最近用鮮奶盒發芽菜,效果好好。
方便而且培植環境啱晒芽菜唔見得光的特性,成品用嚟配麵食~美味。
呢幾日心情MACD從中軸慢慢攀升。雖然繞著腦海的不乏對某些人來說屬沉重課題。你/妳仍可在此抽身不往下看。
對於已經嗰頭近的親人,願意付出幾多金錢去四出尋找治病方法,甚或療養費又點睇點使呢?
個案一,曾經聽過一個中年女兒,用咗二佰幾萬(唔係而家的200個),讓垂死父親入住可供一名親人無間貼身陪伴的私家病房直至與塵世說拜拜。
此中女之母事後講返,係覺得花咗咁大筆錢。估計其母心中不是味兒,而且佢丈夫係指定要佢個女在院照顧。(入住咗好短時間已經呢個數,如果病者再長命啲真係唔知點埋單)
個案二,上年發現妻子腰骨痛到提唔起腳入浴缸沖涼,去睇公立排好耐,用?萬蚊去私家醫院照正電子掃描。西醫就發現佢老婆患咗血瘤癌,開唔到刀。咁事主又怪自己冇及早發現其妻有病(時有說腰痛)。西醫話佢老婆得返幾個月命(而家病人重生存緊)。病者有做化電療。而事主就用盡幾十萬積蓄,去買幾千銀一劑,先得比尾指甲更少的份量嘅豪豬棗畀老婆食(一日兩劑),又中醫兼打蘆筍汁(據說佢妹夫飲此物治好癌症,佢妹連個優質攪拌機都借埋畀佢),後來佢好快就還返部機畀佢個妹(明明有親戚試過係得都唔繼續堅持)。
跟住佢老婆過咗大半年仍在生,精神亦好轉了。以下就係我諗唔明之處:佢哋已共同決定讓患者唔再接受第二次化電療,但就竟然去再做正電子掃描~輻射量等於100次X光照射的驗身(話睇吓入面情況喎);去睇報告結果就係癌細胞多咗。去覆診醫生話病人隨時係咁先,唔化電療冇嘢可做。
65歲人平時有少少積蓄,隨時就可以話唔返工。而家因家中改變,工作時脾氣暴燥、心情唔好都要返。
訴說太太情況時眼有淚光。
佢個女已在楓葉國定居,話到得佢一個時可移民同住;佢另一個妹單身,已移民英國定居,暫住民宿,亦邀請佢一齊到外國生活。佢又一一否定,話唔想陀累第二啲人。
又唔鍾意香港現在情況,藍店一定唔光顧,經常憤世嫉俗好似全世界欠咗佢的模樣,咁生活法好痛苦。
佢同事指出既然喺呢度咁辛苦,試吓跟個妹去外國考慮吓去第二度生活。咁佢呢次肯聽吓人講,立時致電佢妹問續期護照資料。又話一去咗唔會返嚟。。"65歲唔識英文,係唔係可以過去了解吓自己適唔適合先呢!唔通立時退埋公屋就斷晒後路。(英國要求擬移民人士要先買五年保險才可過去呀。)
個案三,63歲退休女單身人士,與9x歲不良於行的母同住,有請工人,退休後立時租咗個單位開咗自己工作室,作品有人買架,但佢經常唔捨得賣。曾裝修供滿自住二樓村屋,裝修完佢啲感情好好的妹妹s就話點解只局部裝修,要夾錢出聲嘛。近期村屋喉管有滲漏,事主好擔心,於是又擬全屋大裝修。提早退休到而家已經大概八年,合指一算冇乜收入又將所有供養母親的支出樣樣自願樂意地攬晒上身,未計水電石油氣差餉交通食用等雜費,8年請工人同租工作室+局部裝修估計用咗佰七萬卦、種牙用咗約廿萬。近期佢本人試過腳凍同痺行唔到嗰一層樓梯,經過做物理治療運動同搖機~好返。
諗緊逆按揭然而又想將層樓留畀佢好愛錫的姨甥們。佢啲妹都已表示唔使。
佢朋友話,在考慮大裝修前(可能又要花七至八拾萬?),會唔會慎重諗清楚係咪繼續住呢度?(潛意思係佢都有返咁上下年紀,又試過上唔到樓梯)。
佢根本一心諗住等佢媽百年歸老先賣呢度買間細啲的。又話呢度住得好舒服。
佢友話,唔好以為而家樓巿高價就一定可以賣到,可能有價冇巿,佢答到時跌價由佢。佢又答裝修咗價錢好賣啲。友續,但佢間屋係改裝咗方便輪椅人士如厠沐浴,就算佢重新裝修買家未必合用。又云唔想佢媽轉去第二度住,每個家庭都有佢難處。友再講,咁佢裝修時都要有地方安置母親居所,佢答,佢哋會一齊住酒店。
佢有買匯豐同港交所,已有親戚話佢成日唔喺高價沽咗啲港交所(一路持有)。。。
綜合種種,佢朋友決定唔會再喺呢方面畀意見,只是聆聽、點頭和😊
