好彩有出山唧,畀我發現嗰間食嚐有:
杏汁豬肺湯呀。。。
臨埋單時問佢哋有冇外賣-係冇嘅。
櫃位重話要訂位同預留。
擇日不如撞日,到四點打去訂位,個聽電話的女人竟然話walkin有位,唔使訂位。
我堅持今天幫襯茶巿時問過,佢話要訂位兼訂定個湯喎。
咁佢先幫我登記。
時間到,小石人就醒,臨出門口時問使唔使帶定吉食物盒。
哈哈哈
離譜
我哋話訂咗位入座時,個知客答其他問攞位的客人:"今晚冇訂位唔會有位架喇。"
我O嘴。
原來間咗半個大堂有人攪春茗。。。。
(其實個知客好大可能係聽電話嗰個,因為我哋一講佢就知我哋訂咗湯。)
我又睇錯嘢以為有單人份量,點知呢個湯只售六人份量。
伙記問我哋要唔要。
梗係要啦,就係為飲呢個湯先嚟食晚餐。
食完打包兩盒走得。
隔離枱兩位女士,叫到成枱上晒菜重等緊人未嚟。
今日特別深刻的體驗係,有啲人經常性對別人嘅邀請都係畀negative的答覆。
我要好有耐性同進一步鼓勵啲人先會答應。
朵玫瑰花係垂頭再重新企返起。。。
🌹
最近天氣冷,小石人有段時間行動唔多方便,咁喺房有暖氣有時睇住電視開餐,呢件嘢又有佢嘅用途了。
老公重喺淘佬訂啲轆返嚟安裝喺個几度,輕易移動,對冇一丁點力嘅人簡直造福無量。改裝完嘅几令我想起酸梅乾變超人俯伏喺滑板爬嘅畫面。
重有就係我隻鸚鵡,一見親我由主人房出嚟就嗌,如果我出廳就嗌得重犀利(知道廳嘅雪櫃同厨櫃內拉架聲一響就可能有嘢食),即是在廳進餐,佢狂嗌好耐影響用餐安寧。我留喺主人房佢會靜啲。
周不時都會睇吓有啲YouTube電影影評,覺得好多未睇嘅戲就算影評有劇透都唔緊要。
本來成日覺得王子公主從此快快樂樂生活嘅情節係冇乜人會理會,因為大部份戲都係死人塌樓殺人精妙計劃露肉槍戰科技競賽較煞食。點知近期嗰套講公厠清潔工人嘅冇劇情片卻大獲好評實在未睇都好意想不到。
舒琪作為資深電影工作者,在自己覺得唔熟悉的範疇時會請一些喺該方面較有獨到見解的嘉賓助陣,非常謙虛聆聽別人嘅意見,觀眾睇"只要有電影"YouTube時會接收到一啲不同知識同睇法真係好好。最近佢談蒼鷺與少年跟住話睇返千羽千尋呀龍貓呀表示唔明乜唔明物,啲嘢冇講點解。我第一個反應係卡通好多真係冇得解咕喎而且充滿想像幻想。個嘉賓就確係有研究,其中佢舉飄零燕海迪打韆鞦個例子,打到瑞士雪山咁高嘅背景咁個韆鞦喺邊度吊落嚟?又係喎。😄
另一條youtube片訪問好戲之人劉松仁,嘩,此君除咗演技精湛,佢叻在好多方面都思考計算到位。如何由演員被動位置轉為主動而有bargaining power。學習導演攝影機分鏡,原來早期佢跟嗰位友好導演嚴謹到3部機set定晒位(據估而家好多人係亂咁擺),會諗埋3機分鏡兩機分鏡,預萬一有一部跪低咗都掂。劉生喺拍嘢時亦唔介意由第一男主角轉做配角,聽呢個人講嘢都學到好多。記得之前提過佢喺大時代嘅演技了得,佢做陳近南出鏡唔多但畀人有極深刻印象。原來佢做陸小鳳時已顧及唔同男演員嘅細節,好厲害呀。
尋日睇咗一齣90年舊片,無線而家似乎步緊以前ATV後塵,翻做晒啲舊嘢,有次我發現有齣翻做舊片晚間一次第二日下午又播一次。
尋晚開電視時已做緊~小魔怪2。
一套全部都係膠嘢嘅片,然而我接近成齣戲都笑得好開心。老公冇興趣睇,聽住耳筒睇電腦只耐唔耐轉身睇齣戲兩鏡。佢有讚以當時年代,做到某啲特技效果已經好叻。
其實呢齣係一部恐怖片。
最好笑係佢有個魔怪造型,老公見到係覺得好嘔心,但我覺得隻嘢抱住個男人大腿fing極fing唔甩好好笑。
回望老公一見嗰隻嘢出場個表情,忍唔住影抵小石人個樣😄
唔怕睇吓昨晚食咗啲乜嘅讀者就拉下睇吓。
惡攪瑪莉蓮夢露-小石人一睇認得出,我狐疑:"係咪🐷小姐呀?
原來,豬小姐咪係惡攪夢露囉!(之前真係完全唔知。。。。)
註:豬小姐Miss Piggy係N年前芝麻街節目內一個布公仔角色,我諗有啲年輕讀者唔知佢係乜水。
喺呢種黐黐黏黏煙雨淒迷嘅天氣,兩公婆都好似馬騮咁周身痕。😸😄
昨天佢去跌打醫館療腳患時,個醫師話皮膚敏感時係做唔到捽藥同敷藥的,更強調自己不會先搽一浸潤膚膏再敷藥(可能佢意思係有啲醫館會咁做,又收多一次診症錢卦)。解說有潤膚油劑之後再喺上面敷藥係冇用。又話條8字帶(固定帶)污糟要洗。
好快,老公就返嚟屋企陪我嘞。
尋日隻腳係滿是紅點嘅。
呢排大家都係病鬥病。
佢好嘢,咁嘅狀況佢都忍到唔搲痕。
今朝佢終於話好想抓。。。
咁由有經驗人仕即係小妹代勞。
因為呢個情況我喺90年試過,症狀差不多九成九相同。
當時我冇扭傷,只係發現右腳內側有一片約一吋嘅瘀色,唔痛的。跟住就發展到同佢現時一模一樣嘞。之後用拐杖撐扶返工,然後行唔到,腳痕咗幾個星期晚晚瞓唔著。睇嗰個西醫係我亞叔,佢係一個非常有名的大醫生。睇咗幾次,佢只擔心我咁樣請假法份工不保,亦坦言同我講,西醫只能開藥止痛、膏藥止痕同埋寫假紙,實質對病情係冇幫助嘅。病人嘅我更感受到啲藥既止唔到痛亦止唔到痕,而呢啲止痛藥嘅副作用係會令我胃痛。
對於一個求醫無門嘅人嗰種心情非常無助。
好彩,當時我做副院長有個下屬,佢係天德聖教嘅信眾,咁就點咗一條明路畀我,醫緣出現~曙光呀。
當時上環某唐樓一單位有位胡醫師。脾氣嘛,當然唔係人咁品。好少出聲,開口就係尖錐般鋒利。佢義診開方單刀直入,一間約百幾呎的住戶單位由好心人免費借出,該單位係經常坐滿20幾人輪候,即係大家都聽到各人嘅病情。而醫師太太(亞婆)就仍有摺火柴盒幫補生計。
胡醫師話我濕火下浸(可能食得牛肉同飲得汽水多),診症完畢佢會夾一張協德x藥材舖咭片畀我去執藥,可能當時我不自覺有些疑惑嘅表情,醫師話佢同呢間藥材舖係冇關係架,意指病人鍾意去邊度執藥都得架。
咁就近咪去。執咗嘅藥,我老豆過目後話係畀靚藥材。
都要睇咗好多次先漸趨好轉,眼見好多同醫師唔相合嘅人係會畀佢鬧嘅。之後上環冇咗,佢有一段時間喺粉嶺蓬瀛仙館義診,該館當時重為佢設立執藥藥房,執藥有冇收費我就唔記得嘞,去咗一兩次把平安脈之後醫師仙遊,人冇咗執藥部都冇嘞。
我可以清楚講畀小石人知,到皮膚患處收水表皮乾咗就慢慢會好。
搲痕嘅手勢,千祈唔好用指甲刮損皮膚,要用手指頭啲肉輕輕移動嚟捽,有時用吓鶴咀嚟啄。皮膚乾燥以潤膚膏嚟滋潤又可以按摩吓佢扭傷瘀傷嘅部位。成個過程第一,兩個都要坐得舒服,第二,要當佢隻腳係少林金剛腿呵住嚟治療。
我有難嘅時候佢常在我左右愛護幫忙,佢有需要嘅時候呢,就要細心照顧喇。
佢回港後,一來呢排我成日病,天氣又耐唔耐非常嚴寒,跟住小石人工傷整親隻腳。卒之要到2月16日先約中學同學食嘢。
佢經常都提議啲我未去過嘅食嚐,今次呢間唔錯。
係間有午巿的bar。
佢事前問咗當日有冇set,佢話連set有杯含酒精飲品餐牌價$3x。
女侍應友善,重係bartender。
佢預早講咗畀我知,可能個餐份量比較多,會帶定食物盒打包。
傾咗一輪偈。帶一片雞薄餅畀小石人試吓(後記:老公話幾好食。)
餐後散步途經尖東,發現有間賣湯的專門店,有豬肺湯,咁又買兩盒返家,雖然唔係我想嗰隻🐷肺湯(杏汁呀),頂住檔先。
自身的想法
別人對我的考量
社會大眾的所謂成就定義,似乎對外向人較有利
錢財儲備 賺錢能力
學識
學歷
睇幾多書
解決問題能力
社交活躍
情緒穩定程度
耐性
自理甚或照顧別人的體貼
時間分配
學習及理解新事物速度
重覆性靭力
遇到突如其來事情時的應變
幽默風趣
笑容常掛
語調溫柔
了解自己有幾多
與親密人相處時是否營造到較平衡和接近對等的感覺,當自覺與不自覺間有著尊卑之分時,下方在得不到善待而不滿足,走?留得來唔開心?不語疏離?另覓新歡?有什麼後著因人而異,本身我哋每個人天生帶來的特質同成長過程所經歷的人和事,父母對待嘅方法唔同嘛。。。
本質多情定專一?唔知架,睇往績卦
二/八比~想起某個人時或某段關係如果有八成或以上都是開心快樂回憶和感覺,繼續下去的可能性相對高,幸福感也隨之而來
2月3日(結婚紀念日)
經過2月2日去咗3度診症,返到屋企翻熱雪櫃裡的食物一齊開餐。寫吓網誌。
紀念日當天瞓到自然醒。
第一餐果菜露。之後再煮完麵食咗午餐先去睇跌打。佢哋週日休息。
去到醫館門口,見到有個上咗年紀都幾健壯嘅白髮男人坐咗喺平時冇人會坐嘅小膠圓櫈上。每次去到會將輪椅搬上一級台階放喺圓櫈旁邊。
按職員安排,我扶咗小石人入咗醫館較闊落的方形空間,其中一間特別護理診症室旁。多數患者係喺方形空間療手或腳傷。
(後記:小石人猜測可能因為職員安排我哋坐喺診症室旁,白髮男以為會畀我哋睇先。)
我向個白髮男講咗一句有禮貌嘅廢話。
問該男人:"請問我放張輪椅喺呢度(佢隔離)會唔會阻到佢?"
其實成間醫館入口附近狹窄,如果要擺輪椅就只有嗰個位。
個男人話唔阻。
(我出門口搬緊部輪椅)
當時負責登記崗位的女士出嚟做調協,請個男人坐入醫館呈方形的空間位置。咁就trigger咗呢個男人表達佢心中的不滿。
原來佢同其他好似有兩三個成棚人坐在醫館梳化,陪一個估計大概十二至十三歲嘅女仔等緊診治。立時有兩個女(同來者)反而企喺擺輪椅個位(唔明點解佢哋會突然由梳化起身企去嗰度。)
白髮男向職員抱怨,佢哋第一次嚟,唔知醫館啲人點安排,入吓一個入吓一個,係咪睇熟人先。點解一路有人遲嚟先有得睇。
個女職員一方面請個男人坐入去,跟住解釋啲人一早登記咗,到差唔多時間先返到醫館接受診治。你哋畀佢擺低咗部輪椅先啦。我哋冇乜嘢熟唔熟人。(聲線肯定而溫柔,要學)
個男人又話:"我唔會坐入去,我出去。"
招牌師父聽見有擾攘聲,走出嚟問:"邊個頭先坐輪椅嚟嘅。"
小石人答咗師父,(佢話師父當時對佢笑笑口)。
跟住師父替個女仔(白髮男一齊嚟嗰個)在診症房治理時,個女仔覺痛嗌得好大聲。完成診治後師父出到嚟又講笑同個女仔講:"妳嚇親我其他病人。"
跟住到小石人同我入咗師父房等佢。
原來入面有好多格cctv mon住唔同位置。
師父處理完某啲嘢入嚟,幫小石人睇緊隻腳期間,就問佢係咪好夜瞓,面青青。聽到佢重早瞓過師父。咁再問佢腰骨有冇見唔舒服,有時腰骨有事會影響到。小石人支吾之際,佢老婆我就搶韁,覆述他有同我講跌落嚟時有嘢ang2到條腰,同埋呢兩日用手杖手腕有啲唔舒服。
師父就對小石人講:"佢又唔係護士長又唔識醫,一陣幫你睇埋條腰。"
檢查後發現佢條腰有啲歪咗,跟住幫佢腰同雙手腕治療。啪啪啪。
我覺~小石人畀佢整完腰後好似面色好咗冇咁青。又靚仔咗。
小石人就話鬆咗好多。
今次睇完跌打要推佢去銀行兼去兩度地方買晚餐。
一間電話落單隨後去攞。另一間粥舖親身去。
小石人平時都係處理晒呢啲。
好嘞,安頓咗佢喺第一間附近等我。我去到粥舖落咗單就等,突然醒起唔係喎,而家返去第一間攞完嘢,推住佢去粥舖再攞咪順路返屋企。
當我話轉頭嚟攞時,個淥粥的紋身女話:"就得咕lu喎。"
我應咗再重複返轉頭先攞。
最終推住老公喺粥舖門口經過攞食物時,個淥粥嘅女人雖然喺佢個位睇唔到我哋,但落單男就講比佢知我哋嘅情況。
當日推佢途中時,有同佢講,由🐎路到行人路上一級台階我係應付得到的。因為老公驚我辛苦想幫我,喺度屹吓屹吓,我更心急就未推到位已經意圖踩起張輪椅所以成日上到咁呢hea。
講咗之後佢明白咗就畀我慢慢整。
近兩日感覺推佢時"佢重咗",實情係經過連番數日的事情,好攰,越嚟越唔夠力。。。
週四2月1日
事關日前小石人跌傷左腳往急症室,醫生有寫咗張可往物理治療部預約的紙畀佢。事發後我忙於借輪椅,陪老公睇跌打等,到是日先打電話去物理治療部查詢。
接電話的告知我可下載HA go處理預約事宜。一攪親呢啲登記,耳邊就會有一啲不耐煩的聲音。時代轉變,就係要適應。
呢個app簡易,用佢電話順利登記好後,預約物理治療只需將右上角條碼素描,醫院方面就會跟進處理。普通門診,個app碌出嚟嘅資料,除離島外,其他診所都係全天候滿額。咁我又試吓不停打電話錄音預約,上網摷吓有冇乜嘢秘訣。
週五2月2日
第二日午間物理治療部就有人回電問當日兩點可否應診,又教小石人先到自助繳費機交咗錢先。
好彩嗰朝早上未去睇跌打。咁就要諗吓交通工具安排。記得之前同奶奶覆診預約可載坐輪椅人士的士,咁又上網搵吓。
今次呢間唔使寫嚟寫去,打電話去預約都得,佢話要24小時前預約,我話咗個情況畀佢知,即時約又得喎。睇錶再加佰二蚊,畀啦。司機比較有耐性,省咗唔使上落輪椅入普通的士車箱內(佢隻腳情況咁樣處理較安全),亦唔使抽輪椅上車尾箱。
預鬆啲時間以防突發事情。果然,去到自助繳費機試咗好多次都唔得。唔好X住。我即時行入物理治療部話畀接待人員知,佢整咗一輪就叫我去醫院繳費處畀錢。本來小石人叫我自己去留佢喺診症樓層。咪嘞,一來我未必記得留咗佢喺邊😄,最主要係佢都要知吓程序,醫院啲地平且滑,幾好推(輪椅)。有時多人,話唔定有輪椅優先呢(物理治療部有,普通繳費處冇)。
順利完成,去返物理治療部等。原來佢唔係有給老公物理治療,而係配拐杖(如圖),度好高度去復康店買,售後冇得退貨。有問吓啲物理治療師知唔知預約門診邊啲時間較易預約到,有人話每小時開始都可試吓。
叫返嗰個台的士,好快就到醫院門口。老公醒,我哋直接去跌打醫館,喺將近下午三點打一次門診電話,過咗三點打咗兩次就有當晚八點的期,老公問我有冇第二日的期😁。最終決定要啦,咁難先有期,尾隨兩日是週六、日咪重難。完成跌打治療後,買咗啲嘢返屋企食完,我好快瞓著咗,佢又瞓。回魂覺一醒來,又係預備出發。
因為已有拐杖同埋做咗幾日跌打治療腳落地冇咁痛,咁就搵吓普通電召的士。一度就話最低消費七十。老公話去的士站搭普通的士。又係好耐都等唔到。多數喺附近接客走唔埋的士站。
好耐之後有架停咗埋嚟。我問佢去唔去嗰間門診。佢個樣好唔滿意。悔氣地答我冇得唔去。我諗我講呢句說話觸動到佢嘅神經。
(事源意外事發當晚離開急症室推住輪椅去的士站時,老公叫我問第一架的士去唔去我哋住處,嗰架係紅的,的士司機話自己要食飯,唔載我哋。我問第二架個的士司機好友善又幫我搬架輪椅上落車尾箱。)
我問呢句時冇諗拒唔拒載事宜,唔願意載我係唔會勉強。
講返,上咗悔氣司機的士後,司機又話妳咁樣問唔會有人載妳嘅。
(又唔載唔得,轉頭又話唔會有人載。。。。)
跟住小石人同我傾偈,又唔知踩親佢邊度,對我非常敵視。到目的地後佢冇幫我落架輪椅。
(後記:若唔係大鐘已迫近診症登記時間,我會同佢講,唔好勉強。我哋再等)
九點半後完成睇門診,我致電另一間電召,收到order冇覆,再打一次又係應咗唔覆。
推老公的輪椅到一個較多的士的街口,去到又係冇的士。等咗一輪又大風又凍,打電話畀最低消費七十嗰度。打完呢個電話轉頭就有好多吉的士出現😄😄😄😄😄。
電召的士到來,呢位司機友善。在車箱內同老公傾談時,我講咗一句,最緊要係樂意去做。司機有幫我一同搬輪椅上落車尾箱。
呢幾日出入屋企大堂時,有啲保安員等我自己推玻璃門。有一次,一個保安員開咗一邊玻璃門,我試圖推過狹窄門位,過唔到,嗰個保安只是企喺開住門嗰面的原地。老公想一路由佢坐喺輪椅推開另一扇關著的玻璃門一路由我推輪椅過。
(有啲滾滾地的我)
說:唔差在喇。
(立時逕自行去推開並固定另一度未開的門)
當次老公睇完跌打,我發覺自己心不在焉。呢啲情況唔好再推住老公在街上了,甚或買食物等。立即要回家。途中佢話去管理處投訴。
我:唔使喇,有啲人講都冇用,投訴只增加怨恨的心。
返到屋企樓下,今次呢位男保安勤快地替我哋開門,有問我哋開一度門夠唔夠過。我哋兩公婆傾開當朝停食水事宜,佢又即刻答我哋食水已恢復供應。
咁多個保安大部份都好幫忙。
呢個位置有好多快樂回憶。
茶色玻璃層架本來上層放電視,下層放錄影機,一件側玻璃已碎(係我以前舊居搬走咗的人遺下來物品)。呢度裝修後,我哋按合適的呎吋高度整過兩件新玻璃而成。本來下層放焗爐,因為老公現在家中以輪椅代步,佢仍會沖啡大家一齊飲,事發第二日我太忙,第三日我執過晒啲位~大project😄,等佢唔使重覆舉高雙手咁傷。
觀察到佢一手持茶壺一手攞咖啡杯喺身前沖,辛苦得嚟又危險~咁我搬定張啱高度的櫈畀佢放啲嘢喺上面沖。攞奶要開雪櫃起身~我擴闊嗰個範圍,將支奶放低啲,就可以唔使企起,一手呔開雪櫃兼攞到想要嘅嘢。(自己坐喺輪椅上試過行得通。)
個身經百戰嘅焗爐仔~好好用架,出爐好多美食,翻熱嘢,小巧方便。前嗰排發現,點解佢變得唔識自動計時熄火?原來個計時掣壞咗,老公~almost fix everything。佢喺淘佬訂咗個似夾萬扭掣的計時掣~超可愛,見到就開心。
上面層架係最近整的,用餘下木紋地磚~我哋重將面作底用,視覺低炒看到木紋圖案,好好呢。
吹頭剃鬚就亞FA同我(免嘈到我哋),喺門口附近處理,我將啲用品放在他適合高度。
沖涼梘液同洗頭水都放喺佢坐喺度沖涼垂手攞到嘅高度。
毛巾替換衣物就放在有碌架上等佢容易啲攞到。
事發後第二次去跌打醫館,個幫小石人治療的醫師(招牌名師父的高徒)。同佢師父傾談間講吓小石人發生意外過程。個招牌師父重教我哋要返醫院繼續覆診以防要休息長時間及攞工傷事宜要點。因為睇跌打唔需要睇好多次,患處發唔到力要休養就要由醫院繼續發假紙。工傷期間千祈唔好秘撈,被查到會坐監同埋再整親冇得claim。
我:佢放假一定唔會去秘撈,整親第一日已話傷咗隻腳,病假期間冇得去影嘢。
(冇喺嗰度講,上兩次都係整親手指。放假期間係周圍去做"物理治療"~用手指撳個相機掣😄😄😄)
學到的做法係,在急症室簽發的病假完結前,致電門診掛號再攞病假休息。
隻傷腳要養住唔好夾硬行。
治療到差唔多好嘅時間我打電話去叫定外賣,嗰間食嚐超多人輪候的,平時喺佢營業前致電落單,搶手食品賣完即止。營業時唔使旨意佢哋聽外賣來電,好忙好忙。
咁我行過去落單,15至20分鐘後有得攞。
再返跌打醫館接小石人,個高徒醫師對我哋真係好(可能敬老),幫我由治療座位將小石人推到門前(因為佢哋舖頭高嗰一級我冇能力由高而下安全處理)
推老公過多車窄🐎路時,有好心司機見我哋好耐過唔到會停低畀我哋過,我會大聲向司機講唔該佢。個個唔肯停真係要等好耐都過唔到。我要留意唔好喺轉角位同有車遮擋的位置由行人路落馬路,分分鐘人哋揸車轉過嚟睇唔到我哋就窩河。
推佢時留意走石屎地平路首選。嗰啲百歲磚就最凹凸,避無可避,坐喺輪椅嗰個會非常顛簸。我以前喺呢啲磚上扭親過好多次。
在街上泊輪椅埋一邊等我買嘢回來接佢,我會將架輪椅泊到老公可以左右睇通背靠花槽。
通道窄時要提佢收埋對手,我眼觀前面唔好畀障礙物撞親佢對腳。
落斜坡要微拖手剎掣,必要時自己背住落斜確保坐喺度嘅人安全唔會仆前。
窄角度唔識偷位,同一時間好嘢要兼顧,唔識揸車嘅人會對坐喺度嘅人駁嘴。
佢自己處理到的事情就由佢辦。
(不同志願非牟利機構的)長者地區中心,有需要時可查返就近區域再致電查詢。
因為要搭一程車先去到,需要諗吓自己抽唔抽得起部輪椅,仍然等唔到的士,搭巴士去借輪椅時問定公車司機,乘客可唔可以攜輪椅上車。
佢反問我點解要攞輪椅上車。三句答咗佢原委。
佢話只可以有一部輪椅在車上,如有坐輪椅乘客就不可以。
問定~萬一等唔到的士就攜上巴士,搞掂。
先打電問咗詳情留咗自己姓名電話號碼,上到嗰間志願機構,企喺詢問櫃位一陣,面前兩個職員完全發覺唔到我存在,佢哋做緊嘢。附近一位婆婆義工就上前問我有乜貴幹。
職員埋緊數,佢哋叫我坐埋一邊等等。
租借手續期間我順便問吓佢有冇綠悠咭申請表,佢話做完輪椅事宜再畀我。(慳返唔使特登去民政處攞表。)
做完手續係唔記得的,又再問。佢有:唷,唔記得添嘅表情。
原來就係那位友善主動的婆婆義工處理的,佢小心翼翼覆查表格內最緊要有信封寄回給相關機構。又送兩個該機構的手抓球給我,我話唔使,留返畀第二啲人用,又問.咁就收咗好啦。免得推嚟推去失手勢。
有職員示範點用張輪椅。
Msg老公話畀佢知借到,咁佢話即刻換衫,待我回家立刻去睇跌打。
我答:不如食咗午餐先去睇醫師。人哋一點至兩點半午膳時間。都成十二點幾。食完嘢人哋可以他他條條咁睇你隻腳。
打開吉輪椅嚟推係平衡穩定啲嘅。條🐎路左右都睇唔到過去的安全島,的士就喺對面。
好彩~個的士司機幫我一齊托張輪椅上車尾箱,得咗。
回家整嘢一齊食。紫菜蝦乾白乾菌配餃子。
用餐完畢各自飲杯手沖啡。
推佢到跌打醫館門口。放咗輪椅入醫館內。一入去醫師已問點班到輪椅。
入面有個(口靚)仔大概八歲卦,傷患同老公一模一樣,左腳眼腫。佢係跳落嚟;老公係跌落嚟。
醫師問小石人幾高跌落嚟,聽到回應後佢好奇怪,成八、九呎跌落嚟,啲骨都冇斷冇裂?
我對老公講:九命😸
捽咗頃刻,佢要入房特別護理。個醫師話畀我哋知:之前有個病人在急症室照完x光,個病人都睇到腳背斷咗骨,個急症室醫生話冇。
跟住醫師同病人做咗三次跌打治療,該病者都重係見痛,後來叫佢再去私家照多次,真係入面有骨斷咗。
所以個醫師一路都好疑惑有冇記錯高度。
小石人:可能因為當時條梯係刮住牆傾倒。臨到地時佢用左腳踭銼落地。(唔知咁多,畀著我冇記得咁細緻。。。)
跟住醫師有問要唔要紥帶?
佢已示範一次,我問可唔可以影低。其實佢係望實我教我點整的。
畀完錢,小石人話我哋部輪椅呢?
我:係喎,我哋部輪椅呢?
櫃位有個女人就答:"冷靜啲,拎咗出門口出面。"
我成世人從來冇人叫我冷靜啲。。。所以我好介意佢咁講我,loop咗呢段幾次。
查實攞咗人部輪椅出外,係咪要話聲畀我哋知呢!
後記:老公當時心裡反應係,咁我點走。
我就係諗,咁我點賠畀間中心。我孭唔起佢走咕喎。。。
酸辣蝦蟹牛肉唔食得。
葯敷6小時,拆走敷料後等個幾鐘先去沖涼。
送支藥酒在患處捽吓(醫師望實我),之後再綁紮帶。
老公問今晚食乜,順便買埋。
吓,係都送咗佢返屋企我先再落嚟啦,我點推佢四圍去買食物。
每次推住佢坐上的輪椅停低等緊過馬路時,我就哼凶兆配樂。
😄
問佢食唔食炸雞。
好啦,返到屋企,一有輪椅經過FA~房通道佢就飛甩鸚毛,好驚驚。
老公又讚咗幾次設計得間屋的設施好好。
我沾沾自喜:寬敞到輪椅都自如遊走,燈掣高度又啱。厠間啲門趟開晒輪椅都入到。
我話好彩老公身型好,再重啲我推唔郁。
小石人問我,推輪椅時佢重定我亞媽重?
我:唔知,之前我借咗輪椅畀我媽去睇中醫,佢暈住都唔肯坐,喺街度同我互相糾纏。街度啲人就覺得我對佢好惡。去藥材舖買完嘢係都要攞,好似上演強盜搶嘢咁都唔畀我拎啲嘢。要喝先肯畀我。佢相熟的藥材舖店員又會點睇。
所以延續前篇網誌"意外"文中說,唔知人哋咁多內情前塵情仇,我學習不批評,佈以寬容的表情對待人家的互動。
15:43-佢msg我話唔好叫嘢住。
16:16-又問 我食咗嘢未。
17:15-話畀我知由梯跌咗落嚟整親隻腳,在醫院急症室。(後記:佢其中一個老闆用私家車送佢入急症,又叫佢搭的士回家時攞單claim公司數。)
出門口去搵佢前,熄FA~暖爐(天氣在20度以下長開,而家出咗去唔知幾時返嚟,涼啲好過有家居意外)同關埋房中暖氣。
問佢肚唔肚餓,當日下午佢同兩個老闆外出午膳,平時午間自帶的蕉蛋提子重喺背囊冇食。
本來想搭的士去急症室,等唔到,轉公共交通工具再轉近程的士。
期間佢msg話敷咗冰患處重痛,隨後照咗X光,話冇斷骨。
18:46-我到咗醫院。
見到佢坐喺輪椅等,據講話等人同佢包紮之後就可以走。
有個亞婆同佢同期早過小石人入急症的,成個鼻樑紅晒,一個估計約6x歲的疑似佢個女就不停吟個亞婆,又叫個亞婆唔好出聲。(後記:結果等到晚9點幾先有人幫佢貼塊膠布。)
我同老公講,真係唔知人咁多嘢,唔好畀個奇怪的表情看待表面的事情。又唔知會唔會係亞婆講極都唔聽,總之唔好以某種責怪的目光去看待別人。
另一個亞婆就大嗌姑娘問當時的位置,咁小石人有講,我就行埋去大聲啲清楚啲講畀該婆知佢身在何處,好讓佢可以通知親屬買嘢畀佢食-收到重要回去上班的親友買給她的食物之後,亞婆竟然問姑娘有冇枱畀佢食嘢,(我O咀。)
19:53-去搵嘢食,結果買咗件好好味的紅酒牛肉批同杯咖啡兩份食。
個售啡職員問我有冇職員咭~冇,跟住佢問我有冇長者咭😄~未有。好彩早啲去唧,人哋晚9點收工。
喺醫護員工工作範圍睇睇,成幾拾人等住收入院或治療,兩個似係醫生的在電腦前好忙,兩個似護士的又係好忙,一個似護士的就在病人們中出現逐個處理。唔問喇,都係耐心地等,因為有啲坐緊輪椅的人個冧把重前過小石入,又有好多在床上似等收症入院。
等待期間,我出去認吓路,等陣可以直推輪椅到的士站,我係路痴,要前前後後望清楚,同時睇吓邊度有助行工具借用,因為佢左腳一掂地就好痛。
原來係個腳套,亦冇助行工具借用。
推佢去到的士站,第一架的士唔肯載我哋。
搭第二架的士回到家樓下,叫司機多打20蚊的單。(因為佢有耐性等我哋慢慢上落車,應得的。)
一入家門,第一件事,推咗張有轆的椅畀老公代步,開返暖爐畀FA~,餵FA~。
佢安裝於企缸的摺椅,多數在我斷食體力虛弱時沖涼用,今次佢用得著。
煮嘢畀佢食。
搵到呢支嘢清潔乾淨畀佢支撐行動。
很感謝各位, 剛開了另一新網誌就有好友們來訪。 那片樂土是用來紀錄學佛之路;給有興趣多研習的同修;獻對這去煩惱得自在法門多了解的同好。 更考慮到大家連結Coolhim這處原本可能是與財務自由有關。網友們有自己向善的不同信仰,閱文心生歡喜心至為重要,所以我另闢新天...
