幾拾年手製銅器店年終結業

 約兩星期前看視頻知道呢個消息,

就問小石人有冇興趣買返個。

事關此舖附近一間似相當出名的粥舖多年都係向佢哋訂做銅煲整魚粥。皆因銅傳熱快,該粥舖試過其他內地製品都沒有香港老字號做得咁出色。

上星期小石人去開旺角,就趕喺下午6點銅店收舖前去到。點知閘上貼上休息一星期字條,又有另一張紙由一客人貼上搵佢哋修理個煲。

白行。

今個週一小石人致電該店冇人接聽。

今天午間同我通訊時話打通了,亦問咗重有賣畀嗰間粥舖嗰種煲,不過佢哋收下午4點。

咁為有我即時裝身出🐎。

去到該店,只見一個亞伯在替客人修理緊個煲。

於是我問個在店內聽電話的另一個亞伯。

佢哋係兩兄弟。

我:"阻你一陣,想買x記粥舖嗰種銅煲。"

一伯:"冇架喇。"

我:"我哋頭先打過嚟話有,你哋話今日收4點所以我由遠處趕過嚟。"

一伯:"冇架喇。"

只見店內的貨品真的所餘冇幾,有兩位顧客在目視那些東西。

當時我心想什麼大家都應該估到。

"係你哋話有我先趕過嚟。。。"

替客人修理煲的那位亞伯完成手頭工作。

咁我又唔心息又再問此伯一次。

二伯:"有呀。"

<之前應該都係佢接電話了,如果係一伯接小石人的電話,我哋肯定買唔到個煲。>

後記:小石人話接電話答佢的人都有遲疑一陣先答"有"。

佢隨隨由舖面走進內室。出來時手執單柄銅煲。

搵佢修煲嗰位客人好驚訝地說:"乜重有!佢讓畀妳!"

我就速速磅水。

臨走前好似聽到一伯話:"呢個女人好熟面口。"

包藏爛心的豆胚

喺灣仔的一間麵舖$80~90/斤蝦子麵超好味。

 

近期發現豆胚外表是乾身鮮嫩,卻包藏爛心。今日唔想影相,更唔想影佢個爛樣畀大家睇。

如果洗菜時發覺啲水渾濁同有細碎葉飄浮,咁就需要揭開菜苞檢查吓。其他如蓎蒿,都係嗰種表面仍好新鮮,但有可能菜的心部Up爛變黑。

奇怪是呢啲菜烚熟後可能未必察覺內裡已爛,係食唔出的。

當我摘走腐爛部份時,菜莖仍可卟一聲地脆嫩,真係奇。

唔鍾意浸菜青味,可以用水烚後菜水倒走,將菜擎水再放入煮好的罐頭忌廉湯內也是不錯的選擇。用呢個方法,小石人平時不太喜歡的菜佢都食到。

菜蟲好多時係壯烈犧牲,冇農藥的指標。

又再整餅·小石人強積金

近期第3次整蠔餅,

蠔仔用滾水淥一分鐘,

瀝乾水份後等一陣,待出清水再用厨紙索乾身。

一蛋一湯匙薯粉,

將蛋漿混合物分兩次煎。

唔懶得。

好有精神先獨立當小食咁整,

因為一味食物要用好多厨具,有排洗。

小石人今次有將成品上臉書,

即係對是次"傑作"的肯定。

佢話唔油膩、蠔仔唔靭,

好過屋企附近間潮洲打冷的外賣多多聲。

功多藝熟 用腦改進

^^

小石人新舊工作的強積金比較,

終於的起心肝開呢個台摷吓資料。

新嗰份工的BCT,佢對我說了好幾次話啲人講呢間強積金公司有得賺。我:"咁係乜嘢人講?"

粗略睇過發現:

BCT新公司強積金賬戶-

1.產品概覽的投資經理係其他現成基金例如富達、鄧普頓、景順。咁會唔會導致佢收費貴的其中一個原因,現成再打個過水濕腳費。。"冇答案"

2.搵勻佢個app、網上、甚至佢寄俾個客的產品概覽都冇講實際具體買咗啲乜。只給投資於香港股票、環球股票、債券等字眼。

3.部份又係由2008年成立將基數以最殘嗰年起跳計算,拉線令組合睇起上嚟好好賺。喺嗰年先開始入巿確係幾好。

東亞舊公司強積金賬戶-

1.類似組合收費較平。當然內容係有出入,唔係兩個一樣蘋果比較。將資金在巿旺轉去保守基金時,咁大家都係唔做嘢乸住筆錢等有平貨時再轉入高風險組合,呢間收費平啲,由2018轉咗做保守基金重有1.x%進賬。

2.東亞的概覧起碼在股票、債券部份話到俾我知佢買咗乜嘢。例如中海油定中石油,我會選擇前者。雖然都只係講俾我知少量百份比的資訊,好過完全冇。

今朝喺小石人部手機安裝咗BCT個app同埋將佢已有及將來供款都轉為香港股票基金。

週三我生日最好佢請嗰日假攪埋老爺在銀行的遺產承辦事宜同埋去東亞將佢啲強積金由保守轉去香港追蹤指數基金。

小石人:"俾妳洞悉到我會嗰日請假添。"

香港人應該習慣自己的資金一定有部份係唔知買咗啲乜。又或者買咗好似知係啲乜其實又係唔真正知。。。

人生如夢幻泡影。買樓時無端端會賺幾拾個,入股票巿場暫時賬面少咗幾拾又如何!

😊應作如是觀😁

強積金轉組合·再整餅

蠔餅~尋日整得唔好,今日再嚟過。

細切薑芫荽蔥

蠔仔用鷹粟粉洗乾淨,以滾水淥佢大概一分鐘,用厨紙索水。

做法:

1.先將加了胡椒粉的蠔仔用油煎乾身,仍有水出的話將多餘水份倒走。

2.兩隻鴨蛋打勻,加少許鹽同胡椒粉,加入料頭。

3.蕃薯粉一湯匙加少許水,待蠔仔煎至較乾身,將薯粉水攪勻加入蛋液

4.混合了的蛋液倒進再加油的蠔仔中煎煮。

5.完成一邊後倒進碟中,反轉半成品跣回加了油的煎煮器具。

這做法沒有炸般油膩。蠔仔出水令蛋液不能成形是昨天不成功的原因之一,所以今日分開先煎蠔仔而不是將所有東西混合製作。

^^

今天終於看看自己強積金組合,由全保守轉了50%至恒生中國企業指數基金,反正錢唔多,喺而家呢啲兩邊有權爆,主要金融股已下調的情況下,試吓無妨。

美妙的一天

佢話揸住嚟影有味道啲。

今日佢突然走入房請我跳咗part慢舞,真係估佢唔到變得咁浪漫,好開心呀。

小石人又主動提議我喺呢度分享吓佢花咗兩日安裝返妥當的氣浮臂。

儍豹主題曲我好鍾意聽架,呢條片係我個智能電話錄同收音。

^^

口罩消毒重用的謎思

今日我搵咗條片係一個女人做布口罩,我問如果我做咗佢會唔會用,佢答會。佢話見到藥房已將口罩價炒高咗好多,$520十個,約為N95嗰種,聲稱韓國製造。佢唔會俾錢啲人咁賺法。

傾開消毒口罩方法,諗到用UVled。連一次性口罩估計都行得通。查到有呢啲UV消毒產品但係已賣斷貨。

其實佢係識自己安裝UV燈的,咁我著佢自己買料整個消毒盒咪得囉。

今晚嗰間公司又話召集聽日返工了,呢個口罩使用處理方法係要解決。。。

^^

是日買賣操作:

買入

386 $4.2

778 $8.85

87001 ¥3.16

^^

東南亞風味的咖喱

料頭一落咗乾蔥香茅同檸檬葉就寧舍唔同。

1.香茅要拍吓佢,剪段。

2.乾蔥一半用油爆香,一半臨尾先落,一樣嘢就有兩種味道變化。

3.檸檬葉最多放兩片,多咗會好霸道同偏酸。

4.百搭配蔬菜、魚、雞、牛、豬、海鮮都得啦。

我哋鍾意配雞翼或肥牛。今次雞翼用啲咖喱醬醃過夜效果好好,入晒味。

做法一:

落油,依次序落料頭:薑乾蔥香茅檸檬葉蒜頭,煎雞翼(徹底解凍至室溫)兩面,加咖喱醬,炒香後加熱水蓋過肉類,加魚蛋。呢啲細隻雞翼煮約9分鐘(中途要翻),加乾蔥至收汁。

點解會冇薯仔?因為尋晚嗰餐煮肥牛時用咗。😄

做法二:

落油,煎切咗的薯仔(想快啲就切細啲),依次序落料頭。。做法同上,將薯仔煮腍。

肥牛我會用另外一煲熱水淥至九成熟夾起撈落啲咖喱汁度。原因是將肥油減少同控制到啲牛肉嫩滑度。

唔記得落椰漿喇。。。哈哈哈😆

Cooking manners

學烹調食物方面,我算係好好彩。

間教會中學有烹飪同縫紉課。

完成一樣餸/一頓晚餐的背後,夠竟係井井有條、從容優雅定亂晒大龍、負能量充斥,先係真正要研究實踐的功夫。

布:厨房內有:

(1)神聖的抹碗布

(2)抹煲具

(3)洗碗綿/布

(4)抹手布,非常重要,一個企理嘅伙頭對手經常乾淨乾爽。

(5)以前重有專用索生肉類/魚類水份的布,而家有厨紙代替。

初入門梗係揦手唔成勢,第二堂就要起鯪魚皮用淨肉嚟煲芥菜湯👻。

初中開始,因父做製衣生意,母要一齊去埋幫手,我雖然是家中最細,唔知點解我就要負責煮嘢俾祖父食。

祖父係商會秘書,不嬲都有佢第二任太太照顧週全,所以連煲水都唔識。佢太太死後,我哋舉家搬去同佢住。

單頭石油氣爐同火水爐,餐餐都要煲湯,當時實際攪咗啲乜我唔記得。印象中,祖父話我煮得好食。

咁我當然為咗解決"危機"係會睇嗰啲乜太節目。回想我認為佢覺得好食的原因係平時佢放工後7點就要食晚飯,我me more到8時許。。肚餓~乜嘢都覺得好食。

當一個人唔係好掌握到要處理的問題嘅解決方法時,重有人好似烏蠅咁在身邊團團轉,多數都會好忟憎。

有時用餐嘅人趕時間脾氣又差,咁又令我緊張同唔自在。

最好煮完嘢個厨房唔會太混亂,有時得有時未得。

兩個有知名度的女主持,我都有收看佢哋嘅節目,令我引以為戒的是,煮食的過程千祈唔好學佢哋對人咁惡。

最忌係將啲食物器皿掟嚟掟去"乓擰嘭冷"。

而家我多數會開住音樂煮嘢、禪煮、站樁煮,總之灌注愛心親手為小石人和自己預備食物。攰就唔煮。

次序步驟大致係:

乾手、需長時間先做,如煲定熱水、浸菜、處理要醃得較入味的食物。

煲緊嘢時候就調醬汁或醃嘢、兼顧到就洗咁啲用過的食具。

貴買平用喺永安買咗兩個唔同大細的煲,可以煎、煲嘢得嚟清洗方便。小心用避免刮花。

重中之重:完成後,笑容滿面地請丈夫出來用餐😊

食之享受

寒冷天氣,看見這熱騰騰的白胡椒酸菜龍利柳。剖析煮理心思。此人在重要部份堅持又帶點隨意就地取材。耐不耐喜歡醒醒胃☺

(1.龍利柳全程室溫解凍歷時8個鐘(視乎魚的冷藏狀態,天氣而定)才能避免肉質流失及縮水。洗淨、厨紙索乾水份、調底味。

2.白胡椒原粒白鑊炒香樁碎香味發揮極致。

3.酸菜浸半小時,白鑊煮一會再加油、薑、蒜適量糖炒香,加水蓋過煮至腍(喜歡吃爽口就減少水份)。

4.添喜歡的菇類索汁,再放魚,放白胡椒。

5.見雪櫃有半舊餐肉切成大小不一加入。

6收汁上菜。

7.每人的口味不同,試味找尋自己喜愛的調味份量)

當仍想瑟縮在被窩時,最好就是口述給伴侶如何烹調簡單食品,容易做得到做得好對沒有太大興趣煮食的人是正面鼓勵。加之就不要對成品太多要求。出乎意料他竟然將銀"幸"切得細緻。讚讚讚。

如果有收看唐頓莊園的人,就知道那些莊園主人會在床上用餐。他有時會打趣稱呼我瑪莉小姐(唐頓大小姐)

😆哈哈哈😊

慳柴火神器-燜燒煲

燜嘢焗粥都得

好處係慳能源;

食物汁不會流失;

得閒煮落間中煲返滾佢就得,唔使睇🔥又慳時間。

今日煲柴枝😜

網上咁多厨神可能有人會知我煲緊乜。。

炆羊加竹蔗茅根可以冇咁燥,呢樣係睇名厨保哥度學的。

我通常臨食前另外調味煮支竹,嗰餐食到幾多羊肉就取幾多。咁樣可避免全煲食唔晒變有支竹蓉的隔夜餸咁。

燜餸放涼入雪櫃,第二日翻熱前,將餸面的油片走,咁就唔使吸收咁多動物脂肪。

幸運地小石人係會去街市買餸的,咁宅婦唔使外出。幾個月前搬遷到現居所,就冇呢支歌仔唱了。事關佢返放工交通時間長咗。我都唔好意思重要佢去買。

下篇網誌想寫"起皮再起皮"
已徵得當時人同意公諸於網誌。
有心機描述都可以寫好長。

暖笠笠食法

天氣又轉冷了,向各位介紹呢個成餐都可以食到熱辣辣食物的方法。

用入得微波爐的碟放喺煲上,煲內放入熱水,煲與碟之間放支牙簽讓水蒸氣排出。

將呢個組合放在爐上保持熱水溫度。

放喺碟內的熟食就可以成餐都係原汁原味兼係熱架喇。

我哋試過放煮好的羊腩同菜,老公盛讚呢個方法好,叫我分享俾網友知,我嘅反應就答得唔好了。呢啲夫妻對答小節我係會檢討的。

食法靈感來源,係好耐前見過鏞記老闆請客的訪問節目,盛食物瓷器皿內裡可以裝熱水嚟保持啲餸和暖。

我發明呢個方法係更正。