現階段長揸短炒兩不宜

$76.15沽941

個人心路歷程
收完息有得賺就走^^
太耐冇落場，呢次經驗感覺唔錯。
思考後有計劃地行事又有紀律咁執行。
拉勻1359兩項交易連手續費數字上當然冇進賬。
賽後檢討我應該減少買入1359的注碼。但我冇後悔入信達，因為想咗好耐一定要俾自己做過先心息。

對大巿想法
現時巿場氛圍就是以『似有實無』嚟形容。
踩落去大大腳，上返少少引散戶上釣。。
據講開巿前後競價時段用少量金額Mark個價以便大戶畫出想要的圖表(我唔識分辨呢個說法的真偽)，呢個方法專係用嚟殺圖表派。
遠鏡回望高價時大成交金額後插水落，由山下仰頭慨嘆上唔上到返去呢?
指數呈斷崖凹凸梯級式下墜。我觀察的名單短揸大部份個股買咗轉身水位低，唔走又被套實。(恭喜揀股心水獨到的網友)
志在燒磨我哋嘅耐性同彈藥，唔好中計呀。。。

練果斷

1.92沽1359    -8.1%

估中但冇獎，反彈太少2.16冇賣，想在地上撿刀仔的算盤打唔響。。。把飛刀又再插下來。

我跟返自己原定的計劃唔加注兼止血沽出。

曾經有諗過穿兩蚊嗰時走，上週五當時1.99同2.0價位徘徊，尾巿急至1.97，今天週一開巿就再-0.05。

搏唔到就趁損失可控的範圍理智執行止蝕。保留仍有上升空間的941，沽出持續下挫的1359。

巿況下跌其他更好的同時減價，操盤時以大局為重，不死抱唔係公認優質的縮水股。

機會多的是^^

亂猜猜

如果你係皇，身處於前朝元老虎視眈眈想拉你落馬的情勢，首要是做什麽?

盡一切方法保住個位。另外打擊對手的財力。以前的亞爺要保住個巿，動不動就暴力救巿，因為嗰時嗰啲亞爺同佢嘅黨羽，本身就積極參與巿場活動。走唔甩時會傳一些諸如北水南流有利因素令個巿爆升然後脫險。

現當權者優先任務係要去摃杆、防走資、有秩序咁將債務危機逐步爆破。事關高處掟落嚟嘅殺傷力影響皇座唔穩呀。

保住人民的儲蓄，君不見中證監對小米在內地上巿時所提出的84問，就係唔俾佢掠內地人水，亦警示之後的假獨角獸唔好作得咁離譜，咁樣有助對應去摃桿的陣痛和貿戰所帶來的後遺影響。

以上係呢幾個月不斷睇唔同人的說法中，一個較令我覺得合理的版本。

個人睇股巿咁樣陰陰跌，俾咗好多機會大家走鬼，好過一瞓醒覺，手上持股價值少咗六、七成，細價股唔見咗九成。。。

入開有條癮

$2.09  入 1359 ^^

不尋常的操作

今日終於有隻股票引到我落搭，重要係我平時唔會做的高追。

$75.1小注入941

今晚去食養生蒸氣亞拉斯加皇帝蟹餐，唔知呢次操作會唔會變蟹^^

閣樓理論

很喜歡這個來自福爾摩斯的場口，他向華生解釋人腦像閣樓空間有限，所以他只專注對他有用的知識和資訊，其他一概不理^^

親人看到電視敎授水墨畫節目著我收看，我瞄一眼..繼而續做家務。

完成工作後，我從智能電話給她看我最近參觀畫展時拍下的作品，告之看過這些佳品又明白作畫的皮毛原理，不會再看剛才的節目了。

一、別花時間在未明基本的『老師』身上，易學壞師。
二、 正是精神有限資訊無窮，要懂選擇。

植入式廣告防不勝防，今天看一篇寫財經文的竟然在文末宣傳某報創富課堂，真是大打折扣，有點兒衝動想刪去連結。不過想深一層，可能長年以寫文為生，有些事情也不是他所願，在閱讀時我自行跳看篩走罷了。

還有要留意是沒名沒姓的消息來源有興趣就當故事看。總知不能盡信。

說話的人平時誠信為人也非常重要。別人講的不負責任，但你有必要找有品德的人寫的說的來接收。起碼他/她不是立心散播一些背後有目的言論。

記著，不是要做無所不知的財經『專家』，找到有較高機會獲利的股票就鎖定範圍再深入了解，太多支只會令自己應接不下。

投資是一門藝術，找到合眼的藝術品時靜待超荀價珍藏，善價而沽或放在博物館收入場費長收長有適隨尊便，但可別買入贋品當寶貝啊。。。

寬容待之 多給機會

我還對他笑說:「跌巿時出貨的人特別多^^」

昨天到銀行兌人仔時，聽到隔鄰櫃位客人沽175。

Teller是新手呀，他連忙致歉因為實在要我等了很久。我這項買賣竟然出動了合共5個銀行職員協助。古某當天心情大好，總是笑笑口著他慢慢來，不要緊。

每個人都需要給予學習機會，年輕人常被標籤我看是對他們十分不公平。現在的工作節奏特別急促多變，很多時沒有充份讓其練習就要上場實戰。客戶或接受服務者待人以寬的只有一星半點。原生家庭對獨生子女溺愛；社會有禮厚道風氣息微，培養成為有修養勤奮醒目合符工作要求，是要很多機緣配合^^

完成櫃位服務後我向他道謝並告知下次再有類似交易會找他，讓他有機會多多練習。。

  (厚多士的中年女士)

我又開始入人仔

上回講到2015年12月1.197沽清人民幣。銀行職員妹妹仔一臉狐疑，事關當時有3釐多息，又一致看好這貨幣。

原來16年尾曾經跌過這幾年低位，當時只顧搭尾班車沐浴於愛河只有兒女私情沒有其他。沒有理會^^

近期經過一輪觀察和對比一些銀行的滙價息率，終於又重新到中銀香港開新戶，無獨有偶，開戶的女職員聽到我的要求時，我感應到她腦海中若有所思欲言又止，後來她忍不住告訴我人民幣一直在貶值，我答她...我知道。

其實我挺喜歡看她們的反應。^^  ^^  ^^

早在人仔仍在高位，屋企人嚷著要買來收息，我告之要再等候。

我們港人有個優勢就是港幣以美元掛鈎現時在這巿況下發揮到作用，上次人仔貶值作為貨幣操控國又給了一定的指標。

如果我相信國內致力去槓桿整頓經濟隱憂，該幣貶值是因為對應貿易戰而這場經濟戰事是特朗普聲東擊西看左打右的戰術。在個人資產配置上有些人仔也是一個不錯的選擇。

昨天到銀行入票要今天下午才可買入，中銀由港幣兌人仔然後7天定存息口5.x%。將想購買的資金分三注入是我的部署。

總覺得貿易戰到頭來會有戲劇性的反向轉機，哈哈哈

1 + 1 永遠=

一條數式如果想得到跟以前不一樣的答案，我們都知道要改變數式內的數字或換算方法。

這似乎是一字咁淺的道理。

但究竟有多少人在不滿以前得到的結果時會認真想想去改變自己和優化以往的行事方法來獲得跟以前不一樣的回報。

我認為最珍貴的不是一個絶頂聰明的腦袋，而是擁有不斷為優化自身而改變的能力。

了解自我對什麽必然會到來又重複地發生的試煉未能欣然接受時，就調整數式令自己不會置身其中，這個我們是有能力做到的，只要能自控預先選擇在什麽階段來貪心^^，什麽階段不衝入戰場。。。

我應否放棄追縱恒隆

近期都是反反覆覆地思考自己的投資心態與規劃。

我發覺原意由抗通脹至往生時手頭上都有鬆動銀根升呢為對收集財富配置方法的資訊感興趣，確實是一個很大的進步。

細心留意每個人都有個人喜好，當某啲種子植根在一個人的腦海內係好難再改變他/她繼後想法，是以在找尋『新』接收訊息時是有選擇性的。而當一個人做決定的時候，從來是沒有客觀可言。

好似前幾個月我成日重重覆覆都係睇住101的股價，因為之前賺過錢，到佢個價位一路下墜時就覺得係再入賺錢的機會。發現網友偶然提起佢都會望多兩眼，再深入啲觀察持有該股票的大有人在但現時都唔多提，因為跌多升少又未到家鄉。有些人就算心知呢隻嘢有好多不利因素都義無反顧穿16蚊再入。

為咗擦去想在現價買入的思路，我數數唔睇好佢的理由係集團太側重於大陸零售業；上海的試點成功，但其他城巿的情況不同所以未必有相約發展；內地人的生活模式趨向網購，雖然吃東西買大型家電用品始終有人喜歡外出消費，但已減少了客源流量影響盈利；人民幣續貶值的機會很高；比佢更優質的地產/收租股有很多選擇，在周街平貨時聰明的資金流會投向優質股；現時跟大巿死貓彈的成 交量很低，甚至有以小量金額mark高少少價令人看似止跌回穩；如果恒指續下跌，個股大多數不能幸免。

講咗咁多，我究竟會唔會到佢派息率再升高同成交金額上升時入呢?我暫時真係講唔埋，哈哈哈。

好多人成日吼住啲價位跌得多或者冇乜業績的細價股，深層次的主觀願望就是希望佢突然一飛沖天，短時間帶來刀仔鋸大樹的巨大『橫財』，咁個腦就可釋放大量安多酚，係冇第二啲嘢可替代，錢買唔到的獎勵^^

到今時今日仍然是零持股呀~

長洲好住處^^

週六、日長洲遊客人流似旺角。嗰度嘅房源大多數為港人都知曉的東堤小築，扲入去睇某啲用後評價，其中一間的一個評語話樓上好嘈，我個心不其然諗起啲嘢，是以揀選時好小心避開嗰個地域。

今趟遇到這房東實在是非常幸運，呢個係一位待人以誠的人，上面圖片係真珠咁真的影像。雅緻簡約，屋主在花園將厨餘堆肥，他以環保概念融入家中，而且周圍有很多不同品種的雀鳥猛禽可作近距離接觸，而且主人與魚鷹有段有趣故事。

刻意在園內擺放一大水缸、三小盆常注滿清水，吸引了一群紅耳鵯甚至是巨大的魚鷹定時在亭園沐浴嬉水，又有褐翅鴉鵑在附近築巢，鳥聲處處充份體現人與大自然和平共存。

房東是位生態工程師，聽他分享原本曾遞交建議書給議員改善長洲單車停泊方法以美化巿容；貨船上落貨時如果能添置碼頭起重機既可避免船隻於加強船上起重機力度而排出廢氣又可除去聲污染；以及向政府提出租用偏遠海旁用地作厨餘減廢都一一被否決漠視。

在香港，環保只是一個口號，政府說了這麽多年究竟敎育了巿民什麽?為社會做了什麽?我們有沒有身體力行去實踐?

而房東給我的訊息是他實實在在地行動，而且他是位超級有毅力和恒心的人﹗他計劃重建現時的平房，若發現附近房屋清拆遺下有用物料，他能本事每天以個人力量搬運大麻石回家儲存備用，搬運期長達幾個月。確是有鋼一般的意志值得我去學習!

南丫島之南

六、七月份去了兩次離島過夜遊，一次比一次精彩。

首先我呢啲冇乜計劃的人次次都係臨小石人孖日休息前幾日先戚起條筋揾旅遊點。

以前冇試過上網揾房源的我誤打誤撞用咗個app，咁抆水梗係冇渡假屋租啦，點知小石人竟然有興趣露營^^".....

搭街渡將到模達灣時，船家見有隻狗喺大海茫茫游緊狗仔式，佢哋真係好心，繼而企圖用支長竹柄撈箕撈佢，好大隻咕喎。攪嚟攪去唔係辦法，卒之有個西婦二話不說咚一聲跳海營求，其實隻狗又唔熟個人點會啋丫，結果個西婦係追極都追唔到呢隻機靈神犬。最後俾人救的早早上岸，個婦人就有排都游唔返埋岸。

人跡罕至只有一間假日才開的士多，所以無論住渡假屋定露宿都最好自己帶齊所有用品同食物。

本來只是住一晚但見嗰度環境清靜，天氣好時晚上可觀賞銀河星際早上又睇到日出，小石人係攝影發燒友，合晒河車。佢好開心於是我哋同房東商量再住多一晚。

問題嚟嘞。。缺糧，幸運的我們，同當地熱情又識做生意的士多老闆娘尚算投緣呀，在資源匱乏的情況下竟然有兩條烏頭魚、有雞有菜做晚餐。

嗰度啲狗呢，冇對陌生人狂吠。好多隻而且有山頭主意，到個沙灘冇乜人佢哋就會兩幫狗鬥吠...有如蠱惑仔晒馬咩嘢咩嘢咁裝胸作勢。到有一幫走頭，另一幫又會輸狗唔輸陣咁死都要講最後一句先算贏咁。

由唔知幾時開始，沙灘經常漂嚟好多好多垃圾，我用自己微薄的人力執走塑膠廢物時，抬頭就有隻執緊食物的狗望住我，好似同我講：「喂，妳做乜同我搶食!」咁我就扮冇嘢咁啦，瞄兩瞄佢覺我冇威脅就走。佢哋拾荒執到垃圾時，個口擔住「美食』係笑笑口行起上嚟個步姿輕快屁股摟動...好開心的。

山雨欲來

昨日早段跌9佰，同小石人講我有鬆毛鬆翼的感覺。。。零持股人在這時間掩蓋不了的喜悅。

唔係唔想買只是按奈著自己。前嗰排我追蹤住的101，見佢跌到好低殘本來想喺派息前入，最終沒有執行而錯失咗財息兼收機會，但如果我冇見好收割，咁而家就會係賠本喇。

點解咁審慎係因為98年買埋啲垃圾，到一嘢插落嚟時，最終輸咗接近成球後離場。今朝睇網友們交流講股災實況勾起呢段猶有餘悸的回憶。

08年喺資金唔多的情況下捕負傷獅子令我覺悟到不可將大部份資金放在一隻股票身上，亦提升了接飛刀技巧至千祈唔好密密接。

好多時過往令人有斬獲的戰士，當佢雄風不再，一不留神可以導至災難性損失，所以咪淨係睇住個食糊位入。857 就係一個好例子，賺咗幾次10%，突然唔知邊度嚟的運氣，佢開始倒下來我沒有用血肉之軀擋，甚至到股價四腳朝天我都冇再沾手。呢隻嘢我諗輸死唔少人。。。

14年唐老鴨被圍剿嗰役由$137追到15年$65，就算佢平到$4x縱然我有充裕資金在手都冇追因為已經到咗預設個股上限了，最終係賠咗幾蚊離場，成個過程輕鬆自在冇壓力。我對於自己能嚴守紀律感到自豪。

分享咗呢啲經驗，小石人問我有冇贏的個案?內銀暫時每次都係財息福星，講咗好多次地方債同內裡令人咋舌不利因素，但佢就成為不少好息財務自由修行者走進康莊大道金鑰匙。

奉勸冇乜博奕經驗網友們唔好睇咗賺大錢師兄們網誌就跟買，個個人嘅口袋有幾多本錢唔同，佢用緊九牛一毛去試水溫玩吓，其他人在不知情狀況下成個人跳落水，潭水孰沸孰冰甚或沒頂之際方記起原來未學過泳術時已太遲!

獲得美好成果網網千斤例子背後是經過千錘百錬洗禮。

侵侵背後的盤算

侵侵乃一不擇手段生意人，只要對佢有利益而且係講緊侵王國版圖擴張有增長的就近乎冇底線乜都做得出。

話邊間公司財團負面言論，之前會唔會已沽空咗先出消息?趁低價入返好嘢之後又話有商量。。。枱面為利堅國攞到著數後就改口再扲過條水喉，務求在談判桌上攞到最大鵰！

反覆無常本身就係一種策略。

對崛起大國喺枱底不停商討特權優惠做生意，試問會唔會俾佢塌下來。當然如果㧬抵晒再有更大好處係完全唔會手軟。

睇見侵侵同金仔握手一幕，兩個都係講咗唔算數的同類，賭仔等住錢去博殺時跪地乜都肯制。到攞到佢想要的就唔會記得應承過嘅嘢。

小石人話，佢哋兩個都鍾意講:「you 're fired!」，一個炒人另一個就將人砲決。。。

大浪灣的石頭

過去的週日跟小石人(我老公)到港島大浪灣曬太陽。

原來有人曾於2003年向老公的親戚以$80萬兜售該處村屋。。。經過衡量後其親友沒有購買。隨後聰明的讀者當然會猜到那『石頭』漲價幾倍有多。如果作為當時人會否覺得可惜。

古某(我)聽畢即時存取密室(腦)檔案參詳頃刻，結論是在當時情況不購買是明智決定，何來可惜之有。

我不打算仔細用文字分析了。因為發覺觀文者大多對理財投資要考慮的因素熟諳，大家心中自然有答案。

懶洋洋的下午，和昫陽光。。到海邊下水時原來。。要算真有財力奢侈地買間用以享樂的沙灘屋，縱使這裡水清沙幼我也不會選購因為我沒有體力在這洶湧浪花暢泳。^^"

當日救生員瞭望台敲起警示鐘，有人遇溺。最後武士

回家後又資料搜集員上身，看看當地村屋概況，哈哈哈

原來大多數是竂屋喬裝村屋，而且涉及非法使用政府土地，更有人違規砍伐公家樹林擴建千多呎『村屋』花園。週六、日出租給外地旅客圖利亦有發生，又多犯一條無牌經營旅館罪行。

不知謂不知

近期在回想當初寫網誌的原因是什麼，根本源自很微不足道的目標，亦與財自無關。

後來演變為記下自己投資?/投機的軼事，以及一些個人生活點滴。

我發覺現在會於大巿升得厲害時就經常翻看不同人仕分享的網文，主要是伺機靜待下一個機會。

要舒服自在做買賣，一定要深入了解剖析自己在什麽情況下心境狀態為何。做完決定後得出的結果較易接受。

有時看到某些分享的想法時，內心會不認同，卻容讓思緒慢慢沉澱。經過月日洗禮後，慶幸能夠接納一些不同的做法。

學習不批評而多理解^^。

世事。。太多可能性，其實我什麽都不知道﹗

奧斯卡做得好

上年神推鬼擁頒錯獎，留意吓佢哋嘅處理手法。

佢哋今年唔單止係用呢件事嚟拍攪笑宣傳預告，重特登揾返上年嗰兩個頒獎嘉賓頒今年同一個獎項。

犯錯後勇於承認同致歉，有俾機會當時人更正完滿這件事的機會。這些畫面何等漂亮﹗

現世人好多時遇到唔接納別人的行為時，就係篤住個「錯」處或者不認同的地方係咁鬧。

責罵有沒有用呢？對件事有幫助嗎？

倒不如專注理順思維來得有建設性。回看件事怎樣發生同了解呢個人/啲人作出此種行為背後原因，可能會有新發現。

近期睇到一個敎養細路的事例。個細路喺單親家庭長大，上課堂時經常作出不被接納的行為。觀察得知呢個小朋友上其中一個敎師的課堂時，判若兩人，因為個老師歡迎佢，當佢有進步時予以讚賞。

(呢啲我哋好多人都知，讚賞比處罰來得正面，但當人見到別人做得唔好時往往傾向找錯處同埋發洩內心的不滿嘅情況較多囉)

講返個細路，佢就好彩，事情發展係研究者要其他老師都效法嗰個老師，咁就掂啦。

再延伸諗吓點解遇到相若情形時真人會有A際遇古人又會有B對待呢。。。

之前對人做過嘅嘢修到啲乜返嚟，信呢樣好多事情會比較合理解釋到嘞^^

要諗諗強積金組合了

對我而言呢個冇新資金的戶口操作係個巿開始起動時就由保本基金轉去港股基金，到而家升到冚冚聲賺咗約25%，嚟一招回歸基本步。再伺機出擊。

尋日趁小石人重放緊假，兩公婆去佢做開強積金的銀行鎖定佢咁多年攪高風險「投資」贏咗一倍有多的血汗錢轉做保守基金。

深深明白食幾多著幾多係整定。

認為個水位差唔多就係好喇，唔使諗住賺到盡^^

得樂自在 · 福報滿溢

真想不到沒有出文這麽久,仍有網友到寒博問好留言,銘感非常。

跟大家分享我的生活點滴^^

人緣3星 ***    自從主動向狗友告別品酒和打馬吊活動後，生活清靜愜意。另外深深體會到無論跟朋友在某時刻多投緣，甚或曾經對人作出相助幫忙，無常出現時就是緣散。無常本身就是常態 。

財源3星***     已將手頭上股票沽清。沒有特別花心思於投資上，粗略估算退休了7年多，儲蓄水位沒有什麽變動。我這宅人出門，遇到布施機會都抓緊隨緣把握，實在是美事。

健康4星****   小病是福。欣喜的是腰痛舊患也因小石人關係轉折間可以得到一位筋骨聖手治療，幸甚^^，後期不知那裡修來的福，聖手堅持不收我們診金，在此祝願他老人家身體健康，福澤康祥。

過去一年曾經極度沉迷智能手機遊戲，哈哈哈，在最近一次斷食後我又成功頭也不回地將所有遊戲抛諸腦後。這麽多斷捨經驗令我明白到當一個人迷的時候無論怎樣也叫不醒，只有當時人能頓悟才有機會慢慢將情況扭轉過來﹗

愛情爆滿分 *****  多謝小石人細心呵護，跟他一起有著很舒服的感覺。愛，是要兩人都有願意優化自我的心，用心了解怎樣互相契合。遇到另一半的行為不合心意時，有否想過其中原因是自己的福德還沒有具足條件令心中所想出現。

佛法鑽研是一件非常有趣的事情，正用心學習循步漸進實踐應用的方法。

新一年祝願各位得樂自在、福報滿溢﹗