執倉碎碎念

昨夜家中出現了這不速之客,細小卻行得快飛得迅捷,轉眼無影無蹤。當小石人組裝好器材拍了一張就不見了。😄

猶幸後來又再找到其身影。

這幀照片老公覺得非常滿意。

留意牠的眼睛是何等魔幻。

有被催眠的感覺呢。。。

蛾>哦

今年五月,個人覺得像時間停頓般漫長。納悶。。。

經常思考有那些情況說話可以省掉:

1.事後孔明。

2.對事情沒有幫助。

3.觀眾/聽眾群已耳熟能詳。

4.非表裡如一。

5.別人不願聽取的。

6.這個我超認同,別"兜篤將軍"。

7.有時就是不想講呀。

~想到再補充記錄~

問候 祝福 衷心讚美 感謝

有興趣 腦袋經常迴旋的就當然要表達,正所謂"唔講唔安樂。"

昨天執倉,砍掉很多股票,又逐步加倉反向作對沖。

今天沽掉部份煤氣,又忽發悟想,同一個價位,之前買現在賣就是想法和形勢轉變了,來來回回是愚是桔還是把握時機,看彩數吧。

 

胡思亂想

 呢件咁金碧輝煌物件,係佢最近買的沖虹吸咖啡用具。斷食完已發覺全張咖啡枱佈滿不同沖啡工具。。。

翻查網誌紀錄,已成年有多冇寫買賣操作。

今日14/5 9988 $204.買入

此股曾於28/2/2020以$200.2買入,25/8/2020全數賣出作價$269.4

今次洗牌重新買入,雞仔注入場,事關如圖"注意~危險"。

近呢一年經常在腦裡思考著在股海浮沉,檢討是否真的有用。

估巿:當事時自己的想法影響了買賣操作,再重新同時同情況再來一次,應該都會是同樣處理。例子,上年美國大選我估無論邊個上場都會塌巿,咁就沽咗一啲貨。

操作方法:呢方面就絕對由自己掌控到。但係佢又會潛行地被估的大巿方向所影響。。。例子:2019年尾至2020年密密入巿,當時比較傾向初時用的資金銀碼中等,冇用喇叭式向下加大注碼,因為初時覺得個巿跌唔落。嗰次用盡子彈嚟打獵。

咁今次呢?手頭已有唔少貨,前嗰排選取的方法是趁有獲利就套出資金伺機入平貨。保持著巿跌有錢入;巿升有貨沽。

沽後變成唔少個巴斯光年s咁"太空戰士一飛沖天"~個腦有想過5次左右啦。之前米兄都有提過我逐少沽,似乎我呢方面耐性都係唔夠,有啲叻極都係分兩次。。。聽吓人講啦😁

大自然交響曲

 

昨晚雷電交加風雨大作,閃電從天而猛擊到地上,一氣貫通何其壯觀。可惜在室內是沒有可能拍到。為有捉兩隻領角鴞上場,風馬牛不相及,是本人作風呀~

紫白金光

銀龍狂舞

暴雨穿梭

狹蛙齊鳴

雨後,這裡又能從遠處聽到一種蛙叫。他熟悉的兩棲類聲音,慣常的稱呼是我無法筆錄的。。"因為真係唔識寫"。

連向神通廣大菊歌大神請教也得思考怎樣發問。

結果從聲音辨別出發:蛙類叫聲大全

縮窄了範圍,牠們可能是花狹口蛙或者是花細狹口蛙,在雨後鄉郊常聽到的聲音。"牛叫"

另外,原來不同蛙類在身體被揩擦甚或擠壓時,一些會像狗叫、貓叫等,真有趣。

記得有一次凌晨時份也是相若天氣環境,置身得如斯咫尺,猶如大自然交響樂拉闊表演,最佳享受當然是。。。

😊😍

月供股票-換🐎

 上次嗰張超高音喇叭,小石人知道我見到覺得好治療,佢話而家影微攝會嘗試捕捉一啲令人看了舒服、有感覺的構圖影像。

話咁快供埋5月份就兩年,供煤氣同匯豐作收息用途暫時賬面成績當然乏善可陳。上次趁中移動跌落低位供咗少少,雖然呢種咁嘅供法係唔方在真正低位入到,但好過我在它跌至穿$40時吽晒咁,乜都冇做。。😅。

昨天沽咗大部份匯豐,餘下一些碎股,作價$48.6,虧咗蚊幾。在下個月停供煤氣,全數轉為供1044。

再睇吓開始月供當時的帖文,有位網友話要嚟供亞婆股,事實我真係開始變亞婆。

有一次搭電梯,一個6、7歲男孩見我啲手機亮著,佢好心同我講:"亞婆,妳啲手機未熄。"

咁我哈哈兩聲答:"我特登唔熄架,你叫我做亞婆,係咪因為我有啲白頭髮呀?"

可能佢聽到我把聲唔似亞婆,知道撞板,答完:"有少少啦。"一開(車立)門就走得好快,開開心心咁玩盪鞦韆。

講畀老公知,佢笑說我冇鬧佢。

咁佢都係一片好心提我,佢睇到覺得咁樣咪咁樣,事實我真係年紀大佢好多嘛。鬧~令佢對女人有陰影就唔好啦。

筆鋒回眸,錢嚟得急和多,背後風險我相信成正比,而且各有因緣,唔會羡慕。

月供呢壇,看似仍在不利情況,我卻相信將會為我帶來安穩的收息途徑或高位沽售獲利。

事關我耐唔耐先睇個巿,而且遲啲未必有足夠心力去處理財務買賣事宜。