大嶼山民宿(多圖)

年頭去過長沙同貝澳民宿,因為當時係農曆新年,搵嘢食係該次主要處理的事情。
嗰段時間,貝澳係會睇到舞獅舞麒麟,聽到熱鬧炮竹聲,嗰次住處露台見到棵好大的象牙花樹,重近距離見到义尾太陽鳥。
期間去過大佛同大澳。
(因為行程冇乜特別+上情緒病冇心情寫網誌...點知剛再同小石人傾返呢個旅程,佢話寧靜各有特色,兩間民宿在天台燒嘢食都好舒服。)

小石人在其他地方尋覓的义尾

陌生厨房搵唔到油同調味料嘅一餐

 大澳文物酒店

長沙民宿天台眺望景觀,呢個房源一路冇再出租

六月中同小石人相識紀念日,又再去大嶼山過兩夜。今次選梅窩,呢度係去過幾間民宿啲用品最齊的。要用嘅厨具都有,房東又特意預備各式調味料,一睇就知係新買冇用過但開定俾房客用,感覺很貼心。

銀礦灣我小學去過旅行,一隻蜆都掘唔到,好記得嗰時啲同學俾咗7至8隻同豉油碟咁大的發財大蜆我。

鏡頭轉返嚟現在,第一日去咗游水,水退得好犀利。原來嗰度泥灘踩落去好似慕思蛋糕咁滑。感覺好得意。第二次再游時係平日,雖然時晴時雨但近乎包場,,,,正。我哋重喺海灘聽男高音Andrea Bocelli嘅歌,跳咗一陣舞。

其中一日去咗迪士尼,事源上年完成老渣某些條款攞到張一年免費入場商務通行證。小石人話睇魔法書房同獅子王慶典舞蹈同歌曲都好專業。鐵甲奇俠3D片 射擊遊戲返洗兩次。

 銀礦灣

美麗月色

食好啲入咗呢間嘆住冷氣睇卡通人物巡遊

現場好膠

長洲好住處^^

週六、日長洲遊客人流似旺角。嗰度嘅房源大多數為港人都知曉的東堤小築，扲入去睇某啲用後評價，其中一間的一個評語話樓上好嘈，我個心不其然諗起啲嘢，是以揀選時好小心避開嗰個地域。

今趟遇到這房東實在是非常幸運，呢個係一位待人以誠的人，上面圖片係真珠咁真的影像。雅緻簡約，屋主在花園將厨餘堆肥，他以環保概念融入家中，而且周圍有很多不同品種的雀鳥猛禽可作近距離接觸，而且主人與魚鷹有段有趣故事。

刻意在園內擺放一大水缸、三小盆常注滿清水，吸引了一群紅耳鵯甚至是巨大的魚鷹定時在亭園沐浴嬉水，又有褐翅鴉鵑在附近築巢，鳥聲處處充份體現人與大自然和平共存。

房東是位生態工程師，聽他分享原本曾遞交建議書給議員改善長洲單車停泊方法以美化巿容；貨船上落貨時如果能添置碼頭起重機既可避免船隻於加強船上起重機力度而排出廢氣又可除去聲污染；以及向政府提出租用偏遠海旁用地作厨餘減廢都一一被否決漠視。

在香港，環保只是一個口號，政府說了這麽多年究竟敎育了巿民什麽?為社會做了什麽?我們有沒有身體力行去實踐?

而房東給我的訊息是他實實在在地行動，而且他是位超級有毅力和恒心的人﹗他計劃重建現時的平房，若發現附近房屋清拆遺下有用物料，他能本事每天以個人力量搬運大麻石回家儲存備用，搬運期長達幾個月。確是有鋼一般的意志值得我去學習!

南丫島之南

六、七月份去了兩次離島過夜遊，一次比一次精彩。

首先我呢啲冇乜計劃的人次次都係臨小石人孖日休息前幾日先戚起條筋揾旅遊點。

以前冇試過上網揾房源的我誤打誤撞用咗個app，咁抆水梗係冇渡假屋租啦，點知小石人竟然有興趣露營^^".....

搭街渡將到模達灣時，船家見有隻狗喺大海茫茫游緊狗仔式，佢哋真係好心，繼而企圖用支長竹柄撈箕撈佢，好大隻咕喎。攪嚟攪去唔係辦法，卒之有個西婦二話不說咚一聲跳海營求，其實隻狗又唔熟個人點會啋丫，結果個西婦係追極都追唔到呢隻機靈神犬。最後俾人救的早早上岸，個婦人就有排都游唔返埋岸。

人跡罕至只有一間假日才開的士多，所以無論住渡假屋定露宿都最好自己帶齊所有用品同食物。

本來只是住一晚但見嗰度環境清靜，天氣好時晚上可觀賞銀河星際早上又睇到日出，小石人係攝影發燒友，合晒河車。佢好開心於是我哋同房東商量再住多一晚。

問題嚟嘞。。缺糧，幸運的我們，同當地熱情又識做生意的士多老闆娘尚算投緣呀，在資源匱乏的情況下竟然有兩條烏頭魚、有雞有菜做晚餐。

嗰度啲狗呢，冇對陌生人狂吠。好多隻而且有山頭主意，到個沙灘冇乜人佢哋就會兩幫狗鬥吠...有如蠱惑仔晒馬咩嘢咩嘢咁裝胸作勢。到有一幫走頭，另一幫又會輸狗唔輸陣咁死都要講最後一句先算贏咁。

由唔知幾時開始，沙灘經常漂嚟好多好多垃圾，我用自己微薄的人力執走塑膠廢物時，抬頭就有隻執緊食物的狗望住我，好似同我講：「喂，妳做乜同我搶食!」咁我就扮冇嘢咁啦，瞄兩瞄佢覺我冇威脅就走。佢哋拾荒執到垃圾時，個口擔住「美食』係笑笑口行起上嚟個步姿輕快屁股摟動...好開心的。