👻仔四人組

過去週日佢同大隻佬去影微距。

⬆呢隻芝麻咁細粒嘅卡氏毛蟲蛛,據講香港獨有。亞大隻佬近期已去過一次香港仔水塘將佢覊留然後是週日帶畀小石人同另一攝友影夠就放歸田園居。

由於大隻佬曾經短期做過小石人而家任職公司散工,呢啲人醒,見間公司千瘡百孔拿拿聲就唔做嘞。之後嗰個懵懂亞推,曾有問小石人叫大隻再去返兜,大隻面嗰句唔喇,底嗰句係多很謝。

由於體驗過間公司嘅"趣怪"嘢,小石人講呢個談不完嘅話題就有對象有共鳴。

上回講到,前科文Y終於頂唔順唔撈。呢間公司腦細兩公婆,扣咗人7日代通知金。激到Y扎扎跳。

本來以為做咗咁多年(更正係7至8年),散工身份冇合約,冇約束力。點知香港政府保障臨時工嘅條款係就算散工,連續做滿某日數某時數假使唔做份工雙方都要有通知期。

即係就算Y嬲到爆,腦細兩公婆一聲按勞工法例就係天經地義扣佢錢,等佢即時劈砲咁使脾四丫哪。。。

但係呢兩個人,永遠都係諗著數佢攞盡,忘記喺呢7至8年間用散工名義請人,實質咁多年一日應得法定假期都冇畀人。夾夾埋埋好似成70至80日,重有期間Y老婆生咗個細路,丈夫有應得產假。儲好紀錄係何其重要,Y除咗喺唔同途徑唱衰腦細之外,已經去咗勞工處交涉向呢間公司追討欠債。正所謂取咗卵之後,分分鐘要賠返隻雞。

辣㷫咗個曾經搏晒命做份工又得唔到所求嘅人,愛得深報復更狠,玉石俱焚。

做緊嘅大仆直冇咗呢個得力手下,由C淋同亞推主理,就算有一名上位散工工作落力,都逃唔過畀大判扣走幾層樓工程由第二啲二判公司進場而飛走腦細公司。

致命死因係呢個人冇腦到用舊物料同山寨貨安裝喺顯眼處,啲盒又唔收好,人手係叠人堆冇人會收起啲罪證,畀驗收顧問見到唔跟投標合約規格不特止重要係次貨。喂,好歹都係國際金融大刀會最top嘅地方,腦細都唔好咁難睇。QC一次甚或次次甩漏咁多錯完又錯,點會唔check得更緊。

另邊廂又有人不下一次去政府部門投訴地盤A工程某些地方不合法例。咁多人一提起呢間公司第二句就攞蝦蟹有乜辦法唔咒怨死。

(初先我諗唔明啲智障以為自己好醒嘅人,點解明知過唔到骨都要咁搏懵。後來我再諗吓啲龐氏騙局嘅壞人,明知有日會爆煲,差在可否及時人間蒸發。好明顯腦細冇諗後路,以為人哋好似佢咁獨攬資訊同大權而唔落地盤嘅😄😁)

小石人唔想去大都會地盤,完成H仔揸旗嘅地盤A就放咗5日假。

回帶:H仔就掂。話說本來係Y睇埋嘅A地盤,腦細就要H仔幫幫手睇住。期間H仔一定要小石人去處理那些淨係老公先攪得掂嘅事工。腦細話調第二個得唔得,呢個口靚仔企硬。

重蹈覆轍,H仔用心合情合理睇好工程,同對家有理有節講甩一啲對公司不利嘅要求。工程一鬆啲腦細又嚟嘞,話H仔用得人手多。H仔:"唔滿意你自己睇返呢啲工程啦。"

腦細忘記係求緊個員工做佢高於本職嘅工作,冇加薪冇加待遇。乍型唔成功lu。

某週日工地對家有嘢投訴,H仔放假都睇緊投訴原因,個腦細未知清楚已經鬧H仔,晦氣說話:"再係咁唔使繼續做生意喇。"

H仔堅呀,答:"好,就唔好做!"

腦細呆咗。。。。

(其實盤生意做唔做,關個幫緊佢嘅員工咩事?)

後來重要係人哋投訴嘅事情根本唔關呢間公司事的。再次不由分說就鬧。我覺得唔繼續做都啱㗎(又關我义燒事呢,妳講故架咋)

棉裡針亞推嘅"成功之道"。。。

喺C淋好耐之前壞手機叫某人幫佢攞去整。(咁似艷照門事件)

發現鬼仔四人組

腦細 腦板娘 C淋 亞推

該某人見到手機內群組,亞推有權對員工升職起皮作生殺大權,話亞推有公司股份。

呢條亞推,表面笑騎騎冇殺傷力,令人心寒嘅係同腦細講雞咗一個老散工(永不錄用),表面人哋係唔知佢殺人於無形的。亞推甚至重喺小石人面前提起嗰個員工時好似好讚賞咁,然後說話間講到老散工冇做原因時就叫小石人:"你問亞Y啦"

老公收風咁勁,之前咪亞Y講畀小石人知亞推喺腦細面前點整死老散工囉。。。。

不去不去還過去。

去到大都會地盤,小石人形容亂到呢。啲女雜工話畀小石人知:"啲嘢重覆做咗好多次㗎喇。"

其實唔使女工們講,小石人見到啲上咗嘅物料有重覆處理過好多次痕跡就知。

可能C淋個腦真係出咗某啲狀況。見到顧問就貫徹見高拜Yes sir作風。答應咗人乜嘢係唔記得嘅。有需要小石人協助拆解危機時尚算好口,完事後就:"你點解會喺呢度出現。"名附其實返轉豬肚。。。

亞推呢,佢最難得嘅係一路覺得自己好重要㗎,工程出咗問題,佢認為如果腦細唔係調咗佢去第二度出勤就唔會出事。

轉頭又喺小石人面前講C淋同搏上位散工壞話嘞,重要放咗幾次長假添。

 

出洞搵食

喺斷食期間成日睇美食頻道。

呢度擺到明係畀人打咭嘅食肆。
 

幾樣味道夾埋好豐富的飲品。

酸梅 話梅 檸檬 薄荷葉 7喜。

懷舊物

揀平日過咗午巿繁忙時間最正。

打包咗個該店特色~班蘭蛋糕。 

小石人話早知帶相機去影。

今次我潑冷水,好彩冇帶。。。(因為已經要攞好多嘢喇。輕鬆啲去食吓嘢咪幾好。)

銀債·斷食·無妄之災

翅毛的悠閒。因為剛出浴完畢。

 

享受沐浴樂趣,個樣幾冧。

爛翼笑天使。不是同一日影,呢張較早前攝。

三張都影得好靚有特色。

呢幾年也有認購銀債。

前兩年都係喺富途處理,開咗戶口,之後自己在app扲扲吓申請非常方便。

今年因為某原因,去渣打處理,在該銀行未有債券戶口,就多重手續了。連續去咗3日,自己名部份先處理好。簡言之,平民戶口就要輪幾日還未計夾雜咗週六 日。優越理財呢,自搬居後一路都冇轉客戶經理,所以佢哋點我返舊時嗰區做。靈機一觸話:"我要換客戶經理",見個接待緊我嘅職員眼神一閃,就話有得做。預約第二日兼開埋債券戶口進行認購。

今晚再著手處理伴侶嗰筆,進行中。

呢排發生好多事。

身體唔舒服,前嗰排搖完機做肩倒立,做咗幾日後試圖挺直腰,點知感覺到內部啲肉似支撐唔到,有撕裂感。跟住內臟痛咗好多日,呼吸困難。過咗好耐先逐漸好返。

之後雙腳腕圓週痕癢,令我聯想到幾拾年前"濕🔥下沉"(醫好我嗰個醫師斷的症)。是次真係的起心肝做咗4日斷食。自對上一次斷食後我沒有忘記持恒,這些年間試過大概4次,美食當前,每次都只是做一日就貪食了。

今次做完幾日,腳就冇痕嘞。內部啲肉不時有痛。(現在冇事)

原本買開蔗汁嗰間舖唔賣了。而家揾間好似佢即榨的-難。

上星期某日食完晚餐,過咗約兩小時,個胃抽筋,非常痛楚。小石人好擔心我。有伴如此夫復何求。好彩有佢喺我身邊照顧我。嘔咗4次,黃膽水都出埋。佢問咗我幾次去急症,我答:"去到啪止痛止嘔,現在家嘔到出嚟長遠對身體好啲。"

痛住查吓有可能乜嘢因由。從發病時間估計係金黃葡萄球菌引起。懷疑出事嗰樣食物我食咗好少。只嘔冇肚瀉。。。胃非常非常痛。痛住瞓著,睡夢半醒期間見到老公望住我同不斷幫我按相關穴位。

第二朝醒咗冇樹lu。

確保平安後先掉雪櫃食剩嘅疑似有問題食物。

德不配位 必有災殃

      可愛地窺探

丈夫工作地人物與事態發展複雜,由近期最大影響劇情說起。。。

科文Y終於唔做呢份磨人的工嘞。最後一根稻草來得非常突然。竟然係完成該次驗收檢測,該腦細話係大部檻過的僥幸心態。就係嗰張表,係呀,為咗一張隨時極容易處理好的表格。腦細同其兄C淋分別用穢語鬧科文Y,話張表畀咗Y。該下午Y即時打咭走人唔撈。

據當時人告知小石人,Y表示再唔會食佢兩兄弟嘅死貓。Y話事後腦細有不停打電話搵自己,但佢冇接聽(似足啲情侶吵架咁)

呢度要提提,似乎好似大部份人都會報料畀小石人知咁,所謂得準訊得形勢矣,對於邊個稍為可信,邊個做咗卑鄙行為推畀別人(亞推)又以為小石人唔知嗰度心寒。老公呢份工令我哋見更多人性,學咗好多嘢。

一陣間又有寫字樓啲線眼,話腦細同老闆娘講:"今次唔會再求Y回公司。"轉頭又傳老闆娘過咗一啲時日後有借啲意搵Y,但Y仍然唔聽佢電話。

Y有一路告知小石人有關其動向。初先話休息吓先,冇幾耐後又已揾到另一份工。而亞推企圖試探小石人有關Y近況,老公就咋唔知。(亞推呢個人表面仍對小石人冇嘢咁,實在已經非常妒忌,信唔過佢喇)

我雖然知道呢間公司冇咗Y,老公面對工作時更唔得心應手(本來都已經要乜冇乜,之前提過只有Y係會切實執行處理跟進事宜),我卻戥Y非常高興。留喺呢間公司好似話已經十年,個腦細見唔同人講唔同嘢,氹Y替其搏殺開夜唔休星期日直踩,搵人幫工程,現在落得嘅收場係,呢個腦細完成一階段後有事就鬧Y,當時人協助C淋解決咁多問題,呢件事未查清楚又係瀨Y。C之後更同亞推話呢件好小事啫(小事你又鬧人?)。(完成咗呢部份工程C當係自己功勞,後來喺地盤搵返份表格兩兄弟就側側膊,鬧完人當冇事。。呢啲慣犯,據做得耐嘅員工話佢哋經常係搵人食佢哋啲死🐱,真係難為啲貓慘死)

冇咗得力幫手,腦細要Y死落地行,自行安排某些事情,其實啲嘢只有佢自己先知,交分段工作日期,標嘅內容又冇睇清楚。期期糧都拖起碼7日,一有糧出老闆娘就趷啲員工們一早等放工齊齊打咭,返工遲呀咁。

有啲年紀唔細嘅散工就爭上位勞役其他散工。好快,做完某些部份工程後,個疑似強迫症腦細要佢叫工人調轉某些嘢重新做過,激到爭上位散工咩嘢咁,擦呢啲人👞,有排受呀。腦細急住要趕工程時就聲氣好少少,一大部檻過完成啲嘢就擺腦細款。

今晚老公回家後告知我佢哋今期糧比平時遲7日後都出唔到。冇能力接啲急趕要求高質素嘅工程,加埋原來做開的,唔知進度唔知邊個偷懶hea做只是叠人堆。

另外亞推叫小石人做某啲普通散工都做到的粗活,畀C淋鬧亞推:"呢啲唔係佢做㗎。"

C淋叫小石人做某啲嘢時,腦細又鬧C:"呢啲唔係佢做架。"

腦細重要喺小石人面前鬧亞推,小石人借啲意行開費事亞推尷尬,點知過一陣小石人出現返腦細又再鬧亞推,重要問小石人:"你話係咪先丫。"(有乜辦法亞推唔憎死小石人。)

舊地盤個頂檔睇住工程嘅H仔問腦細要小石人回去做某個全場冇人識搞嘅部份,腦細話搵第二個回去得唔得?都講明該舊地盤第一期已係試勻晒淨係小石人處理到(亞推當時負責該期工程,又係小石人整完咗嗰啲位置就當亞推自己搞掂的),其實H仔現時重執緊亞推第一期工程的甩漏。

我問老公:"係咪架,次次都講到你自己英明神武乜奇難雜症都係小石人完美處理辦妥咁。"
 

自設系統

經過好長時間儲能量,睇海量執屋整理視頻,而家自己有一套建立起的系統。

接近每天都會趁天宮唔落雨,附近少活動揚灰塵前開晒全屋窗接收新鮮空氣入屋,有流動。

打開所有櫃門蒸焗爐洗碗機同衣櫃,開大風扇吹走櫃內局住嘅死氣。

全屋十幾件窗又有對流,爽😊

物件有佢自己的位置,整濕嘅東西有時會多過一個位擺放走盞晾乾。

夫家嗰邊的大哥大嫂搬屋時畀咗佢哋用開嗰個消毒碗櫃好好用呀,儲存碗碟歸一整齊,冬天重可以有暖碗碟用,多謝佢哋。

如果可以儘量一手呔攞到放到嘢。呢樣要講求物件唔重叠。

理想是于衣物方面直立或掛起擺放。將舊棉質衫剪作抹布地布,清咗唔少空間出嚟,塞實情況已改善好多。物盡其用避免浪費係要佈局同時間。

記得大部份東西位置,要家人幫忙攞嘢時可清楚口述。呢樣又可間接使屋企人知道啲嘢點擺,亦趁機令人知道我建立好嘅系統,保持放回原位有賴家中成員出一分力同合作。

仍然有嘢要儲能執拾。比之前情緒困擾時更有動力去處理積聚嘅東西。

分幾鐘短時間能整好嘅事情就即時清潔完成。唔使太多瑣碎家務堆成煩惱事。

漸入佳境中。

 

畸工實錄

本來做地盤A既第二期工程,由科文Y睇係可以的。

公司又投咗件需要高汁素完成的標,仍係由腦細佢個C淋了瀨的大佬"睇場"。錯漏百出度嘢唔啱位。腦細又訂錯晒啲嘢,唔係工程要嘅規格。咁都生存到確係家山重有啲福。

多次要小石人去嗰個B場,老公都係耍手擰頭,閃無可閃就請假都唔去。

嗰度兵荒馬亂,C淋睇工程既得人驚法。。。十足老人失智,唔記得又賴人,重要成日講埋啲廢話要人聽,嘥人時間。

最終小石人初一留到喺A場,因為無選擇下調咗無能嘅亞推過B場。其實亦係廢嘅。

十五咪又係要小石人去救亡。

乜X工具都冇,問親啲負責人(亞推)就話有,,,有?但係唔用得的,壞了。啲所謂負責人自己去睇完,放低件工具就行開,當乜事都冇發生,件壞嘢就原地放番嗰度,等下一個人去嘥時間。

一係修一係掉,就係咁簡單都冇人處理。

小石人搵科文Y,佢係會跟進的。冇錯,又係科文Y去執呢啲滿目瘡痍嘅炮屎場。

點解小石人咁有利用價值,一度冇人識處理的部份,亞推叫個散工去做,嗰個散工轉頭打咭走咗。唔怪得晒人哋,亞推自己唔識,淨係吩咐老散諗掂佢,亞茂都走。

小石人完成咗呢件曲節離奇嘅部份,條亞推竟然話要加嘢。而且完成後先畀佢嘅意見,未開皮前唔講架,因為唔識。

呢段時間週日開工每晚加班。有人做完成日都吼住想加班,咁好精力皆因日間行行企企怕卦。

勤力工作的真係唔想加班同直踩冇息休日,,,,

亞推初到B場就話唔夠時間,話自己7月要放假。Y科文表示:"你咪放。"放假前腦細叫亞推交低嘢畀Y,亞推同Y講佢乜都唔知。但在放假期間筆寫同別些公司夾過嘅嘢。

咁難得嗰個嚴人寬己卸責嘅腦細讚咗我老公起碼兩次。

腦細自己攪咗某啲嘢,畀小石人發現同修正咗個問題。避免咗影響公司聲譽,兼後果可以好嚴重(死得人嘅)。

個個都好驚test&complete。(委託人驗收工程)

老公應對得頭頭是道。以佢為榮😊

 

重返修練場

前嗰排檀香石斛初盛放時,佢特登攞住叫我影相要嚟寫blog用。

休咗約兩個多月息。科文Y似三顧草廬咁成日問住想佢返去開工。

初先,話唔同架喇,Y睇場。點知講講吓又似之前換湯不換藥,Y學佢腦細口吻話其實唔使要人睇住工程進度的,到時啲人匯報就可以。😮

小石人一路都推佢,直至叫咗三次後,老公就答應Y返去嗰個場。

比較複雜的是,第一階段做嗰度,係延誤 中途要其他公司進場咁進場法會畀人大斬一筆錢的 。大判經理又曾說不會再給這間公司做第二期工程,然而就好似特朗普之後又唔算數嘅。

上次臨最尾一日返工,亞推放工同車到站不辭而別,拜拜都冇講聲就落車。

Y科文喺三顧期間,又話叫住亞推睇工程轉頭亞推又係執返副架生做普通工人嘅工作。

今日小石人係自帶午餐蕉提子温泉蛋,唔再同佢哋一齊同枱午飯。

工作係Y科文分配~一早就應該係咁。

本來預小石人兩天完成的工作,老公半晝就攪掂。

老公話今日返去個個員工都友善地同小石人打招呼。尋日那位女工已問Y小石人幾時返嚟,一聽見今日返她高興地:"咁就好喇"

有日我問佢可唔可以在銅煲鑽窿呀?佢爽手地即刻處理好快完成。

 

Seasonal friend

亞FA~眼中的人形物體。

1自己喜歡自己性格為人處事方式嗎?

2愛跟自身獨處嗎?

3有沒有尋找發掘什麽對我有意義呢?

想遇到怎麼樣的人,就要變成那樣,就可馬上遇上啦。又可再吸引相約的。

不喜歡的,自己就要避免做那些行為。。。嘮叨 批評 否定 操控 在同一圈子內說其他成員是非 敦款老C忽 介入別人的事情內。

人際關係是大部份痛苦的根源。

近期是大批量的看看別人怎樣有智慧地對應。

纏繞了一年的朋友難題,今日解鎖。

上年3月午餐聚會,佢遲到咗好耐。由於約喺饒宗頤文化館本來已經早到的我,答佢唔緊要,慢慢啦。

自得其樂咁樣遊園。

逗吓佢,個疑似主人即刻好緊張咁追出嚟,慌死我會傷害隻🐱咁。

頸上掛咗不要餵我嘅牌。

坐咗喺呢度一段時間。獨處思考享受一個人的自在。

我有我信仰

上次其中一篇網誌講咗呢位一神教舊同學餐後窮追猛打咁向我傳教。

我一律冇反應冇回應。

上年11月我冇再喺佢生日約佢食飯。

新年佢再貼耶和乜耶和物嘅所謂賀年揮春。又問我最近點。

今日佢又嚟問我食唔食我嘅生日飯。

已經諗咗一年嘅最佳回覆如下:

直接 簡單 到題。

 

好高

 

平時去完人氣店鋸扒後,經過一間唔知佢賣乜嘅舖頭。

上星期八八卦行埋去睇吓,原來係賣糕點的。

糕包好在袋,摸落手重暖。

回家後立即試食,芝麻卷香氣撲鼻,兩款都有一種不能言傳馥郁濃厚軟糯感。

何止糕好,簡直好高

土十九話人蠢,古仔觸機一閃,嗰個先係真正亞七。潛伏多年埋身,做晒所有嘢而製造合理原因的假象,口供釘死晒每一吋位,滴水不漏。畀完完美證供先嚟一招改換身份,斷線冇得追。細心睇佢嘅人設就係解釋得太無懈可擊,佢做的行為順暢到似編劇故事咁。

過年後再去買咗一底蘿蔔糕(要致電預留),食完後間舖未有貨返。咁點呀。。。

去佢舖頭買臘味,自家蒸糕bell。

3心九意~伴侶·主人

 

連續呢兩日都夠驚喇。

妳諗掂未架?主人。

第三日女主人凌晨醒來,💡想全部改過晒啲擺位。第一次調完啲嘢之後,出入口太狹窄(FA~唔能夠全翼展通過兩個衣櫃之間),好唔舒服。小石人先生後來話似迷宮。

新嘅擺位會令整個室內更開揚空氣流通。

講咗想法畀小石人知(女主人唔係幾好意思改嚟改去),點知男主人好合作,話試吓。(感激極了)

佢哋食完早餐,主理人買額外料回家,佢諗住做兩粒鐘食完晏就去旺角買嘢。

🐦唔想再郁,女主人氹極我都唔上佢手前臂,實行友善而對抗(冇對佢惡)。之後都就範,又再出廳紫膠椅上等呀等,瓜子係食唔少。

成個過程,差唔多改晒所有啲嘢。

高腳櫈鋸到變普通高度。老虎鋸收手唔切批咗落牆。

小石人:"小朋友(FA~)都塗鴉劃花啲牆。"佢心內有啲唔滿意都有安慰自己。

女主人:"係呀,咬爛晒啲牆架。"😄

⬆🐦嘅作品藝術成份幾高。以前咬落。

⬆我嘅舊作品。

FA~:"我飛上衣櫃頂就係鍾意咬呢隻牆角,我重學女主人喝我阻止我繼續咬嗰把聲。"

三义站樹枝都全部批短,方便畀我跳過個音響器材泵面。

兩個衣櫃推變過晒啲位,好彩有轆唧。

主理人做工程的守門真係一流,住做住吸塵,完成項目後係會一手一腳清乾淨晒地方,真係人見人愛嘅有手尾師父。

由廳返番入我間房,嘩,全部位置轉晒,好驚驚怕怕呀。雖然妳一路陪住我又放我飛。妳以為用大白色床單夾實酒紅色隔音簾我就唔知。我一在衣櫃頂橫一字馬作勢咬隔音簾同爬去白床單之間(女主人:"嗰度會由屋頂直落跌地架,白布同隔音簾之間喎。。。"),飛去韆鞦,一見到妳拉關隔音簾我就嚇到飛落地,瀨咗。妳嚇到我兩日都係咁樣便便喇。

而家輪到我安樂晒,妳兩個衣櫃入面啲嘢重搞緊。

安樂曬~

似唔似戲院呀,哈哈哈,好開心呀。佢完成咗呢項工程lu。

隔音方面有待驗証,因為安裝咗之後🐦未嗌過。

昨晚初完成前期工程(未安隔音簾),雖然只是移咗衣櫃面向走廊,方便洗澡同去解手時取衣物效果如預期般超好非常滿意。凌晨時份冇乜騷擾到隻🐦。

不過房內空間細咗,,我又係用遮遮掩掩方法於,老公記起要攞嘢入中庭,用我龐大身影同大毛巾阻擋站在紫膠椅上廳嗰度嘅小FA~FA~。

第二日(今日),日間工程期間我攰恰陣(伴侶唔想嘈醒我),老公攞中空膠板入房佢就嚇到飛甩雞毛,有時真係在所難免(已經搬咗好多架生 梯 吸塵機 窗簾路軌 大大兩幅隔音簾等等等等物品入厠所同主人房)

🐦仔要新一輪適應,我亦要很有耐性再重新得到佢信任。我心急在佢視線內搬吓小形垃圾桶 推動隔音簾,佢又係狼狼忙忙咁亂飛飛。

近期唔係好肯踏上我前臂,入夜嚇親佢之後,等咗佢好耐都只是黐住雲石層架啲舊衣布碎。食瓜子都係踏前攞咗即退後。(可能知我將鎖返佢,唔想被鎖就如鶵鳥般叫法)

點知小石人買完嘢返家佢就即刻飛嚟我度。(可能想我陪住佢,,知小石人回家後我就會離開🐦。都係唔畀鎖。後來我係又叫又氹,佢不滿叫咗兩聲👄作勢咬我手咁啦。。鎖完佢我再坐一會陪吓佢。)

多一重簾免透光入去佢房。

讚賞讚賞,多得小石人。

 

包有餘

昨晚慶團年,實在同邊個一齊先係最重要。

我哋預測唔到將來,現在選擇認為最佳就是心安理得。

每個人都係自己齣劇嘅導演,走向劇情都係心中一念。

幾時roll機 幾時叫cut。

時間流動 一切在變化中,有機遇就把握好,好似去旅行睇啱心儀物件,過咗去就買唔返亦冇可能再重拾嗰種光景情懷。

新一年,大家揭開精彩一頁。

身體健壯係人人所願。

心情暢快係開心嘅泉源。

祝各位有情人終成佳偶,

有另一半的如魚得水溫馨甜蜜。

愛獨處嘅活得自在。

為大家呈獻鸚舞送蛇(佢嘅步法好似條飯鏟頭咁,活出真我本色)

迎🐎頌新春。

 

糕·高·Go

話說近期另一樣想得較頻密的計劃就係處理家雀嘅隔音安排。

自從上次佢唔知點整到個扣夾住自己隻腳,解扣後凌晨可能腳痛就成晚發出鎖錬金屬聲影響各個睡眠。長遠計有乜特發事件 老 病 ,點知佢會唔會夜麻麻發出聲響,我最驚係佢深夜大嗌,嘈到大家不特止,惹來投訴咁佢就未必可以再留喺度。

而且我哋年紀有返咁上下,凌晨小解係常事。撞著前嗰排有一晚我肚瀉,成晚盞燈自動體感開開閂閂,雖則我已躡手躡腳 輕柔地盡力將聲音減低,然而聽覺靈敏的牠係會受到騷擾。其實佢好乖,好早好早已經醒咗都只是靜靜地坐著企著。但一聽到有其他郁動聲音佢就會細細聲試探性叫一吓。

入~FA房範圍擺衫攞衫,佢接近次次都發出不滿意聲又大力啄木。小石人返工出街買家中物品差唔多朝朝都要聽到呢種雙方都感厭惡嘅聲音實在極之唔理想。一定要解決此問題。

總之未處理好隔音事宜,我係成日心驚驚唔安樂。

我哋不約而同都係諗隔音窗簾。老公有在網上尋找到,後來我又要加碼物料條件~防火。工作已忙,重要顧及家中事務。我就不再多嗲,慢慢等待佢得閒同有心情先再跟進。

由於隔音簾需要做到上天花的大小,非常厚重,物流公司唔畀自己去分派站攞,好彩人哋有遠見,一定要送到戶,嘩,真係重到"飛起"。

加之個自閉老婆唔鍾意應門,戶內明明有人物件都係就咁放喺門口。😁

提早放年假,有日佢話乜都唔想做。

我:"梗係啦,放假就係要休息,攤唞吓。"

之後佢開始張羅購配件。

另呢兩日連續出街(我極少係咁,好耐先出一次街)食嘢同儲糧過年。

昨天計啱時間,買FA~瓜子後順利唔使等位嘅情況下鋸咗人氣扒。

去程時在港鐵車廂內,突然有一年輕坐位男子大嗌:"細聲啲呀!"

坐佢隔離個亞伯就駁嘴:"我已較到好細聲,你咁大聲叫嚇親我。"

又兇返後生轉頭:"你係咪想打我¿"

在我哋企位斜對面有位戴口罩 估約6x歲嘅男士大聲說:"呢個係靜音車廂,熄咗音浪佢啦。"

我在小石人耳邊輕讚:"男士助攻得好。"

我續笑耳語道:"亞伯,好彩你幾拾年前殺咗人,如果唔係我呢次翻唔到身喇。"(黃子華洗燥其中句大約台詞)

在公眾場所有爭執,唔知有冇人暗中用鏡頭對住影緊。。。。

個後生話:"之前已好細聲同你講咗,你唔聽,人哋都咁認為你應該熄咗聲浪。"

亞伯又兇後生:"你咁大聲嚇我會碌低架。"

後生:"咁多人死唔見你死。"

口罩男士又在此時助攻一次,重申呢個係靜音車廂嚟。

靜咗。

後生合眼養神。

(呢場潛在的腥風血雨平息)

到口罩男等落車時行到我哋面前,

古謙笑笑口出聲讚佢助攻得好。

大家笑住講咗兩句男士愉快地落車。

近過年花墟好多人。

鋸完扒,買咗幾樣糕。

再去買咗兩條褲(小石人)

開心的一天。