食髓知味

 ⬆忍唔住獲利。。。。。

前兩日又申請1304新股,兩個戶口其中一個成功抽中100股,明天升與跌都會沽。

閣樓理論

很喜歡這個來自福爾摩斯的場口，他向華生解釋人腦像閣樓空間有限，所以他只專注對他有用的知識和資訊，其他一概不理^^

親人看到電視敎授水墨畫節目著我收看，我瞄一眼..繼而續做家務。

完成工作後，我從智能電話給她看我最近參觀畫展時拍下的作品，告之看過這些佳品又明白作畫的皮毛原理，不會再看剛才的節目了。

一、別花時間在未明基本的『老師』身上，易學壞師。
二、 正是精神有限資訊無窮，要懂選擇。

植入式廣告防不勝防，今天看一篇寫財經文的竟然在文末宣傳某報創富課堂，真是大打折扣，有點兒衝動想刪去連結。不過想深一層，可能長年以寫文為生，有些事情也不是他所願，在閱讀時我自行跳看篩走罷了。

還有要留意是沒名沒姓的消息來源有興趣就當故事看。總知不能盡信。

說話的人平時誠信為人也非常重要。別人講的不負責任，但你有必要找有品德的人寫的說的來接收。起碼他/她不是立心散播一些背後有目的言論。

記著，不是要做無所不知的財經『專家』，找到有較高機會獲利的股票就鎖定範圍再深入了解，太多支只會令自己應接不下。

投資是一門藝術，找到合眼的藝術品時靜待超荀價珍藏，善價而沽或放在博物館收入場費長收長有適隨尊便，但可別買入贋品當寶貝啊。。。

我應否放棄追縱恒隆

近期都是反反覆覆地思考自己的投資心態與規劃。

我發覺原意由抗通脹至往生時手頭上都有鬆動銀根升呢為對收集財富配置方法的資訊感興趣，確實是一個很大的進步。

細心留意每個人都有個人喜好，當某啲種子植根在一個人的腦海內係好難再改變他/她繼後想法，是以在找尋『新』接收訊息時是有選擇性的。而當一個人做決定的時候，從來是沒有客觀可言。

好似前幾個月我成日重重覆覆都係睇住101的股價，因為之前賺過錢，到佢個價位一路下墜時就覺得係再入賺錢的機會。發現網友偶然提起佢都會望多兩眼，再深入啲觀察持有該股票的大有人在但現時都唔多提，因為跌多升少又未到家鄉。有些人就算心知呢隻嘢有好多不利因素都義無反顧穿16蚊再入。

為咗擦去想在現價買入的思路，我數數唔睇好佢的理由係集團太側重於大陸零售業；上海的試點成功，但其他城巿的情況不同所以未必有相約發展；內地人的生活模式趨向網購，雖然吃東西買大型家電用品始終有人喜歡外出消費，但已減少了客源流量影響盈利；人民幣續貶值的機會很高；比佢更優質的地產/收租股有很多選擇，在周街平貨時聰明的資金流會投向優質股；現時跟大巿死貓彈的成 交量很低，甚至有以小量金額mark高少少價令人看似止跌回穩；如果恒指續下跌，個股大多數不能幸免。

講咗咁多，我究竟會唔會到佢派息率再升高同成交金額上升時入呢?我暫時真係講唔埋，哈哈哈。

好多人成日吼住啲價位跌得多或者冇乜業績的細價股，深層次的主觀願望就是希望佢突然一飛沖天，短時間帶來刀仔鋸大樹的巨大『橫財』，咁個腦就可釋放大量安多酚，係冇第二啲嘢可替代，錢買唔到的獎勵^^

到今時今日仍然是零持股呀~

山雨欲來

昨日早段跌9佰，同小石人講我有鬆毛鬆翼的感覺。。。零持股人在這時間掩蓋不了的喜悅。

唔係唔想買只是按奈著自己。前嗰排我追蹤住的101，見佢跌到好低殘本來想喺派息前入，最終沒有執行而錯失咗財息兼收機會，但如果我冇見好收割，咁而家就會係賠本喇。

點解咁審慎係因為98年買埋啲垃圾，到一嘢插落嚟時，最終輸咗接近成球後離場。今朝睇網友們交流講股災實況勾起呢段猶有餘悸的回憶。

08年喺資金唔多的情況下捕負傷獅子令我覺悟到不可將大部份資金放在一隻股票身上，亦提升了接飛刀技巧至千祈唔好密密接。

好多時過往令人有斬獲的戰士，當佢雄風不再，一不留神可以導至災難性損失，所以咪淨係睇住個食糊位入。857 就係一個好例子，賺咗幾次10%，突然唔知邊度嚟的運氣，佢開始倒下來我沒有用血肉之軀擋，甚至到股價四腳朝天我都冇再沾手。呢隻嘢我諗輸死唔少人。。。

14年唐老鴨被圍剿嗰役由$137追到15年$65，就算佢平到$4x縱然我有充裕資金在手都冇追因為已經到咗預設個股上限了，最終係賠咗幾蚊離場，成個過程輕鬆自在冇壓力。我對於自己能嚴守紀律感到自豪。

分享咗呢啲經驗，小石人問我有冇贏的個案?內銀暫時每次都係財息福星，講咗好多次地方債同內裡令人咋舌不利因素，但佢就成為不少好息財務自由修行者走進康莊大道金鑰匙。

奉勸冇乜博奕經驗網友們唔好睇咗賺大錢師兄們網誌就跟買，個個人嘅口袋有幾多本錢唔同，佢用緊九牛一毛去試水溫玩吓，其他人在不知情狀況下成個人跳落水，潭水孰沸孰冰甚或沒頂之際方記起原來未學過泳術時已太遲!

獲得美好成果網網千斤例子背後是經過千錘百錬洗禮。

不知謂不知

近期在回想當初寫網誌的原因是什麼，根本源自很微不足道的目標，亦與財自無關。

後來演變為記下自己投資?/投機的軼事，以及一些個人生活點滴。

我發覺現在會於大巿升得厲害時就經常翻看不同人仕分享的網文，主要是伺機靜待下一個機會。

要舒服自在做買賣，一定要深入了解剖析自己在什麽情況下心境狀態為何。做完決定後得出的結果較易接受。

有時看到某些分享的想法時，內心會不認同，卻容讓思緒慢慢沉澱。經過月日洗禮後，慶幸能夠接納一些不同的做法。

學習不批評而多理解^^。

世事。。太多可能性，其實我什麽都不知道﹗

人民幣 ·別了

今日會將所有人民幣全數兌回港幣，因為人民幣已成功被國際貨幣基金組織納入SDR（特別提款權）貨幣籃子，隨著該貨幣邁向國際化，較自由浮動及受外圍因素影響更大，持續貶值的風險大大增加。

保持飢餓

凌晨時份寫了點東西，覺得寫得不夠好，刪掉。

想問問，睡覺時什麽事最令人開心？

一覺到天明，每個人都夢寐以求。。。

我卻認為將那在耳邊嗡嗡叫的蚊子找出來並成功撲殺，安心安靜不再受騷擾地甜睡進夢鄉才是最開心的事。

直達終點固然好，但途中遇到困難後再奮力衝線那種快慰比無風無浪要高出百倍。

很久沒有談股票操作情況了，如果一直持貨，真的沒有什麽好說，

漲價不賣，又沒有跌至吸引到再度吸納的水平，

那我做了什麽？心情又怎樣？

電訊股~ ~被大行唱淡，股價下滑15%後已進行止蝕，現跌穿52週低位。

油股 ~ ~ 兩注買進後一直持股，曾比平均價升破1x%，沒有沽售現在回歸起點，持形保態。

煤股~ ~ 兩注蟹貨，成功於低位再度入貨，鬆綁並直至目前為止有利潤。

上落市操作：

其他幾支股票於近期高位放售，正試圖伺低購回，將均價拉低。吸取水泥股敎訓，今次不會待股價超低才購回沽出的股數，避免錯失機會。

未完成建倉，仍然飢餓。



心情大好﹗

導入其途

我都唔知幾希望喺我廿幾歲時遇到呢個人，佢講俾我知利疊利(複利)的巨大威力。

佢話俾我知如果我唔受得風險，可以喺大概乜嘢價位入盈富基金，同恒指成份股掛鈎，又係一項較為穩健的投資項目。

古謙：『喺我廿幾歲人時遇唔到呢個人，但係而家我做咗導年青朋友入財務自由其途的人。』

大前提係聽唔聽、諗唔諗、信唔信、做唔做。。。

之前買入的殘股、資源股爆升，忽發奇想，我應該問吓啲網友我好唔好食糊。

事關我唔係會打電話去創富坊嗰啲C9級數，網友的財務理財知識又一定好過財演N咁多倍而且佢哋夠真。

我諗可能會咁答我：

1) 投資的事要獨立思考，自行負責同決定。

2)有價值的股票就梗係等佢好似自來水喉咁啦，重駛問。

喂喂喂，記住複利效應呀﹗

今日冇操作。

糖果魔法屋的謎思

今朝又想食糖，哈哈哈，不過忍住咗。

曾經有人做過呢個實驗，一班幾歲的細路，喺佢哋每人面前放一粒糖，叫佢哋唔好食住，如果喺一段時間內忍到唔食的就會得到多一粒糖作獎勵。

跟住所有大人都走開晒，暗中攝錄住班靚仔靚妹。有啲就梗係忍唔住食咗先算，有啲就睇住粒糖，有時又猶豫攞吓望吓又放番低。咁真係有部份係忍到唔食能夠得到多一粒糖，不過唔係好多人做到。由於呢個實驗係會一路追蹤住啲細路成長過程的，後來發現能夠忍到唔食糖的一群成就比忍唔住要即時享受的人大。

呢個都係相當正路的現象，如果年青時代一味顧住玩，唔好好學習，以後可以有好啲生活相對上難。好了，到出嚟社會做事，有錢消費，儲到錢點用，例如買車定買樓又對以後的富裕程度埋下伏線。買樓係儲資產，就算係自住，變賣時都係一舊錢。而享受駕駛樂趣同優越感就係巨大消費，油錢、泊位、租車位、可能罰款、維修保養、保險、牌費、折舊、然後會壞跟住就乜都冇埋。

套用喺買賣股票方面，見有眼前小利短炒好似見到粒糖就忍唔住要食，但係如果可以忍多一段時間先食，回報可能更豐厚。再加埋另一個結局就係，若然可以忍到一路唔食，原來係可以去到間屬於自己的糖果魔法屋，裡面啲糖係會源源不絶咁食到人好滿足。

但係好可惜，就算我哋知道呢個有可能的結果，礙於忍耐力有限，好多時都去唔到更美妙的境界。

古謙唔會灰心，我相信呢種特異能力唔係天賦，係可以培養的。

就好似練跑，初初只可以跑一佰米，但我要做長跑好手，就由第一個一佰米開始慢慢鍛練，然係再逐啲加上去，跑吓多啲，跑吓歇吓又再長啲，中距離試吓，到自己有足夠的體力和耐力時，再挑戰馬拉松，應該係值得嘗試的美事。

今日有粒糖對我嚟講係好吸引，唔食會唔會冇咗呢？但今次的勢頭，似乎而家唔食可以有多幾粒噃。

大大聲咁講，今天冇任何操作﹗

人民幣何去何從

今天追溯回想由那時開始起買人民幣，是在2004 - 2005年間因為打算在內地購房子，當時港幣比人民幣貴~港元一佰可兌一佰零幾個錢，化算好用。

無心插柳的情況下，又將家人託我保管的一筆錢，逐步兌成人民幣。

時至今日，這筆錢未計利息在內大概2X%回報，這不是一項高回報的投資，但以備用錢來看，相比起存港元及其穩定性，不過不失罷。

兩年前正當人民幣一直穩步上揚之際，在飯局期間對舊同事們提及買入人民幣保值，她們當中有個是完全沒有投資經驗兼『唔輸得』的初初哥；一個是股場『損手撻傷客』蔡夫人。結果是初初哥將我這番話銘記在心裡但沒有行動，蔡夫人嫌當時匯率已相當高亦沒有理會。但到了近期，這兩位人姐都不約而同對買人民幣產生興趣來，前者已付諸實行；後者在古謙與她竹戰期間問道於屋主的女兒，此女是一位理財顧問，蔡夫人有沒有買人民幣我不知道，但起碼她已在這貨幣高企的時候開始想買入。

我想闡釋的是，一樣有價值的東西未形成到每個人都看到它的價值時，很多人都是抱著疑惑的心態怕作槍頭鳥，走出第一步從來都不是一件容易的事，但當價值顯現而大家從眾加入洪流，很多時已距該價值回落之時不遠了!

貨幣的起跌由許多不同因素所影響，以我的認知從來沒有人能很清晰地解說到它升跌的原因，但我相信沒有一種貨幣會只升不跌，如果賺息蝕價的可能相對性地高，加上內地經濟負著地方債有機會引致一觸即發的泡沫爆破風險日濃，到人民幣定期存款到期日，我選擇開始部署止賺離場。

爆邊 ~ 爆笑『專家』

斷食過後，現在已恢復過來。這幾天愛吃酸、辣的東西，而且好像股票大升大跌後『回補裂口』般，經常很肚餓﹗

話說酸，今天看創富坊的一個財演就真是盡顯那股吃不到的葡萄之酸溜溜，其實此君的『超能分析』已達我一看見他便不繼續看下去的程度。

今天大市牛皮了一週多後爆邊突破上升。

財演表示沒有散戶可以因此而受惠，因他們一直在中資股跌得很厲害時勸喻散戶不要買入，今次升市主要是中資股。又今天升，明天可能反跌，要明天收市前企穏才。。。。

古謙未聽畢已關上電視，頓時耳根清靜。

要算我沒有統計，除二三線股外，就觀察今天的升市是相當全面，當然中資股升幅尤其顯注。散戶有沒有趁低吸納我不知曉，但這個財演肯定沒有伺機入市﹗

沒有人能預知未來，那多好，我們可以很放心地放棄估市，最重要的是也應不需要別人替你猜。

找對方法加上耐心，我們的回報表現可不會遜於所謂的『專家』。

今天沒有任何操作。

富人心態也須靜待時機

靜靜地又是寫網誌的時候。經常瀏覽談有關理財、投資的網誌，大家異口同聲都說富人心態，財務自由方法。

古謙也曾經鼓勵年青人多學習理財、投資的知識和方法。其中一個最重要的原因是時代大氣候已轉變，如果沒有做好這一環，對往後生活保障會出現佷大問題。

以前我廿多歲時『炒』股，朋友們都認為我投機取考，而當時的我確是什麽都不懂，當然就只有一個結果~輸...好多好多。

幾番嘗試後，我發覺當時的心態能耐都不適宜買股票，就再沒有參與其中，時辰未到不可強求。找一項配合自己性格的方法，現時的資產大部份都是由磚頭得來。

事隔多年，老朋友們都不再用以前的目光去看我，因為他們終於明白到投資的重要性，也有做股票買賣。而且今時今日，對我的理財之道是褒獎有嘉。

在投資/機背後，我經常堅守一個最重要的原則，『量力而行，後果自負』﹗(正如葉問齣戲，呢度係兩個原則) ~但同樣重要。

以前供樓不像現在低息，當時要11釐多。不能仿傚某些財商高的朋友般的方法，以按揭加大自身入息槓桿(用這方法的財技要更高，慎防加息週期)。

另外，在買股票時從來都是實股，總之一定不可能輸至要家人協助償還。

你可以吸取經驗，但一定要自己負得起而不會『一舖清袋』甚至令你欠債疊疊的結果。

大家經常提倡富人心態，我又覺得我們要錢為我們工作，也得靜待時機﹗

有道是聚沙成塔，那麽也一定要由底一層一層起上來，奠好根基的大前題不就是要工作、儲蓄待自己有足夠『彈藥』去實現理想。

所以，請緊記我所指的並不是一朝發達、炒股炒衍生工具借孖展的投機方法。而且每個人的資金、可承受的風險各有不同，決不可孤注一擲，也不可依樣葫蘆，照單全收。

今天操作

每個人在學習或面對考驗時，都有不同的領悟能力。今天未能掌握到也不要緊，最重要的是認為對的堅持下去。當下，找個自己覺得舒服的位置，在現有的能力圈範圍內自在的進行要做的事便好了﹗

今天沽出早前買入的水泥股，照原定計劃購入時不打算作中期持有，如有機會便伺低再入。

又在自言自語

有人會認為咁樣留意啲股票上上落落好嘥精神。

係架，基於客觀條件唔係人人都有咁嘅時間，另外人各有志，採用的方法又大不相同。

(1)  月供

   唔想為入價傷腦筋，限住自己嚴守入貨資金的紀律，儲股票長揸，發揮複利的巨大威力。

  唔係我杯茶，手續費太貴，我喜歡盡力捕捉抵價的過程。

(2) 頻密交易

  雖然已成功利用銀行優惠減低交易成本，但密密出入只會令自己容易方寸大亂，出錯機會率提高，睇有啲股友不停追逐爆升股、牛熊證、衍生工具好頻撲， 轉身又要快。 佢哋有佢哋的天地。

  我呢個衍生工具絶緣體都係鍾意慢慢思考 ，或者耐唔耐啱價就短炒吓，拉低吓平均價咁啦。

(3)  到價即入，坐定定等收息

  這又分密密睇住同眼尾都唔駛望個市，後者 要對自己選股很有信心先做得到，問心，有幾多個人入咗股後係唔望個市，此乃已入化境的高人。

  我都希望自己做到儲股票同等收息的能耐，但我唔會長揸唔放，呢個同收息又有好大的矛盾。一切由心出發就唔好理收息住。

  開倉階段貼市好正常。實況又印證咗我細注分段入呢個方法好好，由於今次所選的股出現破完又破底價的情況，全靠呢個方法股均價與現貨價仍在可接受距離， 甚至已收復失地或有微利達安全水平。再者，相比起16000點嗰役，那時我已成功在接近底位撈到小注的貨，但卻只賺若10%。

  今次我傾向當股價向下調時提高注碼，每隻股票都設定投放資金上限，以防自己失控越踩越深。初擬部份待24000點(看勢調整)才沽出手上的貨，給自己一個目標去堅持。

沾手殘股確是要有驚人的忍受能力，全世界都喺度踩佢踩到一個仙都唔值，高位大注入咗的又鬧爆佢，有人又幸哉樂禍地冷言嘲諷話到幾多幾多跳十次樓價先入。入咗又段段蟹貨有排唔升續尋底。

如果唔係有不利因素，又點會咁低價呢。大戶十次有八次弄低之後，入夠貨又唱好再來跳舞亞高高。

生十個仔揾幾個去搭順風車尋寶， 撻傷咗重有其他仔養，又做吓實驗。

醜股大翻身

就算係小注分段吸納，如果買入個股，總會有腦交戰的時候。

暫時嚟講我都好滿意自己近期的操作。

甚至早前一刀劈落去的那支股票，其實我已經等佢由支持位跌咗接近30%先落搭，

但佢未跌夠，所以沽~ 之後升番3%，有人問我會唔會唔開心？

又冇噃，要買番都唔係差好多啫。但以我平時的性格係唔會吃回頭草﹗

不過而家嘅我，似乎同以前係判若兩人。

今早同板塊的殘股升，自己放咗嗰隻都係跌，

跟住呢隻已經令好多散戶心碎又好似俾人行咗腰閘之刑的醜股，

竟然有大盤買入係咁掃，我就喺電光石火之間即入番沽出的股數再加@@咁多股。(低於沽出價入)

跟住就見佢係咁升10%以上。

我心中隻惡魔又喺我個腦叫我沽貨，我就同佢講：『咁有耐性等而家開始漸露曙光就走，你唔係同我玩嘢吓嘛，夠膽蝕唔夠膽俾機會自己追番？』

應該要留心觀察，加注添呀，已經離底部不遠甚至今日係見底回升了﹗

手起刀落

今日檢視股票組合，沽了一隻大市升而它倒跌的股票。

其他有些利潤的股票也都不沽。亦有心理準備大市回調，反升為跌，實屬平常事。

多年前曾經遇過一位婆婆慨嘆：『以前的利息還可以支持到生活，但近幾年不可以了﹗』

她獨身，但無論生活多艱苦，也不願意領綜援。

我經常懷疑她可能是『捱義氣』協助友人保管資產而令自己失去取綜援的資格。

理財、管好自己資產的能力該由小培養，

年青人大多都是拍手無塵，有的卻是從工作賺錢的能力和時間，

有機會讓自己在管理資產時犯錯，從而學習改良理財和投資的方法。

資金由少開始，可能蝕的數目少一點，接受程度又大一點。

只要不涉及借貸，在能力負擔得起的情況下，

掌握好這技巧終身受用。

除非閣下的退休金/強積金足以令你退休生活不愁錢銀地活下去，

否則，若果等到退休後才運用有限的退休金去學習投資是一種超高難度十分危險的行為。

但我發覺不少人都會選擇沒有鍛練、沒有安全網的情況下『勇敢』地走綱線，有時甚至連雙眼都矇起來去做。


以前的我，遇到升市會殺綠存紅，死抱著一只持續下跌的股票不放，甚至不停地加碼，直到股價跌到令我心灰意冷然後才沽出，通常是在最低位﹗

今天我的做法是檢討自己有沒有犯錯，如果真的走錯了便承認和作出補救。

股海博奕總不可能百發百中吧。

不為資金不足而套現，而是作好風險管理不讓虧損擴大。

另一方面，升市時有上升動力的股票就讓它們為我的資產進一步增長。

今天的我做得到﹗

曇花一現

前日媽子無喇喇話要入工行(佢喺股票呢瓣真係乜都唔知嘅 人)，見個價好抵，就幫佢入咗2000股($4.41)。

今朝見有得賺，就問佢放唔放，今次投機走一轉$800($4.81)。

佢開心得嚟話唔知講乜好。

問我有冇買呢隻，冇喎，而且今日本來有微利的股都回番晒。

今日有入貨，而家入市，情緒冇乜起伏。

再執平貨

前週末去咗竹戰，今次有向各雀友分享吃生、洗腸和斷食經驗，氣氛似乎比平時輕鬆得多，佢哋都好有興趣聽咁。

鬼咩，見到我只係斷咗兩日幾就成個清減咗，冇前嗰排咁水腫。

吹水期間，有個雀友話因某些優惠同另一半喺工行有個聯名戶口，呢輪工行將香港工行同大陸link埋，工行夠膽死在網上顯示上冇咗人哋個戶口﹗幾番投訴見番戶口資料後，佢哋兩公婆想透過網上買基金時，畫面就只係error。打電話去問又話暫時未得，叫個客遲啲再試。過咗幾日再試又係唔得。但係後來就發現買基金的錢已經扣咗唔止一次，但冇買到﹗
(聽到古謙O晒咀)﹗﹗﹗
最後好彩事主醒目有攝下交易畫面佐證，同銀行續單交易對數﹗


同佢哋講起股票，雀友想得太多就入咗金股。雀友蔡夫人就$5.4x入咗建行，但係就話個市跌到好得人驚，又重複講有乜唔妥都可以要嚟收息。

老實同佢哋講見個市咁跌法我好開心，佢哋話古謙梗係冇貨，冇再回答。
(有貨都未必一定唔開心嘅，不過都唔解釋咁多咯)

我又再問蔡夫人，而家買股票時，知唔知自己買緊啲乜呀，佢支吾以對，我都無謂再傾落去嘞。總之各人有各人的方法就是。

竹戰賽果報捷

今日操作，早前入過的股票運用了第二注資金。另外再買入一些別的。務求做到升市有貨唔嫌少，跌市有錢繼續吸。

小注怡情

今日又有機會小注入貨。下星期有冇再平啲呢，又睇吓點﹗

近期操作

對於因股息而在臨派息前買貨的人，近期都可算是災難，派完息後股價拾級而下，『偷雞唔到可能蝕咗個雞棚，傷﹗』

但那些為財務自由舖著康莊大道的投資者，立心以股息為被動現金流的朋友，卻不會為短期下跌而憂心慽慽，他們有的是信念。

古謙，兩者皆不是﹗股息高低只作買入的其中一項指標，最終會看價位行動，高追沒有我份兒。

等~~等受傷的獵物筋疲力竭才出擊，到牆角的猛獸誓必會特別凶悍，所以一定要網開一面，不是給狩獵目標，而是給自己留有後著。

找到認為有信心投入資金的股票，前哨資金小注，要嚴守紀律，待股價再跌得更低殘才再度運用第二筆資金，

平注或金字塔式加碼，得要看對該股有多大信心與及對後市趨勢評估，如果看錯，金字塔壓下來後果會很嚴重，事前要明白這風險。

近期優質股才展開跌浪，所以未為所動。沒有任何操作。

今天又放了另一哨兵買入殘股，雖然恒指仍在21xxx，有些殘股幾近海嘯價，個人認為是一個機會。