資/機想法

小石人用無人機拍得的美境~極緻

2021年7月膽粗粗第一次期權SP,某些重點股股價經過一輪心電圖般落咗山谷底又再爬返上嚟,奇蹟地竟然開咗的期權隻隻都唔使接貨,好開心呀。喺呢啲巿況,就算隻股喺相對低位,都係現金在袋慢慢諗點部署較優(我係咁諗),況且接貨即代表好大機會賬面係輸緊錢。

翻查戶口狀態,發現富途喺700同9988個股記錄中衍生工具欄話我虧。。"錢。事關過期期權佢仍顯示結算價作紀錄,700(-4仟幾)9988(-8仟幾)。攪到我要計吓成盤數佢有冇計咗我輸呢萬幾蚊。最後啱數,該等負數沒有入條賬戶數。

唔係好明點解要咁顯示,就算有必要咁樣寫,可唔可以表達清楚啲條數冇入。可能對於唔知又唔計清楚或唔進一步問明白的人,就似早排以為自己蝕咗巨額面臨破產,留遺書控訴繼而了斷的年青人,此乃天大的誤會。

筆者計算後又發現開咗戶個幾月,買買賣賣手續費已用咗3仟蚊以上。呢點提醒自己在賣貨前要想清楚密食雞糊的情況是否當刻唔賣就倒輸,盡力減低交易次數。買嘢次數就減省唔多,經驗所得用分注買的方式是非常穩健和持之有效的策略。

最近喜歡睇譚紹?投資學堂視頻,佢嘅分析同資金流向累積資料,對做買賣參考有用。今次700、9988果斷止蝕同做期權行使價考量佳績,都是睇咗佢啲片所賜。

而家某啲散戶學習、思維同經驗都豐富咗精咗。大戶用錢畫圖表和一些人們公認的方法做參考支持位令人一入就蟹是有可能的。又例如當股價到了歷史高位,咁有人會用最高位計算跌咗幾多個%入巿,心中上望升返到嗰個高位賺幾多;最近有云700$550$490都係參考價位,卻好似薄脆咁容易破。$422係呢次低位,咁下次跌返去呢個位,你/妳會唔會衝入去大手買入呢?結算日收回部份失地,又會唔會提高指數嚟轉倉再做淡?

穩陣就自然賺得唔多。買賣首要係唔好輸身家。港產片行運超人賴料布(又係梁潮偉飾演)嘅對頭斷蟹(鄭中基飾)話佢師父講過:

"人一生中總有幾個時辰特別倒霉,

那時人就會渾渾噩噩,

時運高,就會在家睡覺,

時運低,就會無端到澳門輸清光,

又或在卡拉OK被人點錯相諸如此類。。。。"

在巿場中要經常保持警覺,寧願唔贏、贏少啲都唔好見有機會就做過大槓桿。

(呢啲都係自己同自己講)

為自己的行為負責任很重要呀。

 

轉身·又是不同的體驗

上回$583.5入咗700,$594放咗,事關睇視頻知道資金流向:北水同基金沽緊。儍儍的又在$573.5入返,跌到約$500反彈,有機會平手走人,冇咁選擇,尤幸$552都識得肯走。26/7於$490SP是月就係蠢蠢哋諗住接貨。27/7$420SP下月。次次Short put完就大幅跌(掩面)。

9988早約7月頭已做了$187.5是月SP同較遠期10月$185SP。$221.4沽咗早前$204入的貨。再曾在$205.6現貨再入,同上微利唔賺亦懸崖勒馬平手走人。

另外之前又SP咗8月386(早前放咗部份現貨回補)同914。

                    9月883

27/7買咗啲941同1044(早前放咗部份現貨回補)。

7200同7500呢類,買定等波動日日食價,短炒沽咗迎來大升大跌又食唔到,買嗰時知佢情況,食得咸魚抵得渴。

今次如果唔係用期權操作接700同9988飛刀,可能於較高位已入貨,又係一個用腦新體驗。

各位在這波動巿況仍勇敢前行的網友們都是值得尊重的,大家都知道唔想辦法增值資產或/和發掘現金流,購買力已被通漲不斷加劇吞噬。

別氣餒啊。😊😁

 

有S~nake:不喜勿入

 

他的新玩具

好彩做咗保養,玩第二次冷不防墜落執唔返。加$有過第二架新的。

有興趣的自然不停睇有關短片學。

上週日佢再出擊去飛,途中見到~

速度之快睇唔多清楚。。。

原來呢條黃頭蛇,據稱只有一毫子咁大的嘴巴,當時咬住隻田雞腳唔放至受害物發出悲鳴引起小石人的注意而探望找源來。龐然巨影嚇親捕獵手,當然是驚有黃雀在後,出嚟打獵其實都好驚架,一放口,蛙就秒速落荒而逃,影片拍到的是條蛇仍沒有放棄~飛竄追蹤卻徒然。

小石人話:"之後條蛇擎起前半身以怨恨的眼神凝望著他。。。"

跟住氣忿地離開。

手急眼快影到晒,畀個叻佢。

我哋用消費劵買金粒保值

 呢個世界真係有啲設計咁死死實實。😄

今年六月好似條蛇咁流竄飛快地過去。

一出消費券概念,小石人就話想買啲保值的東西,好過飲飲食食同買啲唔係咁需要買嘅嘢啦。佢竟然提議買金。

見佢咁積極保本想法,古某當然大為讚賞兼多方面搵同問唔同渠道呢個方案行唔行得通。

最方便係八達通,致電利昌同金鋪,可能利昌接電話嗰個人都想請我食燒鵝。。佢用串過碼頭咕喱的聲線答我:"梗係唔得啦。"(後來去開上環了解吓佢哋買賣實金的運作就明解。)金鋪都唔會收八達通作買賣交易。

越嚟越近登記日子,得悉支付寶同Wechat有機會以消費券買金,月尾又打去兩間福一間生問吓。

1.可否買金粒。(飾金手工同佣太貴唔會考慮。)

2.可否兩個賬戶的消費券一起來買。

當下兩福未能答到,會回覆。請著乜嘢伙記招唔招生意就係呢啲位。

生生個職員即時就答佢哋只收現金同銀聯。

大福轉頭回覆可以消費券買金粒,可否合戶來購買就未知,叫我遲啲再打去問。

六福今午回覆係公司商討過後,以上1同2都得。佢哋有5錢金粒,現牌價$8945。

因為小石人一向有支付寶用嚟淘嘢。咁我略略睇吓Wechat優惠都不作他想決定用支付寶。事關真係開咗好多唔同戶口冧把密碼滿天飛。

對我呢啲年紀唔平面對不同新世代玩意就係要適應同學習。

有理由相信劏波今次攞分之作,用呢種嶄新派錢形式進一步融合中港兩地消費模式習慣。

按步先開支付寶攞登記消費券早鳥優惠,提過老公佢唔攪就由佢,因為我係佢老婆唔係佢亞媽。

登記消費券首日,吓。。問返上年收一萬蚊個戶口資料核實身份。我呢隻狡兔唔記得咗用邊一窟添。😅

摷咗好耐順便執吓嘢(咁大家終於知道我好冇系統同亂。。。)

後來睇youtuber知道啲人排錯隊又話大塞車,唔登記住都好嘅。

昨晚做人口普查問卷,最主要係千祈唔好攪到戶訪查,又唔知點解做完1號2號資料就係撳繼續都唔畀反應。試嚟試去用吓第二部手機登出登入無數次卒之完成到喇。

殺得勝起瞓唔著,又再登記埋消費券,今次唔再嘥時間搵,直接登記完再後補身份證上載。今晚又做小石人消費券登記,齊料有經驗好快就攪掂。

最後發現唔記得做介紹朋友優惠。。。😄😁

整體來說,能有耐性完成眾多任務,好欣賞自己呀。