消失的刀子

 平時煮嘢接近每次都會用到的,咦,點解唔見咗嘅?

同老公講,大家不約而同反應都係可能包埋在垃圾內棄掉。

咁我激活短暫記憶海馬體。

最後一次見佢喺邊 ?

最後一次用佢係煮咩。

💡

就喺雪櫃放厨餘嘅小篩中發現佢同啲菜頭菜尾料頭外皮安然在一起。

為咗避免 乜都冇晒同累街坊,每次都看看爐頭有冇關掉才開餐。我最易出事係將佢關細火,跟住唔記得熄火。

上次見火舌後換咗個好用嘅石製鑊,點知重燒得高更火旺。咁即係主因是別的~原來火較得太猛,連抽油煙機都"談"黑晒。小心啲啦妳。

嘖,,,不滿 不奈煩的聲音。

好細個時,老豆就鬧我叫我唔准發出呢個音。所以自此之後好少再嘖嘖聲。

嘖人哋多定嘖自己做得唔好呢?

我見到小石人有時食嘢時整污糟自己啲衫就會不奈煩,咁我會拿拿聲清理現場,吃完東西佢沖涼時換衫,盡力避免佢唔舒服嘅感覺。口中安慰道:"有時係會咁架啦。對自己寬容啲。"

我觀察發覺自己其中一樣不奈煩的就係唧唧洗手液用到尾唔想嘥地扲扲扲。而家唔會lu。剔走令自己心煩的事情。

如果有來生,我希望自己能生於善待 懂教養 適當時候給我自主自由的父母。善導教我生存 活好技能。佢哋唔會操控同情緒勒索我,各自負責返自己家庭崗位。

唔使好有錢 夠簡單生活 夫妻和洽。

以為富豪 有錢就係富貴無憂?

看到的例子 包養好多女人/小鮮肉

多子女競爭幾大先得架,有冇聰明才能去滿足有錢父母的苛刻不合理要求 有冇自主定是話就係盤生意交畀你查實你只是仰人鼻息樣樣都係被人扯線。。。

幾多唔見得光或不合格的子女棄之如雜草 。唔達標迫到自殘 情緒病 驚恐症 癲咗都唔少。

兄弟姊妹,有利益衝突 有錢有錢的爭 唔係太有錢都會巧取暗奪 真實在發生。

將自己的生命終結處理得嘖嘖稱奇才是真本事。

老公生日·添美好回憶

 各位早晨啊😊

前日問佢生日想食咩,佢話由我決定。昨日午間通訊告訴佢食泰菜。

佢放工後在港鐵站匯合時,甫出閘口,見到面時佢笑得好開心。

一問之下,原來佢就係想食呢間。

我答:"上次諗唔到晚餐食乜時,你有提過,因為嗰日我有啲攰同天氣比較凍所以冇出洞。但我有記得你講過的事情。"(咁樣咪+晒分,哈哈哈)

是日嘅生牛河保持到水準,美味呀。

豬肉串燒,佢一食就話好食。

之後其實我已7至8成飽(因為預咗重要食梳乎厘~算生日蛋糕),佢未夠,所以叫多味雞串燒,好香。一食落口我話過咗火(武斷),睇真啲已經係用雞肶肉,食到雞串中斷,肉呈少少粉紅色,碟的肉汁都係粉粉哋色,火候係佢可以做的最好程度。

今次坐唔到平時張枱,舖內接近滿座。

坐呢張最埋面枱重好呀,一來我係自攜生日燭(足)唱歌時又唔使騷擾到其他食客,而且影相背景係紅底襯得幾Grand。

當我攞生日蠟燭出嚟時

小石人竟然話唔使啦,室內唔可以點火。

(好彩我品性好,冇燥狂地咁唔使攪啦。。。)

喂,點一支燭啫,唔會即刻射水熄火拉人卦。😁

其實啲女侍應見到都有笑,幾歡樂丫。

況且

我事前帶定兩支蠟燭以防失拖。

搵唔到佢平時用開點寧神香嗰個較輕便橙色火機,只見龍船咁大的黑色直立火機,

摷返我以前儲的火柴盒,重要試吓火柴work唔work。

大佬,你話唔使?

好多時拒絕一次別人的心意就唔會有下次架喇。

又到聖誕臨近,影低商場佈置同地標名稱,想記返是日做咗乜去咗邊就係有效記載。

密蜜會

 昨午見天氣好好,於午間通訊時問佢攰唔攰,唔攰就睇吓有冇興趣看星星。

由於上次間食肆食物未能保持水準,今次我建議叫刺身壽司外賣進行野餐,又可以未天黑前欣賞吓沙灘日間景緻。

小石人問點安排。

咁梗係我攪掂啲食物,佢放工到指定地點匯合就得。

在地鐵上有位年青人想讓座畀我。

多謝佢,我到站了。

連聲感謝。

之前有講過,要人自願先欣然接受好意啦。亦唔會批評不作讓座的人,每個人都付票,先到先得,有權坐。而且好多時真係好攰或者有個人原因(唔舒服 隱患 心情好差等等。)

等到佢放工訊息,我就問使唔使到小巴站排定隊,可以慳咗候車時間。

佢好滿意是次安排😊

我約佢時都會回憶初次見面時那份心情,好開心的。

佢上次去完沙灘回家就表達好似拍拖嗰陣時咁。其實佢同我拍拖時係非常勞碌的,放工後約好地點見面後一齊回佢家吃飯,佢再送我回家然後佢獨自再返家,非常神心亦好疲累。

諗吓自己另一半曾為我及家庭付出許多許多,而家同初蜜運時,自己對佢嘅態度有冇轉變,眼神係咪重係心心眼的仰慕尊重呢?

大家傾談的題材 說話語調 有冇聆聽到對方需要。

有冇畀好大壓力伴侶呢?

走埋一齊就係想開心,過程雙方都愉快相互有進步。行事前有冇詢問老公/老婆嘅共識。

佢返工有帶盞頭燈,夜色漸至,佢用燈嚟照住啲附近環境,哈哈。享用完美食後,漫步。

見到啲水有時波動,我問會唔會有魚呢?

佢哋感覺到水的動靜就迅速游走,所以我哋在岸邊沿海岸線尋找。

做吓啲大家都放鬆而雙方感興趣的事情。

燒烤味不斷飄來,以為週五較少人,原來Friday night fever

老公明天還要上班,早點回家休息。

步往車站時,前面狗主一不留神,隻寵物掙脫衝出🐎路,架巴士嚟緊喇。。。。

好彩個司機睇到隻嘢,而且埋站已將車速減慢。好彩對面馬路冇車。

有相機睇唔到星 有星又冇適合相機

😁😆

連購三日

 好少極少連續3日都七街。

24日(六)

雀仔街買瓜子畀Lady Fa Fa。見到隻折衷公,個主人養得佢好靚仔,而且有啲主人帶鸚出街,咦,有幫隻🐦攬C袋喎,咪唔使放隻嘢上膊,然後整到成個背件Tee,都係。。。

平時小石人買外賣回家一齊食,一起行去買食物途中,我話多謝佢成日四處張羅買嘢食,我覺得感動。

橫豎等待期間,我問佢有冇去過對面嗰間古蹟建築。

係冇嘅。

咁我話過去參觀吓。原來淨係畀入地下。二樓同三樓要約導賞人員組齊四個人以上先可到訪。

印象中之前係畀搭(車立)上去的,去過?但最後都唔太肯定,我個人腦係信唔過的,,,,

本來想幫襯飲杯涼茶,發現種種都唔適合胃氣漲嘅人飲用。

攞完外賣食物,小石人發現附近有間舊舖仔,可能有我搵咗好多間店舖要買的物品。

有幾個女仔喺舖門口,個亞婆店主同佢哋講兩句,幾個女仔猶豫又冇乜興趣再買。

我入到狹小的舖內,講明我想買的東西嘅要求。

佢:"唔需要,唔需要。唔講嘞。"

(佢意思係我嘅要求係唔需要的,佢手上sale畀我的貨品最適合。)

其實我已經去過大大話話3至4間問過揾過都冇合條件的。

我見到有我想買的貨品,問佢有冇我size,佢又講一輪佢嘅偉論。

我:"咁有冇我size?"

佢:"冇"

走得。

我冇唔高興,敍述返過程畀老公聽,老公話畀佢就會答:"而家妳著定我著?"

每次諗起個亞婆店主嘅反應同對答就覺得好好笑。

25日(日)

去咗一間商場買另一款貨品兼食埋晚餐。

去過兩次呢間食肆。

叫返"肉桂"咖啡,店員話佢哋冇呢款咖啡。

Oh no

睇勻個餐牌,究竟我上兩次飲同款的咖啡是什麼呢?

會唔會係玫瑰咖啡有落肉桂呢?

小石人就直情問我,我哋係咪唔係嚟呢間呀?

😄

肯定係呢間啦。

一次同小石人嚟,一次跟我中學時舊同學嚟,今次同第二次重係坐同一張枱添。

26日(今日)

小石人:"叫嘢食。"

我:"乜唔係去屯門飲茶咩?"

去到屯門,叫咗呢個餐:

美味非常

鮑魚鵝掌冇影。掛住食。

今日似生日😋😋

女待應同傳菜的女士們大多都很有禮貌。

"本來小石人話自己未嚟過呢間酒家,見到酒家門口又話好似同殺咗人嗰個舊同事,嗰個人由覊留室放返出嚟後一班人喺呢度食過晚飯。

兩個都好似夢中人咁記憶迷走。"

今天重外賣一隻糉或者明天食。

跟住去以前買嗰件物品嘅舖仔附近,連續問成4至5間都冇。

最後搵到呢間舖個中年女店主,有喎,但佢又淨係sale佢手上嗰件唔啱我size的畀我。。。。

真係唔知點解。

後來同佢傾多兩句,又摷到幾叠貨係有唔同size咕喎!

行成56789十間舖,得一個女人笑笑口咁答我冇,而家呢位算有禮貌。

路在口邊,呢區嘅街坊們都樂意又準確地講到地點方向畀我哋知,超讚。

是日晚餐食埋啲打包食物及餃子,一路睇D+

Keep shooting·日與夜

 近期睇D+釣魚王,其中有一集,參賽者們半夜三更都起身釣魚。

小石人話:吓日釣夜又釣。

我:咁有人夠日影夜又影。

<眼神。。。斜瞟住我>

⬆半夜星空圖,已經影咗幾個半夜。之前有一張佢話有好多星星,但係個拍法係新的畫面冚舊的,嗰晚小解完就發覺靚清境畀雲冚晒,嘥心機。貼出嚟呢幅都有啲飛行物。

幾招積,石顏色好美。

醒醒目目

笑樣

今次有叫埋個成日想輕生的舊同事(死咗老婆嗰個)去。

事前:我哋兩公婆傾談時,我有同佢講,自己冇耐性又唔想聽咁多消極負面的言論感受就幫唔到佢,咪到時之後攪到自家心情都沉埋落去。

最後老公都願意一齊同佢食午餐(呢個人一定唔去藍店的),再去目的地影-將軍澳。

據老公回家講,呢位仁兄話自己以前掛住工作冇同個女溝通。又話供個女去外國留學讀咁多書揾咁少錢(嫌)。(老公頓時覺得自己對住座石山)

曾經講影貓仔,呢位老哥諗住唔帶腳架的。(我唔識都知道有啲環境唔用腳架同快門線係影唔到架啦)

成日換機係賴部機影得唔好。以前講過佢影完唔執相的,話要原汁原味!咪覺得自己影得唔好,不如人。

上次去影🐱仔時,咪話有幾個影友坐隔離枱(其實兩張枱差唔多係黐埋),有個白髮斑斑的Sunny,已用一牌子機影咗一幅有彩燈bokeh嘅貓仔。之後嗰晚又試第二個牌子機影,唔識又會問我老公啲操作方法。攝後又因為自己唔識就搵朋友幫忙執相。我即時讚賞佢好叻。

點解我知佢叫Sunny?

當時佢自豪地畀張褐魚鷹相我睇,重好多人點讚。又見到佢畀嗰張相老公睇。

玩遊戲都要知道多啲資訊先得架。玩熟有成功感就自然更有興趣。

同場加影笑到我甩轆的小石人往事,我問准佢先寫的。

話說佢同死👻老友亞虎(真係死咗的),之前喺舊公司一單工程,總之佢哋的賽制有啲情況吓係下午可以去食嘢。

兩個老友鬼鬼孖住去中上環一間大牌檔糖水舖食甜品。見到有個亞洲人影個牌檔風貌,個老闆娘揸住個拂糖水殼揚揚吓喺度鬧:

"影影影,影你x母"

個亞洲人好驚,走咗。

跟住有個洋人又影老闆娘間舖,蝦,老闆娘又唔鬧佢喎。

咁鬼🐎的小石人就同老友🐯講:

"同個鬼佬解說shoot shoot shoot shooting your mother"

老公複述我聽時,笑到我肚都攣埋。

大佬呀,你知唔知乜嘢係

Shooting人哋個mother呀

砰

等貓仔·艷羨目光

八月份上晒媒體幾十友一齊在海傍捕佢~長洲🐱仔。

小石人想去影好耐,雖然放假。。。但遇著摩羯,打風前夕那個九月首週二,最終沒成行因為佢影友大隻佬話,🐱仔多數鍾意企船桅俯視覓食,有風喺晚上桅杆郁就更難影得清晰,所以我哋取消該日行程。(嗰日係元氣感謝日,會員八折,好彩冇去唧)
 

好美的夜色

看倌,嚟睇慣的都知我唔係線性敍事。⬆晚間重頭戲提要~🐱仔。

9月11日

前幾日攪掂晒啲銀行嘢,昨午他他條條出發。事先搵咗間好出名小店食蠔仔粥,佢加咗方魚乾滿有潮汕風味。炸雞脾略較為入味。

兒時回憶:細個喺七層徙置區居住時,附近大波地在盂蘭勝節有大鬼王塑像威武非常,坐鎮薄鐵皮臨時竹棚內;有木頭車上個個大玻璃盎內酸木瓜酸菜蕎頭販賣;有處燈泡照耀吊著很多保平安玉器讓街坊競投。鐵絲網外圍有單車租賃,單車舖隔離就係掛滿潮洲打冷食品的路邊檔,嗰度啲蠔仔粥就是相若食味。

長洲食完3點3,四圍行吓搵吓會唔會有墨魚骨(畀亞FA~),雀仔街嗰啲黃黃哋色又成好似伍拾蚊一細件,唔想幫襯。乾貨海味舖係冇嘅。去街市問,個赤裸上身下場抹緊汗的中年卦男士,好好人,自己唔知邊度有得賣都逕自行去海鮮檔幫我哋問。嗰時生墨魚係有的,但老闆娘話內臟係唔會留喇。

其實小石人在我哋住處區內有相熟魚佬,我之前都已叫佢問吓,買啲細隻啲嘅墨魚(肉唔會咁靱),跟住咪有佢嘅骨自己曬,我整過啦。

估計藥材舖都有,上網查話多數炒焗過,亞FA~係生機飲食鳥,我搵生曬嗰啲。

剛搜,哈,原來淘寳竟然有得賣😄。

回到長洲遊記,橫豎冇嘢做都係逛吓混吓吉,有當然好,冇亦無妨。

往東灣方向去海邊,呢間⬇佢有興趣,有冰滴啡賣,五點十五分為最後落單時間。咁就去完海邊坐一陣先回頭飲。

我影1

我影2

飲完非常特味嘅果皮啡,臨走前先發現到門口高掛這棵蕨。

我影3

係時候去海傍睇環境睇位食住嘢捕🐱仔。

去到海傍海鮮食嚐有利位置,已經有3位雀友用晚膳等緊。

我話拿拿聲趁佢哋隔離重有張table for two就佔座先啦。

一埋到去,全日金句就係:

三個唔相識的雀友不約而同對小石人話"咁叻嘅,老婆肯陪你嚟打雀。"眼神係羡。慕。極。了。

小石人:"嚟行吓食吓海鮮"

A:"我咪咁同老婆講。"

B:"我夠係咯。"

C:"我都係喎。"

😄😸😁

點咗餐後,有隻真🐱仔喺餐枱附近下徘徊,老公畀咗隻剝殼蝦佢。

我飲咗支大啤消暑,隊晒。上次睇展覽後去bar用膳,小石人飲完幾啖Margarita之後關公出場(其實佢唔飲酒)。今次畀面我再飲咗一啖唔太冰凍啤酒。

好開心的一天。

歸程

借傷成毒

 呢張相係問准咗小石人先貼上公海的,始終呢啲係佢病情同私隱,得到佢首肯先做。

喺呢種黐黐黏黏煙雨淒迷嘅天氣,兩公婆都好似馬騮咁周身痕。😸😄

昨天佢去跌打醫館療腳患時,個醫師話皮膚敏感時係做唔到捽藥同敷藥的,更強調自己不會先搽一浸潤膚膏再敷藥(可能佢意思係有啲醫館會咁做,又收多一次診症錢卦)。解說有潤膚油劑之後再喺上面敷藥係冇用。又話條8字帶(固定帶)污糟要洗。

好快,老公就返嚟屋企陪我嘞。

尋日隻腳係滿是紅點嘅。

呢排大家都係病鬥病。

佢好嘢,咁嘅狀況佢都忍到唔搲痕。

今朝佢終於話好想抓。。。

咁由有經驗人仕即係小妹代勞。

因為呢個情況我喺90年試過,症狀差不多九成九相同。

當時我冇扭傷,只係發現右腳內側有一片約一吋嘅瘀色,唔痛的。跟住就發展到同佢現時一模一樣嘞。之後用拐杖撐扶返工,然後行唔到,腳痕咗幾個星期晚晚瞓唔著。睇嗰個西醫係我亞叔,佢係一個非常有名的大醫生。睇咗幾次,佢只擔心我咁樣請假法份工不保,亦坦言同我講,西醫只能開藥止痛、膏藥止痕同埋寫假紙,實質對病情係冇幫助嘅。病人嘅我更感受到啲藥既止唔到痛亦止唔到痕,而呢啲止痛藥嘅副作用係會令我胃痛。

對於一個求醫無門嘅人嗰種心情非常無助。

好彩,當時我做副院長有個下屬,佢係天德聖教嘅信眾,咁就點咗一條明路畀我,醫緣出現~曙光呀。

當時上環某唐樓一單位有位胡醫師。脾氣嘛,當然唔係人咁品。好少出聲,開口就係尖錐般鋒利。佢義診開方單刀直入,一間約百幾呎的住戶單位由好心人免費借出,該單位係經常坐滿20幾人輪候,即係大家都聽到各人嘅病情。而醫師太太(亞婆)就仍有摺火柴盒幫補生計。

胡醫師話我濕火下浸(可能食得牛肉同飲得汽水多),診症完畢佢會夾一張協德x藥材舖咭片畀我去執藥,可能當時我不自覺有些疑惑嘅表情,醫師話佢同呢間藥材舖係冇關係架,意指病人鍾意去邊度執藥都得架。

咁就近咪去。執咗嘅藥,我老豆過目後話係畀靚藥材。

都要睇咗好多次先漸趨好轉,眼見好多同醫師唔相合嘅人係會畀佢鬧嘅。之後上環冇咗,佢有一段時間喺粉嶺蓬瀛仙館義診,該館當時重為佢設立執藥藥房,執藥有冇收費我就唔記得嘞,去咗一兩次把平安脈之後醫師仙遊,人冇咗執藥部都冇嘞。

我可以清楚講畀小石人知,到皮膚患處收水表皮乾咗就慢慢會好。

搲痕嘅手勢,千祈唔好用指甲刮損皮膚,要用手指頭啲肉輕輕移動嚟捽,有時用吓鶴咀嚟啄。皮膚乾燥以潤膚膏嚟滋潤又可以按摩吓佢扭傷瘀傷嘅部位。成個過程第一,兩個都要坐得舒服,第二,要當佢隻腳係少林金剛腿呵住嚟治療。

我有難嘅時候佢常在我左右愛護幫忙,佢有需要嘅時候呢,就要細心照顧喇。

睦鄰

 出前一丁送的動漫咭,唔知有乜用,夾硬要嚟掃刮清理吓亞FA~留喺窗台的瓜子殼。而家佢唔係好鍾意去廳窗台--咭s冇用。

前兩日,兩口子食緊嘢時,聽到門外有啲鑽聲,老公去看過究竟,原來對面乜生喺度開鎖。初先小石人諗住自己唔識開鎖,幫唔到忙就唔好多事。過一陣佢開度門睇吓。乜生就問小石人有冇架生。

前言:呢位年紀有返咁上下的乜生重有揸夜更的士,多年前跟小石人同lift時,佢問小石人係咪三拾幾,小石人話唔止lu,四拾幾了。咁乜生就冇出聲了。

(估:乜生想招小石人做女婿卦,但知道同佢個女年紀相差太遠,就作罷。

Cool:好彩啫😁)

上年乜生有搵小石人幫忙檢查吓佢家中一樣重要東西,事關佢搵過商舖報價,據說啲商舖睇位收幾舊,問咗維修報價大約幾仟蚊。

小石人幫佢代為買材料兼維修,只需畀料錢實報實銷。

之後,乜太有日撳我哋家門鈴,送咗佢朋友種的耕菜同一啲新年炸物答謝。

場景回轉返小石人除咗攞架生畀乜生之外,又幫手拆鎖。個鎖拆到甩皮甩骨都開唔到度大門。

小石人回到家中,我問佢係咪珠鎖。係~就好辦了,整到的機會高好多。

到小石人第二次再回家時。我話不如搵咭涉門邊擦刮開鎖舌。心意雙通,老公今次就係搵呢樣嘢。

咪用得著囉~~⬆事後老公提咗兩次,我哋應該一人放一張呢啲咭喺銀包。

(以前我有個同事有幽閉恐懼症,又係被珠鎖反鎖喺公司厠所入面。尤幸當時度厠所門下方有百頁窗,我可以伸手指畀個同事見到我隻手令佢個心定好多。最後都係用呢招膠咭攪掂。)

第二日,又有人撳我哋屋企鐘仔。

佢去開門之前我同老公講:我估係乜太。

好彩嗰晚浸咗豆之後冇煲糖水啫。

覺得小石人好好心地。

有次我哋郊遊燒野食時,管理處來電話有個亞伯跌咗件衫落我哋當時住處窗外。返到去見到窗外有魚絲釣咗個鈎落嚟~亞伯真係好鍾意件多袋背心🐸,小石人為免亞伯成晚瞓唔著,即時到戶送返畀亞伯,從面容看係非常感激。

Outward bound

 做緊第一份工時,間機構有畀錢送員工去外展訓練。

食物方面,總之攞咗喺個碟上就要食晒,蠢蠢的我見到啲通菜洽到黑色重走去夾,史上最難食的一碟臭腥味嘅嘢。

有個外籍青年教我哋呢組人(中型卦)駕駛風帆,幾張jibs載10幾人嗰種。記得跟住會畀某啲學員當captain。嗰個男仔當船長時好得意的,佢會每次嗌人做嘢時自己走埋去人哋個崗位落手落腳做。

除此之外,在岸上有另一年紀大長鬍鬚的外籍人士教我哋急救。嗰個salty worm鬼佬。喂,人哋扮dummy佢竟然問個女學員示範人工呼吸時可唔可以真嘴。後來有一次同呢班學員再聚會時,聽講有啲女仔接到呢條友嘅騷擾電話約佢哋出去。

講返重頭戲荒島求生,要喺個島上執啲用品,諗方法10幾人由荒島去返主大樓岸上。另一組人成功。我哋就有人執咗個由竹綁成的大三角形,個諗法後10幾人游水推動個三角竹棚。係唔成功的。

一來件嘢阻水,二來組中有人唔識游水。有冇試過在海面上秒剎間風☁變色,成個天黑晒刮大風兼落雨遠處閃住雷(記得收衫呀)。。。好驚!

跟住啲員工似海豹部隊咁坐住吹氣艇嚟問我哋是否放棄是次任務。當每個人都同意後,佢哋話唔會直接送到我哋上岸,每人用手抓住快艇邊啲繩,運我哋離岸一定距離自己個別游上岸。

頭先咪提個有人唔識游水,古姐出場拖住佢一齊仰蛙腳撐埋岸。

小石人:"咁個男仔有冇追妳呀?"

我:"感激就會。我諗多數唔會追個一見到就諗起自己瘀嘢嘅人卦,況且我唔係靚。。😆"

牙~更新2

以下情節涉恐怖成份,怕就唔好繼續睇。

 3月頭,一天有人按門鐘,其實真係唔多鍾意人撳個門鈴。我嗰次冇應門呀。

事後就知道係郵差送掛號。負返冇開門的責任咪第二日去郵局取件順便出街行吓。

趁防疫措施解封,的起心肝去埋附近牙醫度掛號。嘩,要等成一個月有多,4月19日先有得睇。

洗牙$600。補牙$600~$800

診所有喺應診前一日再致電客人提醒佢哋時間。小石人著我順便問吓可否用消費券:係收現金的。

睇牙當日早上,我問老公畀啲我哋相識但未見面前,佢每朝msg畀我的日出相,新讀者知道嗎,佢晨曦時瞓醒望出窗外就影到彩雲變化同旭日初升。

唔知幾時開始,我睇牙時多數會諗返啲開心時刻,從容接受治療過程。有次個醫生問我落唔落麻醉藥補牙,佢咁問到咪答唔落(打少一兩針)過程去到大半時開始頂唔順,個醫生話嗰時要繼續冇得停,咪頂落去。事後個上半折面似王晶的牙醫讚我好抵得痛。(心聲:都唔知你點解會問我落唔落麻醉藥!)

鏡頭轉返去應診日:

事前做好線牙漱口。

診症當日,有個亞伯問最快可以幾時睇,聽到最快都要5月17日就話痛死都未有得睇。

因為之前佢問當日幾號時我有答過佢嘴,亞伯就對住我講你哋後生就冇遇到牙痛。

心諗:"亞伯你雖然並不年輕,但你有所不知了。我以前在整牙方面受過幾多驚恐,又用咗幾多心機同錢去護理啲牙呢。

我幾歲時由大哥帶我去嗰啲遷徙區無牌黃綠牙醫度,脫隻乳齒佢都落大量麻醉藥,打完嗰幾支針成棚牙同個口都硬晒,跟住佢好用力咁用個鉗扯我隻牙出嚟。

第二次老豆帶我再去,我嚇到攬實老爸唔上嗰張椅,條黃綠話我咋嬌,上次都唔驚格。

咁剝牙法會死人架。

之後脫爆牙補牙箍牙,做牙模整牙膠都試過。

用牙線牙縫刷護理。

先有而家咁嘅陣容。"

點解要痛到頂唔順先睇,係邊個嘅逃避同選擇。(呢句唔出得街喇)

上一代沒有護齒常識又沒有機緣遇到去接收該資訊。

我都係1990年,睇紫微斗數,嗰個業餘相士話,牙齒不齊,遍地桃花,提我去箍牙。

又遇到個好牙醫介紹我用牙縫刷。

各有因緣。

等咗十分鐘,洗牙用咗約十幾分鐘。牙石梗係多,好多年冇睇牙醫又唔係成日咁神心做護齒。若果唔係兩隻臼齒中間個牙窿越嚟越大要檢查吓係咪蛀牙,重有排拖。。。。

多謝淘兄好介紹,呢樣好嘢嚟的,呢個下午做咗以下沖牙器資料搜集:

更新1

更新2

更新1

Waterpik沖牙器的利弊

誰不貪

 記得有個小學同學曾經教我,用一"渣"散紙唔夠數地投入巴士錢箱內搭公車。

人蠢,就唔好走去呃人;正如小石人有道:人蠢,就唔好賭。

拾幾歲時,有次投一個五蚊入巴士錢箱沒有付足夠車資,記憶好似當時重係熱狗。坐上層,咦。。。架巴士停咗,原來個司機上咗嚟上層,同我講:"稱呼,妳入唔夠數。"

而家多謝返佢。一來佢唔怕麻煩告誡我,又為佢間公司監察乘客呃車資行為。

之後我當然唔會再犯。

而家啲人,好多到五十幾六十歲,個樣係唔似佢實際年齡的,如果有做健身護膚保養染埋頭髮,甚至有機會望落後生拾年。

所以憑肉眼幾難判別有冇借用人哋張綠悠咭混水摸魚。

尋日搭小巴見一對男女嘟兩蚊,個司機都有目測望吓佢哋夠唔夠秤。小巴上亦有張貼用這優惠需出示身份證明,哈,司機都應該係發覺太離譜先會去查證。

巴士:而家工作待遇同要求,可能比以前緊張同講求達標,或者會抱多一事不如少一事心態。

況且係政府補貼,冇影響公司利潤,使鬼同佢咁緊張咩。

地鐵同理,特登搵啲人手去抽查係有,但冇誘因特登為樂悠嚟對證件。呃車資就一定要請專人睇到實。

民選議員當然會為長者福利傾斜,隨著人口急速老化,呢瓣選票就更要落力爭取。

對於下年登六的我,都係抱著有當然好,第二日庫房開支太大時,就自然有人要做醜人削減資助。如果冇車資優惠,我就而家搵定錢,幾時都係靠自己最實在。反正我好少出街。有補助確係會有誘因多啲外出。唔出亦冇所謂。

"更新:記起多一樣嘢,小石人有兩個舊同事都已攞樂悠咭,仍返緊工,個樣都係唔似60的。我有位讀文憑時的舊同學都係有咭及重返緊兼職。很多香港人,有份工對佢哋好重要。。。,佢哋都交咗好多年稅。"

我唔使湊孫返學放學,又鍾意瞓到自然醒,自然一定千祈會避開繁忙時間,唔會同上班人士爭上車。請大家放心。☺

誠實~由自己開始做起。

大自然交響曲

 

昨晚雷電交加風雨大作,閃電從天而猛擊到地上,一氣貫通何其壯觀。可惜在室內是沒有可能拍到。為有捉兩隻領角鴞上場,風馬牛不相及,是本人作風呀~

紫白金光

銀龍狂舞

暴雨穿梭

狹蛙齊鳴

雨後,這裡又能從遠處聽到一種蛙叫。他熟悉的兩棲類聲音,慣常的稱呼是我無法筆錄的。。"因為真係唔識寫"。

連向神通廣大菊歌大神請教也得思考怎樣發問。

結果從聲音辨別出發:蛙類叫聲大全

縮窄了範圍,牠們可能是花狹口蛙或者是花細狹口蛙,在雨後鄉郊常聽到的聲音。"牛叫"

另外,原來不同蛙類在身體被揩擦甚或擠壓時,一些會像狗叫、貓叫等,真有趣。

記得有一次凌晨時份也是相若天氣環境,置身得如斯咫尺,猶如大自然交響樂拉闊表演,最佳享受當然是。。。

😊😍

無從稽考·繼續入貨

毛蟲不起眼

吃吃無間斷

一朝成作繭

蝶變顯繽紛

是日操作:

135 買入作價$5.37

659                 $9.34

1848     未能成交

趁今天冇咁痛就完成一些積存的家務。提醒自己不要因身體不適而乸口乸面對著丈夫。

記得初中早會時胃痛入了醫療室休息,當值老師表示奇怪地說:"為何你不舒服仍掛著笑臉?"

木訥的我不懂回應,因為我也不知道呀。

寫東西的其中一樣好處是,一些塵封了很久的記憶會像魔術師帽中的兔子般"o碰"(自創聲音字)出現。

Cooking manners

學烹調食物方面,我算係好好彩。

間教會中學有烹飪同縫紉課。

完成一樣餸/一頓晚餐的背後,夠竟係井井有條、從容優雅定亂晒大龍、負能量充斥,先係真正要研究實踐的功夫。

布:厨房內有:

(1)神聖的抹碗布

(2)抹煲具

(3)洗碗綿/布

(4)抹手布,非常重要,一個企理嘅伙頭對手經常乾淨乾爽。

(5)以前重有專用索生肉類/魚類水份的布,而家有厨紙代替。

初入門梗係揦手唔成勢,第二堂就要起鯪魚皮用淨肉嚟煲芥菜湯👻。

初中開始,因父做製衣生意,母要一齊去埋幫手,我雖然是家中最細,唔知點解我就要負責煮嘢俾祖父食。

祖父係商會秘書,不嬲都有佢第二任太太照顧週全,所以連煲水都唔識。佢太太死後,我哋舉家搬去同佢住。

單頭石油氣爐同火水爐,餐餐都要煲湯,當時實際攪咗啲乜我唔記得。印象中,祖父話我煮得好食。

咁我當然為咗解決"危機"係會睇嗰啲乜太節目。回想我認為佢覺得好食的原因係平時佢放工後7點就要食晚飯,我me more到8時許。。肚餓~乜嘢都覺得好食。

當一個人唔係好掌握到要處理的問題嘅解決方法時,重有人好似烏蠅咁在身邊團團轉,多數都會好忟憎。

有時用餐嘅人趕時間脾氣又差,咁又令我緊張同唔自在。

最好煮完嘢個厨房唔會太混亂,有時得有時未得。

兩個有知名度的女主持,我都有收看佢哋嘅節目,令我引以為戒的是,煮食的過程千祈唔好學佢哋對人咁惡。

最忌係將啲食物器皿掟嚟掟去"乓擰嘭冷"。

而家我多數會開住音樂煮嘢、禪煮、站樁煮,總之灌注愛心親手為小石人和自己預備食物。攰就唔煮。

次序步驟大致係:

乾手、需長時間先做,如煲定熱水、浸菜、處理要醃得較入味的食物。

煲緊嘢時候就調醬汁或醃嘢、兼顧到就洗咁啲用過的食具。

貴買平用喺永安買咗兩個唔同大細的煲,可以煎、煲嘢得嚟清洗方便。小心用避免刮花。

重中之重:完成後,笑容滿面地請丈夫出來用餐😊

結婚紀念日~同場加料是日晚餐

2017年既今日去咗濠江慶祝,

小石人放咗腳架喺度影,結果逢經過的路人都停下來影。

 高牆與炮台

 只窺探到別人/既得利益勢力想給你看的部份

 中西特色共冶

臉書的好處是提提昔日回顧。我唔睇返都忘記今日是特別的日子。午間通訊時話俾佢知,佢都係唔記得嘅😄。

是日操作:

我又儍儍的回補之前沽掉的。。

1997 $39.85重要加碼買多啲。

12 $34.85

其實重有其他好多都想入,選擇呢兩隻係因為近期交過手,比較有"感覺",劉青雲神探一片佢查案唔用理性思考,人們認為佢係黐線,實際佢係精神有問題但又推測到誰是兇手(超讚呢齣片,最尾嗰幕地上散碎玻璃倒影一個人內心的複雜多重型格是絕妙表達手法)。。到咗呢啲個個話重有排跌的情緒下,入巿係需要好大勇氣,重要貼出嚟公告天下。

邊個會知未來,唔入 到佢升返又失去機會,入巿買賣就係經常要遊走於矛與盾和心理變化之多重軌道。

加場後記:
今日狀態幾好,整到幾味。。

 出面買要$65,自己整$25好似多啲肉食,今次重手咗咸啲,點知佢話啱味。煮到一開殼放自己種的蘿簕。

 蝦餅四件,食食吓發覺都係要影吓,事關下年會唔記得今日發生過乜嘢。😁

臨尾啪海膽。睇完老王兄個同我講笑的留言,小石人越嚟越風趣,就話落到肚"冚嘭冷"fusion埋一齊❤

唔好意思,因為之前搵唔到個頓號所以成日都係隔一隔嚟表達,有時又冇標點。

記起白面包青天包龍星同方唐鏡交鋒嗰幕。

* * * * *

今日雖然皇宮開大食會,不過唔使"亞發"出🐎,開餐前佢揾唔到啲銀石線有啲忟忟哋。做人老婆要識做,等我洗埋啲碗。

呢個蛋糕超美味,食完頭先嗰餐休息一陣再開始。

+送尾啡Perfecto