德不配位 必有災殃

      可愛地窺探

丈夫工作地人物與事態發展複雜,由近期最大影響劇情說起。。。

科文Y終於唔做呢份磨人的工嘞。最後一根稻草來得非常突然。竟然係完成該次驗收檢測,該腦細話係大部檻過的僥幸心態。就係嗰張表,係呀,為咗一張隨時極容易處理好的表格。腦細同其兄C淋分別用穢語鬧科文Y,話張表畀咗Y。該下午Y即時打咭走人唔撈。

據當時人告知小石人,Y表示再唔會食佢兩兄弟嘅死貓。Y話事後腦細有不停打電話搵自己,但佢冇接聽(似足啲情侶吵架咁)

呢度要提提,似乎好似大部份人都會報料畀小石人知咁,所謂得準訊得形勢矣,對於邊個稍為可信,邊個做咗卑鄙行為推畀別人(亞推)又以為小石人唔知嗰度心寒。老公呢份工令我哋見更多人性,學咗好多嘢。

一陣間又有寫字樓啲線眼,話腦細同老闆娘講:"今次唔會再求Y回公司。"轉頭又傳老闆娘過咗一啲時日後有借啲意搵Y,但Y仍然唔聽佢電話。

Y有一路告知小石人有關其動向。初先話休息吓先,冇幾耐後又已揾到另一份工。而亞推企圖試探小石人有關Y近況,老公就咋唔知。(亞推呢個人表面仍對小石人冇嘢咁,實在已經非常妒忌,信唔過佢喇)

我雖然知道呢間公司冇咗Y,老公面對工作時更唔得心應手(本來都已經要乜冇乜,之前提過只有Y係會切實執行處理跟進事宜),我卻戥Y非常高興。留喺呢間公司好似話已經十年,個腦細見唔同人講唔同嘢,氹Y替其搏殺開夜唔休星期日直踩,搵人幫工程,現在落得嘅收場係,呢個腦細完成一階段後有事就鬧Y,當時人協助C淋解決咁多問題,呢件事未查清楚又係瀨Y。C之後更同亞推話呢件好小事啫(小事你又鬧人?)。(完成咗呢部份工程C當係自己功勞,後來喺地盤搵返份表格兩兄弟就側側膊,鬧完人當冇事。。呢啲慣犯,據做得耐嘅員工話佢哋經常係搵人食佢哋啲死🐱,真係難為啲貓慘死)

冇咗得力幫手,腦細要Y死落地行,自行安排某些事情,其實啲嘢只有佢自己先知,交分段工作日期,標嘅內容又冇睇清楚。期期糧都拖起碼7日,一有糧出老闆娘就趷啲員工們一早等放工齊齊打咭,返工遲呀咁。

有啲年紀唔細嘅散工就爭上位勞役其他散工。好快,做完某些部份工程後,個疑似強迫症腦細要佢叫工人調轉某些嘢重新做過,激到爭上位散工咩嘢咁,擦呢啲人👞,有排受呀。腦細急住要趕工程時就聲氣好少少,一大部檻過完成啲嘢就擺腦細款。

今晚老公回家後告知我佢哋今期糧比平時遲7日後都出唔到。冇能力接啲急趕要求高質素嘅工程,加埋原來做開的,唔知進度唔知邊個偷懶hea做只是叠人堆。

另外亞推叫小石人做某啲普通散工都做到的粗活,畀C淋鬧亞推:"呢啲唔係佢做㗎。"

C淋叫小石人做某啲嘢時,腦細又鬧C:"呢啲唔係佢做架。"

腦細重要喺小石人面前鬧亞推,小石人借啲意行開費事亞推尷尬,點知過一陣小石人出現返腦細又再鬧亞推,重要問小石人:"你話係咪先丫。"(有乜辦法亞推唔憎死小石人。)

舊地盤個頂檔睇住工程嘅H仔問腦細要小石人回去做某個全場冇人識搞嘅部份,腦細話搵第二個回去得唔得?都講明該舊地盤第一期已係試勻晒淨係小石人處理到(亞推當時負責該期工程,又係小石人整完咗嗰啲位置就當亞推自己搞掂的),其實H仔現時重執緊亞推第一期工程的甩漏。

我問老公:"係咪架,次次都講到你自己英明神武乜奇難雜症都係小石人完美處理辦妥咁。"
 

畸工實錄

本來做地盤A既第二期工程,由科文Y睇係可以的。

公司又投咗件需要高汁素完成的標,仍係由腦細佢個C淋了瀨的大佬"睇場"。錯漏百出度嘢唔啱位。腦細又訂錯晒啲嘢,唔係工程要嘅規格。咁都生存到確係家山重有啲福。

多次要小石人去嗰個B場,老公都係耍手擰頭,閃無可閃就請假都唔去。

嗰度兵荒馬亂,C淋睇工程既得人驚法。。。十足老人失智,唔記得又賴人,重要成日講埋啲廢話要人聽,嘥人時間。

最終小石人初一留到喺A場,因為無選擇下調咗無能嘅亞推過B場。其實亦係廢嘅。

十五咪又係要小石人去救亡。

乜X工具都冇,問親啲負責人(亞推)就話有,,,有?但係唔用得的,壞了。啲所謂負責人自己去睇完,放低件工具就行開,當乜事都冇發生,件壞嘢就原地放番嗰度,等下一個人去嘥時間。

一係修一係掉,就係咁簡單都冇人處理。

小石人搵科文Y,佢係會跟進的。冇錯,又係科文Y去執呢啲滿目瘡痍嘅炮屎場。

點解小石人咁有利用價值,一度冇人識處理的部份,亞推叫個散工去做,嗰個散工轉頭打咭走咗。唔怪得晒人哋,亞推自己唔識,淨係吩咐老散諗掂佢,亞茂都走。

小石人完成咗呢件曲節離奇嘅部份,條亞推竟然話要加嘢。而且完成後先畀佢嘅意見,未開皮前唔講架,因為唔識。

呢段時間週日開工每晚加班。有人做完成日都吼住想加班,咁好精力皆因日間行行企企怕卦。

勤力工作的真係唔想加班同直踩冇息休日,,,,

亞推初到B場就話唔夠時間,話自己7月要放假。Y科文表示:"你咪放。"放假前腦細叫亞推交低嘢畀Y,亞推同Y講佢乜都唔知。但在放假期間筆寫同別些公司夾過嘅嘢。

咁難得嗰個嚴人寬己卸責嘅腦細讚咗我老公起碼兩次。

腦細自己攪咗某啲嘢,畀小石人發現同修正咗個問題。避免咗影響公司聲譽,兼後果可以好嚴重(死得人嘅)。

個個都好驚test&complete。(委託人驗收工程)

老公應對得頭頭是道。以佢為榮😊

 

重返修練場

前嗰排檀香石斛初盛放時,佢特登攞住叫我影相要嚟寫blog用。

休咗約兩個多月息。科文Y似三顧草廬咁成日問住想佢返去開工。

初先,話唔同架喇,Y睇場。點知講講吓又似之前換湯不換藥,Y學佢腦細口吻話其實唔使要人睇住工程進度的,到時啲人匯報就可以。😮

小石人一路都推佢,直至叫咗三次後,老公就答應Y返去嗰個場。

比較複雜的是,第一階段做嗰度,係延誤 中途要其他公司進場咁進場法會畀人大斬一筆錢的 。大判經理又曾說不會再給這間公司做第二期工程,然而就好似特朗普之後又唔算數嘅。

上次臨最尾一日返工,亞推放工同車到站不辭而別,拜拜都冇講聲就落車。

Y科文喺三顧期間,又話叫住亞推睇工程轉頭亞推又係執返副架生做普通工人嘅工作。

今日小石人係自帶午餐蕉提子温泉蛋,唔再同佢哋一齊同枱午飯。

工作係Y科文分配~一早就應該係咁。

本來預小石人兩天完成的工作,老公半晝就攪掂。

老公話今日返去個個員工都友善地同小石人打招呼。尋日那位女工已問Y小石人幾時返嚟,一聽見今日返她高興地:"咁就好喇"

有日我問佢可唔可以在銅煲鑽窿呀?佢爽手地即刻處理好快完成。

 

3心九意~伴侶·主人

 

連續呢兩日都夠驚喇。

妳諗掂未架?主人。

第三日女主人凌晨醒來,💡想全部改過晒啲擺位。第一次調完啲嘢之後,出入口太狹窄(FA~唔能夠全翼展通過兩個衣櫃之間),好唔舒服。小石人先生後來話似迷宮。

新嘅擺位會令整個室內更開揚空氣流通。

講咗想法畀小石人知(女主人唔係幾好意思改嚟改去),點知男主人好合作,話試吓。(感激極了)

佢哋食完早餐,主理人買額外料回家,佢諗住做兩粒鐘食完晏就去旺角買嘢。

🐦唔想再郁,女主人氹極我都唔上佢手前臂,實行友善而對抗(冇對佢惡)。之後都就範,又再出廳紫膠椅上等呀等,瓜子係食唔少。

成個過程,差唔多改晒所有啲嘢。

高腳櫈鋸到變普通高度。老虎鋸收手唔切批咗落牆。

小石人:"小朋友(FA~)都塗鴉劃花啲牆。"佢心內有啲唔滿意都有安慰自己。

女主人:"係呀,咬爛晒啲牆架。"😄

⬆🐦嘅作品藝術成份幾高。以前咬落。

⬆我嘅舊作品。

FA~:"我飛上衣櫃頂就係鍾意咬呢隻牆角,我重學女主人喝我阻止我繼續咬嗰把聲。"

三义站樹枝都全部批短,方便畀我跳過個音響器材泵面。

兩個衣櫃推變過晒啲位,好彩有轆唧。

主理人做工程的守門真係一流,住做住吸塵,完成項目後係會一手一腳清乾淨晒地方,真係人見人愛嘅有手尾師父。

由廳返番入我間房,嘩,全部位置轉晒,好驚驚怕怕呀。雖然妳一路陪住我又放我飛。妳以為用大白色床單夾實酒紅色隔音簾我就唔知。我一在衣櫃頂橫一字馬作勢咬隔音簾同爬去白床單之間(女主人:"嗰度會由屋頂直落跌地架,白布同隔音簾之間喎。。。"),飛去韆鞦,一見到妳拉關隔音簾我就嚇到飛落地,瀨咗。妳嚇到我兩日都係咁樣便便喇。

而家輪到我安樂晒,妳兩個衣櫃入面啲嘢重搞緊。

安樂曬~

似唔似戲院呀,哈哈哈,好開心呀。佢完成咗呢項工程lu。

隔音方面有待驗証,因為安裝咗之後🐦未嗌過。

昨晚初完成前期工程(未安隔音簾),雖然只是移咗衣櫃面向走廊,方便洗澡同去解手時取衣物效果如預期般超好非常滿意。凌晨時份冇乜騷擾到隻🐦。

不過房內空間細咗,,我又係用遮遮掩掩方法於,老公記起要攞嘢入中庭,用我龐大身影同大毛巾阻擋站在紫膠椅上廳嗰度嘅小FA~FA~。

第二日(今日),日間工程期間我攰恰陣(伴侶唔想嘈醒我),老公攞中空膠板入房佢就嚇到飛甩雞毛,有時真係在所難免(已經搬咗好多架生 梯 吸塵機 窗簾路軌 大大兩幅隔音簾等等等等物品入厠所同主人房)

🐦仔要新一輪適應,我亦要很有耐性再重新得到佢信任。我心急在佢視線內搬吓小形垃圾桶 推動隔音簾,佢又係狼狼忙忙咁亂飛飛。

近期唔係好肯踏上我前臂,入夜嚇親佢之後,等咗佢好耐都只是黐住雲石層架啲舊衣布碎。食瓜子都係踏前攞咗即退後。(可能知我將鎖返佢,唔想被鎖就如鶵鳥般叫法)

點知小石人買完嘢返家佢就即刻飛嚟我度。(可能想我陪住佢,,知小石人回家後我就會離開🐦。都係唔畀鎖。後來我係又叫又氹,佢不滿叫咗兩聲👄作勢咬我手咁啦。。鎖完佢我再坐一會陪吓佢。)

多一重簾免透光入去佢房。

讚賞讚賞,多得小石人。

 

糕·高·Go

話說近期另一樣想得較頻密的計劃就係處理家雀嘅隔音安排。

自從上次佢唔知點整到個扣夾住自己隻腳,解扣後凌晨可能腳痛就成晚發出鎖錬金屬聲影響各個睡眠。長遠計有乜特發事件 老 病 ,點知佢會唔會夜麻麻發出聲響,我最驚係佢深夜大嗌,嘈到大家不特止,惹來投訴咁佢就未必可以再留喺度。

而且我哋年紀有返咁上下,凌晨小解係常事。撞著前嗰排有一晚我肚瀉,成晚盞燈自動體感開開閂閂,雖則我已躡手躡腳 輕柔地盡力將聲音減低,然而聽覺靈敏的牠係會受到騷擾。其實佢好乖,好早好早已經醒咗都只是靜靜地坐著企著。但一聽到有其他郁動聲音佢就會細細聲試探性叫一吓。

入~FA房範圍擺衫攞衫,佢接近次次都發出不滿意聲又大力啄木。小石人返工出街買家中物品差唔多朝朝都要聽到呢種雙方都感厭惡嘅聲音實在極之唔理想。一定要解決此問題。

總之未處理好隔音事宜,我係成日心驚驚唔安樂。

我哋不約而同都係諗隔音窗簾。老公有在網上尋找到,後來我又要加碼物料條件~防火。工作已忙,重要顧及家中事務。我就不再多嗲,慢慢等待佢得閒同有心情先再跟進。

由於隔音簾需要做到上天花的大小,非常厚重,物流公司唔畀自己去分派站攞,好彩人哋有遠見,一定要送到戶,嘩,真係重到"飛起"。

加之個自閉老婆唔鍾意應門,戶內明明有人物件都係就咁放喺門口。😁

提早放年假,有日佢話乜都唔想做。

我:"梗係啦,放假就係要休息,攤唞吓。"

之後佢開始張羅購配件。

另呢兩日連續出街(我極少係咁,好耐先出一次街)食嘢同儲糧過年。

昨天計啱時間,買FA~瓜子後順利唔使等位嘅情況下鋸咗人氣扒。

去程時在港鐵車廂內,突然有一年輕坐位男子大嗌:"細聲啲呀!"

坐佢隔離個亞伯就駁嘴:"我已較到好細聲,你咁大聲叫嚇親我。"

又兇返後生轉頭:"你係咪想打我¿"

在我哋企位斜對面有位戴口罩 估約6x歲嘅男士大聲說:"呢個係靜音車廂,熄咗音浪佢啦。"

我在小石人耳邊輕讚:"男士助攻得好。"

我續笑耳語道:"亞伯,好彩你幾拾年前殺咗人,如果唔係我呢次翻唔到身喇。"(黃子華洗燥其中句大約台詞)

在公眾場所有爭執,唔知有冇人暗中用鏡頭對住影緊。。。。

個後生話:"之前已好細聲同你講咗,你唔聽,人哋都咁認為你應該熄咗聲浪。"

亞伯又兇後生:"你咁大聲嚇我會碌低架。"

後生:"咁多人死唔見你死。"

口罩男士又在此時助攻一次,重申呢個係靜音車廂嚟。

靜咗。

後生合眼養神。

(呢場潛在的腥風血雨平息)

到口罩男等落車時行到我哋面前,

古謙笑笑口出聲讚佢助攻得好。

大家笑住講咗兩句男士愉快地落車。

近過年花墟好多人。

鋸完扒,買咗幾樣糕。

再去買咗兩條褲(小石人)

開心的一天。

 

我要離開吓

去食週年紀念午餐那天,

Behind the scene係,早上我重在床碌緊遊戲時,小石人出睡房就發現亞FA~唔見咗。

飛咗上衣櫃頂。

條錬咁甩法又係將會一輪折騰,要捉住佢用布同冷衫包實,一個人控制佢唔好郁另一個人用工具鉗返實個扣同金屬圈。

佢自由就猛咁大嗌。

我一出睡房門,

轉頭就有一隻拖鞋飛去佢度,佢亂竄飛咗入厠所。

我:"唔好咁對佢。"語氣當然唔多友善。

佢飛返出嚟,飛嚟我度(過頭頂高度),伸高手一接佢就:

我:"你做咩咬我?"

佢放口,好彩唔係咬得咁深有印冇損。

跟住放佢飛開,我儘快戴返保護裝備就同平時放飛一樣,來來回回都飛返嚟我度。喺呢方面,兩年養佢同用心練習飛行冇白費,做得好。

今次整返個S扣上佢腳,順利呀。

我同老公講:"我精神好緊張。"講咗好幾次,與自己共情,由內心釋出繃實嘅情緒。

之後都有為我又重語氣對小石人致歉。呢樣要多多修練,急趕時就算見勢色唔對都需學習停一停深呼吸。

事後我連聲說:"好彩你今日放假,我自己一個人扣唔掂。"

話說呢一日假(星期一)係小石人堅持要放的。

呢條亞推重要小石人再一個星期日加班,如果聽佢支笛即係已經兩個星期連續開工咗十三日後再繼續做,使唔使呀(亦已違反勞工法例)。重未計期內夜晚要人加班。

當小石人在群組請星期一時(佢哋公司norm係用whatapp對答通消息。)

亞推又私訊小石人叫我老公最好星期一返。

啋佢嗰個先奇。

假期時,亞C淋L瀨又打電話畀小石人。喂,散工放假係冇薪水的,冇義務隨傳隨接電話。

享受完舒適的兩日假之後。。。

星期二返工時:

小石人後來告訴我接近全體員工一見到佢就稱呼:"石哥"~客氣非常。

長話短說,佢哋做緊嗰單工程有個位就係因為亞推喺第二啲工種公司整塌某啲嘢同位置時唔醒目,冇喺該位置原狀時預先跟進某事情,淨係攞住副架生耷個頭做而履行唔到科文嘅責任,變咗後來自己工程部份亂晒大籠。

原來週一時,好多認C認P嘅人都攪唔掂嗰個位置。

每個人都渴望呢位唯一能打救到呢單工程嘅人(~小石人)返嚟處理呢個位置。(完成唔到就冇錢,工程收唔到錢,有冇糧出都成問題。)

喺呢度,小石人得到好多人嘅尊重。

亞推,到啲嘢比較順啲嘅時候,就又怪一名H仔執漏執得慢。呢個H仔轉頭同小石人呻,冇心機呀,畀人話做得慢。去食煙先(大家都知道而家在地盤唔准食煙,H仔係要離開地盤老遠的地方吸)。

亞推同背後睇唔起佢嘅腦細一樣,最叻打擊士氣。根本同一類人,亞推係縮水板。

而H仔,之前有笑笑口同小石人講:"檢測嘢過唔到都係你啦,又唔記錄低。"

小石人神回應:"我係照大會指示,三日有三個唔同說法做法又冇叫我記錄,唔通我自己冇端端自把自為去做咩?"

(我:呢樣係邊個講畀H仔知嘅呢,只有一個人-亞推。而佢究竟點講法呢,將失誤責任推咗喺小石人身上,呢點十分明顯。老公,要提防呀。)

之後亞推同小石人一齊到某處時,亞推疑問點解呢度嘅工作要咁樣處理?(佢認為多咗工序咪慢囉)小石人答:"呢樣要多呢幾個步驟先能徹底執好晒之前某啲人做出來的多重各種錯誤,亞H仔已經細心哋執咗好多度架喇。"

(即係小石人幫H仔發聲,講畀呢個夢輪亞推知,H仔點解係亞推口中的慢,小石人同H仔做嘅係唔使翻手的一鏡到底呀,其他嗰啲係執咗再執都係錯架)

(我:可能條夢輪自己都係執咗都係錯嘅其中一個。而且而家小石人睇工程定亞推睇工程呢,次次都要老公提返佢。)

有次放午飯,人物有:亞推 小石人 女工Kw Ha(小石人發現呢位後生仔勤力細心做嘢有擔當手工唔錯,同亞推講呢位員工值得留意) Hon

亞推:"個顧問講得好啱,我哋應該咁咁咁做。"

小石人:"推哥,你係年三十晚今時今日先有份去開呢啲會,之前你只是攞住副架生死命做,根本唔知道呢單工程嘅任何嘢包括準則同要求架。呢個顧問講嘅,正常計作為管理呢單工程嘅科文係一早需要知啦。"

(喺小石人敍述這段前,我請佢即場在我面前重新演譯當時嘅表情😄同話語。

看畢我心想:"老公真係忍得好辛苦。"

小石人以為我會否定佢嘅做法對我說:"老婆,我都要抒發吓架。"

我:"係呀,所以我係非常認同老公嘅做法說法。")

(之前我哋兩公婆多次一起分析形勢時,想到我哋唔知呢三個人 腦細 淋瀨(腦細的亞哥,欠債已經賣晒公司股份畀佢弟弟) 亞推 呢幾十年之間的恩情(以前有一齊去外地旅行),我覺得關鍵人物係呢兩兄弟嘅父親乜叔,帶住亞推出身兼對兩兄弟保護有加,每個兒子有一層樓又將生意交棒畀佢哋。

點知乜叔會唔會臨終託付叫腦細記得睇住亞推呀。。。咁就死得。)

好嘞,扎腳布咁長。

臨近歲晚,亞推又要求小石人唔好咁早放農曆新年假,朋友之義小石人有答應。

點知轉頭個腦細又要將小石人調去第二個由C淋L瀨攪到唔達標的地盤執漏。。。。😁

(即係亞推點打人情牌請求小石人遲啲放農曆年假係廢嘅,根本個乜數字都唔知嘅腦細話調走就調走嗰個呢度唯一處理到咁複雜嘅工程步驟的人。)

(而呢個腦細覺得樣樣嘢都好簡單的。但自己負責跟另一單收驗工程時,其中一個同事Hu對小石人講:"睇住腦細佢捉worms入patpat,人哋只是要check項工程通唔通,佢就自己講晒見到的唔影響大局嘅甩漏。驗收員第二日畀公司嘅不合格項目就係腦細講嘅全部。"

(芝加哥殺手:專隊自己友)

自己做唔到某啲重要嘢,呢條腦細將責任歸咎Hu,話佢影相唔跟得貼。,呢位Hu同事前嗰排返工時先至砰嘭累咗喺街跟住入過ICU出院架咋。

(好多同事都會報料畀小石人知嘅,人緣好好呀。腦細臨同事收工前去地盤,都係Hu收到風報訊畀小石人知架呢。))

正當小石人思量緊點寫早放年假時,呢個腦細咁橋喺Whatapp發佈:"你哋邊個要請假就早啲出聲喇,等我有所安排。"

立時,小石人就跟返原定計劃早兩日開始放年假,反正留喺度幫唔到亞推,就算後來又改咗唔使小石人過去淋瀨工地。

呢個PK磁石-亞推,重要畀淋瀨兩次以上嫌佢咁樣安排人手嘥人工。亞推向小石人訴說同埋呻。(其實亞推自己咪又係咁對"下面"啲同事)

直至再呻時,小石人終於忍唔住:"你可以同淋瀨講格,不如現在開始由淋瀨你去安排人手,亞推我揸返副架生做啦。"

呢條鵪鶉又係不語。

當一個好有責任心做事妥當嘅女工Kw在同小石人合作處理某任務時,

Kw:"石哥早咗放年假?"

小石人:"我要離開吓。。。"

最令我欣慰的是,老公會執走晒自己帶返工的架生回家~小石人有可能唔會再返去嗰個修練場!

我:"此地不宜久留"

 

完美示範

該煨,當一些人組合在一起時,就是錯漏百出瀕瀕孭鑊,推卸責任給冇能又不懂保護自己既人 那人不聽試圖幫助他的人有用建議。

呢個傳說中的石哥,雖然是散工一名,卻經常得到同事們讚賞。Hu同事有說:"又一次完美示範呢樣嘢點做。"

有人做呢行廿幾年,對唔同項目安排部署天天都在進步。

反觀有人喺同一間公司做幾拾年,似天天只是做同一樣嘢,手藝 做事方法毫無寸進,無能力處理咁大項工程,唔識爭取需要,樣樣錯晒 唔知邊個散工做邊忽,正在無助地閉翳緊。重要聽人點,冚返晒啲嘢交咗貨先再慢慢想辦法,而家係樣樣都行唔到,交唔到貨,知道錯仍然由啲亂做嘅散工們繼續錯落去。同驗收人夾完嘢再畀指令石哥同一件事三日三日都唔同驗收要求。應該一開始工程就要知清楚的收驗準則係到工程驗收前先同人傾,計劃圖又係埋尾先攞出嚟睇,係咪夠黐線。

呢個點人嘅人,自己負責嘅另一啲工程就係明知錯都繼續錯落去,為咗唔好畀人證明自己之前係錯。自己加班做嘅嘢更係C淋L瀨,最終又係畀腦細鬧鬧鬧,又係石哥執漏。

過去的星期日,石哥要返工,跟著個無能亞推,加班就係執漏,重要提醒亞推需要告知不停做緊錯嘢嘅散工點更正。條友(亞推)重係打電話一舊舊咁"指示",

石哥:"你親身落去講畀佢哋知點做啦,監察佢哋做得啱唔啱啦。"

亞推對著電話筒的對方說:"我而家去你度,我畀人話緊喇。"

上天派人幫亞推都冇用,因為佢一路唔聽幫緊佢嘅人方法而係選擇幫唔到佢嘅人的歪路。

今時今日攪成咁,自作自受。

個腦細就老是找亞推做羔羊,一日都係人哋嘅錯。

我同石哥講:"現在只能專注在每天做的執漏,不要再想他們的大局了。"

石哥:"係呀,好彩我只是一名散工。"

我:"其實腦細應該一早請你做顧問。"😄😊
 

有得選擇

 雖然8月2日週六開始又要返凌晨班,呢個禮拜佢似乎幾開心咁樣。

事關今週一7月28號,呢幾日佢返日班,負責該項工程科文就係此公司長者元老亦即係之前提過的推薦人。推薦人日前問小石人嗰區(舊公司)邊度有得賣咖哩,佢就打電話畀舊公司同事問行情。

(我唔記得咗咖哩舖係賣啲打拆後有用物料如銅廢料的回收地方,真係以為佢話係印度咖哩添😆)

點知呢位舊同事又問返小石人有冇工開,有埋班喎。最終呢位同事約佢開工當朝前一齊食早餐。

聽八卦嘢幾開心,尤其係小石人唔鍾意嘅人啲折墮嘢,返家就主動講講講。我都幸災樂禍戥佢心涼一番。

上星期佢唔開心時,我再同佢提起,佢係有得揀,唔開心可以唔做份工,我哋經濟上係夠生活的。

非常贊成佢26號嗰個週末,覺得需要休息就自己提出放假。放假時佢重整咗條線。呢條銀線佢用辣雞頭尾安裝兩個插頭上去。之前有一日已經試過辣但因物料問題辣到最後一步先斷。今次改咗用第二啲插頭再試成功咗。據佢講嗰陣時買條線價錢過萬。整咗可以配佢新買的耳筒聽歌。

(其實好多我都唔係幾明,操作呀,音色有幾唔同有幾靚。不過我主動問吓佢就好欣悅咁解釋畀我知。)

今晚約佢出街食嘢消費。

採木·盪鞦韆

 

黃皮鸚

據說宋朝要逢清明節期間才可玩韆鞦,呢樣係從觀賞清明上河圖同埋皮毛搜料得知。

亞FA~個竇嘅彎彎龍眼支已經畀佢磨咬到就斷的線懸程度。

於是前嗰排又請唯一有能力處理呢個問題嘅家庭成員出🐎~採木材。

佢出咗街一陣,我電📱佢時,答覆係沿某方向路徑係已經畀人劈晒啲樹光脫脫,冇木。

請佢回家附近匯合我一齊揾。

一起行走我亂指的另一方向不久,咦,原來咁橋再次有大量被砍伐田園放置在路旁的樹。

今次搵到的有黃皮樹同外國引入的樺樹,挑選及割咗一輪之後,樹身有好多蟻同較污糟,正講回家要洗吓啲木材之際就落咗一場大雨,我哋處於冇任何避雨之地。雖然一對落湯雞,幸甚啲木沖得乾淨咗。世事就係咁,人要調整自己心態享受每刻發生的事情。

第二日,老公重成棵樹搬返屋企話用嚟掛啲蕨上去作家居點綴~真係成7呎高架。😄😁

橫豎老公又係放緊悠長假,有心情咪慢慢先剫木。

老公整完吊鞦,因為我已比較熟悉Lady Fa Fa脾性,女主人先將佢上手帶佢去大門門角。男主人預備喺隻🐦見唔到的情形下偷運啲物料入洗手間。

我著老公安裝完鞦韆一定用白布簾掩蓋住新建物。

跟住我先帶Fa~回巢。

果然,Fa~入返房後就察覺有唔同,好驚,見唔到都驚,成大碌木,見到就肯定鸚飛鵡走。。。

我用嗰招係一兩日內圖窮匕現式逐啲逐啲拉開布簾少少。

初先帶佢近條木時佢拍翼後波唔敢接近個鞦。

而家就伏伏伏(飛行聲)由嗰度飛上我前臂,往返都可以。

我又用食物引佢在木上parrot walk,咁粗件木可以磨吓佢嘅長利爪。

彎彎呢,師父整咗未裝。

Fa~房改新嘢又要一輪耐性功夫鍛練。

電器篇

 劇情講到之前壞咗雪櫃。

慳家嘅老婆用燜燒煲保存咗一啲食物,第二日食咗韮菜餃重要一人啃十粒湯丸>>>小石人話食到最尾嗰粒心想有排都唔食湯丸。

(有新雪櫃轉頭咪又買😋)

嘥咗幾盒雲吞,蠢咗,唔醒起還在良好狀態時送畀鄰居。

本來有家舖,可比實體舖平啲購買同款雪櫃。

去商場睇實物時,個女職員好幫得手,有禮貌又解釋得清楚,咁就幫襯該實體店。

該店又有折更講一個保養計劃,條數又係令古姐45度側頭內心擘大個口。小石人今次好決斷咁話加錢加plan。

然後望住我>>>我話:"決定得好。"

哈哈哈哈哈哈。

我問:"而家壞咗嗰部雪櫃用咗幾耐。"

小石人答:"20幾年。咁妳又話決定得好?"

我:"記起個蒸焗爐買咗幾日就壞,所以參加延長的保養計劃係啱嘅。"

小石人又向我解說:"呢個雪櫃電子嘢多,有幾com呢就好難講嘞。"

跟住又有驚喜。

呢個商場為咗吸引多啲顧客消費,又攪咗啲積分計劃。

於是去顧客服務台做鴨s登記。

過幾日,我哋再去該商場食嚐幫襯用咗啲積分。

問揸住煲茶個男侍應:"咩呀。"

我本來想等佢放低茶煲先問,但佢見到我電話的鴨s面,唔知乜嘢積分。其他女侍應又圍住睇都唔知咩新攪法。

跟住叫咗門口知客(大家姐款)嚟,一睇就話有呀,妳去櫃位埋單時嗰個職員就知。

我笑說:"就係侍應唔知。"

知客又禮貌地回報笑容。

燉湯冇影,見到係粟米紅蘿蔔就覺得蝕。因為佢話西洋菜同蟲草花兩樣揀,咁梗係要蟲草花點知其他配料咁普通。

外賣裹蒸糉回家第二日午餐用。

找數時,我攞個電話打開鴨s嗰個男人好純熟的完成結賬。

回到我哋坐的卡位畀小石人睇,佢即時發現問題:"點解重要全數4佰幾,唔係扣積分咩。

一日懵幾勻的我,又往收銀處告訴該男子。

男子:"妳冇話扣積分。"

我:"係呀,我冇講,勞煩你要做多啲工作添。"

男子:"唔緊要。"

佢又好快攪返掂。

再唔該佢一次。

出去食嘢開心愉快,我通常對路人同卡乘客侍應們笑笑口。

同場加映~小石人將個滿晒油漬嘅焗爐拆散晒,洗乾淨再嵌返,勁!

花鳥攝·好好地生活

 前兩日佢洗洗吓碗話,:"而家生活好舒服。"

後來再問吓佢,佢覺得而家種花養鳥,過緊退休時會過的生活。

我哋做家務係邊個得手邊個做,互相補位。

都係嗰句,佢影到FA~美態,攝於3月尾。大隻咗,毛靚咗,拔少咗自身毛。

今朝好火,用嘴搓我條裙啲布。事關攞走咗FA~咬咗一大片的櫻桃木傑作,新木暫時咬唔入。(其實日日差不多都刮嘴同燥。。。。)

你以為啦,轉頭就已經開工密密口...咬咬咬。

亞萬能維修師又有好主意。

今次鑲晒鋼條睇吓妳點咬。😁😄

近期開花

佢的新興趣

晚間發現雪櫃壞了。

搶救在雪櫃儲存的食物中。

疏忽的主人

 小石人話個防潮櫃終於壞咗。於是我哋諗吓如買個新櫃點擺位。佢又上網睇吓揀邊款。

開開心心佢今日獨自去影🐦。

我呢排日日都有在FA~房放鳥由不同方位飛回我前臂。尤其係從高處飛落我手。雖則我有講過雀走失咗唔會揾,但都練定如飛咗上樹點樣引返牠落嚟免麻煩消防員們。睇情形FA~都只是在室內放飛鳥出唔到外面世界。

突然,我發現:

原來係牠咬斷咗條電線。😰

好彩佢冇電q死。。。。

事源佢咬爛咗黐喺防潮櫃上塊實心櫻桃木板,整呢塊板就係唔畀佢咬到電線。

我太大意了。咁都伸到入去咬電線。

對不起。

之後,又係萬能維修師出場收拾局面。

影完🐦返家,除攪返著個防潮櫃之外重整咗以下保護木層。

佢話成個櫃高級晒。

The First

 

週一端午節喺FA~房安裝咗層架專擺牠的物品,呢項構思想咗好耐,要等Mr Almost fix Everything隻腳好返啲先完成到👍👍👍👍👍👍,重用得返上次裝修時搬裂咗的雲石,非常好,襯晒。

佢又清理吸咗塵,乾淨。今次將亞FA~附近的簾封好等佢睇唔到就唔驚,適當時放咗牠出廳的紫膠櫈。

跟小石人取經,吼隻🐦的表情好啲先影,似唔似笑緊?

睇佢前主人幫佢改乜名就知對隻雀仔幾有期望。。。上帝創造的第一個女人,唔怪得知咁霸道咁惡!

近期睇的兩齣戲:

The First omen

The First slam dunk

兩齣都係N年前經典作品,近期拍前傳。

佢哋的共通點係暗暗滲入咗現代元素,前者更有很多向舊作致敬位。學小石人話齋,要諗點殺死一個人已經唔易。重要係同一死法唔同場景死咁多件。以前又連修女神父都煙不離手。後者場波打得精彩,雖然你會發覺櫻木花道跌到條Pan骨都已經觸電地痛楚非常但仍在緊急關頭次次都見到佢助攻搶到個球~好好笑。睇動畫又唔使咁在意佢嘅合理性。佢哋隊友間的鼓勵都係講英文"nice",哈,咁多年前日本人唔會咁啦,幾有現代感與時並進。呢齣重要係宮城良田做主軸,由頭帶到尾😄

電影·雜

 小石人有一件紅花梨木嘅几,好重。本來佢要嚟放音響,裝修、搬嘢、掉嘢時,我發覺都搵唔到呢個几用得著的地方。

最近天氣冷,小石人有段時間行動唔多方便,咁喺房有暖氣有時睇住電視開餐,呢件嘢又有佢嘅用途了。

老公重喺淘佬訂啲轆返嚟安裝喺個几度,輕易移動,對冇一丁點力嘅人簡直造福無量。改裝完嘅几令我想起酸梅乾變超人俯伏喺滑板爬嘅畫面。

重有就係我隻鸚鵡,一見親我由主人房出嚟就嗌,如果我出廳就嗌得重犀利(知道廳嘅雪櫃同厨櫃內拉架聲一響就可能有嘢食),即是在廳進餐,佢狂嗌好耐影響用餐安寧。我留喺主人房佢會靜啲。

周不時都會睇吓有啲YouTube電影影評,覺得好多未睇嘅戲就算影評有劇透都唔緊要。

本來成日覺得王子公主從此快快樂樂生活嘅情節係冇乜人會理會,因為大部份戲都係死人塌樓殺人精妙計劃露肉槍戰科技競賽較煞食。點知近期嗰套講公厠清潔工人嘅冇劇情片卻大獲好評實在未睇都好意想不到。

舒琪作為資深電影工作者,在自己覺得唔熟悉的範疇時會請一些喺該方面較有獨到見解的嘉賓助陣,非常謙虛聆聽別人嘅意見,觀眾睇"只要有電影"YouTube時會接收到一啲不同知識同睇法真係好好。最近佢談蒼鷺與少年跟住話睇返千羽千尋呀龍貓呀表示唔明乜唔明物,啲嘢冇講點解。我第一個反應係卡通好多真係冇得解咕喎而且充滿想像幻想。個嘉賓就確係有研究,其中佢舉飄零燕海迪打韆鞦個例子,打到瑞士雪山咁高嘅背景咁個韆鞦喺邊度吊落嚟?又係喎。😄

另一條youtube片訪問好戲之人劉松仁,嘩,此君除咗演技精湛,佢叻在好多方面都思考計算到位。如何由演員被動位置轉為主動而有bargaining power。學習導演攝影機分鏡,原來早期佢跟嗰位友好導演嚴謹到3部機set定晒位(據估而家好多人係亂咁擺),會諗埋3機分鏡兩機分鏡,預萬一有一部跪低咗都掂。劉生喺拍嘢時亦唔介意由第一男主角轉做配角,聽呢個人講嘢都學到好多。記得之前提過佢喺大時代嘅演技了得,佢做陳近南出鏡唔多但畀人有極深刻印象。原來佢做陸小鳳時已顧及唔同男演員嘅細節,好厲害呀。

尋日睇咗一齣90年舊片,無線而家似乎步緊以前ATV後塵,翻做晒啲舊嘢,有次我發現有齣翻做舊片晚間一次第二日下午又播一次。

尋晚開電視時已做緊~小魔怪2。

一套全部都係膠嘢嘅片,然而我接近成齣戲都笑得好開心。老公冇興趣睇,聽住耳筒睇電腦只耐唔耐轉身睇齣戲兩鏡。佢有讚以當時年代,做到某啲特技效果已經好叻。

其實呢齣係一部恐怖片。

最好笑係佢有個魔怪造型,老公見到係覺得好嘔心,但我覺得隻嘢抱住個男人大腿fing極fing唔甩好好笑。

回望老公一見嗰隻嘢出場個表情,忍唔住影抵小石人個樣😄

唔怕睇吓昨晚食咗啲乜嘅讀者就拉下睇吓。

惡攪瑪莉蓮夢露-小石人一睇認得出,我狐疑:"係咪🐷小姐呀?

原來,豬小姐咪係惡攪夢露囉!(之前真係完全唔知。。。。)

註:豬小姐Miss Piggy係N年前芝麻街節目內一個布公仔角色,我諗有啲年輕讀者唔知佢係乜水。

觀察·重新安排

 Happy coffee corner

呢個位置有好多快樂回憶。

茶色玻璃層架本來上層放電視,下層放錄影機,一件側玻璃已碎(係我以前舊居搬走咗的人遺下來物品)。呢度裝修後,我哋按合適的呎吋高度整過兩件新玻璃而成。本來下層放焗爐,因為老公現在家中以輪椅代步,佢仍會沖啡大家一齊飲,事發第二日我太忙,第三日我執過晒啲位~大project😄,等佢唔使重覆舉高雙手咁傷。

觀察到佢一手持茶壺一手攞咖啡杯喺身前沖,辛苦得嚟又危險~咁我搬定張啱高度的櫈畀佢放啲嘢喺上面沖。攞奶要開雪櫃起身~我擴闊嗰個範圍,將支奶放低啲,就可以唔使企起,一手呔開雪櫃兼攞到想要嘅嘢。(自己坐喺輪椅上試過行得通。)

個身經百戰嘅焗爐仔~好好用架,出爐好多美食,翻熱嘢,小巧方便。前嗰排發現,點解佢變得唔識自動計時熄火?原來個計時掣壞咗,老公~almost fix everything。佢喺淘佬訂咗個似夾萬扭掣的計時掣~超可愛,見到就開心。

上面層架係最近整的,用餘下木紋地磚~我哋重將面作底用,視覺低炒看到木紋圖案,好好呢。

吹頭剃鬚就亞FA同我(免嘈到我哋),喺門口附近處理,我將啲用品放在他適合高度。

沖涼梘液同洗頭水都放喺佢坐喺度沖涼垂手攞到嘅高度。

毛巾替換衣物就放在有碌架上等佢容易啲攞到。

事發後第二次去跌打醫館,個幫小石人治療的醫師(招牌名師父的高徒)。同佢師父傾談間講吓小石人發生意外過程。個招牌師父重教我哋要返醫院繼續覆診以防要休息長時間及攞工傷事宜要點。因為睇跌打唔需要睇好多次,患處發唔到力要休養就要由醫院繼續發假紙。工傷期間千祈唔好秘撈,被查到會坐監同埋再整親冇得claim。

我:佢放假一定唔會去秘撈,整親第一日已話傷咗隻腳,病假期間冇得去影嘢。

(冇喺嗰度講,上兩次都係整親手指。放假期間係周圍去做"物理治療"~用手指撳個相機掣😄😄😄)

學到的做法係,在急症室簽發的病假完結前,致電門診掛號再攞病假休息。

隻傷腳要養住唔好夾硬行。

治療到差唔多好嘅時間我打電話去叫定外賣,嗰間食嚐超多人輪候的,平時喺佢營業前致電落單,搶手食品賣完即止。營業時唔使旨意佢哋聽外賣來電,好忙好忙。

咁我行過去落單,15至20分鐘後有得攞。

再返跌打醫館接小石人,個高徒醫師對我哋真係好(可能敬老),幫我由治療座位將小石人推到門前(因為佢哋舖頭高嗰一級我冇能力由高而下安全處理)

推老公過多車窄🐎路時,有好心司機見我哋好耐過唔到會停低畀我哋過,我會大聲向司機講唔該佢。個個唔肯停真係要等好耐都過唔到。我要留意唔好喺轉角位同有車遮擋的位置由行人路落馬路,分分鐘人哋揸車轉過嚟睇唔到我哋就窩河。

推佢時留意走石屎地平路首選。嗰啲百歲磚就最凹凸,避無可避,坐喺輪椅嗰個會非常顛簸。我以前喺呢啲磚上扭親過好多次。

在街上泊輪椅埋一邊等我買嘢回來接佢,我會將架輪椅泊到老公可以左右睇通背靠花槽。

通道窄時要提佢收埋對手,我眼觀前面唔好畀障礙物撞親佢對腳。

落斜坡要微拖手剎掣,必要時自己背住落斜確保坐喺度嘅人安全唔會仆前。

窄角度唔識偷位,同一時間好嘢要兼顧,唔識揸車嘅人會對坐喺度嘅人駁嘴。

佢自己處理到的事情就由佢辦。