有細藝的一天

 

上週五是近年鮮有要睇時間做人的日子。事關律師樓已完成替我夫君辦理樓契手續。在財務管理上他做得最好的一個項目~完成馬拉松供樓。由於他要返工,所以事前我問好律師樓張委託辦理取樓契授權書點寫。

有任務在身反而會更積極盤算,做好家務,預了足夠交通時間,奈何,到該商場大厦,迷失於八陣圖中兜轉。。。

我是個不折不扣的認路白痴。[用咁重語氣責備自己,因為實在喺呢方面表現好差好離譜]

原本有份文件,係自己可以喺土地註冊署宣誓辦理,之前已經排好晒期,後來因為冇信心唔知攪得啱唔啱,就取消唔繼續。到辦理樓契時委託律師一併處理,承惠多付千捌。錢解決到的事情,有興趣就自己踫踫撞撞當為經歷,有時好似同居蜜友梁朝偉飾演的吉利牛雜舖太子爺咁,日日袋住一舊舊錢(好多雞),有乜嘢用錢攪掂感覺都好正。

老公又著我問吓呢間律師樓做物業+名啲手續同收費。好彩我又事前喺電話查詢,畀我感覺呢間通話期間無端端轉咗第二個人答又唔講聲,負責同事都要查嚟查去先答到。我對耳都尚算認到前後兩個女人把聲唔同。大姐,同邊個對緊話姓乜都講吓好喎,,,唔。。。我諗會搵吓上次辦+名嗰間問吓價作比較。嗰間個負責職員熟識程序又解釋得清楚。客人基本上係乜都唔知靠佢哋喇。

難得出山,老公約我陪佢買波鞋。百貨公司內某專門店,佢想試嗰款得返一隻色重要得手上陳列品嗰對--"。買唔成,打電話問返上次幫襯嗰間,小石人原本就係想買的皇速,新貨未運到,咁就等我再補吓對鞋面著住先。

晚餐:因利成便預祝我生日。去到酒樓先5點幾,包廳。耐唔耐有人叫外賣雞。跟住有幾個約登六的男人入座。高談闊論,成層樓都聽到佢哋把聲的熟客s。

亞洲人普遍都係喜歡在公眾場所大大聲講嘢。我以前都試過。而家唔會。聲音 氣味都係被動式強迫附近的人接收,己所唔欲咪施於人嘛。聲量係隔離個人聽到就可以,若好興奮甚或好嬲要大聲講嘢尤其是咋嬌就返屋企先發作。

相片中呢間食肆,茶巿時蘿蔔糕超好味。