德不配位 必有災殃

      可愛地窺探

丈夫工作地人物與事態發展複雜,由近期最大影響劇情說起。。。

科文Y終於唔做呢份磨人的工嘞。最後一根稻草來得非常突然。竟然係完成該次驗收檢測,該腦細話係大部檻過的僥幸心態。就係嗰張表,係呀,為咗一張隨時極容易處理好的表格。腦細同其兄C淋分別用穢語鬧科文Y,話張表畀咗Y。該下午Y即時打咭走人唔撈。

據當時人告知小石人,Y表示再唔會食佢兩兄弟嘅死貓。Y話事後腦細有不停打電話搵自己,但佢冇接聽(似足啲情侶吵架咁)

呢度要提提,似乎好似大部份人都會報料畀小石人知咁,所謂得準訊得形勢矣,對於邊個稍為可信,邊個做咗卑鄙行為推畀別人(亞推)又以為小石人唔知嗰度心寒。老公呢份工令我哋見更多人性,學咗好多嘢。

一陣間又有寫字樓啲線眼,話腦細同老闆娘講:"今次唔會再求Y回公司。"轉頭又傳老闆娘過咗一啲時日後有借啲意搵Y,但Y仍然唔聽佢電話。

Y有一路告知小石人有關其動向。初先話休息吓先,冇幾耐後又已揾到另一份工。而亞推企圖試探小石人有關Y近況,老公就咋唔知。(亞推呢個人表面仍對小石人冇嘢咁,實在已經非常妒忌,信唔過佢喇)

我雖然知道呢間公司冇咗Y,老公面對工作時更唔得心應手(本來都已經要乜冇乜,之前提過只有Y係會切實執行處理跟進事宜),我卻戥Y非常高興。留喺呢間公司好似話已經十年,個腦細見唔同人講唔同嘢,氹Y替其搏殺開夜唔休星期日直踩,搵人幫工程,現在落得嘅收場係,呢個腦細完成一階段後有事就鬧Y,當時人協助C淋解決咁多問題,呢件事未查清楚又係瀨Y。C之後更同亞推話呢件好小事啫(小事你又鬧人?)。(完成咗呢部份工程C當係自己功勞,後來喺地盤搵返份表格兩兄弟就側側膊,鬧完人當冇事。。呢啲慣犯,據做得耐嘅員工話佢哋經常係搵人食佢哋啲死🐱,真係難為啲貓慘死)

冇咗得力幫手,腦細要Y死落地行,自行安排某些事情,其實啲嘢只有佢自己先知,交分段工作日期,標嘅內容又冇睇清楚。期期糧都拖起碼7日,一有糧出老闆娘就趷啲員工們一早等放工齊齊打咭,返工遲呀咁。

有啲年紀唔細嘅散工就爭上位勞役其他散工。好快,做完某些部份工程後,個疑似強迫症腦細要佢叫工人調轉某些嘢重新做過,激到爭上位散工咩嘢咁,擦呢啲人👞,有排受呀。腦細急住要趕工程時就聲氣好少少,一大部檻過完成啲嘢就擺腦細款。

今晚老公回家後告知我佢哋今期糧比平時遲7日後都出唔到。冇能力接啲急趕要求高質素嘅工程,加埋原來做開的,唔知進度唔知邊個偷懶hea做只是叠人堆。

另外亞推叫小石人做某啲普通散工都做到的粗活,畀C淋鬧亞推:"呢啲唔係佢做㗎。"

C淋叫小石人做某啲嘢時,腦細又鬧C:"呢啲唔係佢做架。"

腦細重要喺小石人面前鬧亞推,小石人借啲意行開費事亞推尷尬,點知過一陣小石人出現返腦細又再鬧亞推,重要問小石人:"你話係咪先丫。"(有乜辦法亞推唔憎死小石人。)

舊地盤個頂檔睇住工程嘅H仔問腦細要小石人回去做某個全場冇人識搞嘅部份,腦細話搵第二個回去得唔得?都講明該舊地盤第一期已係試勻晒淨係小石人處理到(亞推當時負責該期工程,又係小石人整完咗嗰啲位置就當亞推自己搞掂的),其實H仔現時重執緊亞推第一期工程的甩漏。

我問老公:"係咪架,次次都講到你自己英明神武乜奇難雜症都係小石人完美處理辦妥咁。"
 

自設系統

經過好長時間儲能量,睇海量執屋整理視頻,而家自己有一套建立起的系統。

接近每天都會趁天宮唔落雨,附近少活動揚灰塵前開晒全屋窗接收新鮮空氣入屋,有流動。

打開所有櫃門蒸焗爐洗碗機同衣櫃,開大風扇吹走櫃內局住嘅死氣。

全屋十幾件窗又有對流,爽😊

物件有佢自己的位置,整濕嘅東西有時會多過一個位擺放走盞晾乾。

夫家嗰邊的大哥大嫂搬屋時畀咗佢哋用開嗰個消毒碗櫃好好用呀,儲存碗碟歸一整齊,冬天重可以有暖碗碟用,多謝佢哋。

如果可以儘量一手呔攞到放到嘢。呢樣要講求物件唔重叠。

理想是于衣物方面直立或掛起擺放。將舊棉質衫剪作抹布地布,清咗唔少空間出嚟,塞實情況已改善好多。物盡其用避免浪費係要佈局同時間。

記得大部份東西位置,要家人幫忙攞嘢時可清楚口述。呢樣又可間接使屋企人知道啲嘢點擺,亦趁機令人知道我建立好嘅系統,保持放回原位有賴家中成員出一分力同合作。

仍然有嘢要儲能執拾。比之前情緒困擾時更有動力去處理積聚嘅東西。

分幾鐘短時間能整好嘅事情就即時清潔完成。唔使太多瑣碎家務堆成煩惱事。

漸入佳境中。

 

畸工實錄

本來做地盤A既第二期工程,由科文Y睇係可以的。

公司又投咗件需要高汁素完成的標,仍係由腦細佢個C淋了瀨的大佬"睇場"。錯漏百出度嘢唔啱位。腦細又訂錯晒啲嘢,唔係工程要嘅規格。咁都生存到確係家山重有啲福。

多次要小石人去嗰個B場,老公都係耍手擰頭,閃無可閃就請假都唔去。

嗰度兵荒馬亂,C淋睇工程既得人驚法。。。十足老人失智,唔記得又賴人,重要成日講埋啲廢話要人聽,嘥人時間。

最終小石人初一留到喺A場,因為無選擇下調咗無能嘅亞推過B場。其實亦係廢嘅。

十五咪又係要小石人去救亡。

乜X工具都冇,問親啲負責人(亞推)就話有,,,有?但係唔用得的,壞了。啲所謂負責人自己去睇完,放低件工具就行開,當乜事都冇發生,件壞嘢就原地放番嗰度,等下一個人去嘥時間。

一係修一係掉,就係咁簡單都冇人處理。

小石人搵科文Y,佢係會跟進的。冇錯,又係科文Y去執呢啲滿目瘡痍嘅炮屎場。

點解小石人咁有利用價值,一度冇人識處理的部份,亞推叫個散工去做,嗰個散工轉頭打咭走咗。唔怪得晒人哋,亞推自己唔識,淨係吩咐老散諗掂佢,亞茂都走。

小石人完成咗呢件曲節離奇嘅部份,條亞推竟然話要加嘢。而且完成後先畀佢嘅意見,未開皮前唔講架,因為唔識。

呢段時間週日開工每晚加班。有人做完成日都吼住想加班,咁好精力皆因日間行行企企怕卦。

勤力工作的真係唔想加班同直踩冇息休日,,,,

亞推初到B場就話唔夠時間,話自己7月要放假。Y科文表示:"你咪放。"放假前腦細叫亞推交低嘢畀Y,亞推同Y講佢乜都唔知。但在放假期間筆寫同別些公司夾過嘅嘢。

咁難得嗰個嚴人寬己卸責嘅腦細讚咗我老公起碼兩次。

腦細自己攪咗某啲嘢,畀小石人發現同修正咗個問題。避免咗影響公司聲譽,兼後果可以好嚴重(死得人嘅)。

個個都好驚test&complete。(委託人驗收工程)

老公應對得頭頭是道。以佢為榮😊

 

3心九意~伴侶·主人

 

連續呢兩日都夠驚喇。

妳諗掂未架?主人。

第三日女主人凌晨醒來,💡想全部改過晒啲擺位。第一次調完啲嘢之後,出入口太狹窄(FA~唔能夠全翼展通過兩個衣櫃之間),好唔舒服。小石人先生後來話似迷宮。

新嘅擺位會令整個室內更開揚空氣流通。

講咗想法畀小石人知(女主人唔係幾好意思改嚟改去),點知男主人好合作,話試吓。(感激極了)

佢哋食完早餐,主理人買額外料回家,佢諗住做兩粒鐘食完晏就去旺角買嘢。

🐦唔想再郁,女主人氹極我都唔上佢手前臂,實行友善而對抗(冇對佢惡)。之後都就範,又再出廳紫膠椅上等呀等,瓜子係食唔少。

成個過程,差唔多改晒所有啲嘢。

高腳櫈鋸到變普通高度。老虎鋸收手唔切批咗落牆。

小石人:"小朋友(FA~)都塗鴉劃花啲牆。"佢心內有啲唔滿意都有安慰自己。

女主人:"係呀,咬爛晒啲牆架。"😄

⬆🐦嘅作品藝術成份幾高。以前咬落。

⬆我嘅舊作品。

FA~:"我飛上衣櫃頂就係鍾意咬呢隻牆角,我重學女主人喝我阻止我繼續咬嗰把聲。"

三义站樹枝都全部批短,方便畀我跳過個音響器材泵面。

兩個衣櫃推變過晒啲位,好彩有轆唧。

主理人做工程的守門真係一流,住做住吸塵,完成項目後係會一手一腳清乾淨晒地方,真係人見人愛嘅有手尾師父。

由廳返番入我間房,嘩,全部位置轉晒,好驚驚怕怕呀。雖然妳一路陪住我又放我飛。妳以為用大白色床單夾實酒紅色隔音簾我就唔知。我一在衣櫃頂橫一字馬作勢咬隔音簾同爬去白床單之間(女主人:"嗰度會由屋頂直落跌地架,白布同隔音簾之間喎。。。"),飛去韆鞦,一見到妳拉關隔音簾我就嚇到飛落地,瀨咗。妳嚇到我兩日都係咁樣便便喇。

而家輪到我安樂晒,妳兩個衣櫃入面啲嘢重搞緊。

安樂曬~

似唔似戲院呀,哈哈哈,好開心呀。佢完成咗呢項工程lu。

隔音方面有待驗証,因為安裝咗之後🐦未嗌過。

昨晚初完成前期工程(未安隔音簾),雖然只是移咗衣櫃面向走廊,方便洗澡同去解手時取衣物效果如預期般超好非常滿意。凌晨時份冇乜騷擾到隻🐦。

不過房內空間細咗,,我又係用遮遮掩掩方法於,老公記起要攞嘢入中庭,用我龐大身影同大毛巾阻擋站在紫膠椅上廳嗰度嘅小FA~FA~。

第二日(今日),日間工程期間我攰恰陣(伴侶唔想嘈醒我),老公攞中空膠板入房佢就嚇到飛甩雞毛,有時真係在所難免(已經搬咗好多架生 梯 吸塵機 窗簾路軌 大大兩幅隔音簾等等等等物品入厠所同主人房)

🐦仔要新一輪適應,我亦要很有耐性再重新得到佢信任。我心急在佢視線內搬吓小形垃圾桶 推動隔音簾,佢又係狼狼忙忙咁亂飛飛。

近期唔係好肯踏上我前臂,入夜嚇親佢之後,等咗佢好耐都只是黐住雲石層架啲舊衣布碎。食瓜子都係踏前攞咗即退後。(可能知我將鎖返佢,唔想被鎖就如鶵鳥般叫法)

點知小石人買完嘢返家佢就即刻飛嚟我度。(可能想我陪住佢,,知小石人回家後我就會離開🐦。都係唔畀鎖。後來我係又叫又氹,佢不滿叫咗兩聲👄作勢咬我手咁啦。。鎖完佢我再坐一會陪吓佢。)

多一重簾免透光入去佢房。

讚賞讚賞,多得小石人。

 

包有餘

昨晚慶團年,實在同邊個一齊先係最重要。

我哋預測唔到將來,現在選擇認為最佳就是心安理得。

每個人都係自己齣劇嘅導演,走向劇情都係心中一念。

幾時roll機 幾時叫cut。

時間流動 一切在變化中,有機遇就把握好,好似去旅行睇啱心儀物件,過咗去就買唔返亦冇可能再重拾嗰種光景情懷。

新一年,大家揭開精彩一頁。

身體健壯係人人所願。

心情暢快係開心嘅泉源。

祝各位有情人終成佳偶,

有另一半的如魚得水溫馨甜蜜。

愛獨處嘅活得自在。

為大家呈獻鸚舞送蛇(佢嘅步法好似條飯鏟頭咁,活出真我本色)

迎🐎頌新春。

 

我要離開吓

去食週年紀念午餐那天,

Behind the scene係,早上我重在床碌緊遊戲時,小石人出睡房就發現亞FA~唔見咗。

飛咗上衣櫃頂。

條錬咁甩法又係將會一輪折騰,要捉住佢用布同冷衫包實,一個人控制佢唔好郁另一個人用工具鉗返實個扣同金屬圈。

佢自由就猛咁大嗌。

我一出睡房門,

轉頭就有一隻拖鞋飛去佢度,佢亂竄飛咗入厠所。

我:"唔好咁對佢。"語氣當然唔多友善。

佢飛返出嚟,飛嚟我度(過頭頂高度),伸高手一接佢就:

我:"你做咩咬我?"

佢放口,好彩唔係咬得咁深有印冇損。

跟住放佢飛開,我儘快戴返保護裝備就同平時放飛一樣,來來回回都飛返嚟我度。喺呢方面,兩年養佢同用心練習飛行冇白費,做得好。

今次整返個S扣上佢腳,順利呀。

我同老公講:"我精神好緊張。"講咗好幾次,與自己共情,由內心釋出繃實嘅情緒。

之後都有為我又重語氣對小石人致歉。呢樣要多多修練,急趕時就算見勢色唔對都需學習停一停深呼吸。

事後我連聲說:"好彩你今日放假,我自己一個人扣唔掂。"

話說呢一日假(星期一)係小石人堅持要放的。

呢條亞推重要小石人再一個星期日加班,如果聽佢支笛即係已經兩個星期連續開工咗十三日後再繼續做,使唔使呀(亦已違反勞工法例)。重未計期內夜晚要人加班。

當小石人在群組請星期一時(佢哋公司norm係用whatapp對答通消息。)

亞推又私訊小石人叫我老公最好星期一返。

啋佢嗰個先奇。

假期時,亞C淋L瀨又打電話畀小石人。喂,散工放假係冇薪水的,冇義務隨傳隨接電話。

享受完舒適的兩日假之後。。。

星期二返工時:

小石人後來告訴我接近全體員工一見到佢就稱呼:"石哥"~客氣非常。

長話短說,佢哋做緊嗰單工程有個位就係因為亞推喺第二啲工種公司整塌某啲嘢同位置時唔醒目,冇喺該位置原狀時預先跟進某事情,淨係攞住副架生耷個頭做而履行唔到科文嘅責任,變咗後來自己工程部份亂晒大籠。

原來週一時,好多認C認P嘅人都攪唔掂嗰個位置。

每個人都渴望呢位唯一能打救到呢單工程嘅人(~小石人)返嚟處理呢個位置。(完成唔到就冇錢,工程收唔到錢,有冇糧出都成問題。)

喺呢度,小石人得到好多人嘅尊重。

亞推,到啲嘢比較順啲嘅時候,就又怪一名H仔執漏執得慢。呢個H仔轉頭同小石人呻,冇心機呀,畀人話做得慢。去食煙先(大家都知道而家在地盤唔准食煙,H仔係要離開地盤老遠的地方吸)。

亞推同背後睇唔起佢嘅腦細一樣,最叻打擊士氣。根本同一類人,亞推係縮水板。

而H仔,之前有笑笑口同小石人講:"檢測嘢過唔到都係你啦,又唔記錄低。"

小石人神回應:"我係照大會指示,三日有三個唔同說法做法又冇叫我記錄,唔通我自己冇端端自把自為去做咩?"

(我:呢樣係邊個講畀H仔知嘅呢,只有一個人-亞推。而佢究竟點講法呢,將失誤責任推咗喺小石人身上,呢點十分明顯。老公,要提防呀。)

之後亞推同小石人一齊到某處時,亞推疑問點解呢度嘅工作要咁樣處理?(佢認為多咗工序咪慢囉)小石人答:"呢樣要多呢幾個步驟先能徹底執好晒之前某啲人做出來的多重各種錯誤,亞H仔已經細心哋執咗好多度架喇。"

(即係小石人幫H仔發聲,講畀呢個夢輪亞推知,H仔點解係亞推口中的慢,小石人同H仔做嘅係唔使翻手的一鏡到底呀,其他嗰啲係執咗再執都係錯架)

(我:可能條夢輪自己都係執咗都係錯嘅其中一個。而且而家小石人睇工程定亞推睇工程呢,次次都要老公提返佢。)

有次放午飯,人物有:亞推 小石人 女工Kw Ha(小石人發現呢位後生仔勤力細心做嘢有擔當手工唔錯,同亞推講呢位員工值得留意) Hon

亞推:"個顧問講得好啱,我哋應該咁咁咁做。"

小石人:"推哥,你係年三十晚今時今日先有份去開呢啲會,之前你只是攞住副架生死命做,根本唔知道呢單工程嘅任何嘢包括準則同要求架。呢個顧問講嘅,正常計作為管理呢單工程嘅科文係一早需要知啦。"

(喺小石人敍述這段前,我請佢即場在我面前重新演譯當時嘅表情😄同話語。

看畢我心想:"老公真係忍得好辛苦。"

小石人以為我會否定佢嘅做法對我說:"老婆,我都要抒發吓架。"

我:"係呀,所以我係非常認同老公嘅做法說法。")

(之前我哋兩公婆多次一起分析形勢時,想到我哋唔知呢三個人 腦細 淋瀨(腦細的亞哥,欠債已經賣晒公司股份畀佢弟弟) 亞推 呢幾十年之間的恩情(以前有一齊去外地旅行),我覺得關鍵人物係呢兩兄弟嘅父親乜叔,帶住亞推出身兼對兩兄弟保護有加,每個兒子有一層樓又將生意交棒畀佢哋。

點知乜叔會唔會臨終託付叫腦細記得睇住亞推呀。。。咁就死得。)

好嘞,扎腳布咁長。

臨近歲晚,亞推又要求小石人唔好咁早放農曆新年假,朋友之義小石人有答應。

點知轉頭個腦細又要將小石人調去第二個由C淋L瀨攪到唔達標的地盤執漏。。。。😁

(即係亞推點打人情牌請求小石人遲啲放農曆年假係廢嘅,根本個乜數字都唔知嘅腦細話調走就調走嗰個呢度唯一處理到咁複雜嘅工程步驟的人。)

(而呢個腦細覺得樣樣嘢都好簡單的。但自己負責跟另一單收驗工程時,其中一個同事Hu對小石人講:"睇住腦細佢捉worms入patpat,人哋只是要check項工程通唔通,佢就自己講晒見到的唔影響大局嘅甩漏。驗收員第二日畀公司嘅不合格項目就係腦細講嘅全部。"

(芝加哥殺手:專隊自己友)

自己做唔到某啲重要嘢,呢條腦細將責任歸咎Hu,話佢影相唔跟得貼。,呢位Hu同事前嗰排返工時先至砰嘭累咗喺街跟住入過ICU出院架咋。

(好多同事都會報料畀小石人知嘅,人緣好好呀。腦細臨同事收工前去地盤,都係Hu收到風報訊畀小石人知架呢。))

正當小石人思量緊點寫早放年假時,呢個腦細咁橋喺Whatapp發佈:"你哋邊個要請假就早啲出聲喇,等我有所安排。"

立時,小石人就跟返原定計劃早兩日開始放年假,反正留喺度幫唔到亞推,就算後來又改咗唔使小石人過去淋瀨工地。

呢個PK磁石-亞推,重要畀淋瀨兩次以上嫌佢咁樣安排人手嘥人工。亞推向小石人訴說同埋呻。(其實亞推自己咪又係咁對"下面"啲同事)

直至再呻時,小石人終於忍唔住:"你可以同淋瀨講格,不如現在開始由淋瀨你去安排人手,亞推我揸返副架生做啦。"

呢條鵪鶉又係不語。

當一個好有責任心做事妥當嘅女工Kw在同小石人合作處理某任務時,

Kw:"石哥早咗放年假?"

小石人:"我要離開吓。。。"

最令我欣慰的是,老公會執走晒自己帶返工的架生回家~小石人有可能唔會再返去嗰個修練場!

我:"此地不宜久留"

 

尊重界線

前嗰排再打爛多樣器物,第二件喇。當時留意內心反應,冇責備有點兒可惜,事關係三隻同類形杯中最喜歡的顏色。

上次同情況下是小石人一個崩嘴瓷杯。(都係放喺鋅盤小石人修好的架上跣動該架墮下破去)。

向佢道歉。

跟住做同樣動作都瞻前顧後。

形容得咁細緻,本身就要經常探問自己內心真實感覺,才通才透。

今朝心情開朗,開心。

點樣將所想實行。

同一屋簷下嘅夫婦,影響到對方的係大家嘅嘢。有計劃需畀對方有心理準備, 對方有機會發言而佢提出的係會有改變原先想法的可能性,人哋才有心機繼續傾落去。下下都係自己講晒,結果就係自己做晒,或到自己冇能力做嘅就實現唔到一個認為對大家生活得較順心一啲嘅改變。

一次起兩次至多三次(講緊熟識又親近的人,朋友一次唔聽就咪再嘮叨喇)。每個人有聽入耳的,會做嘅一次就夠。

佢對呢件事有冇興趣做呢,有冇共同認為的需要性。諗吓佢成長過程,如果佢鍾意讀書學習多一啲教科書嘅嘢,佢大多數唔係做呢行啦。學校階段時經常畀老師視而不見,有好嘅熱心老師又畀其他傳統得過且過打份工嘅同事群排擠。我有了解佢成長時嘅一麟半爪。適時又會提返佢曾講過的事情。(我有用心留心傾聽)

睇唔同視頻時,留意吓佢對邊啲有興趣會主動望吓。邊啲戴耳筒(有時可能佢睇緊嗰條片佢好有興趣留心睇,未必同唔想聽我睇緊嘅嘢有關。)

就算冇仔女就算唔係一神教,我都會睇想知道多啲唔同嘅嘢 人性 人對不同事物嘅睇法。又唔太因為同人有冇話題嘅原因。我都冇乜實體朋友。

昨晚看到一條精簡又受用的(young vs old 5ways to handle people who disrespect you),係個一佰歲嘅西婦,做臨床心理行業4x多年。

[5個方法用於應對對你唔尊重行為的人。

波士 父母 伴侶 朋友

服務使用者遇到的不被尊重重覆發生。

呢啲人經常只想對方改變,佢哋唔明人是不能令另外一個人尊重自己。

但你可以不做某些事嚟停止該些人對你唔尊重。

你需要反思自己嘅行為代替指責其他對你唔尊重嘅人。

1.當你堅決決定一件自己的事情時,不要詳細向該人解釋點解你會有呢個決定。咁樣意味著你在請求那別人的同意准許,身份位置立時有高低之分。

(係自己的個人嘅事而唔係影響共同的事)

2.兩人共處有不和時,對靜默時刻感到自在。

有人對你說一些不尊重的說話,唔使即時回答。望住佢完全唔畀反應。沈默係一種選擇而非示弱。

3.有失去一段關係嘅心理準備。重覆承受著別人對自己唔尊重,實情已喺行為上告訴佢可以點待你都得。訊息係你需要呢段關係多過佢對你嘅尊重。

需要設立人際關係嘅界線。

4.唔好咁在意人哋對你嘅感覺。控制唔到嘅嘢,就唔使花精神去諗東諗西。只能掌控到的係你容許同接受別人對你做乜嘢嘅行為。

5.自我檢視-你有冇尊重自己。

當一個人能夠尊重自己,在人生上鮮見被受別人蔑視。

(已經剔除晒唔尊重自己嘅人😄)

害怕寂寞 金錢上需倚賴 家庭壓力 空想事情會自動好過來。

以上都係促使別人唔尊重你嘅枷鎖。

你需要認真諗吓乜嘢對你最重要。呢段關係定係自我尊重。]

 

有得選擇

 雖然8月2日週六開始又要返凌晨班,呢個禮拜佢似乎幾開心咁樣。

事關今週一7月28號,呢幾日佢返日班,負責該項工程科文就係此公司長者元老亦即係之前提過的推薦人。推薦人日前問小石人嗰區(舊公司)邊度有得賣咖哩,佢就打電話畀舊公司同事問行情。

(我唔記得咗咖哩舖係賣啲打拆後有用物料如銅廢料的回收地方,真係以為佢話係印度咖哩添😆)

點知呢位舊同事又問返小石人有冇工開,有埋班喎。最終呢位同事約佢開工當朝前一齊食早餐。

聽八卦嘢幾開心,尤其係小石人唔鍾意嘅人啲折墮嘢,返家就主動講講講。我都幸災樂禍戥佢心涼一番。

上星期佢唔開心時,我再同佢提起,佢係有得揀,唔開心可以唔做份工,我哋經濟上係夠生活的。

非常贊成佢26號嗰個週末,覺得需要休息就自己提出放假。放假時佢重整咗條線。呢條銀線佢用辣雞頭尾安裝兩個插頭上去。之前有一日已經試過辣但因物料問題辣到最後一步先斷。今次改咗用第二啲插頭再試成功咗。據佢講嗰陣時買條線價錢過萬。整咗可以配佢新買的耳筒聽歌。

(其實好多我都唔係幾明,操作呀,音色有幾唔同有幾靚。不過我主動問吓佢就好欣悅咁解釋畀我知。)

今晚約佢出街食嘢消費。

凌晨上班

 昨天小石人晚間出發上班,巴士擋風玻璃外堅忍的佐治穩著全身尾fing fing。

一齊咁耐今次深宵獨個在家,有啲驚。

7月15日(二)晚上11時許

他又剛出發上班了。

雖則打散,返工日數幾日,我哋覺得係要有機會就持續工作,保持思路精靈。

凌晨回家交通自費,巴士停止服務,今早佢同事建議一齊食完早餐再等頭班巴士回家,慳返2xx蚊的士錢。

是晚返工前遲啲食晚餐,日間斷斷續續瞓吓覺,對佢平時要早上床休息的人,真係相當唔慣。

我就盡力配合,日間保持家中安靜等佢安心休息,有時幫佢按吓肩頸。好彩最近買咗按摩身同腳的機,佢多次用時都多謝我,套按摩機好有用。

今次逆境嚴冬,我經過1997至200x的慘痛教訓,似乎現時應對得好好,因為銀根上早有預備,多謝自己~多謝小石人~多謝長生天。

築竇

 7月11日(週五)

老公見我放FA~,由鞦韆飛嚟我前臂時影的。我將相+咗效果幾卡通。

⬇就斷

7月13日(週日)

今次帶咗佢離開現場後,企喺廳嘅紫膠摺椅pan都好安靜。

⬆我哋有商有量,下午4點幾完成。

回FA~房後,好彩之前整咗吊鞦,可以有較熟悉落腳點。少不免適應一輪。

上咗新彎彎本來都可以,我發覺有兩個位cake住又再帶佢出大門角,等小石人磨吓嗰啲cake位。

Lady Fa Fa開始不安,又唔想咬我。

再返返入FA~房後續一輪安撫飛行。

⬇未熟工地

約兩小時後。。。

⬆開始修葺⬇

Lok lok聲。

Approx another two hours later...

A little bit tired⬇

新黃皮樹枝未乾透,易入口,老公話聞到好香黃皮味。

都係龍眼支硬淨啲。

採木·盪鞦韆

 

黃皮鸚

據說宋朝要逢清明節期間才可玩韆鞦,呢樣係從觀賞清明上河圖同埋皮毛搜料得知。

亞FA~個竇嘅彎彎龍眼支已經畀佢磨咬到就斷的線懸程度。

於是前嗰排又請唯一有能力處理呢個問題嘅家庭成員出🐎~採木材。

佢出咗街一陣,我電📱佢時,答覆係沿某方向路徑係已經畀人劈晒啲樹光脫脫,冇木。

請佢回家附近匯合我一齊揾。

一起行走我亂指的另一方向不久,咦,原來咁橋再次有大量被砍伐田園放置在路旁的樹。

今次搵到的有黃皮樹同外國引入的樺樹,挑選及割咗一輪之後,樹身有好多蟻同較污糟,正講回家要洗吓啲木材之際就落咗一場大雨,我哋處於冇任何避雨之地。雖然一對落湯雞,幸甚啲木沖得乾淨咗。世事就係咁,人要調整自己心態享受每刻發生的事情。

第二日,老公重成棵樹搬返屋企話用嚟掛啲蕨上去作家居點綴~真係成7呎高架。😄😁

橫豎老公又係放緊悠長假,有心情咪慢慢先剫木。

老公整完吊鞦,因為我已比較熟悉Lady Fa Fa脾性,女主人先將佢上手帶佢去大門門角。男主人預備喺隻🐦見唔到的情形下偷運啲物料入洗手間。

我著老公安裝完鞦韆一定用白布簾掩蓋住新建物。

跟住我先帶Fa~回巢。

果然,Fa~入返房後就察覺有唔同,好驚,見唔到都驚,成大碌木,見到就肯定鸚飛鵡走。。。

我用嗰招係一兩日內圖窮匕現式逐啲逐啲拉開布簾少少。

初先帶佢近條木時佢拍翼後波唔敢接近個鞦。

而家就伏伏伏(飛行聲)由嗰度飛上我前臂,往返都可以。

我又用食物引佢在木上parrot walk,咁粗件木可以磨吓佢嘅長利爪。

彎彎呢,師父整咗未裝。

Fa~房改新嘢又要一輪耐性功夫鍛練。

出手

 

小事糊塗。

有些事果斷爽手完成。

今朝8:55同8:57分別在兩個富途戶口認購這新股。

之前在A股戶口想買,然而該股只供機構投資者買賣。

好少抽新股,今次就試吓。

電器篇

 劇情講到之前壞咗雪櫃。

慳家嘅老婆用燜燒煲保存咗一啲食物,第二日食咗韮菜餃重要一人啃十粒湯丸>>>小石人話食到最尾嗰粒心想有排都唔食湯丸。

(有新雪櫃轉頭咪又買😋)

嘥咗幾盒雲吞,蠢咗,唔醒起還在良好狀態時送畀鄰居。

本來有家舖,可比實體舖平啲購買同款雪櫃。

去商場睇實物時,個女職員好幫得手,有禮貌又解釋得清楚,咁就幫襯該實體店。

該店又有折更講一個保養計劃,條數又係令古姐45度側頭內心擘大個口。小石人今次好決斷咁話加錢加plan。

然後望住我>>>我話:"決定得好。"

哈哈哈哈哈哈。

我問:"而家壞咗嗰部雪櫃用咗幾耐。"

小石人答:"20幾年。咁妳又話決定得好?"

我:"記起個蒸焗爐買咗幾日就壞,所以參加延長的保養計劃係啱嘅。"

小石人又向我解說:"呢個雪櫃電子嘢多,有幾com呢就好難講嘞。"

跟住又有驚喜。

呢個商場為咗吸引多啲顧客消費,又攪咗啲積分計劃。

於是去顧客服務台做鴨s登記。

過幾日,我哋再去該商場食嚐幫襯用咗啲積分。

問揸住煲茶個男侍應:"咩呀。"

我本來想等佢放低茶煲先問,但佢見到我電話的鴨s面,唔知乜嘢積分。其他女侍應又圍住睇都唔知咩新攪法。

跟住叫咗門口知客(大家姐款)嚟,一睇就話有呀,妳去櫃位埋單時嗰個職員就知。

我笑說:"就係侍應唔知。"

知客又禮貌地回報笑容。

燉湯冇影,見到係粟米紅蘿蔔就覺得蝕。因為佢話西洋菜同蟲草花兩樣揀,咁梗係要蟲草花點知其他配料咁普通。

外賣裹蒸糉回家第二日午餐用。

找數時,我攞個電話打開鴨s嗰個男人好純熟的完成結賬。

回到我哋坐的卡位畀小石人睇,佢即時發現問題:"點解重要全數4佰幾,唔係扣積分咩。

一日懵幾勻的我,又往收銀處告訴該男子。

男子:"妳冇話扣積分。"

我:"係呀,我冇講,勞煩你要做多啲工作添。"

男子:"唔緊要。"

佢又好快攪返掂。

再唔該佢一次。

出去食嘢開心愉快,我通常對路人同卡乘客侍應們笑笑口。

同場加映~小石人將個滿晒油漬嘅焗爐拆散晒,洗乾淨再嵌返,勁!

花鳥攝·好好地生活

 前兩日佢洗洗吓碗話,:"而家生活好舒服。"

後來再問吓佢,佢覺得而家種花養鳥,過緊退休時會過的生活。

我哋做家務係邊個得手邊個做,互相補位。

都係嗰句,佢影到FA~美態,攝於3月尾。大隻咗,毛靚咗,拔少咗自身毛。

今朝好火,用嘴搓我條裙啲布。事關攞走咗FA~咬咗一大片的櫻桃木傑作,新木暫時咬唔入。(其實日日差不多都刮嘴同燥。。。。)

你以為啦,轉頭就已經開工密密口...咬咬咬。

亞萬能維修師又有好主意。

今次鑲晒鋼條睇吓妳點咬。😁😄

近期開花

佢的新興趣

晚間發現雪櫃壞了。

搶救在雪櫃儲存的食物中。