德不配位 必有災殃

      可愛地窺探

丈夫工作地人物與事態發展複雜,由近期最大影響劇情說起。。。

科文Y終於唔做呢份磨人的工嘞。最後一根稻草來得非常突然。竟然係完成該次驗收檢測,該腦細話係大部檻過的僥幸心態。就係嗰張表,係呀,為咗一張隨時極容易處理好的表格。腦細同其兄C淋分別用穢語鬧科文Y,話張表畀咗Y。該下午Y即時打咭走人唔撈。

據當時人告知小石人,Y表示再唔會食佢兩兄弟嘅死貓。Y話事後腦細有不停打電話搵自己,但佢冇接聽(似足啲情侶吵架咁)

呢度要提提,似乎好似大部份人都會報料畀小石人知咁,所謂得準訊得形勢矣,對於邊個稍為可信,邊個做咗卑鄙行為推畀別人(亞推)又以為小石人唔知嗰度心寒。老公呢份工令我哋見更多人性,學咗好多嘢。

一陣間又有寫字樓啲線眼,話腦細同老闆娘講:"今次唔會再求Y回公司。"轉頭又傳老闆娘過咗一啲時日後有借啲意搵Y,但Y仍然唔聽佢電話。

Y有一路告知小石人有關其動向。初先話休息吓先,冇幾耐後又已揾到另一份工。而亞推企圖試探小石人有關Y近況,老公就咋唔知。(亞推呢個人表面仍對小石人冇嘢咁,實在已經非常妒忌,信唔過佢喇)

我雖然知道呢間公司冇咗Y,老公面對工作時更唔得心應手(本來都已經要乜冇乜,之前提過只有Y係會切實執行處理跟進事宜),我卻戥Y非常高興。留喺呢間公司好似話已經十年,個腦細見唔同人講唔同嘢,氹Y替其搏殺開夜唔休星期日直踩,搵人幫工程,現在落得嘅收場係,呢個腦細完成一階段後有事就鬧Y,當時人協助C淋解決咁多問題,呢件事未查清楚又係瀨Y。C之後更同亞推話呢件好小事啫(小事你又鬧人?)。(完成咗呢部份工程C當係自己功勞,後來喺地盤搵返份表格兩兄弟就側側膊,鬧完人當冇事。。呢啲慣犯,據做得耐嘅員工話佢哋經常係搵人食佢哋啲死🐱,真係難為啲貓慘死)

冇咗得力幫手,腦細要Y死落地行,自行安排某些事情,其實啲嘢只有佢自己先知,交分段工作日期,標嘅內容又冇睇清楚。期期糧都拖起碼7日,一有糧出老闆娘就趷啲員工們一早等放工齊齊打咭,返工遲呀咁。

有啲年紀唔細嘅散工就爭上位勞役其他散工。好快,做完某些部份工程後,個疑似強迫症腦細要佢叫工人調轉某些嘢重新做過,激到爭上位散工咩嘢咁,擦呢啲人👞,有排受呀。腦細急住要趕工程時就聲氣好少少,一大部檻過完成啲嘢就擺腦細款。

今晚老公回家後告知我佢哋今期糧比平時遲7日後都出唔到。冇能力接啲急趕要求高質素嘅工程,加埋原來做開的,唔知進度唔知邊個偷懶hea做只是叠人堆。

另外亞推叫小石人做某啲普通散工都做到的粗活,畀C淋鬧亞推:"呢啲唔係佢做㗎。"

C淋叫小石人做某啲嘢時,腦細又鬧C:"呢啲唔係佢做架。"

腦細重要喺小石人面前鬧亞推,小石人借啲意行開費事亞推尷尬,點知過一陣小石人出現返腦細又再鬧亞推,重要問小石人:"你話係咪先丫。"(有乜辦法亞推唔憎死小石人。)

舊地盤個頂檔睇住工程嘅H仔問腦細要小石人回去做某個全場冇人識搞嘅部份,腦細話搵第二個回去得唔得?都講明該舊地盤第一期已係試勻晒淨係小石人處理到(亞推當時負責該期工程,又係小石人整完咗嗰啲位置就當亞推自己搞掂的),其實H仔現時重執緊亞推第一期工程的甩漏。

我問老公:"係咪架,次次都講到你自己英明神武乜奇難雜症都係小石人完美處理辦妥咁。"
 

3心九意~伴侶·主人

 

連續呢兩日都夠驚喇。

妳諗掂未架?主人。

第三日女主人凌晨醒來,💡想全部改過晒啲擺位。第一次調完啲嘢之後,出入口太狹窄(FA~唔能夠全翼展通過兩個衣櫃之間),好唔舒服。小石人先生後來話似迷宮。

新嘅擺位會令整個室內更開揚空氣流通。

講咗想法畀小石人知(女主人唔係幾好意思改嚟改去),點知男主人好合作,話試吓。(感激極了)

佢哋食完早餐,主理人買額外料回家,佢諗住做兩粒鐘食完晏就去旺角買嘢。

🐦唔想再郁,女主人氹極我都唔上佢手前臂,實行友善而對抗(冇對佢惡)。之後都就範,又再出廳紫膠椅上等呀等,瓜子係食唔少。

成個過程,差唔多改晒所有啲嘢。

高腳櫈鋸到變普通高度。老虎鋸收手唔切批咗落牆。

小石人:"小朋友(FA~)都塗鴉劃花啲牆。"佢心內有啲唔滿意都有安慰自己。

女主人:"係呀,咬爛晒啲牆架。"😄

⬆🐦嘅作品藝術成份幾高。以前咬落。

⬆我嘅舊作品。

FA~:"我飛上衣櫃頂就係鍾意咬呢隻牆角,我重學女主人喝我阻止我繼續咬嗰把聲。"

三义站樹枝都全部批短,方便畀我跳過個音響器材泵面。

兩個衣櫃推變過晒啲位,好彩有轆唧。

主理人做工程的守門真係一流,住做住吸塵,完成項目後係會一手一腳清乾淨晒地方,真係人見人愛嘅有手尾師父。

由廳返番入我間房,嘩,全部位置轉晒,好驚驚怕怕呀。雖然妳一路陪住我又放我飛。妳以為用大白色床單夾實酒紅色隔音簾我就唔知。我一在衣櫃頂橫一字馬作勢咬隔音簾同爬去白床單之間(女主人:"嗰度會由屋頂直落跌地架,白布同隔音簾之間喎。。。"),飛去韆鞦,一見到妳拉關隔音簾我就嚇到飛落地,瀨咗。妳嚇到我兩日都係咁樣便便喇。

而家輪到我安樂晒,妳兩個衣櫃入面啲嘢重搞緊。

安樂曬~

似唔似戲院呀,哈哈哈,好開心呀。佢完成咗呢項工程lu。

隔音方面有待驗証,因為安裝咗之後🐦未嗌過。

昨晚初完成前期工程(未安隔音簾),雖然只是移咗衣櫃面向走廊,方便洗澡同去解手時取衣物效果如預期般超好非常滿意。凌晨時份冇乜騷擾到隻🐦。

不過房內空間細咗,,我又係用遮遮掩掩方法於,老公記起要攞嘢入中庭,用我龐大身影同大毛巾阻擋站在紫膠椅上廳嗰度嘅小FA~FA~。

第二日(今日),日間工程期間我攰恰陣(伴侶唔想嘈醒我),老公攞中空膠板入房佢就嚇到飛甩雞毛,有時真係在所難免(已經搬咗好多架生 梯 吸塵機 窗簾路軌 大大兩幅隔音簾等等等等物品入厠所同主人房)

🐦仔要新一輪適應,我亦要很有耐性再重新得到佢信任。我心急在佢視線內搬吓小形垃圾桶 推動隔音簾,佢又係狼狼忙忙咁亂飛飛。

近期唔係好肯踏上我前臂,入夜嚇親佢之後,等咗佢好耐都只是黐住雲石層架啲舊衣布碎。食瓜子都係踏前攞咗即退後。(可能知我將鎖返佢,唔想被鎖就如鶵鳥般叫法)

點知小石人買完嘢返家佢就即刻飛嚟我度。(可能想我陪住佢,,知小石人回家後我就會離開🐦。都係唔畀鎖。後來我係又叫又氹,佢不滿叫咗兩聲👄作勢咬我手咁啦。。鎖完佢我再坐一會陪吓佢。)

多一重簾免透光入去佢房。

讚賞讚賞,多得小石人。

 

包有餘

昨晚慶團年,實在同邊個一齊先係最重要。

我哋預測唔到將來,現在選擇認為最佳就是心安理得。

每個人都係自己齣劇嘅導演,走向劇情都係心中一念。

幾時roll機 幾時叫cut。

時間流動 一切在變化中,有機遇就把握好,好似去旅行睇啱心儀物件,過咗去就買唔返亦冇可能再重拾嗰種光景情懷。

新一年,大家揭開精彩一頁。

身體健壯係人人所願。

心情暢快係開心嘅泉源。

祝各位有情人終成佳偶,

有另一半的如魚得水溫馨甜蜜。

愛獨處嘅活得自在。

為大家呈獻鸚舞送蛇(佢嘅步法好似條飯鏟頭咁,活出真我本色)

迎🐎頌新春。

 

糕·高·Go

話說近期另一樣想得較頻密的計劃就係處理家雀嘅隔音安排。

自從上次佢唔知點整到個扣夾住自己隻腳,解扣後凌晨可能腳痛就成晚發出鎖錬金屬聲影響各個睡眠。長遠計有乜特發事件 老 病 ,點知佢會唔會夜麻麻發出聲響,我最驚係佢深夜大嗌,嘈到大家不特止,惹來投訴咁佢就未必可以再留喺度。

而且我哋年紀有返咁上下,凌晨小解係常事。撞著前嗰排有一晚我肚瀉,成晚盞燈自動體感開開閂閂,雖則我已躡手躡腳 輕柔地盡力將聲音減低,然而聽覺靈敏的牠係會受到騷擾。其實佢好乖,好早好早已經醒咗都只是靜靜地坐著企著。但一聽到有其他郁動聲音佢就會細細聲試探性叫一吓。

入~FA房範圍擺衫攞衫,佢接近次次都發出不滿意聲又大力啄木。小石人返工出街買家中物品差唔多朝朝都要聽到呢種雙方都感厭惡嘅聲音實在極之唔理想。一定要解決此問題。

總之未處理好隔音事宜,我係成日心驚驚唔安樂。

我哋不約而同都係諗隔音窗簾。老公有在網上尋找到,後來我又要加碼物料條件~防火。工作已忙,重要顧及家中事務。我就不再多嗲,慢慢等待佢得閒同有心情先再跟進。

由於隔音簾需要做到上天花的大小,非常厚重,物流公司唔畀自己去分派站攞,好彩人哋有遠見,一定要送到戶,嘩,真係重到"飛起"。

加之個自閉老婆唔鍾意應門,戶內明明有人物件都係就咁放喺門口。😁

提早放年假,有日佢話乜都唔想做。

我:"梗係啦,放假就係要休息,攤唞吓。"

之後佢開始張羅購配件。

另呢兩日連續出街(我極少係咁,好耐先出一次街)食嘢同儲糧過年。

昨天計啱時間,買FA~瓜子後順利唔使等位嘅情況下鋸咗人氣扒。

去程時在港鐵車廂內,突然有一年輕坐位男子大嗌:"細聲啲呀!"

坐佢隔離個亞伯就駁嘴:"我已較到好細聲,你咁大聲叫嚇親我。"

又兇返後生轉頭:"你係咪想打我¿"

在我哋企位斜對面有位戴口罩 估約6x歲嘅男士大聲說:"呢個係靜音車廂,熄咗音浪佢啦。"

我在小石人耳邊輕讚:"男士助攻得好。"

我續笑耳語道:"亞伯,好彩你幾拾年前殺咗人,如果唔係我呢次翻唔到身喇。"(黃子華洗燥其中句大約台詞)

在公眾場所有爭執,唔知有冇人暗中用鏡頭對住影緊。。。。

個後生話:"之前已好細聲同你講咗,你唔聽,人哋都咁認為你應該熄咗聲浪。"

亞伯又兇後生:"你咁大聲嚇我會碌低架。"

後生:"咁多人死唔見你死。"

口罩男士又在此時助攻一次,重申呢個係靜音車廂嚟。

靜咗。

後生合眼養神。

(呢場潛在的腥風血雨平息)

到口罩男等落車時行到我哋面前,

古謙笑笑口出聲讚佢助攻得好。

大家笑住講咗兩句男士愉快地落車。

近過年花墟好多人。

鋸完扒,買咗幾樣糕。

再去買咗兩條褲(小石人)

開心的一天。

 

我要離開吓

去食週年紀念午餐那天,

Behind the scene係,早上我重在床碌緊遊戲時,小石人出睡房就發現亞FA~唔見咗。

飛咗上衣櫃頂。

條錬咁甩法又係將會一輪折騰,要捉住佢用布同冷衫包實,一個人控制佢唔好郁另一個人用工具鉗返實個扣同金屬圈。

佢自由就猛咁大嗌。

我一出睡房門,

轉頭就有一隻拖鞋飛去佢度,佢亂竄飛咗入厠所。

我:"唔好咁對佢。"語氣當然唔多友善。

佢飛返出嚟,飛嚟我度(過頭頂高度),伸高手一接佢就:

我:"你做咩咬我?"

佢放口,好彩唔係咬得咁深有印冇損。

跟住放佢飛開,我儘快戴返保護裝備就同平時放飛一樣,來來回回都飛返嚟我度。喺呢方面,兩年養佢同用心練習飛行冇白費,做得好。

今次整返個S扣上佢腳,順利呀。

我同老公講:"我精神好緊張。"講咗好幾次,與自己共情,由內心釋出繃實嘅情緒。

之後都有為我又重語氣對小石人致歉。呢樣要多多修練,急趕時就算見勢色唔對都需學習停一停深呼吸。

事後我連聲說:"好彩你今日放假,我自己一個人扣唔掂。"

話說呢一日假(星期一)係小石人堅持要放的。

呢條亞推重要小石人再一個星期日加班,如果聽佢支笛即係已經兩個星期連續開工咗十三日後再繼續做,使唔使呀(亦已違反勞工法例)。重未計期內夜晚要人加班。

當小石人在群組請星期一時(佢哋公司norm係用whatapp對答通消息。)

亞推又私訊小石人叫我老公最好星期一返。

啋佢嗰個先奇。

假期時,亞C淋L瀨又打電話畀小石人。喂,散工放假係冇薪水的,冇義務隨傳隨接電話。

享受完舒適的兩日假之後。。。

星期二返工時:

小石人後來告訴我接近全體員工一見到佢就稱呼:"石哥"~客氣非常。

長話短說,佢哋做緊嗰單工程有個位就係因為亞推喺第二啲工種公司整塌某啲嘢同位置時唔醒目,冇喺該位置原狀時預先跟進某事情,淨係攞住副架生耷個頭做而履行唔到科文嘅責任,變咗後來自己工程部份亂晒大籠。

原來週一時,好多認C認P嘅人都攪唔掂嗰個位置。

每個人都渴望呢位唯一能打救到呢單工程嘅人(~小石人)返嚟處理呢個位置。(完成唔到就冇錢,工程收唔到錢,有冇糧出都成問題。)

喺呢度,小石人得到好多人嘅尊重。

亞推,到啲嘢比較順啲嘅時候,就又怪一名H仔執漏執得慢。呢個H仔轉頭同小石人呻,冇心機呀,畀人話做得慢。去食煙先(大家都知道而家在地盤唔准食煙,H仔係要離開地盤老遠的地方吸)。

亞推同背後睇唔起佢嘅腦細一樣,最叻打擊士氣。根本同一類人,亞推係縮水板。

而H仔,之前有笑笑口同小石人講:"檢測嘢過唔到都係你啦,又唔記錄低。"

小石人神回應:"我係照大會指示,三日有三個唔同說法做法又冇叫我記錄,唔通我自己冇端端自把自為去做咩?"

(我:呢樣係邊個講畀H仔知嘅呢,只有一個人-亞推。而佢究竟點講法呢,將失誤責任推咗喺小石人身上,呢點十分明顯。老公,要提防呀。)

之後亞推同小石人一齊到某處時,亞推疑問點解呢度嘅工作要咁樣處理?(佢認為多咗工序咪慢囉)小石人答:"呢樣要多呢幾個步驟先能徹底執好晒之前某啲人做出來的多重各種錯誤,亞H仔已經細心哋執咗好多度架喇。"

(即係小石人幫H仔發聲,講畀呢個夢輪亞推知,H仔點解係亞推口中的慢,小石人同H仔做嘅係唔使翻手的一鏡到底呀,其他嗰啲係執咗再執都係錯架)

(我:可能條夢輪自己都係執咗都係錯嘅其中一個。而且而家小石人睇工程定亞推睇工程呢,次次都要老公提返佢。)

有次放午飯,人物有:亞推 小石人 女工Kw Ha(小石人發現呢位後生仔勤力細心做嘢有擔當手工唔錯,同亞推講呢位員工值得留意) Hon

亞推:"個顧問講得好啱,我哋應該咁咁咁做。"

小石人:"推哥,你係年三十晚今時今日先有份去開呢啲會,之前你只是攞住副架生死命做,根本唔知道呢單工程嘅任何嘢包括準則同要求架。呢個顧問講嘅,正常計作為管理呢單工程嘅科文係一早需要知啦。"

(喺小石人敍述這段前,我請佢即場在我面前重新演譯當時嘅表情😄同話語。

看畢我心想:"老公真係忍得好辛苦。"

小石人以為我會否定佢嘅做法對我說:"老婆,我都要抒發吓架。"

我:"係呀,所以我係非常認同老公嘅做法說法。")

(之前我哋兩公婆多次一起分析形勢時,想到我哋唔知呢三個人 腦細 淋瀨(腦細的亞哥,欠債已經賣晒公司股份畀佢弟弟) 亞推 呢幾十年之間的恩情(以前有一齊去外地旅行),我覺得關鍵人物係呢兩兄弟嘅父親乜叔,帶住亞推出身兼對兩兄弟保護有加,每個兒子有一層樓又將生意交棒畀佢哋。

點知乜叔會唔會臨終託付叫腦細記得睇住亞推呀。。。咁就死得。)

好嘞,扎腳布咁長。

臨近歲晚,亞推又要求小石人唔好咁早放農曆新年假,朋友之義小石人有答應。

點知轉頭個腦細又要將小石人調去第二個由C淋L瀨攪到唔達標的地盤執漏。。。。😁

(即係亞推點打人情牌請求小石人遲啲放農曆年假係廢嘅,根本個乜數字都唔知嘅腦細話調走就調走嗰個呢度唯一處理到咁複雜嘅工程步驟的人。)

(而呢個腦細覺得樣樣嘢都好簡單的。但自己負責跟另一單收驗工程時,其中一個同事Hu對小石人講:"睇住腦細佢捉worms入patpat,人哋只是要check項工程通唔通,佢就自己講晒見到的唔影響大局嘅甩漏。驗收員第二日畀公司嘅不合格項目就係腦細講嘅全部。"

(芝加哥殺手:專隊自己友)

自己做唔到某啲重要嘢,呢條腦細將責任歸咎Hu,話佢影相唔跟得貼。,呢位Hu同事前嗰排返工時先至砰嘭累咗喺街跟住入過ICU出院架咋。

(好多同事都會報料畀小石人知嘅,人緣好好呀。腦細臨同事收工前去地盤,都係Hu收到風報訊畀小石人知架呢。))

正當小石人思量緊點寫早放年假時,呢個腦細咁橋喺Whatapp發佈:"你哋邊個要請假就早啲出聲喇,等我有所安排。"

立時,小石人就跟返原定計劃早兩日開始放年假,反正留喺度幫唔到亞推,就算後來又改咗唔使小石人過去淋瀨工地。

呢個PK磁石-亞推,重要畀淋瀨兩次以上嫌佢咁樣安排人手嘥人工。亞推向小石人訴說同埋呻。(其實亞推自己咪又係咁對"下面"啲同事)

直至再呻時,小石人終於忍唔住:"你可以同淋瀨講格,不如現在開始由淋瀨你去安排人手,亞推我揸返副架生做啦。"

呢條鵪鶉又係不語。

當一個好有責任心做事妥當嘅女工Kw在同小石人合作處理某任務時,

Kw:"石哥早咗放年假?"

小石人:"我要離開吓。。。"

最令我欣慰的是,老公會執走晒自己帶返工的架生回家~小石人有可能唔會再返去嗰個修練場!

我:"此地不宜久留"

 

我有我信仰

隔上星期日,佢本來話自己出去影🐦,後來晏咗冇出街,就影家鸚。小石人話佢對翼咁細,又可以飛到伏伏聲。

😄接近日日都同亞FA~飛翔練習的,有時我冇為意翼展貼近畀佢打面添。胸肌雙翼都有力量。

咁嘅角度似兩隻椰殼仔~小天使。

 

證件相都畀小石人影到。

昨天出洞影呢隻。

第二隻都好靚丫,但唔係佢哋心目中的寵兒就遭嫌棄。

近期主要想緊兩件事。FA~聲浪隔音處理。

跟舊同學食上一餐飯時佢問我去唔去佈道會,我已告知她我有自己的信仰。點知飯後,佢再send條link叫我睇吓一個牧師的見證。

其實佢多次約食飯後都會畀張過咗膠嘅咭仔一面係風景或花相另一面係聖經折錄。唔失手勢我都有接。

但呢次我回家後收到link覺得好反感。因為已在飯桌清楚告知我同佢唔同信仰。佢都重要嚟。

該次飯後,我即時想絕交。

到佢上兩月前生日,我經常想起,但都決意唔聯絡唔約佢食飯。

我覺得咁大個人,有思考嘅人或多或少都會了解自己生存嘅信仰。而且我係BB未足月都已經畀老母拎咗去天主教會受洗。中小學都係讀天主教校園。

第一份工又係基督教機構。

於天主教 基督教都有參與活動。

現時亦有看唔同宗教的youtube,了解吓道教佛教民間信仰基督教一些人的見證等等。

最終都選擇無神論自力修練而棄一神論的祂力信靠。

明白有些人確實需要將重擔交付以助緩解人生不能承受的重。

人成長了,發現呢個宗教公關做得好,會自小將細路由家庭綑綁式入教,大咗若唔信,係好難脫離的,因為家族同兒時一同成長的玩伴都是教中人。

現在覺得似乎讓人較成熟才選擇更勝細細個接受被薰陶。

若舊同學再聯絡我,我是否直白地告知:唔向我傳教就食下飯。

識咗幾拾年-Red flag

怕曬lady

 近期同老公喺通訊時玩自家建立貼紙。

睇隻🐦兒好似幾得意,前嗰排我嬲咗佢兩日。野獸本色重重複複係咁架喇。。。

眼神似唔似精神出現咗狀況。

呢幅由條片cap出嚟。老公真犀利,單手用祖師爺的棒同FA~格鬥,另一隻手又攝到佢魂。

呢排佢間房有陽光入屋,嬌的的lady唔鍾意曬,左爪拍右爪躡步去攞女主人手中瓜子 腰果。然後急急回到曬唔到嘅地方。。

識扮我把聲:"開燈喇"

有次我喺佢房同佢講嘢,老公在布簾外走廊以為亞FA~扮我把聲口若懸河😄

苦樂參半,雖然現飛行時懂轉彎降落到哩喺布簾後的我前臂,我對佢嘅喜歡度似乎已減。。。。

悍

 之前佢唔鍾意沖涼,就放金屬容器內有瓜子引佢落水,用壺噴佢時都唔多歡喜。鼻 有時濕濕的。

冬天時開浴室寶以免凍親。

最近幾個月開始懂洗澡樂趣,也不用放零食於金屬盆,逕自跳進水中,浸吓胸口拍拍翼。

如常放牠在房中飛,有時佢食得夠就眼定定左右顧盼,似想離開我哋呢度?上下打量,飛上衣櫃上佢的基地,咬牆咬衣櫃就係唔覺佢咬之前攪開嗰塊木。

有次佢由我前臂第一次直接飛上金屬晾衣架時,滑,一不留神跌落觀景金屬台,好快佢站起,冇樹冇幹。叻。

8月中的一次,又係對零食冇興趣,望望吓唔嚟我度就落地。照例一落地就多事,因為佢喜歡探索黑漆漆嘅衣櫃底(內有十卷裝條形厠紙),想咬啦。

呢啲位就係衝突點,㗅我,跑出嚟突擊我。又係祖師爺的棒出場時候。佢一見就漲晒毛成個波咁好嬲。互相格鬥,凶悍非常。發咗癲咁瘋狂咬報紙(Fa~紙接佢啲C)

又喱喺有轆布架底。E E哦哦。不時出擊。

忍佢好多次,今次我出手喇。

要喺唔傷到佢嘅條件之下,用木捧將佢壓倒,好考功夫同自制力。

叮叮。

被壓倒的牠仍頑強掙扎,全身起來後。。。。

戰敗的鸚如企鵝般挪著搖晃身軀徐徐地口爪並用爬上小木梯子返回彎彎支。

妳都有今日,咁惡丫娜。

好襪成雙

⬆係咪好靚呢,兩公婆考慮良久先買,比較貴。不過兩個一睇就鍾意,難找同類型質料同花紋。
 

今朝凌晨已醒,佢過咗大半小時都醒咗。

跟住,傾咗幾小時到天光。都係佢就職嘅公司嘢。

是日,大雨。

我整咗老早一齊分享。雪櫃有料唔hea就有嘢食。

佢話要返現在工作緊嘅工地檢查吓處理好某啲嘢未,因為尋日放工就走,唔記得咗自己有冇妥善執正某啲工序。(私人時間)

我覺得佢好好,對陌生人好負責,驚如有疏忽會傷到人。

我願意同佢一齊出外逛逛,免佢一個人來回路途寂寞。

⬆佢現時工作地點前台。

佢平時只行員工通道,檢查完畢,係昨天已辦妥當了。覆核無妨。

我又嚟新主意,叫佢不如去工作地點前台睇吓。

嗰度有本講香港離島同石頭嘅書冊,放到已有某種擺咗好耐發出的書味。坐低(目立)完,幾有趣。

跟住去買吓🐦仔零食。

本來想在附近幫襯間咖啡小店,入門女侍應告知只可用餐60分鐘有新客人來要交枱。

即走,冇理由畀人限時限刻,人生時間已tic tac倒數,揾間坐得較小店舒服又任坐幾耐都得的大型連鎖店吧。

而且之前去到雀仔街時間尚早,好多舖都未開,行咗一陣冇亞FA~食開嗰種大小的瓜子,先搵地方坐陣歇吓,咁上下鐘數先由小石人獨個兒出擊再去雀仔街。

(以我平時某啲情況下多口嘅性格,係會問吓開緊舖之前又買開嗰檔會唔會賣包畀我哋,咁就唔使行返轉頭。

不過見個中年男人開舖時係咁掟啲大膠盒蓋,似乎心情唔耐煩,咁我就另謀他法唔好煩佢嘞。)

小石人行雀仔街都會特別留意折衷鸚鵡,商販賣乸較多。眼眶冇FA~咁藍,眼神亦冇我哋嗰隻咁精靈。嗰度啲籠中鳥吽啲。似友善啲😁😆~呢樣真係到時先知。記得FA~初嚟我們家都係好似好善良乖巧。。。。。。。我哋中晒計。

越睇越鍾意。

氣吞天下,,,,,有得揀梗係玩有圖有動物架啦。

活力都巿~姐姐愛跳舞

 今日想曬太陽,佢臨出門去影🐦我先話同佢一齊去。

 

盲拍~根本陽光曬到完全睇唔到棵樹影像。好多紅耳鵯同麻雀逗留 翅毛 搵食的樹種。唔知亞FA~識唔識咁樣謀生?不過佢一出現 落地,我諗即刻有人捉走佢。。。。

原來竹柏,木材 果實都用得。

⬆佢笑住行出嚟😄

我都係鍾意亞FA~

追鴿~同場加影麻雀疾走。

片尾兩個小朋友原來入咗鏡,佢哋於烈日當空下玩得盡興,其中一個(口靚)仔尾隨鴿子隻鳥梗係鴿飛而去。追逐~兩個淨係攪個踏單車用具同埋用手轉動個腳踏(似手攪肉機)都不知幾落力,又搣下野草 盪下韆鞦咁快活極了。

柱高處發現痕跡,練掌風。。。

難道是梅超風留印記????

日照轉當空 嶺南蔭長廊

太曬,,,有啲暈暈哋,搵個陰涼地方歇腳。

⬆不是小石人

四靈獸尾門~玄武

好多外傭濃妝豔抹扮古裝 民族裝束 不同造型如小飛俠內的Tinker Bell等。。。

不少亞伯級龍友在替她們拍照 讚美 不亦樂乎!

耀舞長安

按小石人要求,後補是日美照:

F1~電影

週日,早醒。

等小石人瞓醒。

當佢開眼時,

我問:"睇唔睇戲?"

佢答:"去"

即時梳洗起行。

隻嘢又係一見小石人就發出不滿聲音,啄晒木。。。➡札炮。要等我哋出完街回家先餵lu

佢問我點解咁有興緻睇戲?

(本來是週日大隻佬約咗佢去馬料水搭船時影海鷗,去到塔門唔上岸原船回程,問我去唔去?我表示以前份工成5年每日搭來回兩個鐘頭船,冇乜興趣齋搭船陪攝。後來因為隻特別鷗已冇出現,活動取消。

事前我有提過問佢如天氣許可<又打颱風>,有冇興趣去睇戲,畀足心理準備佢。)

我:"估你會鍾意睇呢齣"

去到睇戲場地,因為都算尚早,間商場好少舖開,呢度出名三尖八角又九曲十三彎難搵,佢有少少忟憎。

我:"出埠去旅行都係咁,有好多不確定性。"

問商場職員,佢哋預備緊開場,都好有禮貌,其中一位女職員非常主動話帶我哋去搭電梯(該時段有電梯女郎)

去到高層電影院,咦,只得自助售票,好彩有老公喺身旁,順利買到。離開場約半小時,跟唔到原定計劃去該地庫茶餐廳,改去星巴。
 

齣戲好好好睇。佢果然表示非常滿意。原來佢以前都有跟開F1賽事。本來我以為重有4DX,哈,上畫咗咁耐,一早冇咗,都好,可以更集中精神睇戲。

(冇冷場嘅商業片,值得入場感受氣氛。回家後又係照例睇好多相關youtube片。

話題又多咗好多。

小石人以前識個在街飈車的人,據講該人有參加澳門賽事,作為乘客的小石人都跟車刺激過一番。自己揸電單車又係體驗過速度嘅爽。車 槍 軍事 攝影嘢,講有關型號 知識好似知好多,我就0兼冇乜興趣。不過佢想講我都會聽。)

散場後我話去食牛河,我指戲院附近越菜,佢以為我講近排食嗰間泰菜。

去到附近越店,當然係要排隊,唔,咁少機會嚟到附近,我想食呢間喎。。。

春卷右下角小碟係碌冧,呢間有放白同紅蘿蔔。

今次坐呢個位可以影到另一幅畫。

築竇

 7月11日(週五)

老公見我放FA~,由鞦韆飛嚟我前臂時影的。我將相+咗效果幾卡通。

⬇就斷

7月13日(週日)

今次帶咗佢離開現場後,企喺廳嘅紫膠摺椅pan都好安靜。

⬆我哋有商有量,下午4點幾完成。

回FA~房後,好彩之前整咗吊鞦,可以有較熟悉落腳點。少不免適應一輪。

上咗新彎彎本來都可以,我發覺有兩個位cake住又再帶佢出大門角,等小石人磨吓嗰啲cake位。

Lady Fa Fa開始不安,又唔想咬我。

再返返入FA~房後續一輪安撫飛行。

⬇未熟工地

約兩小時後。。。

⬆開始修葺⬇

Lok lok聲。

Approx another two hours later...

A little bit tired⬇

新黃皮樹枝未乾透,易入口,老公話聞到好香黃皮味。

都係龍眼支硬淨啲。