寫求情信2

上次去流水響時拍的,記得嗰日有個女人不停大嗌"陳湯圓"乜乜乜又物物物,陳湯圓冇聽佢支笛,又唔知佢噏咩,越叫越走,梗係啦。。。陳湯丸係隻狗。我諗狗根本唔識聽人講嘢,同佢講嘢照做可能係平時跟食物或獎勵連結卦。我就較相信馴狗達人祖斯丁(Justin Sliver)嗰套,訓練同畀指令。總之個女人好嘈,影響晒其他周圍嘅人清靜。

* * * * *

話說今日晏晝老公打電話嚟,我哋好少通電話,多數傳短訊。打電話是在特別情況。

小石人話佢老闆今早要佢哋呢兩日內(明天放假,即係今日內)用公司信紙寫求情信,集齊等佢遞交。

咁我哋當然唔太認同佢嘅做法,但唔照佢意思又好似逆佢咁。兩公婆商討完一陣。。"算罷啦"~好彩我週四一早寫好咗,已在小石人手機有底。本來等案主屋企人同律師睇吓有冇啲嘢唔寫好啲,畀下款我完整格式。因為我覺得做得法官會比較講求跟格式。既然個老闆要攪到好似mass production咁,都唔爭辯。

據講今午,佢公司個個排隊咁寫,揸慣工具突然要佢哋用支筆寫信,真係抓爆頭,同五-六拾歲人突擊考試咁。結果就係識咗好多年同事,十句。

好彩老公有得抄,佢話寫咗兩張A4紙。

我諗法庭求情信唔係多就好,用公司信紙重可能畀個官覺得啲人被迫寫。。。

由信中看到個當時人平時為人做事、品格、對人態度、對家人、朋友、同事係點。犯事前情緒係點,有冇變化,有情緒唔穩定或情緒失控的話,有冇努力謀求解決方法同求醫。有冇悔意。同寫信人的互動,寫信人有冇目擊親證到佢情緒或不尋常徵狀如失眠、手震、心悸、冒汗、精神散渙。不要流於封封都千篇一律。信的內容誠實真摯;真心用心地陳述。

網上見到有時啲官會質疑某些議員究竟見咗個當時人幾次幾多時間,見過幾次每次十幾分鐘根本冇乜說服力。又有個個案,個當時人寫求情信時話都係被害人著得暴露引佢犯錯。結果求情變加懲。

我由個老闆角度諗,咁樣做嘅好處係集中處理,班友唔做慣呢啲事,信紙都即場有埋唔使搵,又唔使唔同人走去問嚟問去或者索性唔問又唔寫。佢對自己有情有義嘅圍內伙記係可以好幫忙的。

 

寫求情信1

"咁你覺得佢值唔值得幫"?

(好多時都好難避免唔用個幫字~括弧呢句同米兄講,如果米有睇嘅話)

問咗佢兩次都係好猶豫。又難怪嘅,細細個講句嘢就畀家長掌嘴;3年級啲功課唔明,個亞哥就忟到不得了咁"教",唔識又話佢蠢。

以前我哋差唔多大部份人都喺無助的情況下學習,而家嘅後生雖然受保護,可是面對嘅壓力又係另一課題。

平時我寫網誌練練埋埋個鍵盤,縱然好多錯別字,不過都唔好話冇用。

前日佢用短訊轉寄畀我有關佢犯咗刑事的同事之案情進展,據知可以搵親友寫求情信而有機會重獲自由。

(講咗咁耐,呢個先係原委同重點)

問得佢梗係唔使佢寫啦,又唔係我識咗嗰個人10幾年,淨係之前發生過一件事,我從佢口中覺得呢個人都好關心同事又聽到呢個人都好愛家人。如果佢覺得呢個同事值得幫,我咪做街邊寫信佬代筆。

咁我就著手上網搵範本又傳短訊問我五隻手指數得晒的其中一個做檢控的朋友啲嘢。例牌要攪清楚佢答我會唔會同工作有抵觸先繼續發問,點知朋友覆我時,字裡行間好似以為係我犯咗刑事😰。我真係表達得唔清唔楚。。。

昨日佢又傳短訊話畀我知,佢老闆問佢如果可以都幫手寫求情信。

聽到呢度就覺得好彩早啲問過佢,有心理準備下就唔使猶猶豫豫慢慢都答唔出或者亂噏啲嘢。忠忠直直慢慢諗嘢嘅人就係有呢樣唔著數。雖然我哋都係唔會擦鞋,而佢回歸呢間公司工作時亦已經預咗隨時唔撈。

今早草擬好咗封信就搵佢傳畀案主家人睇吓有冇嘢要執同補啲資料畀我。屆時就要親手寫,呢項事宜不容有失,事關錯咗又要重新寫過。手字工整啲,言詞真摰誠實誠懇,對件事應該都有幫助。