追悅

今晚位置同影到的顏色重正。

 今年月亮特別靚。

昨晚發現時,本來月前有欄杆,點知佢預備好器材後就爬昇成⬇

昨晚

今晚

冇嘢值得All in

買女人貼身衣物送的,嗰排睇好多野外Solo視頻。

 每逢發生剝花生事件,就係啲網絡發報者、傳播媒體擸高衫袖磨拳擦掌加燃料令個火燒得更加旺時。

有冇去返一些源頭調查吓。

近期單嘢,有人留意到間"公司"網頁聯絡方法係Gmail,真正公司多數會登記專屬電子郵件賬號,尤其"跨國"企業。

有冇負責人資料。少。

睇咁多唔同渠道,有人搵到資料當中只得一個人的"實名"出現過一次。

宣傳攻略揼本。

攪好多大型活動,又牽涉有啲城中有知名度的人。

誤導的公司名稱。

佈局集團(可能只是幾個主腦),一有唔對路就改名。

設法跟不同而又真正做生意的上巿公司扯上關係。

事發呢啲上巿公司做法係立即劃清界線。

而當香港開始有(火羅)味時,台灣(成幢租用寫字樓)、星加坡的辦公地址就火箭速人去留空淨返啲塵。

而香港的疑似"艇仔"s,男的重叫人唔好報警、女的撐到恒鬧爆。

唔通佢哋真心認為呢門"生意"係確信的殷實無呃人?

讀得書多學歷高同會唔會受騙似乎沒有關連。

係律師做生意前對"合作伙伴"背境有幾熟悉?佢哋呢個界別的專業咪係要attention to details。

由富袋攞錢出嚟前只是想著利潤還是有諗吓呢件"搵錢"項目實在"太美好"了,好到會唔會係真架。。。

有冇涉及出咗事都唔敢報警的呢,顏色錢唔見得光。

發生事後,有啲執人口水尾、標題黨的youtubers,畀兩次機會,如果都係咁,之後一見loop出嚟就被Cool即刪。

又進一步深化唔好貪心的信念。

冇嘢值得All in!

以上都是看完視頻s、報導得嚟的幾手後資訊,唔可以盡信。不能保證該些資料是真的。

唔好貪心就係真嘅。

慳時間·留嚟做喜歡事

 記憶中提過一次,我哋係融洽地處理家務事(大部份佢做😁😄)。

唔趕嘅,有能量做就做,唔做就由佢。

呢輪一齊睇吓煮嘢食視頻,佢似乎開始有啲興趣煮餸仔(我哋好少食飯,屋企亦冇電飯煲)。

近期煮餸時佢有問我使唔使幫手。

以前,煮嘢有好多步驟諗(唔識同未建立到系統),,煮食用具唔似而家咁方便先進夠使(中三時完全唔識,放學後需要煮飯,買餸、用火水爐+一個爐頭整2餸1湯,整得好慢),,,

人大咗有段時間,操刀煮嘢時別人唔敢埋身,因為面口唔好睇又比較忟憎。而家留意到有呢種情況加之做得多咗純熟啲,煮少少嘢,冇咁大脾氣。(拍拖同新婚時面容會好好多。)

是以,有些情況下,有冇人幫妳係自己造成。

我攞住刀佢敢行埋嚟,感情好好。。。

單操(一個人整)保持一隻手係乾同乾淨(講過),做定啲乾手時處理的步驟:預備醬汁,放定啲鹽抹蒸魚身,放定啲抹紙吸魚同蠔生料的多餘水份。就唔使手經常濕立立再掂啲物件,尤其是要乾身儲存物。

<以前有個有錢親戚問我啲魚點樣處理先唔水撈撈,佢哋使慣工人所以唔會知呢啲竅門技巧。>

洗蠔有人幫手放粟粉,係順暢好多的。佢想幫手時會自動埋位,好合拍。

昨晚佢第一次溝獻汁,之後老婆煮香茅乾蔥薑蒜蠔(唷,唔記得留份蔥畀呢味添)。蒸魚見過我整,由蒸焗爐攞成品出嚟倒走啲水,好幫得手。

繼續轉變煮嘢時語氣同面口好啲。

有次佢攝錄我處理銀行嘢好專注個樣,Cool睇返。。。吓,覆舟嘴。咁樣落去唔多掂,要改。

正題😁😄

皇宮開完大食會的感覺,就係用洗碗碟機幫輕吓之時,此時不用待何時,機器係要耐唔耐用吓,況且專屬洗碗劑都唔躉得耐,受潮一舊舊。

家居要乾爽乾爽。重要嘅事。

以上內容有啲亂,時序記憶冇乜整理。睇得明,你/妳哋好嘢👍👍👍👍👍

微距影微縮~好戲在後頭

美妙光影
 

好多人,圍住呢件作品,又有個人帶定電筒仔照住打燈嚟影。Cool覺得有啲煩,冇等。

當日原來小石人帶咗兩部相機,一部裝微距鏡,一部影人。寫網誌時問佢,佢解釋完一輪我都唔係好明,大致上係佢部機手持不用打燈都可以有呢個效果。😁

雜貨舖淨係影個招牌、揮春、鐘。意念超可愛。

兩幅合併出來的。人物高度又配合到,絕。呢幅係戲棚內,我諗,未必有人咁影,叻。

啲椅s放喺車架入面冇人敢坐。我行咗入去坐就會有人陸續填滿其他座位架喇。

睇呢類型展覽,兩個人都喜歡的活動~佢問我點知有呢個節目,唔知架,有blog友寫咪知囉。

至10月17日。

同一樣的事物,每個人看到、感受到、聚焦點都不一樣。

嗰個商場高高掛咗隻大恐龍,又攞吓唔同角度,好似隻嘢作勢咬行人個頭。

上二樓龍做背景,Cool扮吓好驚咁。

囡囡行到攰就會有公公、爸爸抱,見到個約5歲嘅小女孩成個人拑住個老豆(卦),扭抱。。。個男人童真的笑容,Cool忍唔住都拍咗。😄

微縮展II·超多圖慎入

 

微縮展l·超多圖慎入

 

有聚友散

 早段時有同小石人和他的雀友去攝鳥。佢哋捕雀,我影佢哋。因為佢哋專注影相時係幾好睇的。

有次喺大埔滘偶遇一位亞伯,佢見小石人搵雀眼利又巧踫到鳥浪,兩個人好合拍地用相機shooting,個亞伯頓時好似年輕咗十幾年咁。

講返小石人啲雀友。

一個雀友已移民咗去美國。

第二個雀友位太太有癌症,所以話唔知人咁多嘢就唔好批評人哋係啱嘅,一方面原來佢表面話唔再接受第二次電療,但後來又改變主意。最後佢老婆已仙遊,留咗遺產畀雀友二。臨去前囑咐佢要照顧由楓葉國回流香港工作的女兒(好大個咕lu喎),呢位24孝丈夫又在妻子去世後經常去老人院探外母。

前因有興趣就睇返以前劇情:

生死之間·邊個等錢使啲(個案二)

呢位雀友二,近期去咗英國同佢個妹一齊住,心情好咗好多,又似乎很喜歡英國生活。祝福佢。

最主要係想講雀友三。

亞虎,只是六張,上星期凌晨接到虎夫人Whatapps小石人告之亞虎休克搶救無效。

小石人最好的朋友咁就永別了。幾化學。

點答虎夫人個Whatapps?

我嚟寫:"突然失去一位好朋友,我需要些時間去接受。"

呢位工作辛勤盡心盡力的愛妻號,一生勞碌,本來月尾計劃同老婆去旅行,現在已沒有以後。

人,係可以選擇自己的優質生活,颱風暴雨,自己可以決定返唔返工,返唔返學。評估外出是否安全。明知水浸到蓋過私家車就咪衝埋去死火,隔離個老豆又係怪政府唔早啲通知有水浸,有嘢就賴人。

自亞虎事件後,小石人話我哋要多啲喺埋一齊。(我哋好彩,有預備,暫時唔使為五斗米,因為我哋食生果😄)

命冇咗,有份工重做唔做到?

ENnio配樂大師

 兩個幾月前,睇舒琪視頻"只要有電影",介紹呢位配樂界巨頭的人物傳記式影片。

好想睇。

小石人放工回來,問佢有冇興趣一齊欣賞,即時扑鎚網上買飛。又係去坐得舒服嗰間戲院,三次去嗰度睇戲都係訂有震動效果的椅子。嘻,今次看的電影終於感受到聽交響樂時現場體感。

呢齣接近3小時的長片,很多跟ENnio合作過的導演s、電影監製s、演員s、歌手s、錄音師等等的訪問片段s。因為唔識音樂又有大量唔識的出鏡者,未睇過之陳舊意大利片,資訊又超多。全片大部份都係講意大利文,要集中精神睇晒全片幾蝦人。

不時望吓小石人有冇瞓著~咦,有留心睇咕喎。

佢隔離個男仔就頂唔順早走離場,我隔離個女人就猛咁睇夜光錶、再隔離個女人,喂,妳覺悶就及早離去啦,不停睇大屏幕手機,啲光騷擾住我喎。畀咗好多次機會,我開始忍唔住想出聲之前,在黑漆漆中用凌厲眼神凝視住佢。。。奏效,佢一睇到我面部表情及反光鏡片就立時冚埋部機冇再打開。😎

我哋嘅優勢係事先知道咗齣戲一些有趣情節,我有憶述給老公知道,咁比較有共鳴感有助專注地睇。

ENnio Morricone

開首音效原來係模仿郊狼叫聲,奇連伊士活話,ENnio嘅配樂令佢好戲咗😄。

片中有一段話,ENnio同義薄雲天嘅導演講,佢想全齣戲都用晒排笛配樂,個導演當然話唔可以啦。

義薄雲天,現時Disney+有播,我唔太識欣賞,片非常長,分咗幾次我都睇唔晒,當時想放棄,就係因為睇咗舒琪視頻而將會再睇ENnio咁就完成咗套戲嘅觀看。

有啲情節覺得唔係幾合情理,例如女主角成半世人都鍾意男主角(羅拔迪尼路),又好憎(占士侯活帶壞心愛的人),男主角要決擇時都係以跟隨占士為首選。但係劇情為咗出人意表最終女主角冇名份咁跟咗呢個好憎嘅人。以女主角嘅高傲性格同咁好條件,佢唔使咁做卦。

男主角在長轎車上強女女女主角嗰場又係攞嚟做的。佢非常鍾意男主角,又明知男主角由細細個就為佢瘋狂地著迷咗咁多年,佢主動錫人,撩起咗人哋又拒絕,唔係好講得過去。

話返配樂,原來拍攝時本身演員就係經常聽住主題曲,羅拔迪尼路更要求聽住嚟拍,稱使他更能入戲。

外國人拍片非常重視配樂,多數在開拍前已找配樂師商討。

片中有導演形容ENnio的原創作曲配樂令戲同電影配樂雙軌並行。

排笛表達哀怨之愁緒。大家認為係咪好配合呢?

擅長試驗用不同器具、樂器變奏、人聲、口哨聲、皮鞭聲、鐵罐聲、敲擊樂、生活遇到又唔起眼東西(如:古舊梯子搖動吱吱聲)發出的聲響,用吹口琴嚟做角色對白(不喜歡說話的人),多元化音效配樂。

佢試過用巴哈Bach個名化為音符加西西里風嚟作曲。

4個音符的不同組合。有冇啲似霑叔笑傲江湖構思。

多產又天才橫溢,創意無限。

原本ENnio係想做醫生,佢父親係小號手,強迫ENnio學小號以維持生計。

佢跟師父學作曲,而當時作曲家做電影配樂被視為叛徒同似賣淫般。

最終,ENnio走入作交響樂的殿堂,贏得業界認同讚譽推崇,後來年輕的一代更以他為仰望宗師,又常常將ENnio的曲加入自己的歌內。

對於不懂音樂的Cool,欣賞呢齣戲好有刺激大腦接觸"新"事物的喜悅。

一個令人傷感的故事

呢幅又再出塲,有唔同架,這是我影的。切合今次想講從視頻看到的真實事情。

因為之前有位網友大肚,唔好睇到呢類型嘢,忍咗好耐先寫呢篇。

提示:不想繼續看下去的可在這裡作罷。

故事主人翁,佢嘅家人廿多年以前移民外地。親人移民前聲稱也有問過呢位人翁去唔去。事主稱在香港有很多朋友,不想離開。

述,每次親人由外國回港探他,都會在住所樓下出現再去食飯,他不讓親人上住所。

是次,又是約他在樓下等,很久也不見他,於是上其家居看過究竟。

原來他通完電話後就離世。

而佢位於高價地段 "住所"已是一層堆滿400呎雜物及腿的地方,佈滿厚厚灰塵不特止,小強四方八面爬出來,有木蝨。發現很多酒店用品,大量止痕劑。可能他已是住酒店,到親人由外國回港才扮由此處出去赴約。

據遺物整理師看到的物件中,他曾有嘗試整理的,他學歷高,手字好靚,有很不錯成就,工作時位高職,家中大量英國新淨衣料。他生前很仔細,很整齊。發現他有寫日記表達對家人思念之情等等。

~~"

學到啲乜?

好多事真係唔輪到自己控制。

為有在意識清醒及仍有心力前,盡量處理安排好要做的事。呈現真實的自己。

不要囤積。

每日都要清垃圾。

發覺自己開始處理唔到就要搵人幫手。

 

夜半笛吹聲

 嗚~~

主人房外牆傳出來的聲音。

水   滴 滴滴      滴滴滴滴答答,由分體冷暖機擁進來。

小石人忙過不停,索索索索。

笛聲何來,他說安裝分體機時諗住削吓條去水管等佢流得好啲,多手。唔知大家記唔記得Cool有提過呢度有時會強風亂舞呼呼作響,尤其打10號超級颱。據佢講係啲風吹響支管所以有笛鳴。成晚唔使瞓。

蘇拉襲港,有人會覺得政府如臨大敵,風勢嚴重性似乎雷聲大雨點小。

實在有一些住在低窪地區如大澳、大埔、杏花邨等地的人,經常要留意住海圖線水位情況。將地下物資搬上二樓、升高搬不走又會浸壞的東西,勤過不停。大排落地玻璃兼日久失修大量泥水擁進,身處其中都咪話唔閉翳。

我哋呢啲算好小事,但都夠佢勞累。該週日,小石人立時去買料DIY修理。好彩佢嗰時同安冷氣的親戚話用外膠封窗,唔係就要扑爛件玻璃。見佢用新買吸玻璃盤放上放落,反覆試好晒先打玻璃膠,真係辛苦晒。

  同場畀大家睇吓我份驚喜🎁。摺疊式玩具。

佢話係呢3條管之間冇封好玻璃膠所以到狂風暴雨時啲水就不停入嚟。

週一當然請假休息一天,是他的份。

Unchained1/2 FA~

 有名的腳環,估係佢細細隻時套入腳仔。好似人戴結婚戒指咁,🐦越大就箍得佢隻腳越緊。

蘇拉襲港的週日,親愛的小石人該日好忙好忙。

忙著補漏家居,下篇先講。

佢又在買工具期間,選購了把大力鉗。替FA~拆環。

一下就用黑色外套老笠住隻🐦。個笨手笨腳又驚死的老婆重戴著厚厚的手套s解雀扣。

一念之仁,小石人驚焗到隻嘢,放一放手🐦頭就露出來咬咗老公幾吓。

"除手套啦。"

終於將佢制服喺木板枱上。

佢叫同掙扎。

到我柔力撳住FA~雀頭附近啲布。

Cool講嘢安慰隻🐦,小石人叫我咪嘈。

(佢驚亞FA~聽到我把聲知道我有份"謀害",會😠Cool。)

小石人剪咗一、兩吓,未甩到個環,第三下啪一聲,同時FA~"呀"嗌咗一聲,好似以為剪親佢隻腳咁。

小石人之前又話幫佢銼埋腳甲。(事前消毒咗個金屬銼)完成到3指s。腳乸得太緊出揼,繼續唔到。

就算行動前調息咗心情做埋briefing,心情都好緊張。小石人:驚整親佢。Cool:驚佢整親我。

沒有🐦仔因此受到絲毫損傷。

人就有受傷喇。