愉悅一天~由看展覽開始

很喜歡的作品有二,呢位在米兄母校剛畢業的同學,咁後生就看透一些物事。

初先我以為是兩個人的作品,原來是同一人不同時期的心境。

講座的嘉賓是兩位在這學校畢業的同學,在社會追藝術夢已有成就。

其中Chocolate Rain作者,麥雅端小姐,之前的舖頭,據小石人話,佢都有份參與該舖裝修工程,而負責工程的PM話呢位小姐就是香港鮮有畫出彩虹的藝術家。

另外一位講者 Stella So小姐其中一作品將藍屋內不同住戶/經營行業,以不同方式切面呈現建築物內家家戶戶的聯繫都是很有創意的想法。

臨離開展覽廳時,見到有些紀念品賣。原以為是毛巾的東西係一對襪,重要係買其他東西才可得到的贈品。

接待客人的學生很有禮貌又為我張羅怎樣才可以最低價錢買東西而得到該贈品。

咁我買條絲巾(唔係校友又買條人哋40週年的絲巾真係唔知想點),要以電子貨幣渠道處理。

我倆公婆都冇。

呢個時候:

一位友善的男子(工作人員),問我介唔介意佢幫我電子付款,我畀返現金佢。

當然唔介意啦。

呢位男子好斯文架,喺佢麻利地撳撳撳部手機過數時,佢問咗我兩個問題:

係咪校友呀?  不是。

咁你乜嘢途徑知道呢個展覽?

網友介紹。

佢輕聲說:"我咪米,古姐。"

😄😄😄😄😄

原來米兄都有作品展出,

我熱切地著他帶我去看看。

很可愛的,由佢兩口子特為女兒和兒子親自策劃繪畫印製的童話書~封面圖。

卡通人物都是充滿童真表情。色彩活潑跳躍。

佢哋嘅簽名冊~我咁樣簽,哈。

離開會場後,又見朱銘先生的另一作品,喺呢排人度影咗好多不同造型,玩咗一大餐。

踱咗好耐當晚食乜好。。。

傾咗好耐,映月樓啦,問完支客,她答咁歡迎5:30再嚟。

原來當時先至係4:30。係呀,兩個都烏sir sir。

咁去返原本我提議的海防道大牌檔,以前我返第一份工呢個區域舊回憶又湧出嚟。

麥兜情節,某牌檔最出名的東西都冇,個伙記伯伯又聽唔到誤會我哋:

        乾炒牛河。 。冇河粉

     咁淨菜遠牛肉。。都話冇河粉咯

唔係要河粉呀。。。佢去問完又答冇牛肉。

哈哈哈哈

小石人對伙記伯伯嘅態度好唔滿意。

一個字-走。

跟住去諾士佛臺(呢個女人乜都唔記得又話要去嗰度)

酒吧街又係唔啱。

金巴利道變晒成條街都係食韓國嘢商舖。

食腩河-佢話食呢啲河粉不如返屋企樓下食。

卒之搵到以吓呢啲嘢食:

                                嫩滑

                          多汁

                最好味~魚羹

         我覺得唔似牛肉味的牛肉

我答小石人:

唔問你係邊個都好啱的,點知古姐係咪拖住第二個叫小鋼炮的嚟睇展覽?

想到以上,未講我都笑到眼淚水標晒出嚟。

之後我冇飲酒精嘢,情緒都非常開懷高漲。

2023年4月29日,很美好的一天。

生🐷肉

 唔係砌。。。

今朝佢問我食乜早餐,我話想食好味既嘢,佢就知我心中的答案。

佢買外賣返到嚟,一食我覺得點解咁爽嘅,爽到有啲咬唔斷,吞咗一舊之後,再揭開隻灌湯餃,吓,成舊🐷肉都係生嘅,,,吓吓吓。

老公即時影低,相中有埋間茶樓的嘜頭嘅膠袋。唔係要投訴發爛,係作個記錄。

我拿拿聲拎去煮返滾同時摷間嘢個電話號碼出嚟。

個接待初先聽唔到我講嘅嘢,提高咗聲亮,佢好快就將電話駁去畀另一位姓周的經理。佢問我係咪whatapp嗰個(可能唔止一個人領嘢)。

佢問我想幾時補返,我話唔係要佢哋賠,儘速通知佢哋係唔想有人再遇到呢個情況。

佢有禮貌地答,佢哋做飲食的係應該確保客人滿意,佢會立刻去處理這問題。同埋佢堅持告訴我賠返件點心畀我哋,今日唔要住,下次取回的方法。

小插曲係佢問我電話冧把同稱呼時,我竟然噏咗唔係老公又唔係現時我嘅號碼。

<好彩唔係噏咗第二啲人的電話號碼唧,唔係就X街>

係講咗以前自己舊手機老冧。老公亦記得呢啲數字。又問我點解轉碼,咁我解釋一輪。

呢個位,自問做得好的地方係,一段親密關係未開始前向心儀對象交代清楚晒自己的過去,你情我願先繼續,我對佢冇秘密。

口腦不協調,最好嘅係平時表裡如一,involuntary的條件反射時,希望都係對得住另一半的言行。

想做個有涵養的人殊不簡單

我尊重宇宙法則~對自己和別人都要公道

 

我記得你有說過想大家都開開心心。

現世代尤其呢幾年的共同經歷,大家都自覺與不自覺地身心俱疲,唔多想講嘢。

好不容易儲夠能量再發文做吓多年來的測試,又係有人覺得你晒命,做人,做一個謙謙君子真係唔簡單。

呢種有修養又成熟的人,要好豁達。我就做唔到喇。

我眼見唔係一次,而係無數咁多次。一開口便有人講啲酸言酸語,試問一個人可以承受幾多次衝激。

言論自由的理想國度,係平等地每人都有想過自己的言行會否帶給別人傷害嗎?有建設性嗎?耳朵同胸襟容得落經過思考的言詞而不是個人情緒發洩無意義的發音。

最近我同相識好耐嘅朋友見面,我經常提起小石人的優點,我哋大家相處得幾開心,又沐浴在超級暖男的庇蔭下。

"喺度晒"她說。

我恍然大悟,就是不應再在她面前提及夫婦溫蜜了。因為她直至登六後幾年現在仍未找到有緣合適的人或者是她好早已放棄了這方面的事而醉心於照顧家人同發展自己藝術興趣,這些方面都很有成績。

呢啲認識的友人,我知道去避忌。。。閉👄,不再在她面前暢所欲言,亦立了少見面之心。

網絡世界就是防不勝防,隨便拋一句冇成本的貶詞又唔使負責任,受者積積埋埋,唔想爭辯,心又慽慽然。

呢啲我用自己心思估啫,你大方又修為高可能唔計較。

又或者你發咗慈悲願心,所以更多考驗湧嚟。

最後一根稻草可以表面看來無關痛癢,然而足以做成好大的改變。

快趣處理

上次搜索完水牙線資料後,好快就再搵吓邊度有目標貨品賣;同埋可以用消費券找數的商戶。

加之我買咗另外三樣配件,多一盒噴咀、可兼容使用的牙刷和舌刮。

尋晚4月25日黃昏送咗貨嚟,同小石人一齊玩開箱。

新x坑,當晚就义電兼實測。

睇咗多條視頻,較了解點樣在洗手盆操作唔會用到啲水射到周圍都係。

告誡,用舌刮時不要壓得太大力,我整損咗條脷,可能下次直情只是輕掂舌部(似乎要幾高超技巧)。

而且需要擺定塊布抹手上的水同部機身。

呢部機唔怕濕水係可以在洗澡時用的。

因為儲水得7安士,所以入水都比較頻密。之後小石人提我用水樽入定多啲pi水,就唔使像我頭一次用咁在厨房同厠所行出行入。🐷

我係先用牙線清潔咗一次。

用完水牙線之後,想睇吓有幾乾淨就再用多一次牙線,結果效果幾好。

之後清潔配件就發覺管道入面啲水好難乾,放完窗台位吹成晚入面都仍有水氣。。。
 

牙~更新2

以下情節涉恐怖成份,怕就唔好繼續睇。

 3月頭,一天有人按門鐘,其實真係唔多鍾意人撳個門鈴。我嗰次冇應門呀。

事後就知道係郵差送掛號。負返冇開門的責任咪第二日去郵局取件順便出街行吓。

趁防疫措施解封,的起心肝去埋附近牙醫度掛號。嘩,要等成一個月有多,4月19日先有得睇。

洗牙$600。補牙$600~$800

診所有喺應診前一日再致電客人提醒佢哋時間。小石人著我順便問吓可否用消費券:係收現金的。

睇牙當日早上,我問老公畀啲我哋相識但未見面前,佢每朝msg畀我的日出相,新讀者知道嗎,佢晨曦時瞓醒望出窗外就影到彩雲變化同旭日初升。

唔知幾時開始,我睇牙時多數會諗返啲開心時刻,從容接受治療過程。有次個醫生問我落唔落麻醉藥補牙,佢咁問到咪答唔落(打少一兩針)過程去到大半時開始頂唔順,個醫生話嗰時要繼續冇得停,咪頂落去。事後個上半折面似王晶的牙醫讚我好抵得痛。(心聲:都唔知你點解會問我落唔落麻醉藥!)

鏡頭轉返去應診日:

事前做好線牙漱口。

診症當日,有個亞伯問最快可以幾時睇,聽到最快都要5月17日就話痛死都未有得睇。

因為之前佢問當日幾號時我有答過佢嘴,亞伯就對住我講你哋後生就冇遇到牙痛。

心諗:"亞伯你雖然並不年輕,但你有所不知了。我以前在整牙方面受過幾多驚恐,又用咗幾多心機同錢去護理啲牙呢。

我幾歲時由大哥帶我去嗰啲遷徙區無牌黃綠牙醫度,脫隻乳齒佢都落大量麻醉藥,打完嗰幾支針成棚牙同個口都硬晒,跟住佢好用力咁用個鉗扯我隻牙出嚟。

第二次老豆帶我再去,我嚇到攬實老爸唔上嗰張椅,條黃綠話我咋嬌,上次都唔驚格。

咁剝牙法會死人架。

之後脫爆牙補牙箍牙,做牙模整牙膠都試過。

用牙線牙縫刷護理。

先有而家咁嘅陣容。"

點解要痛到頂唔順先睇,係邊個嘅逃避同選擇。(呢句唔出得街喇)

上一代沒有護齒常識又沒有機緣遇到去接收該資訊。

我都係1990年,睇紫微斗數,嗰個業餘相士話,牙齒不齊,遍地桃花,提我去箍牙。

又遇到個好牙醫介紹我用牙縫刷。

各有因緣。

等咗十分鐘,洗牙用咗約十幾分鐘。牙石梗係多,好多年冇睇牙醫又唔係成日咁神心做護齒。若果唔係兩隻臼齒中間個牙窿越嚟越大要檢查吓係咪蛀牙,重有排拖。。。。

多謝淘兄好介紹,呢樣好嘢嚟的,呢個下午做咗以下沖牙器資料搜集:

更新1

更新2

更新1

Waterpik沖牙器的利弊

是日郊遊

 陰陰天,屋企停食水洗水缸。最好就係完上星期話出去行吓的約會。

佢呢排又係休息,可以把臂同遊。

瞓醒覺食完早點,"他他條條"。

出發前同隻🐦講定我哋今日會晏啲返,餵咗兩次豐富飽餐畀佢,乖乖哋睇住門口。

送車尾唔緊要,唔趕。

由中環港鐵站,十分鐘我行唔到去中環某個離島碼頭喎。

咁我提議去快餐店一個餐兩份食就啱啱好。

重有大把時間就去影吓佢前嗰排話放返去趕交所附近的型爆石雕。

影影吓相,又差唔多夠鐘。

哈。

究竟我哋去咗邊個估你唔島呢?

前幾次去開的茶餐廳冇開了,好彩決定英明,食啲嘢先搭船。

比起上次嚟游水,啲水乾淨咗好多好多。

跟住見到有條banner話有甜品食喎,試吓啦。

榛果咖啡 芒果糯米糍

聽濤鳥聲。

第一次同小石人去呢島,體力可由榕樹灣行去索罟灣,沿途影相嬉戲。近兩次到洪聖"耶"。。。休息一陣就折返。

不再。