畸工實錄

本來做地盤A既第二期工程,由科文Y睇係可以的。

公司又投咗件需要高汁素完成的標,仍係由腦細佢個C淋了瀨的大佬"睇場"。錯漏百出度嘢唔啱位。腦細又訂錯晒啲嘢,唔係工程要嘅規格。咁都生存到確係家山重有啲福。

多次要小石人去嗰個B場,老公都係耍手擰頭,閃無可閃就請假都唔去。

嗰度兵荒馬亂,C淋睇工程既得人驚法。。。十足老人失智,唔記得又賴人,重要成日講埋啲廢話要人聽,嘥人時間。

最終小石人初一留到喺A場,因為無選擇下調咗無能嘅亞推過B場。其實亦係廢嘅。

十五咪又係要小石人去救亡。

乜X工具都冇,問親啲負責人(亞推)就話有,,,有?但係唔用得的,壞了。啲所謂負責人自己去睇完,放低件工具就行開,當乜事都冇發生,件壞嘢就原地放番嗰度,等下一個人去嘥時間。

一係修一係掉,就係咁簡單都冇人處理。

小石人搵科文Y,佢係會跟進的。冇錯,又係科文Y去執呢啲滿目瘡痍嘅炮屎場。

點解小石人咁有利用價值,一度冇人識處理的部份,亞推叫個散工去做,嗰個散工轉頭打咭走咗。唔怪得晒人哋,亞推自己唔識,淨係吩咐老散諗掂佢,亞茂都走。

小石人完成咗呢件曲節離奇嘅部份,條亞推竟然話要加嘢。而且完成後先畀佢嘅意見,未開皮前唔講架,因為唔識。

呢段時間週日開工每晚加班。有人做完成日都吼住想加班,咁好精力皆因日間行行企企怕卦。

勤力工作的真係唔想加班同直踩冇息休日,,,,

亞推初到B場就話唔夠時間,話自己7月要放假。Y科文表示:"你咪放。"放假前腦細叫亞推交低嘢畀Y,亞推同Y講佢乜都唔知。但在放假期間筆寫同別些公司夾過嘅嘢。

咁難得嗰個嚴人寬己卸責嘅腦細讚咗我老公起碼兩次。

腦細自己攪咗某啲嘢,畀小石人發現同修正咗個問題。避免咗影響公司聲譽,兼後果可以好嚴重(死得人嘅)。

個個都好驚test&complete。(委託人驗收工程)

老公應對得頭頭是道。以佢為榮😊

 

Keep shooting·日與夜

 近期睇D+釣魚王,其中有一集,參賽者們半夜三更都起身釣魚。

小石人話:吓日釣夜又釣。

我:咁有人夠日影夜又影。

<眼神。。。斜瞟住我>

⬆半夜星空圖,已經影咗幾個半夜。之前有一張佢話有好多星星,但係個拍法係新的畫面冚舊的,嗰晚小解完就發覺靚清境畀雲冚晒,嘥心機。貼出嚟呢幅都有啲飛行物。

幾招積,石顏色好美。

醒醒目目

笑樣

今次有叫埋個成日想輕生的舊同事(死咗老婆嗰個)去。

事前:我哋兩公婆傾談時,我有同佢講,自己冇耐性又唔想聽咁多消極負面的言論感受就幫唔到佢,咪到時之後攪到自家心情都沉埋落去。

最後老公都願意一齊同佢食午餐(呢個人一定唔去藍店的),再去目的地影-將軍澳。

據老公回家講,呢位仁兄話自己以前掛住工作冇同個女溝通。又話供個女去外國留學讀咁多書揾咁少錢(嫌)。(老公頓時覺得自己對住座石山)

曾經講影貓仔,呢位老哥諗住唔帶腳架的。(我唔識都知道有啲環境唔用腳架同快門線係影唔到架啦)

成日換機係賴部機影得唔好。以前講過佢影完唔執相的,話要原汁原味!咪覺得自己影得唔好,不如人。

上次去影🐱仔時,咪話有幾個影友坐隔離枱(其實兩張枱差唔多係黐埋),有個白髮斑斑的Sunny,已用一牌子機影咗一幅有彩燈bokeh嘅貓仔。之後嗰晚又試第二個牌子機影,唔識又會問我老公啲操作方法。攝後又因為自己唔識就搵朋友幫忙執相。我即時讚賞佢好叻。

點解我知佢叫Sunny?

當時佢自豪地畀張褐魚鷹相我睇,重好多人點讚。又見到佢畀嗰張相老公睇。

玩遊戲都要知道多啲資訊先得架。玩熟有成功感就自然更有興趣。

同場加影笑到我甩轆的小石人往事,我問准佢先寫的。

話說佢同死👻老友亞虎(真係死咗的),之前喺舊公司一單工程,總之佢哋的賽制有啲情況吓係下午可以去食嘢。

兩個老友鬼鬼孖住去中上環一間大牌檔糖水舖食甜品。見到有個亞洲人影個牌檔風貌,個老闆娘揸住個拂糖水殼揚揚吓喺度鬧:

"影影影,影你x母"

個亞洲人好驚,走咗。

跟住有個洋人又影老闆娘間舖,蝦,老闆娘又唔鬧佢喎。

咁鬼🐎的小石人就同老友🐯講:

"同個鬼佬解說shoot shoot shoot shooting your mother"

老公複述我聽時,笑到我肚都攣埋。

大佬呀,你知唔知乜嘢係

Shooting人哋個mother呀

砰

3個人都要咁

 老公買給晚間仍睇嘢聽嘢的人用的。~無線耳筒~

* *

話說小石人在家中主理裝修事宜到接近尾聲時,就有位工作上識咗好耐的P君串針引線同佢老闆提起小石人可到職工作,嗰間公司有三個老闆,其中兩個當小石人喺Y舊公司做科文時有跟過佢。呢兩個人又曾喺某間世襲下一代的公司做咗好耐,後來因頂唔順啲老細s的做事作風而另起爐灶L公司。咁橋小石人在上一年有喺世襲公司服務過,間公司最尾幾個月重拖欠薪金,又細眉細眼地一粒普通零件都計嚟計去,叫料又唔足,做成工程經常是工人等物資而企晒喺度,本身人工就係咁嘥法。嗰啲領兵嘅科文,冇料兼忌才。

初期,小石人在呢間L公司做得好開心,兩個老闆都對佢客氣又尊重。雖然,呢間公司規模小,有時投標接唔到新項目前,佢哋都會盡力畀其他嘢做留住小石人。

後期未開到工程都有禮貌地叫小石人休息。

咁老公悠閒地過咗差不多一個月。

世襲公司內一位友人又向小石人招手,與此同時L公司又叫定小石人開工,好似係待有新工程就由佢主理該項目怕卦。

老公比較喜歡L公司,亦唔計較佢日薪比同行畀得少,最重要是工作開心。

如上,佢哋未接到新工程架,就安排小石人跟P喺某地盤開工。初先都有講有笑。到亞P前嗰排請咗兩日假同佢老婆行山,佢同小石人講,P休息期間,問另外一個散工每天做什麼工作就得。

到P放假當天,那個散工其實都唔係好知要分配乜嘢工作。及後P放假後中咗招,要在家休息等回陰,工作仍是由該散工分配。

到P痊癒復工,小石人問P當天工作安排時,佢又係叫小石人問嗰個散工。

又係一啲人搵每日做乜的工程。有次小石人話搵個散工問下下樣做乜時,呢個亞P又話:"問我都得"

最奇怪的是。。。。亞P問小石人點解唔講嘢,係咪同老婆嗌咗交。

小石人:"梗係唔係啦。"

昨天,該散工同小石人講,叫小石人跟某樣嘢時要搵埋佢一齊處理。

P又同小石人講:"我當你係自己人架。"

!!!!!!

佢哋呢間公司喺呢單嘢上係得3個員工架咋,重要其中兩個係散工。

月供股票-換🐎

 上次嗰張超高音喇叭,小石人知道我見到覺得好治療,佢話而家影微攝會嘗試捕捉一啲令人看了舒服、有感覺的構圖影像。

話咁快供埋5月份就兩年,供煤氣同匯豐作收息用途暫時賬面成績當然乏善可陳。上次趁中移動跌落低位供咗少少,雖然呢種咁嘅供法係唔方在真正低位入到,但好過我在它跌至穿$40時吽晒咁,乜都冇做。。😅。

昨天沽咗大部份匯豐,餘下一些碎股,作價$48.6,虧咗蚊幾。在下個月停供煤氣,全數轉為供1044。

再睇吓開始月供當時的帖文,有位網友話要嚟供亞婆股,事實我真係開始變亞婆。

有一次搭電梯,一個6、7歲男孩見我啲手機亮著,佢好心同我講:"亞婆,妳啲手機未熄。"

咁我哈哈兩聲答:"我特登唔熄架,你叫我做亞婆,係咪因為我有啲白頭髮呀?"

可能佢聽到我把聲唔似亞婆,知道撞板,答完:"有少少啦。"一開(車立)門就走得好快,開開心心咁玩盪鞦韆。

講畀老公知,佢笑說我冇鬧佢。

咁佢都係一片好心提我,佢睇到覺得咁樣咪咁樣,事實我真係年紀大佢好多嘛。鬧~令佢對女人有陰影就唔好啦。

筆鋒回眸,錢嚟得急和多,背後風險我相信成正比,而且各有因緣,唔會羡慕。

月供呢壇,看似仍在不利情況,我卻相信將會為我帶來安穩的收息途徑或高位沽售獲利。

事關我耐唔耐先睇個巿,而且遲啲未必有足夠心力去處理財務買賣事宜。

滅口

震耳欲聾退三步

道出原委遭滅口?

今天很想跟小石人一起到工作地,

我驚佢俾人滅口。

事源佢講出咗幾樣佢工頭做工程時的錯處。。大嘢,更好的做法是可以省回好多工程成本。(係個工頭攪唔掂時問小石人的)

昨天據稱佢公司又大地震辭退了很多人。連平時同個工頭貌似好關係的都炒咗,事前個工頭突然對嗰個人諸多挑剔,可能就係起皮的先兆。

老公又提到嗰個工頭好大聲,為咗保護耳朶,呢個人開聲前小石人而家會退後以防被獅吼叫震到。

我:"使唔使縫對兔耳仔俾你包住個頭,示意佢知你對耳尤如兔仔咁靈,唔使講咁大聲都聽到。"

小石人:"要喺頭盔上開窿先可伸對耳出嚟。。"

兩公婆狂笑中😄😄