收鳶

 有毛放養豬~油畫feel的相,好靚

19XxX唔收鳶18XxX先放貨😁

今朝好忙,繼尋日放咗啲7200餘下的貨,係止賺。

今日沽部份9988,呢隻有排攪。

全沽388,唔想連贏嗰幾皮都化水。

全沽A股中國平安袋幾仟,呢隻好好彩暫時一路都有斬獲。

MPF都清倉港股基金轉回保本。

我的,伺緊機提取趁重有賺就收手先。

老公的,1業績好定2業績好好定3輸返贏咗嗰啲。我揀1

佢哋講的放紙鳶,係唔跌穿某個指數就繼續揸,今次穿19000就要考慮放。我呢,穿一日唔放到續下跌先放。

心理預期,下星期大升返妳沽嗰啲會唔會唔開心呀?

想清楚先做,就唔好再loop嚟loop去。

尋日又睇N+TV,分析部份好多方面,不詳錄。其中講到日Yen,講者約6算買咗600,000港元。

小石人問我哋啲Yen係咪贏緊?

唔係呀,初買入後有贏過幾仟蚊,而家倒輸。

佢話成日"覺得"以為係贏緊添,呢樣又輸,不過我唔識唔好講咁多。

我:係咁架啦,好少能買在最低點。

(我又講吓多咗人去日本旅遊,據電媒標題,態度服務"差咗"。

又會有啲人衝出馬路影富士山打咭釀成險象環生。當局要圍黑色布阻止遊客此行為云云。

遊客係咁多,唔守規矩兼亂丟垃圾。當地人有乜辦法唔厭惡。而且當地匯率降咗咁多,日人購買力被蠶食咁勁,會有幾開心?)

我哋入日Yen嘅價位到目前為止算好好架喇。

摒棄散戶心態

都係同一扇天窗,投射出來是不同的景象,好有趣。

 呢排升巿,說實話係捱得辛苦過跌巿!

何解,之前自己買的貨跌到幾近麻木,堅持,睇啱方向都要有個繼續來來回回跌的漫長過程。

小石人做得好,佢係唔會過問我做緊同做過啲乜。只有我最清楚自攪出嚟的狀態。

今晚B呢巴啦倒晒呢排忍得幾辛苦爆爆爆。我講個情境出嚟問佢,佢賣唔賣?會點決擇。佢從來都冇答得咁爽快:"唔知。"肯定地嗰隻。

一個冇經驗股票買賣的伴侶。佢講妳都唔好信。一切成敗得失由自己承擔。

低位嗰批有賺的貨,買之前都係諗住片水,有微利放咗佢係一早預咗。轉頭再升,都唔會諗喇。

要忍的係千祈唔好再"賤賣"其他喇。現在進入惜貨如金階段。

今次入貨做得差係唔分段,對我嚟講大手直入。又係到接近低位入少少,因為要做風險管理唔可以入得太盡。

要喺股票巿場獲利殊不簡單。

人哋比我哋有耐性,資源知識器材數據都多,睇住我哋嚟食。咁我哋就要忍得先有望等到佢唔開車唔得,然後搭一程~長程?

最怕係啲駕馭唔到大錢買賣投機投資的人去畀意見搏緊大茶飯嘅賭仔/女。嗰啲人就係一般畀人割的散戶心態~驚。最驚時打貨。

穩住自己的心

天寒地凍時小石人趁放幾日假約咗大隻佬去朗原影雀。回來後都是訴說及兩公婆進而討論政府做完一輪話保育其實將自然生態變咗石屎石屎奪去生物多樣化,規管唔畀普通巿民進入稻田及保護範圍。

係咁架啦,本身政策同辦事的人的思維就唔係真正保育或保持自然生態,只是跟一向做法,例如濕地公園的石屎屋遠距離窄角度觀鳥,會吸引到不同生物的樹林灌木就斬晒佢。

話說回當日佢去完鳥攝後返嚟就開始作病。呢啲時候就係要休息。佢話點解沾寒沾凍似發燒跡象又乏力。

我:唔係咁樣你點會乖乖休息,大隻佬第二日假期再約你去影嘢你會唔會去丫。

我當然知道答案。。。

比原定假期放多一日好好靜心休吓。

呢間公司啲老闆幾有人情味,之前佢哋有個同事中咗風,老闆們去醫院探佢。小石人以前嗰間公司個服務咗十幾年嘅忠心員工(即小石人的老友)突然死咗,嗰間公司兩個老闆冇出席喪禮連乜金花牌都欠奉。啲仍然在職的員工一離開告別儀式無不炒媽拆蟹鬧爆嗰兩個人。

我:生意賺錢生計活動,唔使放太多感情落去。

今次小石人因病請假,現職公司老闆都會問候吓呢個散工,請佢保重身體。

家常講完。

繼上次操作後,個巿上上落落,我只取消了月供中電。因為冇用不完的資金。而且變咗陣買咗日Yen,咁就供少幾期架喇。

近期比較做得好的是$246港交所,究竟個巿在結算日後再掟落去定繼續緩緩上升呢?比著之前一早賺少少就沽。但經過咁耐的逐步沉底,上次盈富同吉利亦係在當時低位反彈,而家由贏變輸然而要改變賺幾粒花生卻追唔返之前的虧損就係要忍耐。

政策。

日Yen carry trade拆倉。

不加息而有心人會繼續作可能減幾多幾多次息。

有人以為升巿就係經濟好。

當多次似出現"常規"時,到大部份人都相信這常態那刻,逆轉可以嚟得好急。

忍耐忍耐再畀耐性,循之前的大綱執行,有變陣係正常,現時的虧損是正常,由贏變輸是正常。

手風順時不意氣風發

逆境時不意志消沉

一日未離開賭枱一切都未有定論。

 

美元兌人仔

 前兩日,將由美股賺取的美元兌換人民幣。原來富途唔可以以人仔買港股人民幣雙檯台的股票。

買咗少量SQQQ作價usd18.77。

繼續讓腦袋運作。

港股方面,之前買入咗啲槓上升ETF防爆升,暫時幾好。

較早前買入的盈富及吉利,有水位獲利,上次冇放,事關考驗緊自己持貨較長一點的耐力,今次又升緊,未知可以容忍幾耐。。。。或者抽多一棍上去沽?

經常都要問自己問自己問自己😆

資/機想法

小石人用無人機拍得的美境~極緻

2021年7月膽粗粗第一次期權SP,某些重點股股價經過一輪心電圖般落咗山谷底又再爬返上嚟,奇蹟地竟然開咗的期權隻隻都唔使接貨,好開心呀。喺呢啲巿況,就算隻股喺相對低位,都係現金在袋慢慢諗點部署較優(我係咁諗),況且接貨即代表好大機會賬面係輸緊錢。

翻查戶口狀態,發現富途喺700同9988個股記錄中衍生工具欄話我虧。。"錢。事關過期期權佢仍顯示結算價作紀錄,700(-4仟幾)9988(-8仟幾)。攪到我要計吓成盤數佢有冇計咗我輸呢萬幾蚊。最後啱數,該等負數沒有入條賬戶數。

唔係好明點解要咁顯示,就算有必要咁樣寫,可唔可以表達清楚啲條數冇入。可能對於唔知又唔計清楚或唔進一步問明白的人,就似早排以為自己蝕咗巨額面臨破產,留遺書控訴繼而了斷的年青人,此乃天大的誤會。

筆者計算後又發現開咗戶個幾月,買買賣賣手續費已用咗3仟蚊以上。呢點提醒自己在賣貨前要想清楚密食雞糊的情況是否當刻唔賣就倒輸,盡力減低交易次數。買嘢次數就減省唔多,經驗所得用分注買的方式是非常穩健和持之有效的策略。

最近喜歡睇譚紹?投資學堂視頻,佢嘅分析同資金流向累積資料,對做買賣參考有用。今次700、9988果斷止蝕同做期權行使價考量佳績,都是睇咗佢啲片所賜。

而家某啲散戶學習、思維同經驗都豐富咗精咗。大戶用錢畫圖表和一些人們公認的方法做參考支持位令人一入就蟹是有可能的。又例如當股價到了歷史高位,咁有人會用最高位計算跌咗幾多個%入巿,心中上望升返到嗰個高位賺幾多;最近有云700$550$490都係參考價位,卻好似薄脆咁容易破。$422係呢次低位,咁下次跌返去呢個位,你/妳會唔會衝入去大手買入呢?結算日收回部份失地,又會唔會提高指數嚟轉倉再做淡?

穩陣就自然賺得唔多。買賣首要係唔好輸身家。港產片行運超人賴料布(又係梁潮偉飾演)嘅對頭斷蟹(鄭中基飾)話佢師父講過:

"人一生中總有幾個時辰特別倒霉,

那時人就會渾渾噩噩,

時運高,就會在家睡覺,

時運低,就會無端到澳門輸清光,

又或在卡拉OK被人點錯相諸如此類。。。。"

在巿場中要經常保持警覺,寧願唔贏、贏少啲都唔好見有機會就做過大槓桿。

(呢啲都係自己同自己講)

為自己的行為負責任很重要呀。

 

轉身·又是不同的體驗

上回$583.5入咗700,$594放咗,事關睇視頻知道資金流向:北水同基金沽緊。儍儍的又在$573.5入返,跌到約$500反彈,有機會平手走人,冇咁選擇,尤幸$552都識得肯走。26/7於$490SP是月就係蠢蠢哋諗住接貨。27/7$420SP下月。次次Short put完就大幅跌(掩面)。

9988早約7月頭已做了$187.5是月SP同較遠期10月$185SP。$221.4沽咗早前$204入的貨。再曾在$205.6現貨再入,同上微利唔賺亦懸崖勒馬平手走人。

另外之前又SP咗8月386(早前放咗部份現貨回補)同914。

                    9月883

27/7買咗啲941同1044(早前放咗部份現貨回補)。

7200同7500呢類,買定等波動日日食價,短炒沽咗迎來大升大跌又食唔到,買嗰時知佢情況,食得咸魚抵得渴。

今次如果唔係用期權操作接700同9988飛刀,可能於較高位已入貨,又係一個用腦新體驗。

各位在這波動巿況仍勇敢前行的網友們都是值得尊重的,大家都知道唔想辦法增值資產或/和發掘現金流,購買力已被通漲不斷加劇吞噬。

別氣餒啊。😊😁

 

鋪大自己的格局

看了良久才發現那可愛的忍者蛙。

今天我接到他傳送來這幅相片時就滿是喜悅。

近一年經常問自己:

"現在做緊的事情令你開心嗎?"

人到了沙漏倒數階段,想法更趨活好此時此刻。

做恆常事情時,隨意放些什麼作為背景音樂,為重重複複活動配襯上不一樣的思緒。

有時又發覺守護精靈會提醒我避過災禍。好彩及早發現,警惕著。。,審視環境,減少下次再發生的機會。

很久沒有談買賣操作了。投入巿場最主要是冀望能有安穩無憂無慮日子,我現在就過著這樣的生活,那麽這些項目大前提是不要影響我現狀,所以只是偶爾看看股價,心血來潮做一單半單交易。

對於熱衷於鬱金香狂熱行為,自身沒有參與的必要。也不理會別人覺得不趨時的目光,從小到大我就是不追隨偶像和潮流自轉個體。

六位數字的上落,面不改容。一步步鋪大格局。參與投資/機時,對不同常態情況都能做到巨岳崩於前無懼色。

思考一個嶄新的語言表達方式和技巧是來得較有趣的題材。

每個人做每項決定都有其背後原因,作為旁觀者,高興就看看,切忌潑冷水。

氣定神閒 看透世情的模樣

 

無常未來

香港仍有人種稻田,

原來稻米成熟時穗會有尖利位,

收割時要穿長袖衣物和長褲。

第三波疫情確實磨人,作為退休人士也感受到各行業都處於水深火熱中。營業額持續下降;被欠帳;開工不足;欠薪;午餐無處用膳;無理被發脾氣的情況比比皆是。

雖然這陣子我笑容少了,但更需要保持不抱怨的好心態。關心另一半心理狀況。小石人不斷優化自己的處事心境,越來越好修養,作為妻子的當然要大力讚賞和支持。他說:"聽得周華山先生視頻多了,人也改進了。"

昨天晚上開始,我們在家中練習太極。庸懶成性又沒記性的我,多得師兄用心教導,希望今次能像小石人般有毅力學完一套拳。

今天下午遠眺窗外景觀做了些單操動作和站樁瞬間。

這時刻,不盲目正向,踏實地對無常未來做好準備。

各位,共勉之。

突發危機·操拆解思維·應對損失創傷後遺症

腦袋迴路新建構

天使頭上心光環

買賣操作:
沽出獲利部份股票
21/4 1883 $2.79
是日 135 $4.92
         178 $1.4
        2588$52.25
套多少少現金若跌巿有錢入貨。近期有賺唔獲利倒輸大大鑊情況出現,又要問自己而家邊樣操作個心會舒服啲。
1升咗冇賣輸突
2賣咗隻嘢繼續升
似乎呢兩個問題耐唔耐都要問吓自己。做咗就樂意地接受結果。我比較叻係少對自己決定後悔。。可以的話,別太對過去的事傷神,於事無補。



月供股票:
取消供匯豐
加碼供煤氣
匯豐已失每年四次收息功能。跟原來預算有違,供完4月份最後一注稍拉低平均價後,唔會再擺新資金落去,也不在這低位走貨。
雖然煤氣減派紅股,首先佢執笠機會唔高(卦),在這低迷巿況其他作收息用途股票冇乜揀得落手。。。

大包圍方式中地雷機會高咗,唯資金分散每隻買唔太多,萬一某幾隻出事損失較可控。觀之都好過一注或幾注獨得若然爆中冇得補救。巿況波動,有事發生時就係動腦筋解決危機好操練,千祈唔好靠問人搵答案,冇人比自己更清楚個別差異形勢。自己規劃才有樂趣呀。

買賣目的為將來更安穩生活,莫將自身置於時刻憂懼重重境地至為重要。
買賣前有心理預備以防"損失創傷後遺症"發作。
事情發生後,需要尋找原因和認知過程,讓心情平靜作理性分析。
買賣犯錯時有出現,是常態,教我更注重做好風險管理。
別在腦海中反覆重想損失數目,甚或以收入(年薪)作比較和若不虧蝕,錢可以做什麼。
靜心專注手頭正在處理的事情,例如手沖咖啡時觀察流水及每個步驟,呼吸穩定細 慢 長。
留意有沒有放鬆全身,頭頸肩背腰手腳內臟。其實日常你做任何事,久不久就注意自己身體逐漸每部份挺拔而放鬆是很好的練習。
出路機遇多的是,感謝每天仍幸福充滿愉悅。

☺😁

認輸·認錯·研究死因

首先要聲明以下是本人購入3175後,發生很多與原油期貨相關波動,3175發行人更改操作模式而作出檢討此項投機失誤的想法,請持有同一產品的讀者不要基於此文而作出任何買賣決定。

這兩天從不同途徑不停搜尋資訊

西德克薩中間基原油(WTI)價格可以是負數實在顛覆了一般人甚至一些機構投資者的認知。

圖一

楊世光金錢爆20200421腦洞大開?原油負值下。。。

從楊世光在金錢爆

20200421腦洞大開視頻中

我得到的資訊是芝加哥商品交易所CME主機之前沒有負價格交易機制,4月15日臨時重寫程式支持零或負價格交易。

這樣代表買入原油期貨者每張有機會輸的價格不只是至0。而估計其他WTI原油交易平台的機構很大可能亦不知道是可以有負數,故程式並沒有負數的選項。

求證及延伸閱讀:

這篇是16/4/2020的MoneyDJ新聞

前所未見!能源金融商品報價恐轉負、CME重寫程式預備

從圖一顯示5月期油結算日最後時間14:28和14:29的負成交價,是什麼人可以負數做出這兩口價(知道有負數操作的人+交易系統平台用新改動程式)。倘若當時已購入期油合約的買家想平倉,是需要付出100美元一張,變相是付出的代價更大。

兩張打出結算價為負數似乎很多坊間文章所說的賣方要將儲存運費成本加在交收上的"原因"有商榷。

實質運作我不懂,但這些是整件事可能有預謀的一個疑點。

說回3175的幸運是在這場跑不掉的"坑殺"行動前已將5月期油合約按時間表用5天,每天20%轉成6月期貨合約。

3175將轉倉日期方法列出,一方面清楚陳述了給購買產品的人知道以更了解運作,但同時亦有很大可能成為大戶的獵殺對象。其一是基金規模已由3月頭油價下跌引來大批機構及散戶投機者以致規模數以十億計以上。而當時6月份原油期貨合約價格已是單位數字,規條列明當子基金有終止風險是例如指數不再可供作為基準或規模跌至少於4千萬港幣(這個是今天再看這產品章程時的數字,印象中之前清算退巿的數目較現時為高。)

所以我認為3175操作人在21/4將"賽制"修改為即時將6月期貨合約轉為9月是風險管理的"保命"做法,以防成為下一頭被生吞活剝的對象。矛盾點是規條可以隨時改動是兩面刃。同時亦彰顯了正差價相距大對已買入產品客戶持貨的腰斬損失。

個人操作方面:

21/4早上曾經分別以$3.54和$3.57在開巿前意圖直接沽出,可惜後來又見巿價不太波動而取消沽盤。

22/4當得悉基金隨便更改約章後認為這行為將有機會影響日後隨時再次更改的操作。所以分別以$1.9及$1.84開巿前預設沽出。

要明白,原油期貨確是曾經作價為0,即是原本這項投機操作是推斷錯誤,亦需要心服口服地接受。這產品也跟當初得悉的規章有落差,雖然現在9月期貨合約暫時風險比之前低,期油價格有可能反彈上揚,但也不是應該繼續持有的產品。

芝商所-期貨行情

鳴謝

感謝本熊兄於其網誌分享楊世光視頻。使我對事件有另一重考量。

忍住唔獲利·比做清兵考驗更大

前兩晚小石人一見到呢個畫面就笑。。。疫情下如何在嚴峻大環境中處之泰然找笑點,兩個人比一個人有活力,大前題當然是身邊的是什麼品性的人。

今時今日自主自在對我來說很重要。

我哋近期興扮貓叫,佢有一次在工作地點搵個角落頭錄音咪咪咪。。哈哈哈,扮得好似,倆笑得好開心,他的想法越來越跳脫。

😄😁

如題,油相關股嘭嘭嘭升咗幾大棍上嚟,今趟有兩、三次都諗過要獲利。
會有不同念頭跑出來,賣咗3175,妳重有883、386、135blar blar blar
在網上銀行扲兩扲,又要自己忍住。
對神華的想法又唔同,就算有兩、三勻可以賺6至7毛錢的上上落落,都有一種賣咗買唔返的感覺,能夠好堅定安份地等。。。

越睇得多講外面世界、經濟、不同行業有幾唔掂的帖文,坐貨的耐性越低。

我自己的強積金部份重攪笑,3月中在轉投資決定時,手多多按咗一個掣諗住睇吓入面內容,點知變成買入咗懶人組合。已即時再做一次操作,又有埋參考編號。點知近日查看,佢俾我的電郵是入咗第一個亂扲選項。可能個啟示係要我再啃清楚啲:p

是日冇買賣操作~~要搵啲嘢嚟分散注意力。。。

陸續有來的心理準備

列陣排排等運到

^^

資金分散到不同版塊,

在這動盪的巿況

中招機會高。

同時不側重大注碼於一兩隻股票,出事時損失可控。

若不是風險增大又那來便宜貨。

作為小股民不需要為盤生意操勞當然是沒有多大發言權了。

決策對我們不利,但嬲得幾多..

我明白大家的憤怒和覺得不公。但這遊戲何時有公平過。

大貓唔派息我曾有諗過這可能性。

一連串的事件,巿道經濟不好,有公司倒閉也不是奇事。

近期操作:

之前沽出的700&2628用資金來作新嘗試😊

30/3/2020

3175 $4.31買入

玩·逆市獲利

雲霧驟見片綠洲

清泉常在樂無憂

時起時跌屬常事

有金有股倍生輝

沽咗驚唔驚買唔返呀?

唔會啦,有錢賺係額外收益。

700    $364.6

2628  $14.1

選擇入得嚟行就輕鬆愉快地應對,

升唔好嫌少;跌唔使驚青。

練習舖大個格局成大器。

😊聽日有cake食😁

過去是過去的事·沒必要每天每天都記起

非常喜歡這對白,這角色冷靜素有訓練,處變不驚。

現在最不需要的是心靈龜湯。

而是冷靜地分析個人形勢。

前天跟小石人講笑,而家我的入股運作似花花公子。買完一批,唔望。。又入第二批。

只著眼新的又好價錢的。

每項交易都充滿喜悅地完成。

18/3

883  $7.09

作為最大燃油輸出國,一定會想辦法將油價回升,我係咁諗。

19/3超蚊型股數都照入,當供mpf

135    $2.98

175    $10.26

178    $1.07

778    $6.24

1810  $9.52

1883  $2.29(等唔到$2.2,呢隻仍然笑住入。😁)

2588   $34.75

2628   $12.04

幸福,有一位永遠支持自己的枕邊人。

下一步要處理小石人由舊工作強積金戶口轉錢到新戶口預備出擊。佢的錢要留待最後,最大遍利潤才逐步轉。

我咁平凡都攪得掂,你哋一定會做得到。

🎊😊😁🎉

超興奮

越入越起勁

古橋遠眺好風光

遊人享樂未思源

一磚砌石層層疊

門拱穩步關關過

大家經常說等大跌巿擇肥而噬。

某隻股票穿那個位入。。

以工具讓升巿時倍增速度。

哀鴻遍野時是越來越安全還是更趨險峻。我覺得是前者。

興波作浪的操盤者就是要消磨散戶意志企圖讓人信心崩潰好使他們收割。

什麼時候來過迅雷不及掩耳的回彈無人能知。

身歷其境我反而覺得慶幸爬過這刀山火海。

縱然周圍撕殺聲不絕。

內心反而寧靜到沒有半點漣漪。

(超喜歡這玻璃沙瓶般背景)

蟻哥沒有想前路有多遠,只管慢慢逐步向著美好方向繼續行。

別忘記笑著過大部份的日與夜。

😊😍

17/3/2020是非常充實的一天。

因為計劃了到遺產承辦處取文件。

早上賣出澳幣(-約10%)兌回我城貨幣入貨。

將另外一半強積金轉成中港股票基金。

烹調了美味食物給自己配手沖啡。

取完文件後(今次不用等還飛快完成,我有興趣可能描述做遺產承辦的有趣經歷)再到中銀總行取消戶口將錢尾(小石人的叫法,佢話老婆錢尾都有咁多)整合到另一戶口。

小石人歡天喜地約我鋸扒。鐵板扒一到手,我就是這件食物的厨子,要注意熟成程度煎封肉汁。

我已養成蓆地而睡,攰就倒頭甜睡的習慣。醒了,精神奕奕地思考,凌晨寫網誌。沒有因為股市波動未能入眠。

將來的成敗得失不知曉,目前的心理狀態是最重要啊。

入貨情況:

8       $4.37

1359 $1.48(我知道周街大把好嘢,情意結地任性😜)

1918 $35.4

2018 $39.65

7200 $6.63

小鳥必必 ¥2.4

做自己的基金經理,型。

黑色星期五·月照華燈

股壇道上常波折

多邊無際任縱橫

披荊斬棘覓方圓

陰晴過後始得月

如果視之為藝術,輕重遠近有變化才是佳品。

當巿場熾熱大部份人覺得有利可圖的地方,水漲船高到一個點,海嘯據說先兆是一遍寂靜,然後就是極速氾濫將所有東西吞噬淨盡。

事情未發生時,其實說什麼也是徒然。書本名人給閱讀者的是別人的紀錄,出奇不意來臨時歷史又再重現在不同人身上。

是以在這地方覓食,遠而不熟悉,過程太複雜甚至是借來的求生工具到最危急時要還,再在漆黑中所有店舖都關門的情況下四處撲,就不符合養生修身之道。對我來說練好普通操作簡單是美是最適合。基本樁重覆正確地練往往最受用。

無人會知道的事,操作方法避"險",險的定義和時機又是自己的事。資金配置去減低將籌碼放得太重在一個項目。

要算實力雄厚大家公認估值高的,有心理準備它,它們不一定會令散戶有收獲。

是日曾蝕賣所有英磅套資金入貨,當巿場很多人都要錢補倉時金股匯都同時下跌。選了下跌3%的來下手。

感謝有經驗的網友分享在這風雨飄搖的季節時可考慮的方法。我決定分細注分散入心儀的項目。

是次最估不到的。。午後竟然急速大反彈,甚至懷疑看錯。

最令我欣慰的是小石人今次主動說想入2800,用儲蓄買有機會賺取利潤的東西不用在這裡多說了。可能他是想透過這樣賺取他正儲錢買那對我來說虛無縹緲的昂貴鏡頭。不枉我按下人肉錄音機幾次,完全不懂又沒打算進一步了解的,買這個應該是最佳之選。

本來人人正浴血撕殺,我就不應講笑。但我屬實忍不住。。

話說他新工地盤有些工人在近期連番急挫的港股情況下大哭股喪,"輸晒喇,唔使再買"。。他們就問小石人有沒有入場。

小石人:"而家先係入巿時機。"

(其實小石人一啲都唔識,咁嗰啲工人又好似信咕喎)。

昨日操作:

2800  $23.15

(這是首要任務所以入到當日比較好的價。已跟他說兩次,要有繼續可能下跌的心理準備)

上午其實都心大心細入唔入,初先我冇睇已入的,反而著眼一直在觀察而未入的。

2       $76.75(買得多到漏寫😅)

35     $2.86

62     $17.94

435   $4.02

823   $72.5

1848 $7.47

跟住睇吓已入的,又揀咗呢兩隻

1883 $2.67

1       $55.45

(1號,呢隻要同自己講,佢再跌到點都唔好再入)

另外入咗航運股。

入貨時如35 62 435 1848呢啲交投唔活踴的,我感覺唔到人踩人,反而係冇乜沽盤。

用兩間銀行做基地,一間有問題都唔會一鑊被炒起。見過有網友說IB、一通運作喺呢次戰役中系統極不穩定。我一直認為銀行就算手續費貴好多都值得俾。

雖然唔知是次入巿會唔會有收獲,但一副牌無論來得好唔好都俾心機打好佢。贏的時候不得意忘形;逆勢就盡量減低損失。過程打得輕鬆開心是最重要。

凶險但繼續入貨

他們打雀的地方,有時是位於雜草叢生,毫無美感之處。這幅是在屯門歷奇公園附近山坡,百無聊賴地散步時候發現所影。

作為買賣股票的人,經常要面對自己矛盾心態。今天想著長持明天卻沽走。原本的計劃又可能因形勢改變而完全不同。在近日一買即蟹的情況下,心情就是戰戰兢兢。

經過97無知一夜餘下三成資金、樓值蒸發一半有多。911惶恐入了的貨都急於求售。08資金不多越入越跌。1幾年$19友邦$26地鐵+其他如領匯入量少賺少少即放。都是猶有餘悸或回首笑看一個字·儍。

這個就是觸目驚心的鬥儍遊戲(講我自己)。

昨天入貨時要為自己做好心理準備,有經驗的人都知道今天低位便是明天的高位這名言。但大家亦知道若巿場急速爆升,豐厚的利潤能否轉移到自己手中就是決定於一念。

如今要承受很多心理壓力直至巿場回暖,但此時不跳進波濤洶湧高浪裡,是完全無機會抓到海中珍寶。或者再更有耐性地等待迷人deep V的來臨。

不過我選擇要繼續。

1      $62.75

303  $64.15

386  $3.87

941  $57.5

2588 $58.15

7200 $8.01

"如果"的想法已沒有了

用手沖咖啡來形容我在股票巿場買賣心態。

一點一滴地累積。

回甘又可以加點甜。

以前喜歡熱飲,

後來發覺沖製的時候需要掌握到溫度和一些技巧,才可使杯中啡滑而不凍。

我追尋的是在股票巿場上開開心心地遊走獲利。

曾經為自己做不到買入後長期持有而煩惱不已。經過很長時間掙扎煎熬,終於處之泰然地摸索到定位和較適合自己性格的做法。我不是價值投資者。

經常靜靜感覺內心,在什麼情況之下會忐忑 氣爆自己。

可能第一個浮現出來的想法是:"輸錢囉。。"

"贏"心中亦有機會不忿~贏得少,贏得不夠盡。

1.本來賺,想等獲利更多,誰不知股價一瞬間下滑由贏變輸。

2.沽後狂升似火箭。

(這些情況一定會發生)

1還是2,那樣會沒那麼難受。到能練到心理質素和/或以操作方法使自己在不同情況下都心境平靜是要經過很長時間千錘出來。

想保持開懷的另一竅門是分配好可投入的資金。不要老是想著一股獨贏也別一次將子彈耗盡。記得2008我在資金不多的情況下重注匯豐,雖然分3至4注入巿,但整個過程是十分難過受罪。<這例子可能很久以前提過,太深刻>

留有資金備股災出現,這樣有部份錢就閒置。我樂於容許。等如遊輪上的救生艇s,平時在甲板上乾曬,重大事故時保命。

1             2      3

分注入巿相隔有一定距離才可將平均價較大幅度降低,多數不會用到第3注,她較悠閒😄,這技最需要是耐心。

如題所述,現時大部份入巿、退巿、做決定都是考慮得很清楚才執行,"如果"這兩個字在本人仍神智清醒時可能會從我人生中永別。

網絡世界卧虎藏龍,很多高人高手。

寫這篇是答應了一位給我電郵的讀者,所以用心分享我個人一些經歷、鍛煉後的想法。請各界好友多多指正賜教。

本人網名古謙的由來是股謙,謙遜而立,不是故意"雄兔腳撲朔,雌兔眼迷離·····"

是日操作:

買入2628 作價$19.34

😊😉

笑到最後

非常重要

買賣的節奏 · 三卷次子

~是誰~

在敲打我窗

(無間道電影試膽機用歌手蔡琴那首被遺忘的時光)

小石人終於從堆積的雜物中,將這些東西像有趣積木般砌回。

他:"老婆,你應該早啲敦促我執嘢,咁對喇叭就早啲好似而家咁響得返。。"

我:"要你覺得舒服先去做啦;正如你都冇要我執好啲畫完畫又唔執整齊的顏色同畫具。"

Funk咗一陣,佢突然將音量收細。原來佢發覺喇叭邊爛爛哋,,,咁喺呢方面知識豐富嘅佢,就請我幫佢搵深水埗鴨遼街出名整喇叭的舖頭象記電話同地址。

好快手地,佢已將低音對喇叭兩日來回修好帶返家。兼今日再出咗去攞對高音喇叭。

佢:"老婆,多謝你俾我喺廳享受HiFi樂趣。個同事的老婆一定要喺廳放組合櫃,佢套嘢係放喺組合櫃入面架咋!"

咁我都好鍾意聽音樂嘛😊

^^

尋晚佢收到風話啲人搶厠紙,佢喺某區超市目及目及情況,真係搶購一空。佢就打電話著我落街買,佢明知我尋日落枕~條頸痛到氹一聲都要我出去,咁一定要聽從。事關我哋屋企

只有新晉美女

[三卷厠紙]。

^^

午夜笑語

凌晨醒咗,兩個人講咗一輪笑。

佢:"遲啲如有人話衛生巾缺貨啲人都會去搶購。"

我:"可能啲人會用嚟做口罩。。"

呀哈哈哈哈哈。

一陣笑聲中。。

佢:"真係見過有人對住的媽巾喺度商討。"

喺呢個黐孖筋的瘋狂世界,有幽默感真係救命靈丹。

佢:"唔夠厠紙用要用把較剪攞2.5格嚟用。"

^^

今早佢第一次落街買早餐時發覺超市貨架上米同厠紙都冇貨。

第二次佢諗住搭車去攞喇叭,見到超巿返貨就買,嗰種情況似熾熱巿,手慢啲就被人搶走。

😁😄

是日操作:

7500 $6.49入貨

又再有機會入返lu,今次學精咗入一注先。俾機會我有耐性地練習進可攻退可守的黃金戰略。

結婚紀念日~同場加料是日晚餐

2017年既今日去咗濠江慶祝,

小石人放咗腳架喺度影,結果逢經過的路人都停下來影。

 高牆與炮台

 只窺探到別人/既得利益勢力想給你看的部份

 中西特色共冶

臉書的好處是提提昔日回顧。我唔睇返都忘記今日是特別的日子。午間通訊時話俾佢知,佢都係唔記得嘅😄。

是日操作:

我又儍儍的回補之前沽掉的。。

1997 $39.85重要加碼買多啲。

12 $34.85

其實重有其他好多都想入,選擇呢兩隻係因為近期交過手,比較有"感覺",劉青雲神探一片佢查案唔用理性思考,人們認為佢係黐線,實際佢係精神有問題但又推測到誰是兇手(超讚呢齣片,最尾嗰幕地上散碎玻璃倒影一個人內心的複雜多重型格是絕妙表達手法)。。到咗呢啲個個話重有排跌的情緒下,入巿係需要好大勇氣,重要貼出嚟公告天下。

邊個會知未來,唔入 到佢升返又失去機會,入巿買賣就係經常要遊走於矛與盾和心理變化之多重軌道。

加場後記:
今日狀態幾好,整到幾味。。

 出面買要$65,自己整$25好似多啲肉食,今次重手咗咸啲,點知佢話啱味。煮到一開殼放自己種的蘿簕。

 蝦餅四件,食食吓發覺都係要影吓,事關下年會唔記得今日發生過乜嘢。😁

臨尾啪海膽。睇完老王兄個同我講笑的留言,小石人越嚟越風趣,就話落到肚"冚嘭冷"fusion埋一齊❤

唔好意思,因為之前搵唔到個頓號所以成日都係隔一隔嚟表達,有時又冇標點。

記起白面包青天包龍星同方唐鏡交鋒嗰幕。

* * * * *

今日雖然皇宮開大食會,不過唔使"亞發"出🐎,開餐前佢揾唔到啲銀石線有啲忟忟哋。做人老婆要識做,等我洗埋啲碗。

呢個蛋糕超美味,食完頭先嗰餐休息一陣再開始。

+送尾啡Perfecto