德不配位 必有災殃

      可愛地窺探

丈夫工作地人物與事態發展複雜,由近期最大影響劇情說起。。。

科文Y終於唔做呢份磨人的工嘞。最後一根稻草來得非常突然。竟然係完成該次驗收檢測,該腦細話係大部檻過的僥幸心態。就係嗰張表,係呀,為咗一張隨時極容易處理好的表格。腦細同其兄C淋分別用穢語鬧科文Y,話張表畀咗Y。該下午Y即時打咭走人唔撈。

據當時人告知小石人,Y表示再唔會食佢兩兄弟嘅死貓。Y話事後腦細有不停打電話搵自己,但佢冇接聽(似足啲情侶吵架咁)

呢度要提提,似乎好似大部份人都會報料畀小石人知咁,所謂得準訊得形勢矣,對於邊個稍為可信,邊個做咗卑鄙行為推畀別人(亞推)又以為小石人唔知嗰度心寒。老公呢份工令我哋見更多人性,學咗好多嘢。

一陣間又有寫字樓啲線眼,話腦細同老闆娘講:"今次唔會再求Y回公司。"轉頭又傳老闆娘過咗一啲時日後有借啲意搵Y,但Y仍然唔聽佢電話。

Y有一路告知小石人有關其動向。初先話休息吓先,冇幾耐後又已揾到另一份工。而亞推企圖試探小石人有關Y近況,老公就咋唔知。(亞推呢個人表面仍對小石人冇嘢咁,實在已經非常妒忌,信唔過佢喇)

我雖然知道呢間公司冇咗Y,老公面對工作時更唔得心應手(本來都已經要乜冇乜,之前提過只有Y係會切實執行處理跟進事宜),我卻戥Y非常高興。留喺呢間公司好似話已經十年,個腦細見唔同人講唔同嘢,氹Y替其搏殺開夜唔休星期日直踩,搵人幫工程,現在落得嘅收場係,呢個腦細完成一階段後有事就鬧Y,當時人協助C淋解決咁多問題,呢件事未查清楚又係瀨Y。C之後更同亞推話呢件好小事啫(小事你又鬧人?)。(完成咗呢部份工程C當係自己功勞,後來喺地盤搵返份表格兩兄弟就側側膊,鬧完人當冇事。。呢啲慣犯,據做得耐嘅員工話佢哋經常係搵人食佢哋啲死🐱,真係難為啲貓慘死)

冇咗得力幫手,腦細要Y死落地行,自行安排某些事情,其實啲嘢只有佢自己先知,交分段工作日期,標嘅內容又冇睇清楚。期期糧都拖起碼7日,一有糧出老闆娘就趷啲員工們一早等放工齊齊打咭,返工遲呀咁。

有啲年紀唔細嘅散工就爭上位勞役其他散工。好快,做完某些部份工程後,個疑似強迫症腦細要佢叫工人調轉某些嘢重新做過,激到爭上位散工咩嘢咁,擦呢啲人👞,有排受呀。腦細急住要趕工程時就聲氣好少少,一大部檻過完成啲嘢就擺腦細款。

今晚老公回家後告知我佢哋今期糧比平時遲7日後都出唔到。冇能力接啲急趕要求高質素嘅工程,加埋原來做開的,唔知進度唔知邊個偷懶hea做只是叠人堆。

另外亞推叫小石人做某啲普通散工都做到的粗活,畀C淋鬧亞推:"呢啲唔係佢做㗎。"

C淋叫小石人做某啲嘢時,腦細又鬧C:"呢啲唔係佢做架。"

腦細重要喺小石人面前鬧亞推,小石人借啲意行開費事亞推尷尬,點知過一陣小石人出現返腦細又再鬧亞推,重要問小石人:"你話係咪先丫。"(有乜辦法亞推唔憎死小石人。)

舊地盤個頂檔睇住工程嘅H仔問腦細要小石人回去做某個全場冇人識搞嘅部份,腦細話搵第二個回去得唔得?都講明該舊地盤第一期已係試勻晒淨係小石人處理到(亞推當時負責該期工程,又係小石人整完咗嗰啲位置就當亞推自己搞掂的),其實H仔現時重執緊亞推第一期工程的甩漏。

我問老公:"係咪架,次次都講到你自己英明神武乜奇難雜症都係小石人完美處理辦妥咁。"
 

畸工實錄

本來做地盤A既第二期工程,由科文Y睇係可以的。

公司又投咗件需要高汁素完成的標,仍係由腦細佢個C淋了瀨的大佬"睇場"。錯漏百出度嘢唔啱位。腦細又訂錯晒啲嘢,唔係工程要嘅規格。咁都生存到確係家山重有啲福。

多次要小石人去嗰個B場,老公都係耍手擰頭,閃無可閃就請假都唔去。

嗰度兵荒馬亂,C淋睇工程既得人驚法。。。十足老人失智,唔記得又賴人,重要成日講埋啲廢話要人聽,嘥人時間。

最終小石人初一留到喺A場,因為無選擇下調咗無能嘅亞推過B場。其實亦係廢嘅。

十五咪又係要小石人去救亡。

乜X工具都冇,問親啲負責人(亞推)就話有,,,有?但係唔用得的,壞了。啲所謂負責人自己去睇完,放低件工具就行開,當乜事都冇發生,件壞嘢就原地放番嗰度,等下一個人去嘥時間。

一係修一係掉,就係咁簡單都冇人處理。

小石人搵科文Y,佢係會跟進的。冇錯,又係科文Y去執呢啲滿目瘡痍嘅炮屎場。

點解小石人咁有利用價值,一度冇人識處理的部份,亞推叫個散工去做,嗰個散工轉頭打咭走咗。唔怪得晒人哋,亞推自己唔識,淨係吩咐老散諗掂佢,亞茂都走。

小石人完成咗呢件曲節離奇嘅部份,條亞推竟然話要加嘢。而且完成後先畀佢嘅意見,未開皮前唔講架,因為唔識。

呢段時間週日開工每晚加班。有人做完成日都吼住想加班,咁好精力皆因日間行行企企怕卦。

勤力工作的真係唔想加班同直踩冇息休日,,,,

亞推初到B場就話唔夠時間,話自己7月要放假。Y科文表示:"你咪放。"放假前腦細叫亞推交低嘢畀Y,亞推同Y講佢乜都唔知。但在放假期間筆寫同別些公司夾過嘅嘢。

咁難得嗰個嚴人寬己卸責嘅腦細讚咗我老公起碼兩次。

腦細自己攪咗某啲嘢,畀小石人發現同修正咗個問題。避免咗影響公司聲譽,兼後果可以好嚴重(死得人嘅)。

個個都好驚test&complete。(委託人驗收工程)

老公應對得頭頭是道。以佢為榮😊

 

我要離開吓

去食週年紀念午餐那天,

Behind the scene係,早上我重在床碌緊遊戲時,小石人出睡房就發現亞FA~唔見咗。

飛咗上衣櫃頂。

條錬咁甩法又係將會一輪折騰,要捉住佢用布同冷衫包實,一個人控制佢唔好郁另一個人用工具鉗返實個扣同金屬圈。

佢自由就猛咁大嗌。

我一出睡房門,

轉頭就有一隻拖鞋飛去佢度,佢亂竄飛咗入厠所。

我:"唔好咁對佢。"語氣當然唔多友善。

佢飛返出嚟,飛嚟我度(過頭頂高度),伸高手一接佢就:

我:"你做咩咬我?"

佢放口,好彩唔係咬得咁深有印冇損。

跟住放佢飛開,我儘快戴返保護裝備就同平時放飛一樣,來來回回都飛返嚟我度。喺呢方面,兩年養佢同用心練習飛行冇白費,做得好。

今次整返個S扣上佢腳,順利呀。

我同老公講:"我精神好緊張。"講咗好幾次,與自己共情,由內心釋出繃實嘅情緒。

之後都有為我又重語氣對小石人致歉。呢樣要多多修練,急趕時就算見勢色唔對都需學習停一停深呼吸。

事後我連聲說:"好彩你今日放假,我自己一個人扣唔掂。"

話說呢一日假(星期一)係小石人堅持要放的。

呢條亞推重要小石人再一個星期日加班,如果聽佢支笛即係已經兩個星期連續開工咗十三日後再繼續做,使唔使呀(亦已違反勞工法例)。重未計期內夜晚要人加班。

當小石人在群組請星期一時(佢哋公司norm係用whatapp對答通消息。)

亞推又私訊小石人叫我老公最好星期一返。

啋佢嗰個先奇。

假期時,亞C淋L瀨又打電話畀小石人。喂,散工放假係冇薪水的,冇義務隨傳隨接電話。

享受完舒適的兩日假之後。。。

星期二返工時:

小石人後來告訴我接近全體員工一見到佢就稱呼:"石哥"~客氣非常。

長話短說,佢哋做緊嗰單工程有個位就係因為亞推喺第二啲工種公司整塌某啲嘢同位置時唔醒目,冇喺該位置原狀時預先跟進某事情,淨係攞住副架生耷個頭做而履行唔到科文嘅責任,變咗後來自己工程部份亂晒大籠。

原來週一時,好多認C認P嘅人都攪唔掂嗰個位置。

每個人都渴望呢位唯一能打救到呢單工程嘅人(~小石人)返嚟處理呢個位置。(完成唔到就冇錢,工程收唔到錢,有冇糧出都成問題。)

喺呢度,小石人得到好多人嘅尊重。

亞推,到啲嘢比較順啲嘅時候,就又怪一名H仔執漏執得慢。呢個H仔轉頭同小石人呻,冇心機呀,畀人話做得慢。去食煙先(大家都知道而家在地盤唔准食煙,H仔係要離開地盤老遠的地方吸)。

亞推同背後睇唔起佢嘅腦細一樣,最叻打擊士氣。根本同一類人,亞推係縮水板。

而H仔,之前有笑笑口同小石人講:"檢測嘢過唔到都係你啦,又唔記錄低。"

小石人神回應:"我係照大會指示,三日有三個唔同說法做法又冇叫我記錄,唔通我自己冇端端自把自為去做咩?"

(我:呢樣係邊個講畀H仔知嘅呢,只有一個人-亞推。而佢究竟點講法呢,將失誤責任推咗喺小石人身上,呢點十分明顯。老公,要提防呀。)

之後亞推同小石人一齊到某處時,亞推疑問點解呢度嘅工作要咁樣處理?(佢認為多咗工序咪慢囉)小石人答:"呢樣要多呢幾個步驟先能徹底執好晒之前某啲人做出來的多重各種錯誤,亞H仔已經細心哋執咗好多度架喇。"

(即係小石人幫H仔發聲,講畀呢個夢輪亞推知,H仔點解係亞推口中的慢,小石人同H仔做嘅係唔使翻手的一鏡到底呀,其他嗰啲係執咗再執都係錯架)

(我:可能條夢輪自己都係執咗都係錯嘅其中一個。而且而家小石人睇工程定亞推睇工程呢,次次都要老公提返佢。)

有次放午飯,人物有:亞推 小石人 女工Kw Ha(小石人發現呢位後生仔勤力細心做嘢有擔當手工唔錯,同亞推講呢位員工值得留意) Hon

亞推:"個顧問講得好啱,我哋應該咁咁咁做。"

小石人:"推哥,你係年三十晚今時今日先有份去開呢啲會,之前你只是攞住副架生死命做,根本唔知道呢單工程嘅任何嘢包括準則同要求架。呢個顧問講嘅,正常計作為管理呢單工程嘅科文係一早需要知啦。"

(喺小石人敍述這段前,我請佢即場在我面前重新演譯當時嘅表情😄同話語。

看畢我心想:"老公真係忍得好辛苦。"

小石人以為我會否定佢嘅做法對我說:"老婆,我都要抒發吓架。"

我:"係呀,所以我係非常認同老公嘅做法說法。")

(之前我哋兩公婆多次一起分析形勢時,想到我哋唔知呢三個人 腦細 淋瀨(腦細的亞哥,欠債已經賣晒公司股份畀佢弟弟) 亞推 呢幾十年之間的恩情(以前有一齊去外地旅行),我覺得關鍵人物係呢兩兄弟嘅父親乜叔,帶住亞推出身兼對兩兄弟保護有加,每個兒子有一層樓又將生意交棒畀佢哋。

點知乜叔會唔會臨終託付叫腦細記得睇住亞推呀。。。咁就死得。)

好嘞,扎腳布咁長。

臨近歲晚,亞推又要求小石人唔好咁早放農曆新年假,朋友之義小石人有答應。

點知轉頭個腦細又要將小石人調去第二個由C淋L瀨攪到唔達標的地盤執漏。。。。😁

(即係亞推點打人情牌請求小石人遲啲放農曆年假係廢嘅,根本個乜數字都唔知嘅腦細話調走就調走嗰個呢度唯一處理到咁複雜嘅工程步驟的人。)

(而呢個腦細覺得樣樣嘢都好簡單的。但自己負責跟另一單收驗工程時,其中一個同事Hu對小石人講:"睇住腦細佢捉worms入patpat,人哋只是要check項工程通唔通,佢就自己講晒見到的唔影響大局嘅甩漏。驗收員第二日畀公司嘅不合格項目就係腦細講嘅全部。"

(芝加哥殺手:專隊自己友)

自己做唔到某啲重要嘢,呢條腦細將責任歸咎Hu,話佢影相唔跟得貼。,呢位Hu同事前嗰排返工時先至砰嘭累咗喺街跟住入過ICU出院架咋。

(好多同事都會報料畀小石人知嘅,人緣好好呀。腦細臨同事收工前去地盤,都係Hu收到風報訊畀小石人知架呢。))

正當小石人思量緊點寫早放年假時,呢個腦細咁橋喺Whatapp發佈:"你哋邊個要請假就早啲出聲喇,等我有所安排。"

立時,小石人就跟返原定計劃早兩日開始放年假,反正留喺度幫唔到亞推,就算後來又改咗唔使小石人過去淋瀨工地。

呢個PK磁石-亞推,重要畀淋瀨兩次以上嫌佢咁樣安排人手嘥人工。亞推向小石人訴說同埋呻。(其實亞推自己咪又係咁對"下面"啲同事)

直至再呻時,小石人終於忍唔住:"你可以同淋瀨講格,不如現在開始由淋瀨你去安排人手,亞推我揸返副架生做啦。"

呢條鵪鶉又係不語。

當一個好有責任心做事妥當嘅女工Kw在同小石人合作處理某任務時,

Kw:"石哥早咗放年假?"

小石人:"我要離開吓。。。"

最令我欣慰的是,老公會執走晒自己帶返工的架生回家~小石人有可能唔會再返去嗰個修練場!

我:"此地不宜久留"

 

完美示範

該煨,當一些人組合在一起時,就是錯漏百出瀕瀕孭鑊,推卸責任給冇能又不懂保護自己既人 那人不聽試圖幫助他的人有用建議。

呢個傳說中的石哥,雖然是散工一名,卻經常得到同事們讚賞。Hu同事有說:"又一次完美示範呢樣嘢點做。"

有人做呢行廿幾年,對唔同項目安排部署天天都在進步。

反觀有人喺同一間公司做幾拾年,似天天只是做同一樣嘢,手藝 做事方法毫無寸進,無能力處理咁大項工程,唔識爭取需要,樣樣錯晒 唔知邊個散工做邊忽,正在無助地閉翳緊。重要聽人點,冚返晒啲嘢交咗貨先再慢慢想辦法,而家係樣樣都行唔到,交唔到貨,知道錯仍然由啲亂做嘅散工們繼續錯落去。同驗收人夾完嘢再畀指令石哥同一件事三日三日都唔同驗收要求。應該一開始工程就要知清楚的收驗準則係到工程驗收前先同人傾,計劃圖又係埋尾先攞出嚟睇,係咪夠黐線。

呢個點人嘅人,自己負責嘅另一啲工程就係明知錯都繼續錯落去,為咗唔好畀人證明自己之前係錯。自己加班做嘅嘢更係C淋L瀨,最終又係畀腦細鬧鬧鬧,又係石哥執漏。

過去的星期日,石哥要返工,跟著個無能亞推,加班就係執漏,重要提醒亞推需要告知不停做緊錯嘢嘅散工點更正。條友(亞推)重係打電話一舊舊咁"指示",

石哥:"你親身落去講畀佢哋知點做啦,監察佢哋做得啱唔啱啦。"

亞推對著電話筒的對方說:"我而家去你度,我畀人話緊喇。"

上天派人幫亞推都冇用,因為佢一路唔聽幫緊佢嘅人方法而係選擇幫唔到佢嘅人的歪路。

今時今日攪成咁,自作自受。

個腦細就老是找亞推做羔羊,一日都係人哋嘅錯。

我同石哥講:"現在只能專注在每天做的執漏,不要再想他們的大局了。"

石哥:"係呀,好彩我只是一名散工。"

我:"其實腦細應該一早請你做顧問。"😄😊
 

慎

一見呢幅就開心,清到呢 背景又翠綠。
 

過去的週日

早上大隻佬約小石人去影雀。

佢哋約下午,我就截咗佢糊先同小石人早點到目的地附近豆品店食嘢。

現代少女既青春又歡樂地結黨踏單車去,大派冰淇淋。

呢排老公都係提住工作,更發惡夢。夢劇情我解讀為舊公司無啦啦被炒,現職又走唔到同因友人情誼而傷心。實際夢境佢咁私人嘢就唔講lu。

推薦人係佢多年朋友,又一齊學太極。平時呢位先生畀我嘅印象係遇到別人對佢不公或擺老細架子都係唔出聲順受。就算家庭事上係嬲都敢怒不敢言。

呢類人先可以喺呢間公司生存到咁耐。

小石人孖埋大隻佬喺呢間公司做散工,佢哋以為單嘢分咗兩組人係競賽,所以喺推薦人負責部份奮力工作。

點知亞推反而做做吓又派小石同大隻去幫人哋隊team。抓晒頭。佢唔知個老細喺科文Y面前批評亞推做得慢,重叫Y科文去話吓亞推。

邊有呢啲咁嘅老細,自己授權Y去攪自己公司分化!

亞Y都唔係儍嘅,佢知亞推係兩朝元老,所以只係喺小石人面前講"點開口"

(當然唔知Y嘅動機係咪想借小石人把口達到某些目的。老公只聽沒有再將事情傳開~醒<冇被人利用>)

我告訴小石人,你哋以為係比試,其實跟本冇得比,亞推一早就輸咗。所以小石同大隻不必為佢爭什麼。

而且我問小石人,發聲係為咗自己想表達定為亞推不值,要問自己說話和行動背後是什麼原因。如果是想表達,有權講,講咗出嚟對件事有幫助又舒服啲。但如果是為亞推,那麽我想小石人要考慮收聲了。只聆聽就可以了。

因為亞推重喺個林度,以為自己好了解個老細,重經常為嗰個老細講說話。佢在自己製造出嚟嘅肥皂泡內先可以做到咁多年。你就唔好篤爆佢。

大隻佬更評亞推根本唔係做大佬的材料。小石人觀察,亞推自己唔係做睇大局嘅崗位反而重揸住架生死命做。沒有遠見不懂用方法推動工程進度,走歪的進程沒有及時修正。好多時反而係小石人提佢。

而公司老細自己其實係做遙控科文,控制圖則等資訊 材料要由佢自己叫又經常叫少 工具唔齊 買又買唔啱用的 而且竟然唔落場實測,亞推報咗數量老細自己又改少啲。

最最激氣係,亞推重話人哋快,小石人大隻佬唔夠人咁快。(我聽到小石人憶述時直頭爆粗,咁邊個調老公同大隻佬去幫人哋嗰team。係咪黐x線!)

人哋個team係做錯晒啲嘢要翻手做同補救架喎,快,有x用。

呢個老細喺工程話好趕,重要調走小石人去第二個地盤。大隻佬知道要調走小石人,轉頭就話唔做嘞,留佢都唔會回頭。

亞推心知趕唔到工程進度但又唔爭取,反而同樣情況,科文Y係會鬧返個老細轉頭,會爭取幫到手既人留低。老細看重Y,有某些牌 後生 做到成績 都有佢合理理由。

小石人又提亞推了,以前佢舊公司做科文的有權按工程進度保留員工唔會咁調嚟調去。有些人講極都做錯科文有權炒的(呢度當然唔係咁)。由得話極都做錯嘅人留喺度放計時鑊。

呢次亞推有聽小石人講同個老細表達。

多年朋友,真係唔好咁熟甚或共事,要保留友誼就出小句聲。然而有啲嘢已經變質。

我曾不下一次請小石人考慮唔好做。原因係做工為咗錢,而呢個老闆成日計住條數唔準時出糧,遲出拖欠。

據離職散工告之,呢間公司重未供餘下強積金期數呢。

既不能共患難·又不能共富貴·有屁用

一.
 Y科文對腦細說:"間公司送錯咗貨嚟延誤了工程。"

腦細:"關我咩嘢事。"

二.

Y科文告知腦細:"該地盤領班話我哋自己好難運啲咁重嘢入去個島,他表示我哋可以揾卡板包好啲重物,用佢哋吊雞運啲貨上佢哋專用船。"(明醒)

腦細:"去邊度揾卡板?"

三.

某判頭對Y科文說:"你腦細乜嘢都唔理,不如你自起爐灶接我啲生意。"

另某判頭對呢間公司舊員工講以上同一番說話,加多句"你唔接我都唔再畀生意佢做,會揾第二間公司合作。"

Y科文的朋友亦是在呢間公司做的,同Y鬧咗交冇做一排又返番嚟,同小石人訴說Y以前脾氣唔係咁暴躁的,自從入咗呢間公司學埋呢個腦細咁。

(有說如果啲嘢打唔開或入唔到Y就用蠻力大力搖啲嘢。。。情景畫面在我聽小石人敍事時我想像佢好似隻發狂猩猩咁樣。)

腦細對Y科文說:"晚間呢樣工種咁好做,等我嚟處理,你放工後由嗰度運啲工具去邊度邊度交畀我。"

塞車中。。。。

腦細不停打電話畀Y催促!

(有人唔知道塞緊車點催法都冇補於事。)

其實只要加多少少錢畀個員工留在原地加班就可解決,亦不用員工浪費自己時間送運工具給腦細吧。

Y對同事訴說就算腦細想自己lam嗰工易執的事項都可以講得圓滑得體令人聽起嚟舒服啲卦。

替公司在工程立咗功,應承咗年尾會有獎賞,到年尾一陣風都冇。

凌晨3點幾自己瞓唔著whatapp個女工話下次打掃完要將該物件放回指定原位!

大佬呀,你唔瞓人哋要瞓,第二朝重要起身返你份工。

有個員工臨時唔舒服打電話向佢請假佢電話唔通,whatapp去群組通知腦細,腦細自己冇睇whatapp就在其他同事面前鬧個員工表示自己編好晒啲更表打亂佢安排。

其他員工有睇whatapp知佢鬧錯人而且該日工作安排少一個員工大家都知冇影響的。

情何以堪

腦細自己做錯諸多藉口 員工做錯鬧到xx。

地獄

Nineteen dinners

 原來由本月14日開始除打十號波停咗幾日,返通宵班至25號,若不是打風要直踩足咁多日。

本來重話有單接住去離島,該島船期係晚8時搭船留島工作直至早上8時由島才有船回岸,由上船處回家來回又幾粒鐘有多,個黐線腦細,喺科文提出咁返工法回家逗留幾粒鐘又要再出門返第二日唔掂,腦細竟然發脾四問:"咁退訂囉唔接單工程?"

咁接工程法嘅人,腦袋都有啲問題。返工嘅提出疑問好正常又被鬧。科文反建議返隔日,中間休一日。

當小石人告知我時,

我問小石人,如果係原定咁安排佢會點。老公答:"唔返。"

個腦細之前叫科文同其他倆員工(包括小石人)講25日晚一齊食晚飯,科文唔記得通知啲人,然而個科文自己都唔會去赴宴,因為食完嗰餐(原定工作計劃係)即時凌晨要返通宵工所以唔飲得酒,冇酒飲佢唔去。腦細又發脾氣:"咁以後唔使攪呢啲活動啦。"

喂,如果唔係後來取消咗25日晚至26日凌晨工作,約晚上6-7點喺旺角,食完嗰餐飯又返唔到屋企,流連喺街等到晚上11點幾先返工,員工之後要捱夜通宵咕喎。有冇諗吓人哋?其中散工(小石人),唔返工冇錢,冇工程就雞,重要用自己時間去食埋呢啲陪笑飯。餐飯係獎勵佢哋開咗咁多晚通宵定係懲罰????

重喺背後話想揾年青工人領工程,而家某些員工係長者(可能包括講緊我老公)。

識諗嘅人都知道,要培養有經驗的技工師父,除咗平時學識同經驗,重要訓練佢處理工程能力,唔係石頭爆出嚟就識,佢公司冇能力培養呢啲人材,之前提過買粒縲絲釘都計住幾多粒,買完一次又一次,師父員工時間都唔止呢個數。

之前又一次,小石人放假,引薦做呢份工的朋友(可能係腦細口中講緊嘅其中一個長者,在該公司做咗好多年)打電話畀小石人話休息都要返公司食嗰餐開年飯。小石人又畀面這個舊派思想引薦人。返到去,個已經退股的其中個舊老細(現腦細兄長,財務問題纒身)問小石人:"你唔係放假咩,點解會返嚟?"

真係人都癲。

後來又又一次,引薦人黃昏後又打嚟問小石人點解唔嚟食晚餐。

小石人:"冇人通知喎。"

重繼續問:"咁而家嚟唔嚟。。。"

小石人:"老婆煮落飯鳥"

賞

 覺得呢張有獵奇的特別感覺。

昨日佢同大隻佬去塱原大豐收。

隻彩鷸好謹慎靜靜雞行出嚟,佢哋其中一人慢慢尾隨,隻🐦自然走到被偷窺的位置入鏡。

飛邊後。⬆所以我要求佢畀埋第一幅我。寫嘢寫特色,唔係有乜好講。😄

佢影到鸚鵡好似好開心。

雌雄同框,佢話周圍有另外兩隻乸,隻公淨係黐住呢隻。

日前有疑似utuber,同年輕貌美身材正女助手八卦文。

小石人:"遇著呢啲情況個男人死梗"

我說:"老公夠坦白。"

實情我冇留意嗰啲嘢。人哋男歡女愛唔關我事。

春意濃

前天,佢最近在職又因工程未開工而放假的公司,個性格好執意的老闆(可能有強迫症)竟然特登再打電話畀小石人交待因工程未開到所以要員工休息。

可能上次小石人開通頂的那一晚,同呢個老闆及一科文共事時,老闆對小石人解決當時工程的能力讚賞,因為老闆有採納呢個散工(小石人)的各項建議。

(我多次提醒小石人對個科文要小心啲,因為可能該員工看在眼裡會覺得受威脅。你唔同人爭但人哋會妒忌你。)

呢個老闆經常都會吹毛求疵,例如某啲工作已盡能力完成後,個老闆會要人將啲位做到直角(實際係做唔到的)。

在老闆致電給小石人後,我讚他們。

個老闆知道你在此工種能力上有真材實料,所以咁有誠意打嚟交待未開到工住。

昨天去塱原影嘢時,有關方面一通知公司可重開工程,個老闆又即刻打電話問小石人在別處埋咗班未,未就重返工作。

我覺得呢個老闆好尊重小石人。

而家經濟不景,有乜嘢項目係雲來。。。

求神問卜

問下點解運滯 問下點樣財來 問下呢問下路。

我就唔會求,正神仙唔會幫人改變因果,邪神陰神幫咗事主要還的更多。

逆境未嚟前做好防風準備,自己踏實生活最靠得住。

穩住自己的心

天寒地凍時小石人趁放幾日假約咗大隻佬去朗原影雀。回來後都是訴說及兩公婆進而討論政府做完一輪話保育其實將自然生態變咗石屎石屎奪去生物多樣化,規管唔畀普通巿民進入稻田及保護範圍。

係咁架啦,本身政策同辦事的人的思維就唔係真正保育或保持自然生態,只是跟一向做法,例如濕地公園的石屎屋遠距離窄角度觀鳥,會吸引到不同生物的樹林灌木就斬晒佢。

話說回當日佢去完鳥攝後返嚟就開始作病。呢啲時候就係要休息。佢話點解沾寒沾凍似發燒跡象又乏力。

我:唔係咁樣你點會乖乖休息,大隻佬第二日假期再約你去影嘢你會唔會去丫。

我當然知道答案。。。

比原定假期放多一日好好靜心休吓。

呢間公司啲老闆幾有人情味,之前佢哋有個同事中咗風,老闆們去醫院探佢。小石人以前嗰間公司個服務咗十幾年嘅忠心員工(即小石人的老友)突然死咗,嗰間公司兩個老闆冇出席喪禮連乜金花牌都欠奉。啲仍然在職的員工一離開告別儀式無不炒媽拆蟹鬧爆嗰兩個人。

我:生意賺錢生計活動,唔使放太多感情落去。

今次小石人因病請假,現職公司老闆都會問候吓呢個散工,請佢保重身體。

家常講完。

繼上次操作後,個巿上上落落,我只取消了月供中電。因為冇用不完的資金。而且變咗陣買咗日Yen,咁就供少幾期架喇。

近期比較做得好的是$246港交所,究竟個巿在結算日後再掟落去定繼續緩緩上升呢?比著之前一早賺少少就沽。但經過咁耐的逐步沉底,上次盈富同吉利亦係在當時低位反彈,而家由贏變輸然而要改變賺幾粒花生卻追唔返之前的虧損就係要忍耐。

政策。

日Yen carry trade拆倉。

不加息而有心人會繼續作可能減幾多幾多次息。

有人以為升巿就係經濟好。

當多次似出現"常規"時,到大部份人都相信這常態那刻,逆轉可以嚟得好急。

忍耐忍耐再畀耐性,循之前的大綱執行,有變陣係正常,現時的虧損是正常,由贏變輸是正常。

手風順時不意氣風發

逆境時不意志消沉

一日未離開賭枱一切都未有定論。

 

戴勝

一只在香港很常見的🐦。

動作好快架。

據小石人講,隻雀仔都唔驚人。

然而,一大堆攝友嚇到佢要上樹。

人類,有時啲行為好得人驚。。。

陌生人上鏡😄,老公呢幅捕捉得好好。

週六,佢友約好早呀。去到冇幾耐,佢就msg我話返嚟同我食早餐。

咦,你唔同大隻佬(佢友)一齊食嘢傾吓偈?

原來去到拍咗兩嘢佢友就走了~要去拜山。

過去一星期,最開心的一天係~小石人被指派到隔離座樓度做工程。早上可以瞓晏啲,回家攞工具方便。重可以食老婆預備的愛❤午餐。似以前人去耕田,間屋就喺田邊,慳返好多上班車程同時間。

佢呢間公司,3個老闆合資。

其中一啲老闆對員工幾好架。

記憶中以前啲上司老闆,工程地點越近你家就越唔會編畀你做。硬係將員工互相調派去老遠返工促進公共交通工具流量。

小石人話成間公司,佢開工日數最少,幾好丫,週六日休息吓。趁有精力時預留多啲時間畀自己同陪家人。

前嗰排佢公司請食飯,個老闆重畀咗幾個日期亞小石人揀。對老公十分尊重。席間,有位同事的言論,事後畀老板背後話嗰個人"包拗頸"。似乎呢個人犯咗職場大忌,做人,在某啲人面前某啲場合中更要謹言慎行會好啲。

 

最有價值家庭成員生辰

佢話請一日假,我話請夠兩日連放三日。

老公今早到街巿買料等我煲湯畀佢飲。

畀某人知道你唔係等住份工啲糧開飯都好。。。佢話冇咁諗,只是呢度街巿,放工後啲湯料販已收檔。

我小器啲,我係咁諗。😋

食完早餐歇一陣就開始每種料用薑蔥汆水。煲煲煲煲煲。

用消費券買的急凍翅解凍再放入蒸焗爐兩個鐘。未夠腍,就用上湯餵多大半小時。

老公曾同我講話用濃湯寶😵

今朝至下午傾咗好耐偈。

人 營營役役 係需要畀時間自己休息 沉澱思緒,將唔舒服的感覺認清楚兼表達。每次放下唱針,講完諗完有正面訊息方為舒緩心中鬱結之上上策。理想的狀況是不要留於每次想起都給自己二度三度輪迴度的傷害。<買賣股票輸咗錢同理>

當在提起某件覺得不悅事情時,像訴說別人的故事~就成功喇。

恭喜晒😄

前幾日 佢返工,我哋午間通訊時,送咗呢個gif畀佢,而家不同地方啲管工變晒雞窺蛇咁監察著。

夫妻經常互相扶持 心靈伴侶 夫復何求。

0.78磅 $692.6 我哋分兩次食,買的當日間店舖做緊優惠,購1000蚊Q蚌實畀$900,即時可用此特惠無需等下次幫襯先得。

 

3個人都要咁

 老公買給晚間仍睇嘢聽嘢的人用的。~無線耳筒~

* *

話說小石人在家中主理裝修事宜到接近尾聲時,就有位工作上識咗好耐的P君串針引線同佢老闆提起小石人可到職工作,嗰間公司有三個老闆,其中兩個當小石人喺Y舊公司做科文時有跟過佢。呢兩個人又曾喺某間世襲下一代的公司做咗好耐,後來因頂唔順啲老細s的做事作風而另起爐灶L公司。咁橋小石人在上一年有喺世襲公司服務過,間公司最尾幾個月重拖欠薪金,又細眉細眼地一粒普通零件都計嚟計去,叫料又唔足,做成工程經常是工人等物資而企晒喺度,本身人工就係咁嘥法。嗰啲領兵嘅科文,冇料兼忌才。

初期,小石人在呢間L公司做得好開心,兩個老闆都對佢客氣又尊重。雖然,呢間公司規模小,有時投標接唔到新項目前,佢哋都會盡力畀其他嘢做留住小石人。

後期未開到工程都有禮貌地叫小石人休息。

咁老公悠閒地過咗差不多一個月。

世襲公司內一位友人又向小石人招手,與此同時L公司又叫定小石人開工,好似係待有新工程就由佢主理該項目怕卦。

老公比較喜歡L公司,亦唔計較佢日薪比同行畀得少,最重要是工作開心。

如上,佢哋未接到新工程架,就安排小石人跟P喺某地盤開工。初先都有講有笑。到亞P前嗰排請咗兩日假同佢老婆行山,佢同小石人講,P休息期間,問另外一個散工每天做什麼工作就得。

到P放假當天,那個散工其實都唔係好知要分配乜嘢工作。及後P放假後中咗招,要在家休息等回陰,工作仍是由該散工分配。

到P痊癒復工,小石人問P當天工作安排時,佢又係叫小石人問嗰個散工。

又係一啲人搵每日做乜的工程。有次小石人話搵個散工問下下樣做乜時,呢個亞P又話:"問我都得"

最奇怪的是。。。。亞P問小石人點解唔講嘢,係咪同老婆嗌咗交。

小石人:"梗係唔係啦。"

昨天,該散工同小石人講,叫小石人跟某樣嘢時要搵埋佢一齊處理。

P又同小石人講:"我當你係自己人架。"

!!!!!!

佢哋呢間公司喺呢單嘢上係得3個員工架咋,重要其中兩個係散工。