生機飲食

呢排真係心思思成日想寫吓嘢，但係又唔知用啲乜嘢題材，講食講買股講心情?

而家食嗰啲嘢，噏出嚟可能看官一聽到會作出副好難食的表情呀:紅菜頭同生果、菜葉打成的汁，係開始試緊生機飲食﹗

記得幾年前參加咗由周兆祥先生舉辦的洗腸營，首次接觸到果菜露呢樣嘢，返到屋企就用有機蕃薯葉加蕉打嚟飲啦，嗰種菜青味真係。。。『冇得頂』!!!!! 跟住梗係食幾日之後就唔再攪咁多嘢啦。

過咗好耐好耐之後的近一輪，因為身邊的小石人雙腳有皮膚患疾，睇個樣係好難好嗰隻，於是上網查吓有乜解救方法啦，就揾到有位亞哥話自己有辦法醫喎，重係自身實體驗證過添，其中佢有做斷食同生機飲食，斷食我知丫，以我又懶又冇乜『磚牆』嘅壽頭，呢樣都可算係強項，至於生機飲食lu喎，每次同小石人提起嗰啲咁嘅果菜露，我都會泛起詭異的笑容....騎騎騎..

嗱嗱嗱...試咗大概幾個禮拜咁食法之後，傳說呢種極頑治癒的皮膚問題好明顯地冇再蔓延，重係向住好轉的方向嚟行。

而家差唔多朝朝早都整杯嚟飲，屋企位高堂都加入埋一份，可能成世人的飯癮都有機會戒到﹗

何謂生機飲食，主要是以生果、蔬菜、果仁等素食材生食，因為咁樣先保留到食物中的酵素。

處理方法最好係用高效能高速攪伴器打爛，食味較佳得嚟避免大量營養流失又唔浪費。至於嗰種菜腥味點克服呢?可以選用沙律菜，初先時用少啲菜多啲生果然後逐步增加。有益嘅嘢都要入到口先有恒心繼續食架嘛﹗

據講癌同奇難雜症醫極都唔好的，用斷食同生機食療呢兩味都掂。