,自由度又要看佢表現而定。佢已經好黐我,一放隻手喺佢附近就起腳想上手(玩嘢時除外。)其實呢次斷食就係成日諗吓點安撫佢。好小器架,耐唔理佢可能破壞彼此得來不易建立的感情同信任。

日內有飲兩次青檸汁。

Day6身體反應同上一日差唔多。飲青檸汁。

放咗亞FA~同平時跟牠一起做的活動相約(減少部份次數)佢又笑返。

Day7飲嘢同上。反胃想嘔,7日唔食嘢都有嘢嘔到(泡&痰)。舒服咗好多。

收到二姨甥女Whatapps話由外地返咗香港,佢大概7年前嫁咗外地土生土長的我另一位親戚,在外定居,育有兩兒。老公話她對我幾好,會搵吓我。我:佢細個時我成日同佢幾姊弟玩board game的,有畀時間陪伴。

要提早復食,因佢11月頭走,約咗10月尾見。

復食

Day8今日 鮮菠蘿十片加薑三片,vitamax 打完再隔渣的菠蘿汁,嘩,好好味呀。

今早有便便。

黃昏時份,亞FA~大嗌,我搖緊機,第一次嗌冇理會佢,整慣咗一叫就給關注咁有可能成日嗌唔停。當佢嗌第二次就出去睇吓佢係咪安全。有時條腳鍊會cake實樹枝令佢吋步難行...只見佢爪住鋁窗開關手柄,唔知係咪呼喚緊啲折衷公。見佢安好都在FA~房中坐吓陪佢。

突然,隻嘢大嗌數聲,由窗位置飛起至走廊著地。又急急腳爬上紫膠椅(佢個竇)。飛射啲C落報紙。教佢如厠訓練,第一次見佢主動返指定地點攪掂,真係好叻。

講開飛,佢好似最近先知道自己識得飛咁,平時好似企鵝兼宕蕩咁行,由高櫈落地又咬爪住窗簾。

晚間有新鮮清甜蔗汁。

Day9(22/1022)

          青檸汁

          橙汁

          蔗汁

Day10青檸汁

           蔗汁

           橙汁

           椰青汁

黃昏亞FA~又嗌。

好想食1/6包丁麵。。。。。

Day11凌晨就有陶土色便便,身體感覺舒服。

青檸汁

昨晚小石人回家話我哋幢大厦要進行強檢。咁我當時就立刻告知我姨甥女新消息,請她自行決定月尾重嚟唔嚟探我。

然而,我上網搵咗好耐都唔覺有我哋需要強檢的通告。。。

是日早上我哋去做檢測,途中我又對佢講吓近期喺迪士尼頻道睇的戲。佢對睇戲好揀擇的,差唔多次次我講咗啲劇情畀佢知,再叫佢<試吓啦>佢先睇,甚至有時聽咗冇興趣就唔睇,奇人。

回家後飲咗500ml橙汁。

自己剪頭髮,又幫佢修吓啲秀髮。

一齊睇咗齣驚天動地(Con Air)。

飲蕃菠pink。

開始身痕。

食咗一小碗魚片粥。(今次做唔到斷1復1)

是次深感安裝智能厠板同雨淋撳掣花灑物有所值,好虛弱時仍能不太費力地自行清潔身體。

晚上收到姨甥通知,佢話唔冒險了,因為離回佢家日子好近。

我回:明智決定。

老公話咁咪無端端早咗結束斷食。。

我:就係提早復食今日先落到街做檢測。👍👍👍

 

請問大家飲緊乜水?更新2

FA~個👄靚返好多嘞🍀,新環境需要一輪適應。

事源用開的濾水器陶瓷蕊要更換。

然而呢個濾水器過濾後的水,我唔多願意齋飲的。

現在飲緊蒸餾水又能一日主動飲一杯,因易入口。亞FA~都是較樂意飲蒸餾水。

趁時機到,想問吓大家邊隻濾水器好啲?

用蒸餾水機或樽裝各有利弊,所以想了解咗濾水器先。

30/6 9:35更新

 

30/6 18:23再更新

好嘢,又辦妥一樣。

第二日,PI水系統濾蕊亦要專人上門更換。

執到

 

呢次裝修其中一樣明智決定係冇畀舊有總電掣箱同食水總掣這些原有內藏設施限死。

裝修想用開放式厨房設計卻被近大門口厨房有以上掣的牆令到東西擺位擠迫。因為我喜歡老爺珍而重之的一張傳統舊餐枱,可以由四人枱開展至六人以上的鵝蛋形木製品。還有四張四平八穩的有靠背椅。

佢哋以前用時係次次都包膠枱布開餐,我見到呢張枱時係九成新。我用得好粗,成日包住膠就唔係木枱啦。我哋呢個年紀,唔"真"用重留畀邊個?枱面又花又有印係生活的歲月痕跡。

加之思緒:佢話以為在裝修可以掉之。(其實有時唔太肯定他的心意,或者是他一直就我。),因為最終留下了這張我看見便❤❤眼的"舊"物。

啲椅:用嚟拉筋又得,做運動又得,爬高開氣窗,協助老公師傅mark曬晾杆位等好使好用安心又放心。

好嘞,交代得有點亂。總之為了在厨房放下這張枱,我花了好多腦汁,都諗唔掂,最初想將剛才說的那幅牆拆了移近大門約八吋擴大厨房範圍,玄關位變得窄了(牆的厚度約六吋),兩個人思前想後,叮一聲,既然大費周章起返度牆,不是主力牆,何不將佢拆埋就多咗吋金呎土。

咁我哋需要一度屏風嚟自製玄關同唔好畀人一眼睇通間屋,尤其厨房乃一宅之糧倉。

有諗過用聽講的Gucci玻璃做partition。又有問過當時將移民英國的小石人親戚重要唔要家中印度屏風同防火布藝燈飾。(呢度屏風同盞意大利製造布藝燈係多年前一客戶裝修,不知為何會變咗垃圾將要被揼爛,小石人執到轉送給其親戚的。)

但呢位親戚竟然將呢兩件物品寄埋去英國,可見似乎係好嘢嚟。識就係寶唔識就係草。

我又喺babykingdom見到有人因為移民以六佰蚊急讓一購買價萬多元的手工松鶴日本屏風心頭好,x佳禮券都照殺。咁我又攪一大爛餐登記呢個網站問吓佢賣咗未,當然係人去留空冇覆。

古董買唔起,優雅的又鮮見。瀏覽見到相中物眼前一亮(今次終於幅相貼返篇文)。手工木雕香樟動物花鳥屏風。木雕又可以有復古銅色,襯晒今次裝修的格調。

落單在內地即造。

送貨當日係個網購站主自己送嚟,個樣重開心過我。似係有人欣賞佢眼光卦。在門口拆開包裝物料後,樟香滿溢,好鍾意呀。

跟住佢發現我哋唔係靠牆擺就話有對腳架穩陣啲。因為得我一個人收貨,我話咁你提供腳架資料畀我丈夫。佢問咗幾次,好似意思係買套腳架要同老公商量咗先咁。。。

據報價,腳架同屏風的價錢好似唔多啱比例,咁小石人同我講音響同音響腳情況都一樣。你要配一套有需要的配件就係咁。

仔細觀賞構圖,有成其好事雙雙對對,有蜜運追逐佳偶天成。有荷塘春色四季盆景福鼠吊金錢,賞心悅目。

同前述般,有興趣的是寶,冇興趣的就覺得多條🐟。😄

在家安老

 確係唔太理會幅相夾唔夾所說主題,當時想上邊張咪邊張。冇框~

講起呢件墨魚骨來源,係小石人去西貢碼頭影猛禽時順道買咗隻活墨魚的產物。

呢一點我有諗過唔想打爛FA~的齋砵,然而似乎啲雀仔需要補鈣,就做咗。

正題

點解今次裝修咁落本,原因是我哋有共識之後唔會再做,而我一心諗住家中設施可以方便再老啲,身體機能衰退時,仍然可以在家中生活,唔去院舍過下段人生。

尤其我試過咁多次斷食,好清楚身體極為虛弱時,如厠沖涼都係似登高峰咁難嘅事。

老咗,其中一樣重要一環,係保持身體同衣物清潔。

智能厠板具清洗下身同自動掀蓋功能。應該會好幫得手,減少洗手次數(我掀開厠板後通常會洗一次手),又可舒緩痔瘡不適。

在企缸安裝嵌牆摺櫈+雨淋撳掣花灑,只要坐到埋去就清潔到。年紀大咗腳步不穩時,坐著抹身可減低跌倒風險。

有部份燈是體感開關,方便夜間如厠又免忘記熄燈。

裝修前計劃將所有燈掣降低高度,家中沒有小孩,沒有玩燈掣的情況。點知小石人按我構思重做得盡善盡美,而家直情做到唔使舉手就開關到的高度。適合地方設2ways開關燈掣,上咗床唔使再去門口關燈~正。

遙控開關窗簾,預留咗電掣~真周到👍👍👍👍👍

佢親戚嚟幫手安冷氣時問及點解裝冇軌趟門,小石人答佢方便啲轆轆吓。而家燈掣都方便轆轆吓時伸手可及。加之,我一早諗定家中門同櫃門,用到的都會係趟門裝置,慳位好多。

佢親戚又問點解安智能門鎖,小石人就搬出我同佢講有關網友的情況。一個人在家居有意外,只要提供門鎖密碼就不用消防員破門入屋。之後更換密碼就可以。佢親戚笑稱,第二日老到只有能力用手指按平安鐘個掣。。。

本來小石人佢唔想安智能防盜眼裝置。而我認為我哋已經唔安鐵閘,就要加強阻嚇,防止別人取易不取難。而且住我哋對面嗰家人有大耳窿追數,佢哋安咗個監察鏡頭喺門口。我哋都要加強保安。個木工師傅話點解防盜眼開得咁低😄。小石人心諗唔係開畀你睇,係照我老婆高度㗎嘛。事實係我開始骨質疏鬆越嚟越矮,這個是自然現象(裝修好之後真係要啲起心肝做運動)。

近期搭(車立)遇見對面嗰兩公婆,男的問我係咪唔裝鐵閘,我話係呀,唔想嘈到鄰居。(其實間屋苑住戶啲閘門開關就好似舊式路軌火車般嘈得好交關-我覺得好煩,重要戶戶都係咁。。)

門鐘,未裝修前喺房係聽唔到門鐘聲的,叫咗🍕就要開咗房門留心住。而且我聽覺走下坡,所以千叮萬囑佢要喺房安多個門鈴。第二日到我完全聽唔到如還有些少視力,就將門鈴換燈泡,咁樣人哋撳鐘我就睇到著燈。

晾乾衫後最好唔使摺,原衣架掛入衣櫃,收納方法要諗計唔使換季。衣帽間地方擺唔到咁大個衣櫃,我會進一步減少自己物品。仍有能力前處理好自己的東西。。。

我哋好幸運,從冇為洗碗事宜你推我唔做(基本上兩個一齊食完嘢啲碗佢洗😆)。不過,設咗洗碗機就可慳返好多時間,而家食完晚餐都想hea吓。本來會安埋化骨龍減低垃圾量,又慳啲垃圾徵收費。取捨下,而家個大型洗碗鋅盆多功能然而個去水位係方形安唔到化骨龍,真係可惜。小石人話再睇吓個去水位拆唔拆得考量吓安唔安到。

淨係佢先攪到咁嘅陣容,啲師傅大部份係佢工作上累積的人脈,合作無間知道嗰啲人手藝功架先搵。

黃金花大酒店Penelope Wilton所演角色,經常向丈夫抱怨,她不想住在有扶手的家居,似乎佢接受唔到日漸衰老的情況。

呢個現象係必然,視力 聽力 語言 活動能力 身體機能 智力 腦筋 記憶退化,能做的是想清楚自己想怎樣適應 接受 和預先規劃,有尊嚴地與配偶攜手繼續走完這段風光。

個個都要現金

 今年見面紀念日改為跟進裝修清潔事宜。

無錯,而家陳述事情越嚟越雜亂沒條理。

好聽啲就係多元化,儲得多啲餡先包餃子。

在租短期約時,我縱觀附近地產,主觀認為嗰啲x原美x沒有細舖業主緣咁多。嗰個地產老闆one man band,我入去佢間舖仔時,根本唔想so我。後來知道我哋有自己物業先態度好少少。我未見過一個人經常如此吹噓佢有物業同呢間舖已買咗嚟做生意。由於上述原因:我覺得佢有短期租約業主源,所以我忍佢。

佢就係推介咗啲我用唔著的盤。古某一早諗定自己的目標要求所以畀佢好清晰指示。

過咗一排,佢再打畀我話有個合適的。所以就算租期一定跨農曆年,我都會租,因為好難遇到咁符合條件的。

見到業主當日,我同業主閒談講吓舊曆新年假期裝修工人休長假所以比原定租多一個月,未講完句說話呢個地產代理就插👄話呢啲唔使講咁多(咁無禮貌都做得出)。

先畀兩個月上期,一個月按金,收樓時四個月租金(按金扣返一個月),業主全部都話要現金,租約前付全數。

註:我真係冇佢咁on車,攞幾萬蚊現金未交到佢手如果畀人老笠咗邊個可憐我。於是堅持要畀票佢。

嗱,個地產為咗做到單生意,就話收樓前幾日我攞票去地產,佢幫業主入票,收到錢先交樓,當時業主冇異議。訂金都係收咗支票。

到收樓前幾日,我照商討方案搵個地產,條友又唔應whatapp,古某留言同佢講,"幾時方便可以答聲嗎?"

之後先答我。

佢唔知係咪特登喺業主到佢舖時,當業主發牢騷暗中用電話畀我聽到佢哋對話。

內容:業主又返返轉頭話我只肯畀票唔畀現金。地產就答佢唔係個個好似你咁架嘛。(咁耐淨係幫個租客出過呢次聲,兩邊佢都收佣喎。雖然我明白業主係佢老主顧同長做長有,又畀現金😝)

註:之前講好咗咕喎!!!

咁另外一把男人聲,似係業主嗰面的人,就和顏悅色地分析畀業主(女人)聽,而家早幾日入票,到時過到數先交樓係夠時間。

及後~

個地產通知我交票畀業主時,呢條友又話佢啲佣金要收現金,我話諗住都係畀票,佢就當我乜都唔識嘅咁對我話:"而家嗰幾仟蚊,個個都係畀現金架喇。"

講到我出支票係好無知咁。

唔通我又大返佢,同佢講我之前租過咁多次樓畀人都係支票交收,佣金唔係用現金,大地產公司歡迎客人畀支票有根有蔃咩。

咁我冇出聲離開佢舖頭。

交樓當日,佢收佣金時,我請老公畀錢條友,因我都唔想同佢有乜接觸。呢個地產又詐詐帝帝唔畀收據,我當然唔會就咁算,就問佢攞。

嗱,即時可以喺櫃桶攞到張收據出嚟,搏我唔問就唔畀,呢啲咁嘅人。。。

住落咗之後,因為物資延誤要續租,咁個業主就話畀票佢的方法時,我主動講:"而家入票好麻煩,因為疫情啲銀行冇開亦隨時唔開,不如我轉數畀妳。"

呢次裝修期係7個月,各樣都係要有耐性同銀根充裕方能完成。

有賣有買

呢個網誌自從我識咗小石人之後就多咗唔同嘢寫。。。寫佢啲興趣 玩物。😄

前嗰排去米兄同無忌兄雅誌留言,系統成日都話發生錯誤留唔到。唔得我就唔重覆又重覆了,用乜易得返變咗發神經咁五 六個紀錄。

6月7日$355.6賣咗 100股趕交所lu.事關譚生成日話每日成交低唔值呢個價(佢成交幾多先值乜價我真係唔識計喎)。又睇咗亞豬視頻好清楚咁告知有關鎳爆升時LME取消某些交易畀苦主入稟告佢,如勝訴可能港交要賠償,視頻表示巿場對該消息沒有太大反應。我都照賣咗lu。呢刻冇反應,到想做低個價時就鋪天蓋地,其實好多時任有心人噏而帶方向。

今日回補一注之前賣咗941同部份386作價分別$49.3同埋$3.67。通常啲人猛咁叫人買,就係好消息派貨。有啲散戶重話今次中移唔會賺息蝕價,點知又逃不開魔咒。有一次小石人話5拾幾蚊冇賣跌返去4拾幾,😊真係估唔到咕喎。有啲情況係賣晒升翻天個個有經驗的我等都試唔少。揸住唔放上落巿時要有超強心理質素。密食雞糊到佢火箭升空又追唔返。好難捉摸。。。。

打開佢強積金賬戶,呢次都打理得幾好,出出入入之餘,決定繼續留返1/3香港指數追蹤,其他伺機撲殺。

好早前做落的期權,巴巴今個月應該要$14×接貨,恒安$40都多數要接。銀娛$32怕且唔使接卦。

佢呢排多返品茶,唔同年份的藏茶。我又係唔識~糊裡糊塗有得飲,呢啲係佢十年的結果,我嘅情形就完美展示咗食幾多著幾多皆有定數。

佢話相中嗰餅係睇住師傅人手用石磨示範壓製~所以佢唔捨得飲住,咁就試機製嗰啲先啦。

 

沽

呢排發覺又係集中唔到精神睇文。以前覺得自己懶,而家知道逼唔嚟就唔好內心自責。理解唔到的就搵啲自己好似明白的著手。

上一輪有兩次機會。。空想了,冇做買賣,因為猶豫,既然有咁嘅情況就隨心地什麼也不動了。如果執行了,結果不是預期,短期巿的上上落落就不要後悔。係要咁樣先至做到情緒不受股價干擾。略估算,八成做到啦(越來越唔記得都有其好處)。

對待忘記的方法是由心而發地做每件事,誠實對別人和自己,就不怕前言不對,表裡不一。

今日又有執行力去處理買賣了。

沽咗9988 $94.35

        7200$5.415

        175 $14.7

       7226$1.632

又轉返部份小石人MPF由追蹤香港指數到保守。

上落巿,呢啲動作未必有好多次機會。嚟緊如有大插插就大注啲買入,忍忍忍忍忍買咗唔放。

睇譚生視頻,佢有做股票累積沽空紀錄。隻招行係好長時間的累積沽空榜首,而之前又不斷升。可見大戶的耐性非比尋常,而且縱然一路沽空又唔代表會短期內跌。反之亦然,見到騰訊升又唔使開心得太早,托高嚟沽係周時發生的。器材 知識 資金 工具 耐性等等都完全落後,咁有乜嘢資格論贏。

咁又點解重要買?

因為一個香甜的芒果,之前十蚊大大個,而家已經要廿幾蚊了。

在電視劇鬼吹燈怒晴湘西,紅姑娘話入咗寶山損兵折將空手回很不甘心。老洋人答,係咁架啦。(因為佢哋搬山一族尋找雮塵珠上千年次次都搵唔到。)

點解重要搵,因為佢哋族人一日唔用該珠解咒,個個都英年早逝至將近滅族。。。。

咁我哋開開心心繼續耐心地等"""買 or賣"""""

 

今日入貨

 無出街,摷返以前自己一個去郊遊影的相片。

上次跌到一萬捌仟幾,之後V大反彈。看人寫的 聽視頻,就係有啲人話自己無"最低位"入港股掃貨,嗌笨。

事後同小石人閒談,佢話雖然佢唔識但係好驚。咁驚我第日都係略略同佢提吓算喇。

我有執行底位入反彈放貨的諗法。忍忍忍咗咁耐,今日又再出手了,分別入返部份之前放咗的阿里實股。。。(另外,做落的3張未到期遠期期權重係輸緊。接咗一張好早前做的$185。一路碌落嚟逐少買實股。上次試圖在$8X至約$10X位出入拉低吓平均價。又T咗一次)今次入咗再賣唔賣住就未定。

放咗啲千年7568$17.35。據講大戶係好容易睇到呢啲倉位。個人覺得另外一樣考量的係隔山買,美股我哋凌晨時跌到翻天都賣唔到,尾巿由跌至升,做完一輪大龍鳳都唔關我哋事咁。反而前嗰輪把心一橫換咗啲美元買Sdow有啲進賬,但我唔會淨係講自己贏嗰個倉😆(三兄弟出的文娛樂性豐富,真係學到好多嘢)。拉勻都係要繼續諗計追返條數。。。

10/05/2022 銀行戶口入9988 $85

今次冇攪盈富轉咗入7200 $4.52

褲圖入7226 $1.246(有一少注$3.X,上次喺低位拉平均價一次)

             175 $11.2(呢隻都可以呀,出入位拿捏得幾好。)

            2018 $16.7(同上,賣咗而家又入返)

褲記認購綠色債券好多優惠,所以我同老公的戶口各認購5萬鎖咗部份資金。又唔想繼續入太多$去褲。幾窟又發揮佢作用的時候了。

其他較早前放咗的中移動 中石化同中銀,都要耐心啲等位入返。

今日又入返老公戶口MPF的第二注。

自己個強逼金戶口銀碼很少,留待若再插深啲先入埋尾注。

查實有啲股票已經跌到同上次痕指萬捌差唔多甚至更低。

大致想講的係咁,下面盞燈唔知係咪我。😁

登堂入室·電動床

貓,呢啲係整咗出嚟嘅效果。

今日又要上去接應地毡送貨員,心血來潮不如影吓畀大家睇吓。呢度,老公諗住整暗門,鐵骨上會安返石膏板。揀西班牙女郎色系漆油~蕃茄/辣椒紅色,夠唔夠辛辣刺激😆😄

傳說中的巴士摺門。用三摺門較厚身,物料方面老公都度咗諗咗好耐。上面有趟氣窗,係咪好通爽特式呢。原本只兩公婆呢度門都可以唔整。但萬一有稀客到訪,人哋閂咗廳同中庭之間的門,咁我哋咪入唔到自己房😄😅。如果我哋喺房,出嚟咪行唔通,+上厠所始終有穢氣,擋擋遮遮好啲。

諗嚟諗去亞FA~多數都係長駐中庭衣帽間,事關有多度門隔音,佢嗌破喉嚨都唔會嘈到鄰居,嘿嘿嘿。

呢兩日我隻鸚鵡先多次輸出100分貝以上雄壯鸚聲,我聾聾哋仍感到耳膜震痛。而且煮嘢食而家成日都要就住佢厨房出入關門同有時熄機,電水煲聲 抽油煙機 焗爐都會刺激到佢。連老公吹頭FA~都嗌,遷就到老公對佢都🔥🔥哋。我哋食嘢佢有時又拍晒翼刮起巨風,以前唔知係咪皇帝旁邊潑扇宮女?好似試圖將張椅爪飛離地。(house of the dead其中一個boss?暴風女?)如果得就係一項壯舉(所以老公擺咗個8~9磅大鐵鎚穩住張椅。

言歸家居,家中各處採光度都變得好好。

有次入主人房,3幅昨日再見色系牆+一幅較深色的橙花油,覺得入面好似發光咁,咁橋又襯晒條雲石晚霞紅。而家啲漆油溝出嚟可以玩色系配襯特色牆,正。睇到家中的牆漆似剝殼雞蛋咁滑一滑好開心,個師傅又係小石人識得同好有心機做。有日個漆師父(唔係"師父愛你"嗰個)話佢老豆屋企有嘢要緊急維修,咁當然要畀人做咗緊急事的。

第二部份

電(動)床我想咗好耐,人體工學背靠坐喺床上睇電視舒服過以前碧麗宮睇Gone with the wind.幾年前睇嗰時有折。後來情緒病 老公重返緊工 ,好彩思前想後咁耐先實行,因為嗰時窗外景觀優美,諗住將傢俬床舖升高睇景,但要解決好多問題(因為又係話唔畀改長啲窗)。

而家已經冇咗個靚景,回想嘆慢版都有其好處,好多嘢就是不能強求。

現時個主人房佈局精心。最主要老公睇芒時我坐喺床上可以見住佢。以前擺位就淨係見住佢背影。

發覺佢只能在現在睡處坐好短時間,因為實在唔舒服。希望第二日多啲佢有興趣嘅影片可以一齊溫馨電影欣賞。

呢間賣床的,哈,而家又有折。詢問過現時正席裝修,唔知佢折扣到幾時?(每張慳返幾仟蚊)。咁個負責人話可以落訂,要送貨時才通知。

我想講嘅係佢哋啲女職員:

我轉數落咗訂,第一個女仔,一打嚟覆單就唔識讀我個姓(英文)~(唔緊要),講咗中文畀佢知之後,

佢竟然話:"你係咪串錯咗,我幫妳改返。"

我:"呢個係我個姓氏,我唔會寫錯的!"

跟住佢又問我幾時可以送貨。

(我心諗,亞小姐,開首就已經同你哋負責人問清楚講清楚我嘅狀況。)

我答:落訂前已同你哋講過我的情況,喺落訂過數備註亦寫咗我正席裝修,裝修好再通知你哋。

(我心諗:重問)。

好嘞,過一排,另一個女人又打嚟。又係問我啲床幾時送貨。

我儘量保持平和,

答:"已經告訴你們我哋裝修緊,而家疫情關係樣樣延誤,未知幾時。"

佢:"我明白,唔知4月尾送到未呢?"

我:"咁上海幾時開到關,我啲櫃啲物料喺嗰度訂,佢幾時開到,我話到畀你知。"

佢:"冇,因為已預留咗你訂的床,有人而家訂貨,我哋5月中再返貨,想問幾時要貨同可唔可以畀咗佢哋先。"

我:"我都唔想咁,但妳一方面話明,一方面就重覆不停問我幾時可以送貨(乾笑兩聲),我真係答唔到你!"已經講咗好多次畀妳知喇。

收線後,老公話好彩係老婆接呢個電話,而家樣樣都延誤晒,人心情又唔好。

我:"最好畀個電話亞FA~答佢囉。"

鸚鵡會講:"好丫。。。FA~.....kakaka(笑袋笑聲)"

 

T

 新買Tshirt我哋都會選購快乾透氣衣物。綿質索汗,久而久之啲汗臭蝕咗入衣料內,浸洗消毒反覆煎煮清洗都甩唔到浸味。物盡其用的我會剪咗佢嚟抹地。

昨日放工佢去買衫,佢似乎都習慣咗會問吓我揀乜嘢色。事關以前佢多數係灰黑藍綠,自從識咗我佢就被轉化為著多啲色彩的衫。橙色紅色😮。著咗上去試吓先啦。

其實呢3隻色買兩件,都問,咪佢以前揀嘅色(呢句心諗)。我又大條道理咁答,而家你已有件還算新淨的灰色,鬆出嚟開工的是藍色同綠色。

佢十一月生日,我話我送畀老公的生日🎁。實用 有需要 自己揀 鍾意的,唔使理係咪正日,幾好。

前嗰排放晒啲阿里巴巴正股,伺低吸納,呢個過程覺得有少少壓力,佢係慢慢回落,我貪心想等低啲,同希望4月結算會插多一嘢。

調整心態,發覺自己無論點都要在相對低位入返啲。因為完全唔買,一抽高我知自己會好唔開心。

27/4 84.5買

29/4 102.2沽

叫做再追返啲。

好多隻都有排追,下風牌。耐性兼檢視自己心理狀況,有壓力就試圖搵吓來源制定和執行然後解決佢。

大巿跌冇人講到答案畀另一個人知喇。睇人操作都唔係辦法,人人揸住副牌唔同,櫃桶籌碼數量不一。

好網友會睇吓我的狀況,呢度啲嘢參考價值不大。

成熟的人,買乜做乜都有經過思考,用心睇過別人的網誌可窺一二。作為觀察者我就選擇唔置喙。

人哋講嘅嘢,有冇試過 做過?冇,咁有乜好畀意見。有,對方想交流傾得開心咪爹吓。對方一路唔答,自己又要大方識趣。

以上全部講我自己。

兩間鋁店都攞到我哋嘅感謝金

以上對話係小石人轉寄畀我的,所以對答冇分人物。小石人個a/c同吊趟門及浴屏公司聯絡的麟爪。

 鋁窗工程公司係小石人大哥介紹的。以我一貫品味又係想整啲顏色框,小石人話屋苑唔畀。負責工程呢位老闆好忙,睇我哋單嘢時好多電話搵佢。

欣賞佢會多方面從我哋角度出發去諗,例如喺主人房佢靜心聽話我哋間房好靜,話唔使裝雙層隔音玻璃可以慳啲(我哋要求裝)。如果讀者記得,或有睇我之前啲短篇,我哋間房行雷電落大雨時係十足聽現場交響曲。夏蟬鳥鳴通通都有,重要係成晚唔停口,加之週日電單車黨飛馳引擎聲。

窗手柄位置特低就係做畀小矮人又烏唔到嘅人用。我觀察同思考咗咁耐就係用下氣窗方便又唔使爬高開關。現時用料同設計又可以避免強風時蓬蓬聲打到嚟咁嘅巨響,同吹郁啲窗。

<講到地動山搖咁恐怖。我真係有考慮過裝窗閘,睇嗰間專做閘的網頁係豪宅級才幫襯😆>

部份藥水磨砂玻璃可以唔使同鄰居互望增加私隱度,佢哋長年搵布同膠封窗的,我諗咁樣安排隔離母子會開心。嗰幅做隔音就可降低佢部冷氣的噪音。另外一隻厨房窗又係做磨砂咁就唔使睇到出面啲渠。

後加:如果佢有cathedral glass就正喇,係咪好攪👻呢。

厨房的窗:暫時冇人答到我點樣裝法先真正容易開關。每每都係要烏住身距離接近兩呎深的地櫃或鋅盆,隻手又唔夠長,要搵Fantastic4或incredibles啲elastic body&limbs先攪得佢掂。

後加:趟摺窗雅緻且縮短開關距離但嘥位同易滲漏。呢個idea我諗咗好耐,最後都要放棄。

厠所打晒度牆都係想裝三趟鋁門,等更通爽,日後希望少啲煩啲發霉嘢。我又話要顏色框,鋁老闆話綠色好咩?佢淨係得綠色同埋佢話隻色唔靚😁(咁你淨係得綠色,唔靚又有呢種產品~怪,呢句心諗唔會講出聲)。後來因為我哋要求的三趟佢安裝技術上做唔到。佢坦誠地表示可以找別家,唔使驚唔好意思。

後記:用第二間都好嘅,搵佢裝又有軌~開關嘈啲,有障礙家居,第二日又有脫軌問題, 開關掣入面出問題的可能(有軌,畀著上幾篇寫嗰個女人就發晒癲,可能童年有陰影)。

鋁老闆安排得聰明:度咗呎過年前已落單運埋到港,春節假期一完就可安裝。佢呢瓣係完全冇因貨運延誤。

(有關裝修期點解橫跨舊曆年係因為等符合我哋要的條件嘅租約,吉屋同座以方便擺小石人舊物 搬嘢同睇工程。據保安講好彩我哋早人一步,後期多人冇工返就趁閒置做裝修)

冇裝冷氣的衣帽間嗰個位我裝咗窗就可以更通風 曬晾同進一步避免浴室發霉。

(香港人的衣物曬晾就好似委曲求全咁,呢間租約屋望上去嗰家人條褲就係晾喺揩到褲囊夾住條渠,畀我唔會晾出去。)

鋁老闆又建議主人房的其中一個冷氣位都係裝窗,方便萬一要維修。

佢建議整窗楣,佢哋兩個男人就打雀咁眼望人哋戶有冇裝,有先例就照行。

~ ~

一場傾盆大雨,多得呢場雨,窗同泥水的滲漏現晒形。鋁老闆默默就係著伙記執,伙記自己做嘅手功見到咁嘅情況就話冇理由。小石人都冇話過佢哋,你話聽到呢啲人明見有問題都係話冇理由係咪有啲🔥。

~ ~

我鍾意小石人的安排,逐個做工程的單位出現在屋內,咁啲師父開心又舒服唔使就嚟就去。

我重話咁樣安排可以在疫情期間保護大家減少互相感染風險。

~ ~

雨後另一日,泥水師父話個蜂巢要執,當時無知的我在場(機率好細,啲嘢差不多全部都係小石人跟晒)

我問:咁蜂巢入面有冇蜂呀?

師父滴汗。。。

小石人話畀我知係做泥水入面啲空隙導致漏水,唔係真蜂巢。後再解說震筆步驟做得未夠,小石人喺呢方面都識好多嘢喎。

~ ~

有個窗泥水收唔到口,啲泥水師父猛問小石人點算,(雖然大家識得,小石人實在係你個客唔係你判頭喎,你係呢方面嘅師父問返個客點算!)最終小石人搵鋁老闆按提供的呎吋整咗條鋁條收口。。。老公真係好多嘢兼顧呀。

~ ~

事前原來我有搵過啲資料我都唔記得,老公記得我send過冇軌吊趟門公司嘅料畀佢。

呢間公司喺工厦,趙生話我哋見到佢公司的門面都繼續睇可見我哋好有誠意。稱多數啲客傾完都會落單。

小石人注意到佢哋有成疊訂單排住隊。<我冇留意,淨係同趙生啲貓玩。長毛波斯一見人就走,過一陣睇定咗就返嚟;另外一隻大花貓就任摸唔嬲,原來有啲貓唔鍾意被摸頸,佢收起啲爪用雙手撲我手。一隻就哩埋咗。趙生話佢太太幾年前臨終時千叮萬囑佢要繼續照顧呢3隻都是別人棄養的貓兒。>

後記:我同小石人講,我死咗佢自己決定養唔養亞FA~

講返訂門,趙生好機靈地引導個客選擇佢認為最穩當的貨品。

顏色門又係得綠色,佢話大陸的焗色唔係咁多人接受到。有花紋玻璃,佢話佢哋印出嚟啲圖案有時唔對花又可能有瑕疵。呢啲係經驗之談,本來想試新構思的我都係做返啲穩陣啲嘅決定。

<之前睇咗灣仔地舖浴屏黑鏡鋼,我哋都好鍾意個效果。我又堅持做3摺浴屏都做到。灣仔呢間話另一面浴屏一定要做梗玻璃唔可以做開關門。>

小石人屬意搵趙生做埋浴屏~明智。

趙生話浴屏最com同防漏最好的是傳統的鋁物料,如果我哋唔嫌老土。當時我哋仍是堅持用之前諗的黑鏡鋼。佢哋冇乜花款揀的。

度呎係黃生(Jack)同一個女仔到戶。商討感覺令人好舒服的。有禮貌,最重要係真係聽到個客嘅要求然後努力嘗試諗解決方法做到。(講我嘅諗法時,唔會第一時間聽到回👄,唔得 冇人咁做 平時係咁樣,其實做唔做到都有思考過得唔得先答係咪好好)

厠所企缸出入位非常狹窄,出入亦有困難。由於先入為主話浴屏不可有另一開關,於是唔再諗開另一個出入口。Jack睇咗實際呎吋都認為嗰度好難出入。

(點解會攪到咁嘅局面就係我,建議小石人將原本的洗手盆位同沖涼位調轉,咁樣沖涼位就有窗可以更乾爽。

小石人話屋苑唔准移外面渠位,內部厠兜已移得最盡。)

呢位亞Jack話可以開另一出口但係要用鋁。咁就解決晒呢個棘手問題。巴士鋁摺門😆😄好開心。Jack話用腳踢開都得。

趟門的花款,單邊和風feel。但如果用喺厠所三摺門就好似個囚室圍住咁。。。嗰度梗係唔要花啦。我咁愛自由。

(呢篇同場加料,後來同Jack電話聯絡時,我竟然在老公面前叫咗Jack做Danny😅。畀老公疑心我之前係有鍾意或掛念個人叫呢個名。

我都唔知點解㗎,口腦不協調。)

疫情轉膊,佢哋用水路由大陸運貨嚟香港,據稱運費好貴。又係要等個幾月。

中期重話運咗落嚟嘅摺門爛咗,(真係一波幾折)話分兩次安裝。即係又要再等個幾月。。。。

後來話爛嘅係第二張單的門,(我哋好彩啦)

因為安裝趟門時老公已返工,古某要現身開門接應啲師傅。

二度門 一幅三趟 浴屏+摺門

佢哋一個下午完成。效率奇高。

小石人放工上去收貨兼做下一單工程保護措施。回來讚得佢哋好緊要。非常滿意。

趙生好想我上去收貨。臨走打電話畀我。我萬分多謝同讚賞。

感謝提供優質 用心及有效率服務的公司,服務態度實在值得我哋予以肯定推崇。

再遊流水響

 

呢幅我放咗日本女超人面罩喺手機前面影的。

倒影之翠綠幻似真

找到相中的生物嗎?其他遊人一直說見到好多xx,我努力地終於見到一隻。

用手機出手可以好快。小石人話用佢部相機隻嘢不停跳跳吓對唔到焦。呢幅我好快手執個用嚟索麵包袋的膠片以作實物比例,搵到未,好細隻的。

影呢幅時查實反光到乜都睇唔到,斷估影。

昨天週日,佢話想郊遊。

我話週日多人喎。

佢:"而家要返工淨係星期日先出到去玩。"

腸仔雞翼。。佢去街巿買料,我整好出發。

記性麻麻,上次去完,今次對頭段景物覺得好陌生。

佢有機會試新買的相機用品。

我好少影人物,看見這構圖好有感覺。

一隻小鳥飛到彼岸,我諗起我隻鸚鵡喺呢度飛過實搶晒遊人目光。好靚呀好得意呀。如果將亞FA~放嚟呢度佢搵唔搵到食呢?松果佢食唔食呢?小石人話佢多數落地就有人帶佢返屋企養。。。

鄉下仔起碼兩次鼓勵我唔好放棄繼續養亞FA~。我寫網誌同睇網誌冇乜特別目的。紀錄下自己的想法。有些人原來日後會給我需要的知識和啟發。有名有姓的網名是一種在人海之中不認識卻有交流有延續的互動。

我平凡,在狀態可以的情況下大部份時間都是思考。

真實的生活就是會有想法不同的時候喇。

練習好好地表達。

積累到頂唔順先講就容易扯火。頻密定偶發。事後點樣去溝通。傾唔埋欄又點處理。

人際關係健康界線又點定。

冇標準答案。鏡子的正反面,身處不同位置角度你我他。。。對當時人來說都是真實。

有濾片和沒有濾片呈現出來是不同的東西。乍似然而一切都在慢慢轉變。

消費券:咁難得真係用得著,你竟然同我講。。

大家可以選擇由下面入題😄開始睇。

如果你想由頭睇篇文,我一樣咁開心。

 話說裝修最有樂趣的是好似好多錢未開頭咁,豪氣買買買選購付得起又高質素的產品。

要長期黐住的如地磚 牆磚 電掣 電線 熱水爐等,你哋知我講乜,特別要com 小巧(有時) 同自己見到真心喜歡。

大門喎,睇外表先啦,咁我一見到啲琴款 加金屬葉圖案 似夾萬的就好奇又興高彩烈咁睇。可能佢覺得嗰間啲物料麻麻,最主要係小石人有位對佢好好的前工作客戶有介紹某間買門,似乎佢對呢間唔太感興趣。

去到佢話介紹嗰間,啱啱我夠鐘要完成埋啲手遊限時任務,而且啲門是一排要逐度揭,我就好冇禮貌地叫小石人自己睇。佢又揀唔到。其實我目立吓眼有啲款咪就係頭先有琴款嗰間的一樣。佢見我咁,佢又冇心機睇,個店員一定好唔鍾意我。

睇到下幾間,嗱,呢啲就吸引到我。擺出嚟的特色款metal look。據講係新款,但佢又似乎唔感興趣。行完。

問佢喜歡啲乜,原來係啲比較傳統木色木紋嗰啲。

我哋全屋已揀晒木紋有凹凸感的地磚㗎喇。

咁佢話鐵刀木+有啲金屬嗰款。呢款我都鍾意。而我見完咁新穎metal look,係咪畀自己多啲新鮮感呢又貴氣。未決定到就大家諗吓先啦。最重要都係要有防火合格的質素。同問吓管理處在門顏色有冇特別要求。

呢間的售貨員都好好,提醒到我哋好多忽略咗嘅嘢。我通常會問返個呢類sales貴姓,咁下次落單再搵返佢。

沉澱咗思緒一段時間,大家都可能估到屬意揀乜。

第二次再去又問清楚,要有防火規格就要加錢。

運送方面陸路,打通咗關係都要成個幾月先到。

電子鎖新款防盜眼都可以一條龍買晒。

售貨員開張報價單,我話我哋買㗎喇。

(小石人事後話個售貨員聽到開單對眼閃晒好興奮,另外講疫情期間運輸安排時sales說起來好自豪。<我冇留意到。>)

因為要睇埋蓮花頭花灑,就留啲門鎖同防盜眼喺售門鋪轉頭攞返。

本來之前我想幫襯埋賣洗碗碟機的樓上舖買蓮頭花灑,但係小石人想買進口產品。

點知行街舖我又睇中最新最貴嗰隻,重要係撳掣開關。因為洗手間好細,企缸超細,

嗰個款有一個小盒設計可以擺嘢。佢話為咗咁買貴咁多值唔值。我答:多個空間擺嘢計返呎價值,而且我哋有好多樽清潔用品。後來發現淨係嗰款先用到,因為以我哋個擺位設計第二啲連埋龍頭位佔位多到企唔到。

返去賣門舖攞嘢,小石人要再回花灑舖度清楚啲位,咁佢錯過咗一幕精彩真人show。

事源去親啲舖頭,之後就招到多啲客入嚟睇同選購。

呢對夫婦似係要搵一度安裝於狹窄空間的門,呢間舖有度巴士木摺門,但個男的想裝趟門。個女人突然好大聲嗌連手指指:"我就係唔要趟門,安咗喺厨房我乜都睇唔到淨係見到地下條軌!"

佢伴侶同個售貨員,兩個男人靜晒。

我心諗:"小姐,呢個世界有冇軌吊趟門架,我最近先幫襯咗間樓上舖,服務態度好好,有版睇又平過街舖。"但我冇理由在賣門舖介紹畀佢倒人米架。呢間舖啲人又招呼得咁好咁周到。

接待佢嘅係另一位好有禮貌的亞叔。窒咗一陣,亞叔陰聲細氣話,不如畫吓間屋佈局再從長計議。

心想:總有一啲大庭廣眾,唔顧伴侶情面的女人。

入題😄

講咗咁耐,呢間地舖可以用消費券找數架,我哋訂門嗰時未到四月,尾數可以用得著。

小石人前日放工就去找數,點知佢唔記得帶另一部用支付寶的電話,因為而家佢多數留畀我在家用嚟打機。

佢:"我已經到咗旺角,不如用咭找條尾數。消費券都可以找抽油煙機條數。"

門尾數7000

抽油煙機尾數5000

你用消費券找一張我找另一張咪用到晒囉,好過攪埋啲唔想買嘅嘢啦。

我堅持。。。。。

疫情下的大裝修

鳳坑一景,平時水漲係過唔到個島。前兩日小石人話趁再度返另一間公司開工前同我去一次郊遊。過完個島返轉頭就見到相中呢位兄台在寫生,好有文化氣息。小石人非常滿意的這幀作品,佢話神來之筆。

今次茶座食肆冇星洲米因為話買唔到咖哩。見隔離枱叫咗煎蠔餅又姑且試吓。嘩蠔仔好足洗得乾淨又煮得嫩滑,出乎意料地好味。

唔影相唔知自己身形已膨脹咗好多。我估係思量買股票策略同埋等待買賣做成的無形壓力引致我食多咗好多嘢尤其係肉類。加之因為裝修做唔到斷食,距離上次已一年多了。

唔記得有冇喺呢度提過上年年尾小石人再度被舊公司叫休息,第二次係個老闆客客氣氣咁同佢講,咁樣係一個比較完滿同多贏的做法。老公能做到邊度畀人cake倒,邊度起返身,作為妻子真心為佢驕傲。

老公放悠長假期,最啱就係時候開展全屋大裝修工程。佢自己睇呢啲全屋裝修工程,未試過,慳到好多錢之餘又係一個好好的學習機會。而且佢自己做判頭的工作好多事情都有商有量,過程九成九時間都係愉快的,因為我有好多天馬行空又奇怪獨特的想法。裝修期間我吵過兩次大大鑊的。第二次我吵鬧時亞FA~已嚟咗我哋屋企,FA~直情成隻僵硬咗,唔敢郁唔敢出聲。相處嘅真實面就係有時會激烈表達情緒。

1.各種跡象顯示個業主係好緊張間屋,佢哋連做完打掃啲爛布同用過嘅手套都要晾喺度唔掉唔帶走。教我哋用佢條鎖匙開大門閘時都躡手躡腳輕輕行事,開個鋁窗都叮囑我哋話個裝窗師父稱要雙手平均開先對稱😅。咁亞大佬小石人,換咗佢啲燈嘅座同任何物品係咪要留返條"屍"畀個業主呢。。。。又要問我,叫佢要留,佢又話掉咗要喺垃圾桶執返,重要對我唔耐煩地回答,係咪扯起我把🔥。(之前已經對間屋好多唔滿意)我同佢解釋,咁好彩租到咁近咁方便,有時啲嘢就唔好成日著眼住呢間屋啲唔妥善的地方啦。我沖第一次涼就好似粵語長片咁搽晒番梘先撳到個花灑制,沖力chok甩咗水龍頭同花灑喉的連接四圍射水又凍又唔知點算都冇半句怨言啦。

2.一切物資都因疫情延誤送貨日期,幾條及一塊大窗台雲石都要兩至三星期先送到。因為唔想佢咁辛苦一向都係同佢講使錢要人送貨上到屋企,唔好慳就叫人樓下交收自己搬。賣雲石個哥仔係好有禮貌又爽手,他有表示啲雲石好脆要喺石底做加固鐵條。有貨後佢哋電話聯絡收貨時,驟耳聽佢哋電話對答呢個哥仔又問小石人樓下交收定上樓(價錢唔同)。小石人話得幾條雲石自己搬到。

咁。。。就喺老公小心翼翼將佢哋搬到達家中擺放時"突"(佢形容係好似餅乾斷開的聲音),塊大雲石就裂咗。佢回到我面前我見佢面色變晒就知道有嘢令佢心情好唔平伏。咁就當然喺呢啲時候唔好出聲由佢冷靜吓。事後兩次企喺佢嗰邊安慰佢,我嘅感覺就係個個我提出的方案佢就駁返我轉頭。到我話嗰個哥仔唔應該再問小石人係咪自己搬上樓,老公又話唔怪得人。🔥🔥🔥呢個時候我忍唔住嚟料嘞!

"我一路都企喺你嗰邊安慰你,又從冇怪責過你。時間延誤咪慢慢整同等待。你可唔可以唔好怪責自己同企喺人哋嗰邊講嘢呀"

跟住駁完👄佢就係砰門走咗。。。。

嗱,轉頭好快就message同我講對唔住。呢啲咪叻同清醒得快。

生活的火花

之後再等幾個禮拜雲石又到嘞,今次送到戶同埋加咗塊木板喺底做承托,但係。。。。

瞓瞓吓覺佢突然提起話第二朝早同個油漆師父搬塊雲石由A到B點(下面嘅原因我聽唔到)

因為我個腦就係講緊你有冇攪錯呀!

咁我同佢講,你唔好再自己郁塊石喇,等個泥水要嚟做的時候先同嗰個專門負責的師父一齊搬啦。

佢淡然咁答應。

我話呢個建議值得你讚我同答好丫啦。

塊石再有乜閃失你受唔住架喇。。。

新返嗰塊石紋靚同彩好多,我哋又諗到用塊裂石由老公自行切割做第二啲用途物盡其用。

紀錄得咁詳細留嚟自己第二日如果睇返知道乜嘢事。因為之前啲嘢就咁一句寫完就係完全唔記得自己嬲乜。

東拉西扯,零碎回憶。有心情再敍述吓其他。

衷心肯定小石人好叻同做得超凡地好。遇到的接近全部都係好專業同工作態度好好的人,有著我哋美好回憶的工程。

😆😄

🙏

FA~的藝術相

小石人話多啲雜訊有油畫粗粒感。

表面可愛親人,聲音嬌嗲背後係性格複雜多重,容易令人放下戒心。

你養緊一隻有攻擊力的猛禽呀~最近才發現佢有睡意時會好似踱橋咁tap腳趾。條裝修數諗掂未呀,FA~
 

有一陣子被定性為觀賞鳥,齋睇。

不速之客~緣

 叁佰玖拾蚊~乜嘢用途?

話說我哋上年年尾透過地產洽談到超近居所的短期租約以做家中大裝修。

今年一月十日,早上就聽到有一不知名鳥叫得好大聲。小石人當早到家居地盤就發現有隻表紫紅底透綠的折衷鸚鵡勾在家中的棚網上。

小石人本來搵我上去,諗住我睇完隻雀就放佢走。

捕捉過程當然係雀用力咬人,四處飛甩羽毛隻嘢又驚驚怕怕兼惡死。

最後聰明的老公靈機一觸將前臂曲在鸚鵡前佢就乖乖上手。

迅速地佢安靜下嚟扮可愛個樣又上我膊頭。完全好似養咗好耐好馴良咁。

平時唔主張養動物又懶照顧別東西的我就話養佢。^^"

好多時另一半係估我唔到架喇。

咁我哋倆好似小學生興高彩烈拖住手去買鸚鵡架同混合種子餵佢,指定唔會買籠。

上網查吓,呢個品種動物出名,,,,

       咬人。

經常畀佢咬到就係去救佢。有一次佢將扣住佢嗰條鋼鍊先圍住自己條頸兩個圈然後用隻腳撑直頭使力向後想"解開"條錬。嗰種急燥法可想而知。小石人行埋去救佢就瀨嘢。

伏(擊)人最叻:好機警咁弓起身體頭左右竄動用其強而有力足以粉碎硬物的大力金剛👄去縷住人肉或啄。

春天嘛呢排就雄渾有勁的大叫~嘈到鄰居呀~FA~。齒咬又掹食然後甩到成地彩色羽毛~"幾浪漫"😆