銀債·斷食·無妄之災

翅毛的悠閒。因為剛出浴完畢。

 

享受沐浴樂趣,個樣幾冧。

爛翼笑天使。不是同一日影,呢張較早前攝。

三張都影得好靚有特色。

呢幾年也有認購銀債。

前兩年都係喺富途處理,開咗戶口,之後自己在app扲扲吓申請非常方便。

今年因為某原因,去渣打處理,在該銀行未有債券戶口,就多重手續了。連續去咗3日,自己名部份先處理好。簡言之,平民戶口就要輪幾日還未計夾雜咗週六 日。優越理財呢,自搬居後一路都冇轉客戶經理,所以佢哋點我返舊時嗰區做。靈機一觸話:"我要換客戶經理",見個接待緊我嘅職員眼神一閃,就話有得做。預約第二日兼開埋債券戶口進行認購。

今晚再著手處理伴侶嗰筆,進行中。

呢排發生好多事。

身體唔舒服,前嗰排搖完機做肩倒立,做咗幾日後試圖挺直腰,點知感覺到內部啲肉似支撐唔到,有撕裂感。跟住內臟痛咗好多日,呼吸困難。過咗好耐先逐漸好返。

之後雙腳腕圓週痕癢,令我聯想到幾拾年前"濕🔥下沉"(醫好我嗰個醫師斷的症)。是次真係的起心肝做咗4日斷食。自對上一次斷食後我沒有忘記持恒,這些年間試過大概4次,美食當前,每次都只是做一日就貪食了。

今次做完幾日,腳就冇痕嘞。內部啲肉不時有痛。(現在冇事)

原本買開蔗汁嗰間舖唔賣了。而家揾間好似佢即榨的-難。

上星期某日食完晚餐,過咗約兩小時,個胃抽筋,非常痛楚。小石人好擔心我。有伴如此夫復何求。好彩有佢喺我身邊照顧我。嘔咗4次,黃膽水都出埋。佢問咗我幾次去急症,我答:"去到啪止痛止嘔,現在家嘔到出嚟長遠對身體好啲。"

痛住查吓有可能乜嘢因由。從發病時間估計係金黃葡萄球菌引起。懷疑出事嗰樣食物我食咗好少。只嘔冇肚瀉。。。胃非常非常痛。痛住瞓著,睡夢半醒期間見到老公望住我同不斷幫我按相關穴位。

第二朝醒咗冇樹lu。

確保平安後先掉雪櫃食剩嘅疑似有問題食物。

斷食記錄6~已復食

 小石人曾告訴一舊同事PK有關我不時進行斷食,

他:"其實食嘢好開心架。"

👻唔知男人有鬚。

個個都想餐餐美食,

有啲人慈悲;

有啲人想身體更健康;

有啲人年紀越大根本食唔落咁多。

今次斷咗十日,在上一篇帖文當日已復食。

今次比上次做得好,

這幾天有頭痛頭暈反胃胃氣身上紅疹漫延,昨晚更是痕癢難耐。

完全做唔到操勞嘢,沖完涼氣喘如牛,呼吸困難。

今天有橙色(似金屬質)便,就是這次斷食的其中一個成果,排出可能粘附著腸內壁多年的廢物。

四日半都是飲丈夫為我預備的不同果汁。

蔗汁(買)

西瓜汁

蕃茄汁

橙汁

椰青水

鮮榨,呢兩日佢整定畀我先出去影嘢。

今日碌咗條youtube片,係西藏生死書以廣東話讀畀聽眾聽,啱晒我。

斷食記錄5

 為免唔記得,短短哋都要寫幾句。

第八日

排泄~清咗

又係狂睇飲食資訊,睇咗當食咗。

第九日

頭痛嗝氣反胃想嘔胃痛身出紅疹痕排返深色液。

兩日都係我餵FA~

晚間我問佢可唔可以用外賣木羹餵吓。我突然記得有段時間我餵FA~都咬我,我係用金屬鉗同膠羹畀蔬菜頭佢咬同餵佢(而家想返用膠羹唔係好方法)

之後請佢餵水,小石人都肯。

有時都唔明啲食肆,有間懷舊菜成人搵飲食有啲知明度嘅人去試菜做宣傳,但睇openrice食評啲客就話佢哋服務態度又衰到不得了。

斷食記錄4·誰是兇手

 

本來餵佢食香蕉,畀佢咬到小石人手指流晒血。

老公話以後唔餵FA~

我幫老公處理好傷口後,喺🐦面前掉晒啲蕉落FA~紙都唔畀鳥食。圍封。

老公話我好嬲,我話要擺姿態警告鳥不要咁做。

斷食第七日

胃痛。

斷食記錄3

今朝雲景好靚。

呢兩日清風送爽,舒服極了。

第五天

佢買咗青檸整咗三次青檸水畀我飲。

講起又奇怪,反而呢兩日精神過前兩日。

橫豎無聊,睇吓富途啲牛友講嘢貼嘢。

巴巴:原來有人係成四球幾買落一隻股票度的。短炒,十幾萬至幾拾萬上落閒閒哋,又有獲利清倉過球幾,之後當然又係再買返。

唔太記得身體有乜反應。

淨係記得幾開心。

第六日

午夜起來下體流濁。

有胃氣少少胃痛。

久違~有便😁(舒服)。由斷食開始排的液是鮮橙色,有次鮮黃色有泡。

日間望吓雲。

佢又不同時間按要求沖青檸水畀我。

亞FA係唔com撈嘅雀仔,呢排我少餵佢,都唔識對小石人先生友善啲。(佢真、唔虛偽)

今日我出去同佢溫馨時刻,放條毛巾鋪喺我大脾,坐喺防潮櫃方木上,佢就會便一便先行嚟我度。有時會任我摸,有時就越咬越大力。(佢lur飯應咁過嚟,之前梗係過嚟就有嘢食啦。)

今朝我手放喺佢小腿,叻叻妹用喙輕輕叼住我手指搬開,再行去彎彎(樹枝)刮嘴。之後又行返過嚟上大脾。不過都未平伏到忟憎心情,作勢啄我。

我:"落去。"

無謂大家都危險。

晚上小石人想餵佢,佢似強盜般穿過被袋簾由高櫈跳落木板突過雀頭出嚟猛力啄塊木板。

小石人攞住腰果畀佢睇到:"咁你食唔食丫?"

佢速步catwalk去彎彎再向前爬去搖搖(樹枝),欣悅可愛地叫食。

😄😊

舊照

頭先又睇吓富途商湯,有個人會成日出圖然後自己加條股價飛天的線。一日出幾次。有其他牛友叫佢唔好再畫喇,次次畫親都係跌。

成個下晝狂睇Hoy煮題cook,美食多籮籮。

今日又係好開心。

 

斷食記錄2

趁重有啲精神又寫吓先。

第二日

腰痛,老公在身邊確係唔同,有按摩服務呀,富途牛牛嘅頸枕就用得著,仆轉個人塊面都呼吸到。

搖機時只要像布偶公仔咁,搖完十分鐘佢幫我擺手另一角度,成個公主咁。

咁我當日有精神睇晒上回提及筆者女士嘅歷奇人生,香港藝術工作室同法國南部藝術車兩邊走。遇到許多許多人,以佢過來人經驗講吓點解港女愛洋腸,外籍人士又點解同醜女在一起。重有其他我哋一生人都冇經歷過的。

第三日

胃痛

有將尋日我睇的撮講畀小石人聽。

第四日

仍有胃氣痛。

今日停水。睇過通告都唔記得。

佢講完冇行動。

我即時留啲水洗手,洗手對我好重要。摸亞FA~前後都洗,打個乞嗤又洗。

日前佢有落附近叢林搵吓上年隻過境橙頭地鶇。我叫佢去吓。唔lu,原來佢已約咗人去將軍澳影嘢,多姿多彩。

到下午四點幾有人撳鐘,我冇應門。

到六點幾未有水。通知佢食咗嘢或買外賣回來。

佢返嚟知道原來人哋四點幾整完,撳鐘冇人就唔開返水。

小石人認為,閂咗人水,整好就自動要開返畀我哋。

過咗一陣,我請佢埋嚟。

我掃住佢背講:"你啱。佢亦錯唔晒,佢以防住戶開住冇水的水喉外出。係我唔應門,我唔啱。不過成四日冇食嘢,而且我平時都唔鐘意應門。😄

佢順返晒,人哋開返水有唔該人哋。👍

黃昏有精力都留嚟沖涼,之後,左頸肩扯住痛,呼吸有點困難。同佢講,似係瀕死預習。

 

斷食記錄1·買銀債

驚慌鳥,又一佳作。昨天佢去青公影的。

10月11日

斷食第一天,清吓啲信件。

又發現自己需要妥善準時處理啲嘢。尚待改進。

身體冇異樣反應。

當朝先知原來係重陽假期(快活不知時日過),上網攪銀債。

老渣:

搵極搵唔到網上認購路徑,又係打電話問資訊的時候。

小姐答:如果佢有彈個banner出嚟就有,冇彈就要親身去銀行辦理。

碌骰仔feel,我個版面登入一、兩次都係冇。

由於是日假期,下星期一我已經斷食第四天,有冇咁嘅體力去辦呢?

選擇1:到時睇吓情況請老公陪我搭的士去處理。

選擇2:唔斷住,星期一攪埋先開始。(唔想揀,因蓄勢才發,斷咗就難再斷)

買唔到就算?

再登入南商:

話說最近佢哋轉咗成個版。我登入亦用唔到個密碼器,(其他功能時又要用喎)。可選一次性密碼登入。

對於60,要適應新嘢而家摸吓摸吓還可以。佢竟然冇咗不同戶口合共存款總數。係要自己計返外幣匯率折合港幣金額。(定係我未搵到?個路徑)

咁股票價位都係日日分分鐘浮動,佢又顯示得到(明解係大概數額)。

我亦搵唔到買銀債的方法。因為用呢個戶口買唔係首選,所以唔花時間問嘞。

富途:

撳咗一、兩次就問我係咪確認買,比原先想買的金額少咗,佢咁方便好用就幫襯佢。上次買綠債都係用佢。買咗坐艇接近3年,下年5月埋岸。

本來想預留多啲現金喺呢度買股,事關佢手續費平好多。但又唔想擺多過50萬太多。

銀債:安心辦妥一件事。播種3年收成。😁多多少少都叫做參與過。

結論:簡單方便易搵。做到生意的其中一竅門。世間九x九懶人。

同場加映,白🐎黑係粗口。純情勿拉下看喎。

細個時,身邊總有人會喺我哋面前講粗口。有時係老豆嘅潮洲粗、男友、亞哥。

所以我倆都知有呢個說法。

但係句嘢點解、同點解同白馬拉上關係,好多人係冇深究,人講佢又講。

上網查都係不得要領。多數只係話返呢句嘅意思,但點解會扯上隻白馬就冇講。

摷到一個堅得意嘅blog。呢位女士第一篇網誌就係話佢亞媽兒童故事係講咸濕故仔畀佢聽。佢6歲左右喺平房花園聽到佢母同母女友喺屋內傾偈又係粗口連篇兼聽咗會笑的咸咸濕濕對話。

最最最前衛,呢位女士筆者係以藝術為職業,原來佢同另外一個男士,喺Covid期間,冬天去過尖咀幻彩詠香江平台位置做過一次行為藝術。

男同女全裸體只戴住口罩。

相片貼埋喺網綕。

而白馬黑喺佢網誌都解釋得較清楚。

烏x瀡瀡(音sir)

我諗同隻馬冇關,只是讀音較順口。

 

終於的起心肝·明天開始斷食

 近期極佳作~

食蟻的,有啲影者拍到佢喺一啲樹時保護色到近乎隱咗形。頸圖案色澤似枯木橫切面。

如題,真係好不容易才決定再斷食。期望今次守返好紀律處理得好啲。

明天有精神要安排銀債申請事宜。小石人問嘅問題,都盡力解釋畀佢知。怕且財赤政府暫時還可以按承諾畀到三年約4釐息。我都考慮咗好耐,睇吓股巿環境先扑鎚。遲啲息口逐下跌就冇咁化算。

又完成一次斷食

20/11/2023

由開始斷食嗰一日數到而家大概12日。

斷前覺雙臂內凍冷入肉,好似作感冒癥狀。胃痛。流液。左面頸膊冤痛。

笑唔出。有件事發生咗覺得好無奈(B,暫時唔想講,留個暗號提提自己係乜嘢🌳)。

有唔舒服最好就係內在自我復修。

如以往,一念斷食,胃氣就開咗掣咁不停吐吐吐地清出嚟。好舒服。

最好係去完解首後就斷,因為之後唔夠氣唔夠力推出嚟,隔得耐再有下一次同可能會比較辛苦。今次又係好好,期間去到兩三次。

頭一兩日做到簡單拉筋(hea)。搖機頻密。有用按摩油自按頸肩。沖暖水袋暖身不同部位。

打吓電話叫外賣畀老公做晚餐,叫到啲舖頭人s認得我把聲。或浸定菜等佢返嚟自己煮。

餵到FA~換到花紙。

24/11/2023

約第五日,請老公買青檸畀我,跟住下來每日都有飲青檸水~唔加蜜糖的。

26/11/2023

請老公買薑磨薑汁畀我沖水飲,暖身。內外都可恒氣活血。有屁。

29/11/2023

近期比較開心的事:我的中學同學11月全個月去咗日本,因為佢11月生日前我有問佢幾時方便食飯。佢話等佢12月返港先。佢...成個行程一路影啲好靚嘅相畀我update住。❤❤❤❤❤。

老公28日話下年想同我去日本。

29日重有體力可以上網兌日Yen,趁"抵"換定先囉。

(又有入吓貨~股)

嗰幾日已開始瀏覽不同食嚐舖頭。

30/11/2023

佢買蔗汁畀我飲。之後飲椰青水~好口渴。

今次完全冇守復食原則,過程大部份時間都夠精神,總之冇唔舒服冇掛掉。

期間:

不時有胃痛、畏冷、頸膊酸痛。

排到啡啫喱狀物同清到啲對身體有害的液體。

今日笑得出~

頸肩舒緩了好多~

見到網友們仍常來探我才有動力寫這篇。

 

終於再斷食3~曳

 斷食前同小石人一齊去處理銀行事宜,之後我提議去有佢兒時回憶的懷舊冰室。佢話細個企喺卡位開心享受美味紅豆冰。有次試菠蘿冰唔對胃口,想再叫。。。

邊有咁容易,畀奶奶鬧,快啲乖乖飲埋🍍冰。😆

我哋幫襯嗰日腰豆眼瞇起咁飲杯冰,笑得天真爛漫,好可愛。

復食,

之前提過今次復食界線模糊,大前日就已經食咗兩箸丁麵同一啖腸。

尋日就食咗細半碗丁麵同幾件刺身。

今午重食海南雞同炒通菜。

延唔到長不特止,還要受唔住誘惑。

而妹下生果同飲吓蔗汁,既在過程中冇咁辛苦,又有少少體力。

今次晚間睡眠較之前好。平時斷食係有夜裡眼光光的。

第9日同第10日都有血糜排出。食咗嘢之後又係冇排了。

便方面也比以前潤暢,5月18日同19日都有。

身痕同平時一樣。。。已維持了好多日。

今次斷咗幾多日唔準確的。😁大約5月6日~17日(以17日晚食丁麵計)。

喺斷食中、早期,面色烏黑額紋多咗,有一次出房睇亞FA~時,佢震晒同有啲驚,唔知係咪以為我就嚟唔得。

我諗動物、小孩們都會感應到親近人的情緒和感覺。

約三日前見到我,佢翼就縮吓又伸吓,同佢比較要好時佢係會翼展同舉起雙翼,我覺得係向我敬禮。呢兩日有向我salute。

終於再斷食2

覆自由兄:

嗰間大澳甜品店買的椰汁糕,遊覽吓臨走前喺大澳大會堂旁的公園歇息乘涼嚐糕點。

5月11日(四)斷食第六日

救命青檸水出場,非常口渴呀。然而就係飲唔落齋水,加咗青檸汁就飲得落。都有胃痛同反胃。

尿液是橙色的。

之後每天都有喝青檸水。經小石人再關心下有飲蔗汁兩天~美味。

第八天

欣悅,排到暢順便😄

晚上吃了半片柑。

第九天

晚上有"妹"了幾丁方芒果。

復食與未復食?今次界線比較模糊。

想延長一些時間,適時也喝喝一些流質新鮮飲料及吃少少生果塊。

第十天

舌苔厚黃、 口苦。

今晚想喝些椰青水。

 

終於再斷食1

 小石人開工前著要5月4日往大澳遊一轉,遊記有相片易勾起記憶,拖住先。呢碗係當地甜品店美食。

5月6日(週六)

覺得有啲喉嚨痛,通常有唔舒服的癥狀就更有鬥志去斷食。想講講,唔係有超多好處,正常人唔會攞苦嚟身的。好彩伴侶非常支持,冇潑冷水不特止,佢重由第二天開始,晚餐主要食生果。因為前一天買咗美味鮮搾蔗汁,又唔係規定乜乜乜,所以第一日有飲咗杯幾。一話斷食唧,身體已收到指令,腸胃不停嗝氣出體外。尿液好快已經係茶色,內在機能做緊嘢。

斷食首三天都是正常活動,午間餵到FA~換到FA~紙。期間唔知幾時開始左手前臂內側有笪小籠包(底部圓周)咁大的紅疹。

第四天早上攞咗兩粒黑提mui吓解渴。當晚開始胃痛 嘔乸喉嚨的酸水 腰骨好似斷咗咁痛。是日睇咗好多飲食視頻。灣仔都有啲店舖可以去幫襯吓。

有做吓搖機。

今天第五日,開始乜都做唔到。呼吸短促。老公話驚住係警號,我諗冇事卦。小石人呢兩日已經問我使唔使買蔗汁。都忍住話唔使,買咗就一定飲。

因為記唔到咁多日細節,寫住先。

多謝好網友們,我呢排冇出文都嚟探我。still alive。

斷食~今次只能做7日(更新2)

唔知邊位網友咁有心,翻閱我上年四月的破紀錄斷食網誌。Thx.

我睇返原來同今次的反應大同小異。

Day1(14/10/22) 身體如常,重可以煮晚餐畀老公食。

可以放亞FA~在FA房走動。

我有便便(正)。

Day2 老公問我有冇放亞FA~,我話冇能力處理。

因為要清埋啲菜同餸料,晚上只能完成一半晚餐,其他佢自己攪掂。

攰。

Day3 冇精神,有嗝氣,左面胸口乸得緊。

是日週日,老公放假但約咗雀友去西貢影嘢。

未出門前放咗FA~一陣。

佢同朋友食完晚餐先回家,幾好丫。有自己的活動。

Day4 胃唔舒服,反胃 有痰擁擁貢。今日冇放亞FA~

Day5 唔掂喇,亞FA~唔滿足只是耐唔耐我坐喺佢面前探佢。暴躁 磨👄得厲害 一上唔到我手就行開,嬲。唔開心。養寵物要陪佢,自由度又要看佢表現而定。佢已經好黐我,一放隻手喺佢附近就起腳想上手(玩嘢時除外。)其實呢次斷食就係成日諗吓點安撫佢。好小器架,耐唔理佢可能破壞彼此得來不易建立的感情同信任。

日內有飲兩次青檸汁。

Day6身體反應同上一日差唔多。飲青檸汁。

放咗亞FA~同平時跟牠一起做的活動相約(減少部份次數)佢又笑返。

Day7飲嘢同上。反胃想嘔,7日唔食嘢都有嘢嘔到(泡&痰)。舒服咗好多。

收到二姨甥女Whatapps話由外地返咗香港,佢大概7年前嫁咗外地土生土長的我另一位親戚,在外定居,育有兩兒。老公話她對我幾好,會搵吓我。我:佢細個時我成日同佢幾姊弟玩board game的,有畀時間陪伴。

要提早復食,因佢11月頭走,約咗10月尾見。

復食

Day8今日 鮮菠蘿十片加薑三片,vitamax 打完再隔渣的菠蘿汁,嘩,好好味呀。

今早有便便。

黃昏時份,亞FA~大嗌,我搖緊機,第一次嗌冇理會佢,整慣咗一叫就給關注咁有可能成日嗌唔停。當佢嗌第二次就出去睇吓佢係咪安全。有時條腳鍊會cake實樹枝令佢吋步難行...只見佢爪住鋁窗開關手柄,唔知係咪呼喚緊啲折衷公。見佢安好都在FA~房中坐吓陪佢。

突然,隻嘢大嗌數聲,由窗位置飛起至走廊著地。又急急腳爬上紫膠椅(佢個竇)。飛射啲C落報紙。教佢如厠訓練,第一次見佢主動返指定地點攪掂,真係好叻。

講開飛,佢好似最近先知道自己識得飛咁,平時好似企鵝兼宕蕩咁行,由高櫈落地又咬爪住窗簾。

晚間有新鮮清甜蔗汁。

Day9(22/1022)

          青檸汁

          橙汁

          蔗汁

Day10青檸汁

           蔗汁

           橙汁

           椰青汁

黃昏亞FA~又嗌。

好想食1/6包丁麵。。。。。

Day11凌晨就有陶土色便便,身體感覺舒服。

青檸汁

昨晚小石人回家話我哋幢大厦要進行強檢。咁我當時就立刻告知我姨甥女新消息,請她自行決定月尾重嚟唔嚟探我。

然而,我上網搵咗好耐都唔覺有我哋需要強檢的通告。。。

是日早上我哋去做檢測,途中我又對佢講吓近期喺迪士尼頻道睇的戲。佢對睇戲好揀擇的,差唔多次次我講咗啲劇情畀佢知,再叫佢<試吓啦>佢先睇,甚至有時聽咗冇興趣就唔睇,奇人。

回家後飲咗500ml橙汁。

自己剪頭髮,又幫佢修吓啲秀髮。

一齊睇咗齣驚天動地(Con Air)。

飲蕃菠pink。

開始身痕。

食咗一小碗魚片粥。(今次做唔到斷1復1)

是次深感安裝智能厠板同雨淋撳掣花灑物有所值,好虛弱時仍能不太費力地自行清潔身體。

晚上收到姨甥通知,佢話唔冒險了,因為離回佢家日子好近。

我回:明智決定。

老公話咁咪無端端早咗結束斷食。。

我:就係提早復食今日先落到街做檢測。👍👍👍

 

破紀錄接近十二天斷食

趁未唔記得晒,係時候做下半段記錄。好彩醒目,喺體力許可時做咗前半段筆記。

話說六日後那幾天仍然有反胃同胃痛。好靈驗地第七至八日下體又排出一次一些點狀血糜後就是黃色液(估計是藥物顏色)。由於每次斷食都要等咁多日先開呢個檔案,於是想堅持排得幾多得幾多。再過咗幾日,小石人說:"老婆好似唔想復食咁。"係架,因為據以往經歷一食返嘢,呢個檔案就閂而唔再排西藥。開咗新檔案係尿液深琥珀色咗好幾日,又係一食返嘢就唔排深色不特止重好清。

今次長咗日子,啲水再難飲都要想辦法飲。買咗青檸用半個果的汁開水,又真係易入口咗。第一啖就嗆親。要將下巴收近頸部,維持此動作慢慢飲水就可避免以上情況。

那幾天人當然是憔悴虛弱,舊患頸腰痛發作。

另一任務是開始張羅復食所需。由於附近沒有鮮榨蔗汁。老公又替我跨區尋找。

今次又嘗試未復食前飲一啖青檸蔗水,試吓會唔會唔再排毒。結果係若真頂唔順都可以濕吓口,甜一甜。

以下都係我個人會發生的情況:

舌頭苔厚酸與苦

頭痛失眠舊患來

視力模糊後清楚

大汗腺排肝酮物

胃反畏冷髒穢除

好處:

1.即時瘦咗一個碼,結婚戒指戴起嚟冇迫住。

2.皮膚最嫩滑時係十一同十二日,一食返嘢就唔再似剝殼雞蛋般幼滑。

3.今次排便處理得好,清到粘稠橙色宿便兩次。

4.由於有機會畀內外痔癒合,有好轉冇流血。講開呢樣,近期睇到蘇絲黃的視頻,佢好細個已有蕃鬼荔枝咁大的痔瘡。醫生唔建議佢做手術反而勸佢要注意飲食。後來佢食多些蔬果之餘,更在家安裝了可沖洗小菊花的坐厠改善便秘情況,話好返。我都打算裝修時添置這坐厠,斷食時應該好有用。

5.斷食期間有耐唔耐做吓按摩 搖機pro therapist 五行功 鬆頸椎同尾閭 ,今次頸肩腰痛楚有好大緩和。之後冇保持良好姿勢又會痛返,呢樣我要加倍注意。

小插曲:

第九日有斷斷續續起身煲紅綠豆粥畀小石人表愛意。喺我斷食期間佢每天自己煮晚餐獨食,見到我唔舒服佢都唔開心但佢好支持我想達成的目標。

佢同屋企人去拜山,佢亞嫂知道我用呢個方法排毒復修身體機能,就表示乜唔係食啲嘢入去排嘅咩?復修乜嘢?

喺春天,呢度附近有隻鳥會由午夜至凌晨3至4點不停咁叫,我估可能係猛禽雛鳥叫食聲。有時會加上群鳥鳴叫,非常熱鬧。瞓唔著的日子份外感受到佢嘅生命力,大家都唔使瞓嘅。。。

一晚上有昆蟲爬到我大腿,漆黑間準確地用沾衣指將牠擒拿,當時背部貼滿pro therapist電線,就推醒隔離請佢幫我放生隻綠色甲蟲。伴侶真係好品。

復食

今次都做得好好,接近1:1復食期。全部飲果汁。

蔗汁

西瓜汁

橙汁

蕃茄汁

每朝小石人早上6點起床,榨定晒不同果汁放入存氣保溫瓶畀我日間飲用。初期每次約飲200ml,慢慢飲。其實成日都會覺得好口渴,有一次飲多咗個胃漲住,此經驗又再一次溫和地提醒我要限量飲用。

中期除上述果汁外,加入:

新鮮椰青水

(佢買咗個專開椰青取肉的工具)

椰青肉加菠蘿打汁

菠蘿蕉

蕃菠pink都好好飲

(蕃茄菠蘿出來是可愛的粉紅色)

後期有加菠菜苗落不同果汁

生腰果露

後來發覺有時體內寒氣間中侵襲,就打定一些生薑汁加入果汁,日間飲用以3茶羮為上限(我覺得最適合的辣度),解決咗寒氣情況。基本上如果喜歡薑味的人,此品係果汁百搭。

今次復食期間都如常皮膚痕痒,身體多處都起粒粒,又有小水泡。所以搲痕唔能夠用指甲,只可以指頭掃抹以唔抓破皮膚為重要。

之後又加多一樣肌肉疼痛,初先大腿跟住連小腿都係,然後腋下附近淋巴位。

每次斷食完我都可以維持一段時間生機飲食,今次比之前長,而家日間有兩餐有時一餐果汁或水果。重成一個月冇飲汽水同咖啡。

狂玩開嘅手機遊戲又棄坑lu。

 

斷食第六天

小石人作品

週日佢同亞虎去攝獵,

影到兩張一對鳥親熱相好開心呀~

生日後第二天就開始今年首次斷食。

第一天如常。

第二天喺午間通訊話請老公晚間幫我按摩,佢好爽應承。點知晚上按完,立刻五臟翻騰,好唔舒服。

第三日佢問我:"平時妳三日都冇事格.."

我沒理沒氣咁告訴他,"咁今日我咪又係可以洗晾收啲衫。"

其實頭先睇返上次的斷食日記,都係差唔多有唔自在架啦。

今次做得好的係在斷食前一日食完嗰舊生日蛋糕,請老公沖普洱茶飲,轉頭就有naturebigcall。

事關之前每次都過咗好多日先可以。咁就非常困難,因為冇食咁多日嘢,唔夠內氣推啲廢物出嚟。重要沖涼呀咁,好le hea。

第四日夜晚瞓唔到眼光光。

第五日又順利排一次lu喎,正。

晚間就成日反胃,跟住重吐咗啲液體出嚟。應該係好事。

我本來想提佢買兩件蛋糕就好,不過都知佢會買成個架喇,明知嘅就慳返啖氣免受拒絕。大家都諗到,一個蛋糕食咗兩件之後,一個人要食幾多日先可以食晒呢...

😄😁

中段記錄完畢。

 

斷食九天的突破

現在差不多每天都喝椰青水解渴。椰青肉菠蘿加青檸汁攪拌成的飲品清新可口。

六月下旬,一天晚餐時左肋內有異樣,呼吸時有痛感。立時躺下,過一會兒,發覺該部位好像有氣在內。當體內的氣體舒緩後,痛楚就消失。

翌日開始不進食,今次下了決心來一次較長日數的斷食。

由於自2013年起已做了不少次,練成近幾回斷食時的頭一、兩天都可如常活動而身體亦能自然適應。飲水方面,量很少甚至覺得味道難喝所以不飲。

需要增加日數才可深入隱藏病灶達到顯著排毒效果。

第三至四天開始見真章。胃部很是不適,嗝氣及胃酸上湧。後期有泡沫及痰。

第七至八天,排出婦女陰道炎症時,西醫很久以前處方的西藥,這個情況某兩次斷食期間也曾出現過,藥物溶解成小粒狀態、有時血糜、甚至沒有溶解過原粒藥丸排出。小石人著我應該在網誌中記下,讓網友知道以作警惕。

期內,胃常痛。曾口苦、舌苔厚。以不同渠道排出體內氣體。

是次過程非常不好受,很多個晚上失眠。腦海冒出天馬行空的念頭。沒有飢餓感,曾有肉念。

活動:聽視頻。用搖機、pro therapist、五行功協助入睡及緩和不適。

小石人:"老婆,點解我叫您唔應我?"

我隔了一會答:"唔係唔想應你,只是我咁多日冇食嘢,尤如置身空氣非常稀薄的雪山中喘氣,叫我點有體力答到你。。"

沒有斷復日數1:1。復食初期飲用水菓汁,很滿意。到復食後約第七天,吃得太多東西,午夜時胃部頂漲及超痛,我覺得自己在當刻會一命嗚呼。。。幸而小石人替我做手療按著患處,很有幫助緩解。

又感謝他協助洗頭洗澡吹髮。他說難怪以前人們辟穀要有人侍奉。

復食後又是"身痕"起疹多天。今次更是十指脫皮。

另一可喜之處是是次斷食期,小石人大部份都是吃水菓餐;又有自行洗菜和煮食,他表示也想期間吃得較清淡。

又,體會到瀕死時若身體受病魔折騰,是沒有能力念佛的。。斷食期間,老公有幾天在旁唸心經給我聽。另外,他差不多每天都有靜心(meditation)。我們又一起聽磐(singing bowl)調和內息。睡房就像練功室讓倆雙雙修煉。

原本我想進行十天,到完成第九天忽然很想吃東西(不是餓),多少天只是對自身有意義。。破紀錄和復修得更深入。

執筆前回顧自己過往斷食網文,既可避免重覆累贅又可細味循序漸進歷程,改變行文風格。

或者以拉筋作個比喻,很痛但對身體有益;定期為之就會適應而越來越有進步。

斷食完畢的獎勵~短期飲食選材較健康、肥膏驟減、面上斑色轉淡、皮膚嫩滑、更有回春奇效。

選對朋友

大館的THE CHINESE LIBRARY

早前跟Poly舊同學午聚,本來是斷食期間,如果只是與在港的相約,我會"鴨腎",事關呢幾年每年兩次的斷食都只能維持3日,太多誘惑了。身邊的另一半是很支持我,但要經常見人好滋味的吃,或者是我不進食時他餐餐焗🐷扒飯,又於心不忍。。。

今次一知道居澳門的舊同學專誠到來會晤,我就盡快復食了,少見面更為珍惜。

話題離不開近大半年的社會運動,我平時在一群人飯局時,大多數都是不多說話。套用其中一位同學丈夫的話語"I"個性的人在人群聚會時是忍受著社交狀況。我未至於忍受,但總是未能找到大家都有興趣的演繹方法和話題。

今次比較深刻的感受是我雖然只有五隻手指數得完的朋友,對我來說她們是品格和質素都很高的。

有一位已申請移民中,她跟丈夫更曾經兩人去過禮賓府舉標語喊口號歷時幾個小時:抗議林鄭冷血管治將香港淪為戰場!

(怨有頭 債有主 不滿意當權者時的正確做法 不願意活在夾縫中的明智選擇。)

另一位舊同學告訴我們,有一些被捕者是罹患自閉症或過度活躍症年青人,他們是該舊同學以前的服務使用者。這些患者容易情緒波動,激動時會不顧一切。

有位分享她妹妹情況,就讀大學一年級女兒由初先和理非遊行開始已積極參與,及後到情況嚴峻暴力升級,家人有勸阻她參加。到女兒堅持要外出時,他們父母就陪同女兒,一家四口一起,這樣最起碼能確保有突發事情時全身而退機會高。

當友人問及我丈夫的取態時,不諱言他通常不看抗爭者作暴力衝擊的新聞。

澳門表面年年派錢,歌舞昇平,背後的黑暗面縱然是我同學真人真事經歷也不在此敍說。

斷食4&5

分別在9/2015及6/2016進行兩次斷食，現時『功力』已可清水斷食八天之久。

打算一年閉關兩次。最難得是家母都發覺其對我的好影響，沒有再像以前般勸食，進行時就省卻了很多煩擾。

注意事項，記緊問清楚斷食期間有沒有非去不可的聚會，曾經試過因這原因而提早終止，有點意猶未盡感。然而，也不需務必達至預先訂下的日數，問自己身體的感覺，一切發乎自然是王道。

過程記述，仍是排出很多西藥殘餘，究竟妳以前用過多少，沒完沒了地排....但當看到能夠排得那麽徹底又心裡暗暗高興。

記憶中第4次斷食除了出宮困難和作嘔之外，沒有其他不舒服。

意念是強大力量，第5次斷食期間練習五行功之排毒篇，可以幫助不同部位排出毒素。

是次更出現以前曾經因灼傷、蚊叮已癒合的傷口重新脫皮、自動損傷，再癒合一次；嘔出墨綠色帶很多小菱形黑色物體；更試過眼角盈眶，有一剎那瀕死的感覺。。可能我太文藝了^^

斷食完畢排毒過程持續，腳腫、全身痕癢了兩個多星期。

我總是覺得在有能力時好好面對和處理體內積存之毒素是養生上上策。而且每次完成後機能年齡逆轉。。。『真    係    咁   神    奇   架』!!!!!

今期的收獲乃皮膚明顯細緻如去殼雞蛋，還有就是內氣通關，何解?

事源近幾個月開始學習太極，師父看得出我進行斷食前後的分別，站樁時氣血流動情況大有改進。看來他也對此道躍躍欲試﹗他還打趣說我應該將經歷編寫成書，分享經驗。

一樣不易令人信服的事情，不用費唇舌去解說，明白的人自然會明白；懷疑的人看到以身作證的果效會相信；不相信的人就讓他們不相信。

斷食3

很高興有不少朋友也對斷食感興趣，為看官進一步揭開其神秘面紗，是時候對這次活體實驗行動作出總結了。

三次實踐當中，這次心情輕鬆喜樂，是大滿貫地達標完成﹗

除了第三、四天如一般常見情況類同有些頭痛而獨自呻吟了幾聲外，得到的收穫可真豐富。

1. 排出大量胃氣；

2. 透過皮膚散走體內不潔，最有趣的是在第三、四天掌心是持續『黐蠟蠟』的.....

3. 如過往一樣新陳代謝時有強烈的西藥味；甚至有呈水泥色的條狀物<唔知有朝一日會否排出鐵釘呢....哈哈哈>；

4. 虎口位置曾顫抖多次；

5. 頸榷位置卟聲四響，及後放輕鬆了；

6. 大部份的日子裡都能做到拉筋、舉啞鈴、打坐冥想、遠紅外線床、按摩腹部、清除雪色舌苔、家務。

復食期間虛弱無力屬每次的正常反應，所以若下次再進行時也會像今次一樣預留1:1斷、復食時間以恢復體力。

依次以流質循序至糊狀食物，選了橙汁、粟米汁、西瓜汁、蕃茄湯、粟米湯、麥皮等。

究竟是次本人只喝水而斷食了多久?   154小時是也﹗


重要提示:未有足夠相關認知者請勿自行進行斷食，復食為當中最重要的過程務必認真處理。

斷食2(4)

7月12日

覺得自己精神好少少，想做啲家務。

1 吸塵

2 落雨收衫

加埋呢日終於有便，好吃力先攪得掂。

平時輕而易舉的事，是日做完之後好似去到空氣好稀薄嘅地方咁，歇好耐先平服過嚟。

家人對耳唔靈光，要好大聲先聽到，同佢講嘢時我像啲妖要吐粒內丹出嚟咁，元氣用盡﹗

舌苔超厚同白，清極都唔乾淨。

又嘔咗兩啖嘢出嚟，前幾日啲水、泡係透明，今次就係淺啡色重有啲細小的渣滓。唔明，都冇食嘢咁耐個胃重有嘢？味似我哋醃的酸梅，唔通已經喺個胃發酵咗好耐？

我諗我個胃都好差。

睇咗個節目，原來紐西蘭有啲人專訓練啲狗嚟捉野豬。獵豬犬會包抄圍捕隻豬，追逐完一輪之後，嚇到佢呆企喺度，跟住個獵人就會揪起對豬腳將佢翻轉，再用刀將之殺掉。節目主持人苦苦哀求個獵人放過隻豬，基於獵人的『天性』，僵持咗好耐獵人先肯放。隻豬驚魂未定，好明顯流著兩行眼淚，好可憐。以前我食少啲肉，係因為想健康啲，但而家可能會再食少啲。