專注與放鬆

這幾天悟到的是專注與放鬆同時運用，經常提醒自已進入這個狀態。

漸進

日日改少少壞習慣；時時加多多好心態！~^^~

想做怎樣的人

究竟是什麽人或想做怎樣的人。

虛假與有禮

率性的人爽直想到什麽就說什麽，可以說成是真，

粗言穢語

情緒失控

那又可以定性為真。如果所在圈子裡接受這行為，大家是可以相安無事，愉快地互相問好﹗
為何一群人會接受到這樣的交往，跟人的本質、背景、耳濡目染有關，
後兩者很多時也不到自身控制，在未懂事前身處的地方，成長後為了適應群體得到認同，很多時就要這樣，久而久之就如家常便飯般沒有兩樣，別人不認同是大驚小怪、不合時宜、虛偽。

以這用語對父母表示友好，而子女也理應可以這樣做，對你問安﹗

笑笑從眾的路永遠比選懌自己要做何許人的路容易很多。

改變的勇氣

要過怎樣的生活，都在乎一個人如何選擇。。

與其不斷埋怨工作不如理想，藏頭露尾地投訴上司的不是，倒不如增值自己找另一份合適的工作，拿出轉變的勇氣來﹗看得更透徹的會發覺到處楊門一樣花，到甚麽 地方若個人心態沒有轉，結果也不滿收埸，能夠越過心理關口，才會在漫長的工作生涯上安穩而立。最為上算的就是坐言起行，建立自動現金流，為將來作出週全計 劃，工作立時可以處於無重狀態。

無論那些跪地被掌摑的片段孰真孰假都不想再看了，也請各位在轉載前想一想，是否值得再助長這風氣。這個不尊重別人的行為大家都不會認同，但拍攝被人掌摑的 目的又是什麽呢？上載為求點擊；公告天下另一半如何對待自身希望得到別人同情，張顯其不是？上載這些畫面對心智未成熟的人可能做成壞影響。拿出勇氣站起 來，告訴另一半：『不』，如果在依靠她/他，自己去別處爭取需要的。每個人在世都是珍貴的，生命由自己主宰﹗



 

彩繪心靈

曾提到舊同學P之畫社，她也實在大方，答應敎我們畫畫。

昨天A相約我週三到畫社，可是我抱恙不想作傳播元兇害苦了她們，下次再有機會吧﹗

言談間A表示只想學書法，不想學畫因以前曾學過覺得沒天份，怕自己做得不好﹗

跟她笑說，這可是千載難逢的機會啊。。遊戲人間玩玩又何妨，最緊要是那過程愉悅就好了﹗

轉轉話題，又跟大家分享一下最近發覺自己在解讀曼陀羅方面是頗有天份的，就是看一個人的色彩畫作了解作畫者的內心世界。當時人看不到的。。轉個角度又是另一番景象，相當有趣的玩意，而且用具簡單，一張紙一些顏色筆，每個人都可以繪出心裡的曼陀羅﹗

絮

天兔的情況跟投資股票有些相似吧。。大家預期的並沒有在香港發生，市場永遠是對的，那。。怨甚麽﹗還是及早看勢，收拾心情再戰江湖為上算。

上次告訴大家買了支電訊股，原來屋企人聽了我提及，神神秘秘地在電腦前操作了一輪後，笑說：『抄古大師功課﹗』

並非獨食，買賣屬個人事，古謙經常抱著不想影響別人的心態。尤幸該支股票似是見底回升，現在有5%的上升，再看﹗

~ ~ ~ ~ ~

今天跟摯友閒聊，很認同有些人經常像思想很豁達、心胸很廣似的，但內裡可能是兩碼子事﹗是不太認識自我地一廂情願；他們心裡很想自己是這樣﹗

我相信其中一樣很重要的是當別人提出建議時一定要用心聆聽，反駁是最差的表現。要算一些東西未能得到共識，對肯真心說出想法的人該懷著感謝的心。

~ ~ ~ ~ ~

如果別人在某些地方真幫到自己，最理想的答謝就是告訴她。我想願意無條件幫助別人的善心者不是要人感謝，而是想知道你已比以前活得好﹗

緣滿在秋

尋日竹戰回家真係攰到氹一聲，隻眼唔盲經已好好嘞。。。哈哈哈﹗

今次我好滿意自己的表現，成日笑笑口咁，有啲唔想聽嘅嘢就選擇性失聰唔俾啲煩音入耳，呢招掂檔﹗

食咗舖滑板十三么都算係有交代，四連勝﹗ ^ ^

呢幾日雖然睡眠質素麻麻地，但係就過得好有意義。又幫到一個心靈受困的人。

人與人之間的微妙之處好似一個環，以前人哋喺我有困難的時候幫過我，而家我又去幫吓其他人，生生不息將善念延續。。。實在蘊藏千般美﹗

言語間溝通，傳得多咗幾重加入不同人的個人感觀，好多時就有誤會，當有人勇敢地嘗試去傾清楚，咁一班人從唔湊唔睬又變番冇樹冇幹，係最近家中的寫照。在此向幾位屋企人加以讚賞，做得好，係我學習的榜樣﹗

無比‧笑看人生

前一陣子看到有網友表示不用腦時就是寫網誌，頓時令古謙打從心裡哈哈大笑出來，無他，事關寫網誌就是我用腦的玩意。正所謂人比人比死人，不用的寫得很好，用腦的(我)出品卻是平平無奇，甚至有沒有閱讀價值也成疑問﹗

人們往往墮入的陷阱就是比較，續下來是不同程度的羨慕與妒忌。感情上，為何付出了關懷心思，明明說愛我愛得天崩地裂連性命也肯無條件付上，但最後卻不願放棄別的跟我在一起﹗跟優越的人比容易失落；跟平庸的人比又流於自大，若平凡人所擁有的更多更好，那可是一大堆為甚麽。

如果有看筆者以往文章，不難發覺經常都圍繞著變，改變心態，改變思維，變在於自己，比同樣也是跟自己比﹗事情比以前做得更好，解決問題能力比以前更高，對人比以前更懂得體諒。。。活得比以前更加開心自在﹗

以上框架為大前提，人生旅程另外一樣要學習的課題，就是適應、接受，智力和體能走下坡是遲早發生的，常聽見中年危機，很多時就是未能適應，視聽覺漸漸模糊、手腳較以前緩慢、性能力不如前、工作收入停滯不前甚至有所倒退。

四季有時，人生有序。事前有了心理準備，到那些時候到來時，欣然面對秋末冬至的日子，有所籌謀的還可以手中一杯熱檸蜜，開懷地在窗前笑看屋外營營役役的人們辛勤一天。

想‧賞

這幾天著實很忙，忙甚麽？

替密友設置網誌加上技術支援。在朋友最需要你時出現，二話不說，擁相關知識協助解決迫切的狀況 ~ ~ 這樣才真的有意義。

上天好像聽到我這孩子的心聲，上幾回在好lonely的blog文中提及的失散網友居然又再度重回我生命當中，勤於在她的面書帖來回穿梭，這個有趣的人兒往往令人會心微笑，然後暗暗在心裡開懷地嚷句：『黐線，咁都得﹗』久違了的歡顏﹗

最深刻第一次可數算昨晚赴之管樂團音樂會，也想像不到對這方面一竅不通的我會這般投入欣賞。置身其中有點像Shelock holm在留意台上和周遭的動態變化。如我能鳥瞰整個台上每位樂手，細聽他們的奏鳴多好﹗

原來台上的佈局每次如一，為的是呈現出更美妙的音效﹗

我最喜歡敲擊樂，瞧那小伙子忙碌得似工蜂身影閃電飛快地來回多件神器當中，渾然忘我，數著拍子又偶爾舞動身軀。融入其中之餘我又要忙著一察覺鄰座開始發出打鼾聲時輕拍提示，情境猶如曲目Wild Nights般瘋狂﹗

blogspot基本網誌版面常用設定

重申只是將這幾天設置網誌探索成果分享。

若用家在範本選擇『動態檢視』，呈現出來的是很多花款變化的版面。sidebar /classic /flipcard/ magazine等同版可供選擇，有趣。昨晚試了一整個晚上，發覺該視圖不理想情況有:

1) 無導覽列可供設置使用，導致欠缺撰寫新文章、設計、登出等選項。
    https://support.google.com/blogger/answer/42269?hl=zh-Hans

2) 小工具之網誌封存只有年份和網誌數目。

3) 若複製網址再貼上搜尋，看到的是黑白版面，小工具只有訂閱可供使用，也不能到別的版面。

基本網誌版面常用設定

1) 前往文章清單 > 範本 (選擇喜愛主題) >  顯示圖片下方 >  自訂 

2) 範本設計工具(頂部)  > 版面配置 1 > 選擇版面類別  > 套用至網誌(右上方) > 返回blogger

    但這版面配置之欄位佈局並不適用於前述『動態檢視』範本主題。

    其他如背景/調整寛度 (網誌欄) /進階 (字樣、底色等設置) 可在此處調整。

3) 版面配置2 > 按喜好編輯版面

    自選相片

    網站小圖示 > 編輯 > 瀏覽 > 選擇 > 儲存

   關於我自己

   新增小工具 > 簡介(第25項) + > 編輯

   網誌清單

1) 於喜愛範圍按新增小工具  > 網誌清單( 17項)  +  > 複製想列在清單的網誌url  > 編輯  > 加入

    清單(左下方)  > 貼上 > 儲存


   標籤

1) 於喜愛範圍按新增小工具  >  標籤(22項) + > 按喜好設定  > 儲存

    撰寫新文章時右上方文章設定下按標籤 > 加入索引名稱  > 完成

註1：小工具方塊可隨意拖曳到指定版面配置2欄內

如有錯漏，敬請多多包容、指正。再嘗試找出答案。

用blogspot - 留言設定

我不熟識網絡技術，只想將我這幾天摸索到的blogspot設定跟大家分享。

留言設定

1) 在網誌上有留言方格:

    前往文章清單  >  設定(左方列最底)  > 文章和留言  > 留言位罝  > 嵌入

2) 方便來訪者留言而不設字詞驗證可在同頁  >文章和留言  >  顯示字詞驗證 > 否

3) 到網友處留言要在自己電郵收取到回覆通知(更新)：

    前往文章清單 > 設定 > 文章和留言 >  顯示反連結  >  顯示

   探訪網友網頁時，其網誌留言框之右下角會顯示『通知我』，在方格內剔。

註:以上跟我上次到某網友處留言發現的剔欄情況有出入，在試驗中，請各位留意。

https://support.google.com/blogger/search?hl=zh-Hans&query=%E8%A8%82%E9%96%B1%E7%95%99%E8%A8%80

4) 在網誌上配置最新留言

    前往文章清單 > 版面設置 > 增設小工具(於想放置的範圍) > 資料提供(第20項) >

    資料提供方格內貼上url > http://YOURBLOG.blogspot.com/feeds/comments/default

    > YOURBLOG改為閣下網址資料 > 繼續 > 按喜好設定後 > 儲存

如有錯漏請多多包涵，希望可幫大家慳一些時間忙別的事情。

   

中秋餅共嚐

點滴是生命這慈善團體於中秋期間舉辦名為『月共賞 餅共嚐』活動為長者、露宿者和低收入家庭送上福袋，現正向市民收集月餅，詳情如下：

收集目標：900盒（共3600個月餅）
收集日期：8月1日至9月12日
收集地點：九龍尖沙咀星光行1915室（辦工時間：星期一至五 9:30am-6:00pm及星期六9:30am-1:30pm）
查詢電話：27358377
備註：必須是一整盒及在最佳食用日期內的月餅，包裝上沒有註明食用日期的月餅恕不接受
http://llcs.org.hk/index.php?tn=local-charity-detail&ncid=4&nid=247&lang=tw

有興趣跟有需要人士分享家中過剩月餅的網友們請於收集期前行動，行善積德 福有攸歸。

好lonely的blog

樣式色彩都多選擇，但你唔會知實際邊個探訪過，又冇途徑探索找尋新網友，只係靠舊有人脈的網誌清單。瀏覽到的範疇傾向單一化，其他的『花鳥蟲魚詩詞歌賦』完全冇路線去到，真係好朋黨獨個兒自說自話feel。

想起以前曾經有一段時間，通過寫網誌認識到一些網友柴娃娃咁談笑甚歡，嗰段時間過咗之後，自己寫寫寫，都有機會俾人去四圍探索，唔出聲都睇吓人哋釣魚網網千斤、煮嘢食色香味丫。

可能呢個就係人生寫照﹗

好似靚仔靚女的時候無憂無慮咁，興起時甚至會促膝夜談，當時有個好有趣的網友係行歐盟時間，重俾人話我好半夜三更唔瞓無無聊聊咁同佢係咁傾。但係而家諗番起又係一種偷快經歷。少年輕狂，漸次步入正正經經的社羣，又認認真真咁學習，新知識帶來另類滿足感，但總縈繫著那種莫名的寂靜。。。

寫呢篇期間，屋企人在籌備家庭聚會，講咗個gag，我俾咗個反應。我慨嘆好耐，應該都有兩年冇人講過笑話。佢話唔係丫，尋日.....。我既意思係我就成日都試講啲人哋覺得唔好笑的笑話，但周圍嘅人係冇人講.....真係好dry。

如果講到呢度就收筆，我同嗰啲終日唉唉唉嘅人有乜分別。我諗學習知識、認真工作、生財愛富都可以開心活潑咁進行，事關而家係悠閒活動，要觸動別人的幽默細胞係好唔簡單的事，只有自己經常在失敗中屢屢嘗試，起碼要捕捉生命中一些生趣才像樣....笑樣﹗


你幾耐冇笑過呢？你今日笑咗未﹗

 

決策

以前，遇到『難題』時，都會思前想後，好不煩惱。

今天，看見後一輩受著『複式情緒困擾』，也可以感受到一、二。究其原因大致如下：

未能建立到有效的決策模式，思考時事事枝節雜草叢生，越扯越遠影響解決問題的專注，未能針對問題之核心，反而被其他不重要的東西纏繞。

沒有按事情的緩急輕重分類，重要而緊急、不重要但緊急、重要但不緊急...序列處理，反而著眼於不緊急不重要的事情。可能對自己有過大的要求，希望將重要的事情辦好，反而將之推遲跟進，未完成工作增加了內心極大的壓力，最後是臨死線前趕急去辦導致結果未如理想。情況持續重複發生，使自我形象及信心日漸低落，形成一次又一次的挫敗感，覺得自己沒有用。

時間管理差，承諾、約會來者不拒，以致疲於奔命卻效果不佳，遲到早退如骨牌一個個倒下。其實我沒資格說時間管理，承諾是一定兌現，但遵照約定的時間赴會卻仍須加倍努力改善。

做了自己承受不了的正確決定。現實世界，對的未必得到上司和同事認同，帶來的後果卻要付出沉重的代價，一直讓控制不了情緒的人墮進深淵。繼而抗拒甚至憎惡共事的人，降低工作熱誠，影響表現。

將所有事情都歸咎於個人身上，經常處於做得不好、連累別人的惡性循環中。

原來受情緒困擾和抑鬱的人，果真是有一種不能自拔的無力感，有的甚至明知也無法控制到不去想而終日活在哀傷。

改變並不是一朝一夕能做的，既然一步登天是不可能，那就一足一步地完成手頭上的工作，每天為工作制定具體可達成的目標，發掘辦得好和成功的經驗，把給自己的欄放到可以跨過的高度。人，很多時就是看不見自己的優點和長處，也不知道原來自己對身邊的人有多重要﹗

繫

這兩天總有一種生氣勃勃的感覺。變，換來的是一片新景象。

為什麽經常著意管好自己的腦袋散發好能量，使身心都洋溢著正面的氣，與人交往確實需要很多能量，尤其是最親近的人，我們發出和接收的就是真性情表露無遺，要長年累月好好地相處是藝術。

對我不好的人，採取的是我行我素態度，要不自在的共處在一個空間，我寧願獨處。這是很不世故的做法，但我認為勉強將一些不願相見的人拉在一起，只會有反效果。控制不了和善以對就隨心中意願而行吧。最起碼是忠於自己的感覺。

對我好的人，是要經得起雙方磨合階段，如果不能真真正正在一起，給自己一個機會和期限，最少是已經嘗試過。雖然花費了很多能量但最終能跨過不調協而沒有各走極端，是要彼此也願意作出改變才能成其好事。現在與家人的關係正是處於這和洽融合的狀況，尤其是她已屆高齡，我可是對她沒有半點遺憾﹗

新契機

當知道雅虎要關閉網誌服務後，沒有半點一絲不快與憤怒。

由在雅虎書寫自己所思所想的刹那開始，我的得著實在多不勝數。

建立了寫作習慣而且非常享受樂在其中，我可以盡情抒發內心感受。

要從腦裡組織言之有物的東西使我更留意日常發生的事情，不停閱讀充實思維知識，導行一些有意義的行為，人生更積極渡過。

本來想完成搬遷後才向大家呈現全新形象，仔細思考後又有新想法，

繼續發文、通知有興趣繼續追看我開心經歷的隱身網友、在新平台認識新朋友可以三方面同步進行。

重新定位，想想自己寫東西的路向......讀者喜歡的還是自己天馬行空、有時『無喱頭』、有時感性的真我顯現，我仍是選擇後者，這主場猶如自由自在的秘密基地，讓我釋放，同時也喜歡客人到來分享我的喜樂，探索愉快未來的歷程。

如果新天地可以增設表情符號就好了，我經常愛這個

綠洲

呢排對眼好攰，所以冇乜睇文章，我經常做事的原則係最緊要長玩長有，唔好用殘副『計』。

呢兩日係好有意義咁渡過，幫咗唔少人。

尋日相約舊同學A去咗舊同學P的新天地，話說P因上司疑似躁鬱症發作催化咗提早退休的計劃。佢自己有一個理想，就係揾地方開畫社，等佢可以繼續各項開心的興趣。平時大家食個晚飯，係冇乜時間比較深入傾談，呢次唔同，舒服的地方暢所欲言。

言談間A提及家庭中發生的軼事，其實佢好多嘢都處理得頭頭是道。但我發覺佢今次說話時眉宇間經常縐起。敎出優秀子女，但到細路成長有自己想法時，好多時做父母就係時候做支持聆聽的角色，之後就要下刪三千字。。。收起嗰啲給子女的建議。A好認同我的講法，察覺到佢面容鬆咗好多。

回到家中，等姨甥女學完小結他到訪。之前嗰晚抹好啲塵，執拾家居。我發覺而家的執行力同毅力強咗好多。

今次有機會協助姨甥女紓緩情緒，洞悉佢生活上壓力來源，具體地解決一些問題。

超爽﹗

開心持股

呢隻油股終於爆鑊，我渣咗，今日停牌，但我冇乜感覺。

是以唔好將所有雞蛋放喺同一個籃好重要，你永遠唔知嗰間公司內部的實況。

買港股ETF盈富嘅好處就係唔會受呢啲個別公司出事所拖累帶嚟嚴重影響。

食得咸魚抵得渴，想賺多啲風險又高啲。

而風險高亦唔一定賺多啲。

最緊要了解自己可以承受到幾大風險同唔好影響到心情。

或者做個一啲都唔科學的測試~ ~

股票市場上落幾多會影響到心情？

一千幾佰

一萬幾千

三五七萬

十萬八萬

一佰幾十萬



又有分係唔驚定唔識驚，或者係麻木咗？

認清楚自己屬邊類有助以後發展優質投資/機心理質素及注碼的分配。

各位努力。

仍愛

今日又用番廣東話嚟寫，最鬆弛的做法。

自從上次了解咗電視電玩之害後，

打機已戒，

鍾意睇電視的我就多嘢諗喇。。。

有得賴嘅係古謙自細已成日睇電視，唔怪得之看書的專注力咁弱啦。

睇緊電視時又會偶然鈎起智商係咪下降緊呢？咁重睇﹗

經過一輪矛矛盾盾之後，都係冇搣甩舖電視癮。

亞Q啲嚟講每次都會用腦諗好多嘢，觀察場景佈置、服飾道具、欣賞特技製作、劇情合唔合理、演員演技。

有時睇卡通片我都會熱淚盈眶，睇推理劇會考吓腦筋，歷險戲又會幻想吓自己置身其中又會點，有意思同寓意的就同老死分享吓自己的想法，樂在其中。

況且我而家都越嚟越與外界隔絶，可能呢個係重同世界有連繫的弦，如果都可以斷埋，離升仙之期唔遠了。

講咁耐開場白，其實我想講吓最近的仙巴歷險記。但唔係講劇情喎。

我鐘意海，我喺度諗如果要揚帆出海四處漂流闖蕩，

喺船上可以有乜嘢貢獻？我識釣魚同煮嘢食。

跟住....如果想歷險，就係時候要鍛煉好自己的體能，就由呢度開始好了。

懶惰孩子成功的一天

她得摒棄無謂的手機訊息，

翻撻開始冷卻的熱忱。

突破過份保護的家長防線，

向愛惜她的人温婉報以微笑。

持之以恒地完成工作。。。

1) 無知的人是有福的

2) 對自己沒有要求的人有福了

3) 身在福中而不自知還諸多抱怨的人更是福澤延年

懶惰的孩子就是沒有123，

她不可以再讓自己庸怠下去，

生活就這樣一天一天的進步。

福果因為她的求知、對自己有要求、身在福中懂惜福而不斷地生長成蔭，

人生改變得更為美好﹗

學柔

八十高齡的意大利老神父勸導年輕神父們：『不要看她們現在青春少艾的模樣，想像她們數十年後的樣子。』

意大利女人年輕時個個樣貌五官輪廓分明，身段誘人，誰個不愛﹗

三十年後的她外表可大不同，醬汁累事。。。

除了飲食文化用大量黏軟如膠的芝士外，那各式的意粉都要配以色香味濃的汁液，要不然便是淡而無味。

四川人嗜辣，水土氣候使然。

潮州人口味偏咸、偏酸、偏甜，罹患高血壓者相對亦較多。

自小受家庭、族群的薰陶，要醒覺甚或反其道而行之，談何容易。

不從眾的路途實在難行，要猛力敲醒從眾人的心，真誠的忠告是『不要亂來﹗』

經年累月築起的牆壁，是要建成者願意窺探牆外美好風光而自行逐漸卸下那一磚一瓦才來得安全自然。

人們總是要到向內延伸的垣土將自己迫到透不過氣時才乾著急，要在重重圍困的籠牢中解脫得更使勁地加倍努力。

怎樣才能自由自在的活著？

問 ~ ~

問自己內心真正感覺。

點到即止術

謎團終於解開。。幾個月前，平時謹慎的我在短期內接連摔破東西，原來笨拙也可能是潛藏意識有話說的蛛絲馬跡﹗

回想當時情況，那杯子就像在眼前消失一樣，直至『兵嘭』才如夢初醒，一只用了很久很久的東西完了。

第二次是杯蓋，第三次又是另一隻杯，何其湊巧。

今天意識到是破舊，關鍵詞是『很久』，頓覺人的身體確是很奇妙的藝術結晶，那種無形的流動，意識與非意識的連繫，是那麽奧妙令人深思、著迷。

最近古謙在學習點到即止術，慣常在發現別人做事奇怪時，除了想出個更好的方法外，繼而腦裡會說一些評語去否定那人。

現在開始訓練自己只想到解決辦法，有意識地將後段批判減省....不要想。

有時明知對方口誤，自行補上正確的做法便是。

我覺得這篇是挺有意思的，十分喜歡，希望你也有同感﹗

保持飢餓

凌晨時份寫了點東西，覺得寫得不夠好，刪掉。

想問問，睡覺時什麽事最令人開心？

一覺到天明，每個人都夢寐以求。。。

我卻認為將那在耳邊嗡嗡叫的蚊子找出來並成功撲殺，安心安靜不再受騷擾地甜睡進夢鄉才是最開心的事。

直達終點固然好，但途中遇到困難後再奮力衝線那種快慰比無風無浪要高出百倍。

很久沒有談股票操作情況了，如果一直持貨，真的沒有什麽好說，

漲價不賣，又沒有跌至吸引到再度吸納的水平，

那我做了什麽？心情又怎樣？

電訊股~ ~被大行唱淡，股價下滑15%後已進行止蝕，現跌穿52週低位。

油股 ~ ~ 兩注買進後一直持股，曾比平均價升破1x%，沒有沽售現在回歸起點，持形保態。

煤股~ ~ 兩注蟹貨，成功於低位再度入貨，鬆綁並直至目前為止有利潤。

上落市操作：

其他幾支股票於近期高位放售，正試圖伺低購回，將均價拉低。吸取水泥股敎訓，今次不會待股價超低才購回沽出的股數，避免錯失機會。

未完成建倉，仍然飢餓。



心情大好﹗

好好句

前兩日都冇乜機會用電腦，只因屋企人要用部腦做功課。冇智能手機的我又有冇因為冇得用而典床典蓆癮起？哈哈哈。

同家人朋友傾吓計、做吓家務、睇吓第二啲嘢、去吓拜山，總有好多其他嘢好做。

今日睇一篇文章，好鍾意以下呢句：

『世上又哪有借回來的快樂可以到永遠呢？最緊要識起身！』
呢排個心就成日諗住劉青雲喺電影十萬火急向方中信講嘅呢句對白：

『亞sir，我真係冇氣同你拗喇。』當時喺火場缺氧狀態要有人犧牲做某啲事，兩個人爭住捨身成仁。

近期有人向我訴說生活、家庭、工作上遇到嘅問題同困擾時，我會先問吓佢係想向我『呻』吓定想聽我意見，是關大多數人都只係想人聽吓佢哋有幾慘。

另外，我要學習說話精簡一點，是以今日唔打說進一步解說以上事宜背後原委。

動完腦筋寫嘢完畢，下個節目係閱讀，各位happy Tuesday ﹗

紡織娘的秘技

她永遠都有多手準備

是大自然界熟稔平衡之道的超級高手

將自己放在安全的位置

懂得未雨籌謀

懷著鍥而不捨的毅力

人生道上每個人都會遇到困難和挫折，

有的人遇到大風浪時一蹶不振，

有些人又可以安然渡過，跨越障礙後甚至更上一層樓，看得更遠。

那當然每人的經歷都大不相同，也有各種千百樣的況態。

看看那織網蛛兒，經常命懸一絲卻不會墮地身亡，

織呀織呀的網總會從多方牢固地張開來。

預先做好自己的支援系統，不只側重一個人、一個範疇，

生活一旦失去依靠，縱然傷心失望，卻不會步向絶望。

因還有很多人支持自己，很多路可走、很多選擇。

從今天開始著手建好自己的獨特網絡，

生命有很多可能、可變、可塑﹗

電視電玩嚴重影響我們的IEQ

前陣子搜尋有關成癮原因的文章，發現某些上網活動尤其是玩電腦遊戲影響玩家邏輯思維、判斷決策發展和功能，延伸是令人容易產生脾氣暴躁、情緒失控情況。

據稱當人玩電玩時，腦部alpha 波和 beta 波的活動跟腦退化症患者呈現的相約，都是維持在極低水平。

遊戲過程無須活動到腦部前額葉直接由視覺接收訊息作出反應，前額葉正是掌管人類思維決策所在，久而久之腦部對外來訊息習以為常地不經思考就作出情緒反應。

無獨有偶看電視對人腦運作的不良影響跟電玩有過之而無不及，給發育期間之幼孩看電視為他們腦部發展的窒礙確是非同小可。

其他壞影響包括導致焦躁不安、對外來刺激反應不協調、語言聽覺發展較遲緩、缺乏創意和想像力、專注力不足、解決問題能力偏低和欠缺堅持。

家長們可能要認真考慮在子女建立到閱讀習慣、思考能力前不要讓他們看電視和接觸電子遊戲，若然多些人能做得到，盼望擁有一個美好和諧快樂的世界可能不是空想。


以下是其中一篇電視如何影響健康的文章

http://tw.myblog.yahoo.com/jw!qenrcEifHwRFOdGa9A63JZvo/article?mid=2619

聰明人的快樂

聰明、智商高、有高尚職業、富有、有權勢會比別人活得快樂嗎？想大家必心裡有答案。

比常人看得清楚透徹，明白事情的複雜性，往往對自己和別人的要求都較高。

對內若果能將事物層層遞進地解決向前，那當然會帶來成就感，能力越高承受的壓力也越大，到壓力大得接受不來時，由於以往面對的都能解決，面對失敗時能否有效地卸掉那份挫折空虛的感覺正是關鍵所在。

指標：經常失眠、對周遭事物提不起勁、嚴重的身體出現心理導致生理毛病例如不知明的痛痺、尿床。

如果表徵持續不減，情況已嚮起警號，得檢討當時面對的壓力是否承受得了，尋求協助、向信任的人傾訴、停止壓力來源另謀出路、找專業人士作出適當的治療。

最危險的『處理』方法便是硬撐下去，這樣的做法往往將自己推到絶路，最常見的是做出傷害自我的行為如濫藥、酗酒、嗜賭成癮、自殘、了結生命。

可能你不會相信據一位協助病態賭徒戒賭的人士稱醫生、律師好賭成癮欠下巨款不能自拔的大有人在。當人受到挫敗、不如意，處於抑鬱狀態時切忌尋找一些容易成癮的東西或事情去嘗試、去倚賴，在最脆弱時於臨界點徘徊，容易成癮的行為使大腦釋出多巴胺為人帶來的愉悅感只會為走上不歸路埋下隨時引爆的炸彈。

站在十字街頭，痛苦無助之際，聰明智商高的你有沒有人為你分憂？有沒有一個像黑洞的傾聽者協助渡過難關。

經常抱怨找不到知心朋友，身邊的另一半未能同步成長，在下這個定論之前有沒有想過為何到十萬火急的問題降臨時找不到可以傾吐對象？

與其羡慕別人，不如好好用那聰明的腦袋想想。

平時有沒有建好自己的安全網，還是到十號風球高高懸掛時才張羅卻發現家中甚麽也沒有。

如果確信自己高人一等，要找同級數的朋友可不易，雙方都抱著自負的心便更難放下自尊去好好相處。可能會找到一個自己認為敬仰的人好好聊聊，但這個唯一又未必懂得協助別人走出心理障礙。

從一些說話和想法往往就可以了解一個人認為自己在階梯的那個位置，『以我的條件只有我揀人。』『跟他說幾句已經露底。』『她與我的級數相差太遠了。』

公平的是你揀人人揀你，比你高級數的人未必揀你、同級的難求、比你『低級』的又看不起。

如是能培養到對人平等的心，在有需要時，一個比你『低級』的人可能是有能力幫助你走出困境的救星。

一個智商高的人往往需要有更豁達的心，虛心地欣賞比自己不聰明的人。原因是不聰明的人未必有能力達到更聰明。這裡所指的欣賞是真心去體會別人的優點、長處而不是站在高處表面對人好，內心卻懷著『我比你聰明高你很多班，我是在讓你。』的心態。

如果抱著這樣的心態跟人交往，逆地而處你又會與那一直瞧不起自己的人深交嗎？

所謂同步，要看兩個人的本質是否都願意適應、改變、存有發掘新事物的心，是雙向交流，如果預早已抱著自己比別人優秀的心，究竟又可曾放慢腳步真心讓對方肩並肩快樂前進同行，還是你只是想著『我在放慢腳步等妳。』

快是否一定好，我看未必﹗

素養

我在享受這一刻，聽著雨聲跟美妙音樂的拍子和應。

已經將前幾天入侵的負能量清洗淨盡，亦想到了日後面對某些事情的正面方法。

有一天看到小思老師(盧瑋鑾敎授)的講說，題為中國語文老師的素養，吸引了我的眼球。

我觀察到那種演講技巧：

1  不用現時常用的背景圖以免參加者分心，這樣要很有功力才可做到，全程所有目光都聚焦在講者身上。

2  不忘留意參加者的反應，很多聽講座的人慣性都會不停抄筆記，她卻提醒大家放鬆心情，不要以增值課程為苦差。立時很多參加者的面容也從容了，我也發覺沒有閉目養神人士。

3 逆地而處道出參加者當時的心境、面對的困難，引起共鳴。


(我看的已是多年前的演說)

她直指最不喜歡『我會做好呢份工』這句說話，一個老師在工作時應該有『關情』，是愛這工作。

也引用六韜的軍用擅用兵器以消除學生不願意學習的障礙，適當地找出切入點。

舉例，多年前她有位同事的女兒不喜歡學中文，同事向她求助。一次，到同事家，知道同事女兒愛唱粵曲，就請小友高歌一曲觀柳還琴。唱畢後小思向小友讚好，但表示欠缺感情。那可喚起了小友的好奇心，也製造了難得的切入點。

曲中一句『背燈徒自嘆，對鏡為誰容』，小友可知何解，小思老師以抛磚引玉的方法解說了首句，再請小友自行找出下句的典故和解釋。果然兩天後，小友致電老師一一道出。

以上內容只是筆者憑記憶記下的，與講辭可能有所出入，敬請讀者留意。

古謙並非敎育工作者，也已不用為工作而忙，可是以上的真知灼見可以應用於不同工作範疇、生活、育兒、與人相處等很多方面，一理通百理明。

為興趣而學習是非常快樂的事情﹗

導入其途

我都唔知幾希望喺我廿幾歲時遇到呢個人，佢講俾我知利疊利(複利)的巨大威力。

佢話俾我知如果我唔受得風險，可以喺大概乜嘢價位入盈富基金，同恒指成份股掛鈎，又係一項較為穩健的投資項目。

古謙：『喺我廿幾歲人時遇唔到呢個人，但係而家我做咗導年青朋友入財務自由其途的人。』

大前提係聽唔聽、諗唔諗、信唔信、做唔做。。。

之前買入的殘股、資源股爆升，忽發奇想，我應該問吓啲網友我好唔好食糊。

事關我唔係會打電話去創富坊嗰啲C9級數，網友的財務理財知識又一定好過財演N咁多倍而且佢哋夠真。

我諗可能會咁答我：

1) 投資的事要獨立思考，自行負責同決定。

2)有價值的股票就梗係等佢好似自來水喉咁啦，重駛問。

喂喂喂，記住複利效應呀﹗

今日冇操作。

始作俑

幾年前智能手機開始普及化時，初初哥已經同我講，平時當佢受到別人不禮貌的對待時，係會起晒降以惡迎惡。但佢再唔會咁做，因為佢意識到可能會有人攝錄後上載公告天下，咁就邊度都唔駛去~ ~ 明智。

那邊廂大家都隨時可見，啲人已經唔顧身份，冇晒羞恥心，明知同埋特登喺有鏡頭影住、眾目睽睽之下都會歇斯底里地咆哮，點解？

似乎這世代已有一撮人認同咗呢種表達方式，怒目而視青筋暴現，講嘢鬥大聲，嘈住唔俾人發言。

我在回想第一次見到沿用呢種面相表達法的係邊個。。。5..4..3..2.1

你諗唔諗到？

毓字派。

跟住前兩日聽到鄭斑訪問那位退休前休假警司，那種令我十分厭惡的重複阻住人講嘢的手法，，更甚者佢重要將責任推喺別人身上話俾咗好多時間但警司唔答，大佬談判專家都揾唔到位入，根本就完全冇溝通空間可言。

無論一個人幾有學識、對事物分析得幾有理據幾透徹，用呢種表達方式本身就係超錯。

呢種咁既歪風禍延下一代不特止，情況更有年長化的跡象，好可怕同可悲。

嗰個我唔多想諗佢嘅言行的人，尋日又重講佢個敎副學士的同學老死，老早已經話嗰啲8、90後冇得救，新加坡已超越我們云云。重成日話希望今次佔中攪大鑊。以前佢已經係洗腦式咁批不出十年香港玩完，今次更斷言話五年玩完。

呢舖我真係再唔能夠唔出聲，我話妳啲負能量好犀利，咁大家坐喺一條船妳都唔想佢沉架，係一個周期，第日會好嘅。

佢即刻皺眉頭話係坐埋同一條船，但係呢個唔係經濟周期，只有越嚟越衰。

我扁嘴表示不滿，但冇再回答。(一係唔想喺嗰個場合爭辯、二係未諗到好的方法講好呢件事，而我的反應都唔太正面，我應該唔答都笑笑口。)

後記：

好簡單一樣嘢，如果你承認大家都係坐喺一條船，若是有啲人的行為係會令隻船沉，但你只係閙嗰啲人點衰，自己主觀意念卻不停咒罵架船就快沉，架船只會沉得更快，同加速自我實現的結果。呢個係面對逆境最差的一個想法同做法。

我哋改變唔到人的思想，但起碼由我開始做起，對人有禮多啲笑容，面對不禮貌的對待時唔係以牙還牙。如果朋友由你處學到、感受到正面的思維(例如佢舊同學，但現實係好明顯兩個都有排唔會有咁嘅素養，遇著不如意爆粗就有佢份。)已經初部少咗好多於事無補，令人情緒更不安的煩音。我哋未必可以解決到問題，因為唔係一個人的力量可以改變世界，但我哋至少可以做到唔好令歪風蔓延。

尋日一落街就見到幾個年近60的男士幫手賣旗，唷，好似冇散紙添。但我真係唔想拒絶佢哋，因為好難得麻甩佬肯日曬當空做義工叫人買旗，好想給他們正面鼓勵和支持。佢哋有禮貌、說好話，咁我又慰問佢哋幾句，就係咁簡單。

與其終日埋怨，不如發掘身邊多啲別人做得好的事去欣賞。

放過我吧﹗

今日去每月竹戰時，狗友話舊同事的另一半又想再約我哋打牌，咁等我就稱佢為熱鬥小馬吧，應酬過佢大大話話都有五、六次。我不諱言告知狗友，其實我唔想打喇。狗友即時喺其他兩個雀友面前問咁呢檔呢。我答：『我可以打到妳哋揾到人為止。』

不過我諗佢哋都係當我講下啫，今日打完之後又約下一個月，可能真係揾唔到其他人卦。起碼我表達咗我嘅意願，我認為最緊要係對別人和自己都老實，坦然講出嚟。

另外一個唔想同狗友太多交往的原因係，呢個人完全冇用心聽人講嘢，亦唔記得自己對人講過啲乜，每次的話題都差唔多。如果講開某個人，佢就會講相同的內容，重重複複N咁多次都一模一樣。最離奇的是由於佢老公係做警察，當消防員大力要求加薪時，佢就撐硬話如果火燭鬼加，差佬都一定要再加，咁我話係囉，消防員只係要讀消防條例，但謷察就要識晒所有法例，不可同日而語。佢好同意，但佢完全唔記得我講嗰啲說話係佢自己講俾我知嘅，以上對話佢講一次我答一次，佢都唔發覺，真係人都癲﹗

又好似有一次同熱鬥小馬雀局，講到有啲兩公婆落埸會打感情章。我同熱鬥的屋企人都係咁，狗友就話點會呀，家人嚟架嘛，打全沖出唔到蠱惑。我哋解釋咗俾佢聽全沖都可以使詐，佢又係好堅持己見。

今日善良屋主話開，佢細佬同弟婦打牌時打龍通得好犀利，（助語詞），狗友又係咁樣答﹗﹗﹗

我真係強烈認為呢個人同人交往的言行都好有問題，但佢身邊的朋友又覺得冇嘢，重好多人好喜歡佢，好奇怪的現象。

其實我有時係會表達自己的想法，呢排雖然我可以保持禮貌，內心的吶喊越來越頻密～～呀。

就算我朋友唔多，我都想將我啲時間與真誠的人分享。

牌局賽果，勝，三連勝﹗

『無奈地想了一會兒，好醜心太明，則人不親。如果不能擺脫，可能是另有玄機，那我就應該以正面的心態去面對，將自己的注意力集中在享受這遊戲，不要想這個人的言行可行嗎？在這個圈子中發放善念，古謙盡力吧。。。』

心火盛

乜嘢係人哋有興趣的事物？

豬朋狗友，嗰個成日揾我打牌、耷骨、去旅行、飲酒食嘢嘅，佢真係屬狗。

佢成日講嘅話題係是非、行街、買時尚嘢、認叻，經常就以自己人生目標係吃喝玩樂而自誇。

以前工作辛勞，頸肩腰都非常『淵』攰就有同行耐唔耐耷兩嘢，過咗一啲時日，我開始冇再同佢一齊北上耷骨，主要係我真係冇興趣呢啲話題，俾人嘅感覺係唔出聲的人一個。而且我冇再做嗰份令我身心俱疲的工作後，最顯著的就係肌肉冇晒呢啲痛緊實。

去旅行雖然遊覽的地方唔同，但來來去去嗰十幾個狗友的朋友，都係冇乜交流，我覺得去一次同去二十次都係冇大分別，所以去咗十多次之後都開始婉拒，咁當然你可以話都係睇名勝啫，咁大個人話不投機莫同行都唔駛我多講。

飲酒，自從我個胃開始唔妥，我就唔多飲，於是又唔需要再應佢約。亦留番啲限額同家人飲，其實而家都只係淺嚐一兩啖，因家人話酒逢知己一個人冇咁有癮喎。

至於打牌，其實都開始冇乜興趣同佢打，但係講咗好多次請佢揾人戥腳佢都照揾我，唔通兜口兜面拒絶以後朋友都唔做？

哲學家亞里士多德認為如果嗰啲只係沉醉於吃喝玩樂之享樂層次的人同豬冇乜分別，自己唔係追尋呢啲但又唔會咁串嘴話人，始終唯樂主義係人天生喜歡的，人各有志。

網友喜歡睇啲乜，可能係政治經濟對後市影響、大市走勢分析、買乜嘢組合、收幾多息、富人心態，都係我冇能力講的。

我講的亦係以上呢個已被定性為雀友的舊同事冇興趣聽，其他人又未必明白未必有興趣，對別人來說可能是不值一提的老生常談，卻係我內心所思所想所感受的記錄。

但我依然努力發掘題材，保持內心的一團火，如果連我自己都不感興趣，可能我的人生已變得空白、無聊、不屑一顧了﹗

變化倍化

1 光說不做  ~ ~ 空想型

2 光做不說 ~ ~ 實幹型

3 不說不做 ~ ~ 沉悶型

4 又說又做 ~ ~ 有趣型

初相識，為了討好對方，行4(又說又做)

開始了解，越來越少話題，但仍喜歡對方，為維持關係，行2(光做不說)

因了解而漸漸不再互相欣賞，敷衍政策，行1(光說不做)

最後，行3

從心理學層面，由有變冇、多變少、好變不好，感覺最難受。

人只會要求越來越多，將人抱到天上，再將之由彩雲美景擲下，那是何等感受。

人又豈是完美，若是由1,3進化至2,4，咦，由冇變有、少變多、不好變好，感覺好得多了。

凡事總有例外，

別人不喜歡聽的說話或覺煩厭的時候，站在對方立場也就不說為妙，

吵架的時候，3是不錯的做法，

傷害別人的事情，光說不做總好過又說又做，最好是不想不說也不做﹗

還是那個變字，選擇怎麽變，想要變成怎麽樣。

做人處事適時變化，好的再不停倍化，樂趣自然變得生生不息﹗

性本趣

由某心理學派角度，夢裡的蛇、火車等長型物體與男士性器有關。

在課堂期間，有個男學生就係喺敎授一講甩晒棚牙呢句之後就猛咁答係呀係呀，原來甩牙同自慰關連 ~ ~ 即時囉爆。

呢段都諗咗好耐寫唔寫好，因為我覺得香港係一個外表開放內裡保守的『國際都市』，尤其是一講到性。好多時啲人係道貌岸然，企於『道德高地』去看事物，性更經常被禁談，收收埋埋相當鬼祟。

從無由父母處得知性知識，我諗佢哋都唔識，多數人由朋輩、色情刋物一知半解的就大把，我就只係中三上生物堂女老師閃閃縮縮咁講解。

總之成件事就係尷尷尬尬。

呢篇都預咗未必有人答嘴，亦唔知網友們點睇我，但係我真係覺得呢個解夢法幾有趣。

而該男生唔需要尷尬，成熟的人理應唔會笑佢。

學得呢科，就係要將深層不為人道的一面引導受者自我釋放、自覺地了解本我、解開心鎖、擺脫痛苦過更美好的人生。

心理上的問題，唯一方法係自救，專業人士只可以協助你自願地了解自己的問題，真正幫到你的就是你自己，呢點，我可以好肯定﹗

深層疊疊

家中有成員對學習孜孜不倦，有時會分享課堂的有趣內容。

有沒有想過有些時候我們

口誤  (口快快講錯嘢即無端端講啲九唔搭八的話)

筆誤  (顧名思義同上但係寫唔係講)

誤聽  (明明人哋講呢樣就聽到第二樣)

代表什麽？

在正常情況下，意指若大家未到失智症舊稱老人痴呆，那麽有可能是你的非意識本我(id)在透露內在意願和想法。

有一例子，學生很早意會到他的臨床心理學敎授不喜歡自己，成年人當然避重就輕不會表露出來。

一次，兩師生在走廊相遇，老師將會舉行一個宴會  (其實個心極之唔想邀請呢個學生，但係其他人都有請唔好意思唔問佢﹗)

老師道：『丫，我會喺Repulsive Bay攪個宴會，你嚟唔嚟呀？』

(Repulsive 解作令人反感、厭惡 ，宴會地點實情係喺淺水灣Repulse Bay)

兩位都是臨床心理學研究者，不言而喻﹗

另外，夢也是顯現本我的投影。

記著如果有興趣上臨床心理學課堂，別在敎授講解夢的深層意義時胡亂答嘴，夢裡所指通常離不開性與侵略。

美妙效應

聽著音樂心情愉悅悠閒地寫點什麽好呢？

最近看書、網友文章、電視沉澱下來的想法。。。

財務知識、心理學還是愛情觀，後者好像是想通了一些東西似的。

『其實成日係咁寫寫寫又點丫，都冇人睇，收檔啦，或者索性揾本死亡筆記寫自己個名上去，寫死佢﹗』

嘩，古謙，何時開始變得如斯田地，發放大量負能量，要不得。

古謙話：『吓，上面嗰句唔係我講嗰喎，或者有人想懶風趣咁攪吓黑色幽默啫，唔關我事架。我都唔知寫嘢寫得幾開心，樂在其中，成日都有人嚟睇吓我發啲乜嘢噏瘋，又有幾個好心地的經常留言鼓勵，我已經覺得好滿足﹗』

回望以往走過的足跡，勾起何等回憶，美麗的風光，別人送過給你的善意，聞到似盛放花朶蜜糖般的香氣，總有人曾經甚至現在仍舊記掛著自己。

我已經自覺地將集中力注意在我得到的許多許多。

有時偶然發現平時一本正經的網友在文章上『彈』出隻言片語的笑話時，是很開心的。

所以不要以為沒有人共鳴而不繼續發放笑彈，告訴大家是有人識欣賞的。

未認識財務自由真正意義的人可能會以為我們經常錢錢錢，看到想嘔。

那又如何，我們很清楚錢不是財務自由的終極目標，

那迂迴走過這路途的過程和得著，學習改變思維方式的可貴，

生命影響生命的效應，遠超乎我們的想像﹗

師父，一點也不明白

雖則只是一齣劇集，但背後所帶出的訊息害死人。

心愛的人死了，因為放不下而自殺，但竟然劇情卻暗喻兩個相愛的人在天上重聚﹗

這種浪漫淒美的橋段請務必叫停。

對人死後的況態不了解，但試想如果有機會讀書明道理，到考核時因為個人理由自動放棄，會否有第二次機會呢。

古謙覺得人生在世有機會給眾生來到這裡，為的是鍛煉、修行、考驗，

既然給了機會，今次修不成，因為有努力和沒有放棄，賜予下一次是有可能的，

但放不下而自我結束生命，除了不會再有下次再生為人的機會，只存著的是不可彌補無窮無盡的痛苦﹗

當遇到求不得、愛別離的考驗時，在世是扭轉這執念的契機。

男女之間的緣份並非先後，而是深淺、因果、起滅。

別人的緣份比你深，又或者兩人之間的緣已完滿了，那就放下自在吧。

找段今世真正屬於自己的緣，也可能已經還清所有孽債，獨個兒修行是一種更超脫的境界。

已在默默起革命

有遠見的人會看得到我們的敎育並無敎下一代正確的理財觀念，在我們還在溺愛小朋友的同時，財技大國已開始透過媒體向青少年們灌輸理財知識和富人思想。

今天發現bizkids這個節目，內容敎授年青一輩認知學好做好個人理財、簿記、會計管理的重要性。亞美利堅鼓勵後一輩，從小已開展和體現他們經營自己的小生意，魔術表演、出售自製汽球動物和玩具、家庭式船上賣雪糕生意(三兄弟妹分工合作)。

我的印象是生意小小，但經營的青少年都是面露笑容，充滿活力和生命力﹗

由先洗未來錢的擦咭文化至從小開始敎導新生代擅於理財，正是由窮人腦袋邁向富人思維的佐證和實踐。

願望之泉

話說遠古時代不知名的地方有個村莊，由於村民開罪了天神，天神一夜之間以怒火將他們所有人都弄盲了。

從有視力至失明，每個人對人生和活著的態度產生了迥異。

一些終日留在家中自怨自艾，抱著消極的感覺活在痛苦當中，每次需要學習新事物時，都有一大堆藉口....我從未試過.....我已一把年紀等等。

更可恨的是當他們聽到鄰家因為努力學習適應不用雙目發展自顧能力時所發出的跌跌踫踫聲音後，自艾者還笑適應者愚蠢。

時間一天一天過去，自艾以前儲在屋內的食物將要吃盡，由於他自失明以來一直吃而沒有活動，本來處事麻利的他手腳笨拙多了，而且因為沒有把握在失明後黃金時段內作出變陣，生命總是頭頭踫著黑。

他心想，這個時候為有吃完所有東西再算吧，沒辦法。

原本不聰明的適應者，在失明之後沒有放棄，縱然身上傷痕疊疊，已學會靠聽覺、嗅覺和觸覺揣摩到以有缺陷的身體活得好一點的竅門。

不過現實是要算日常生活能維持，始終找不到新的食物。雖然他未盲前積聚了不少食物，但也會有吃完的一天，那麽要在仍然有充裕食物時就想出解決辦法。

以他的能力，未能盤算出妥善方案。

雖然很害怕，適踏出了熟識的家門，到外聽聽其他人有什麽良策。在每個人都是盲摸摸但境況相同的情形下，現在要做的是認真鑑別出誰的方法較可行。

收集得來的情報顯示，原來有人已比他早一步洞悉問題，離開了村莊找傳說中的願望之泉。在那裡可以實現一個願望。

離開的人沒有一個回頭，究竟是到了目的地、迷路、還是遭遇不測呢？

連世上有沒有願望之泉也是一大疑問，要繼續下去必須放棄現有的東西以無比的信念來支持。

實在太多不明朗因素，佷多人寧願等死也不冒這個險。

至少在未用盡糧草之前仍能『生存』，可是沒有將來的活著，這班人只是一群活死人...行屍走肉地走完一生。

有些人又因為誤信而不加思索地盲目跟隨了表面說得頭頭是道的人而陷入了彈盡糧絶的深淵。

相反地那些人盲心不盲，堅毅不撓的人終於到達了願望之泉。。。

有的要求有源源不絶的食物

有的要求恢復視力

有的要求天神的原諒

有的要求以後過著快樂的生活

不知道在逆境時大家會採取什麼態度又如何應變？

如果要結伴解決問題，你會找何人當你的伙伴？

危機帶來的是絶望還是轉機，甚至是因禍得福的恩賜，在乎人心如何選擇。

流動的專注與分心

前天古謙所買的殘股下跌10多%，屋企人替我滿是可惜。

我告之，以我慣常的性格，當那支股票升了10-20%，大多數都會沽出，但今次我在鍛煉自己的持貨能力。

我想投資老手，在購入股票前都已經定好自己的目標，待股價到某個價位沽出。再高層次的更能在預期的沒有出現時作出相應對策。這樣對持股的時間起了指標作用，只要等待預期的出現便可機械式操作，少了很多掛慮，確立了目標，專注地執行是必要的。

對於未摸清自己屬性的人來說，似乎又可以反其道而行之﹗

當我仍未可義無反顧地一直持貨，懷著不時想修正自己的錯誤、市況逆轉、恐懼大災難的來臨等千百個原因，要練習持貨久一點，可能就要試試分散自己的注意力，不要那麽專注股價上落了。

吊詭的是，對於那些一心達致建造自動現金流的財務自由嚮往者來說，他們須要專注執行力的同時也須具備不注重股價上落的特質，掌握一種發自內心控制自如的流動狀態。

很難，但有人辦得到，為他們高興，也為未做到的人帶來希望，只要你願意踏出第一步勇敢地嘗試，凡事都有可能﹗

當自己的人生敎練

在職時最討厭就是做目標計劃，不喜歡有框架，不愛永無止境地提高那支無形的桿，別看我外表老老實實，『本我』原來就是野性不覊嚮往自由自在的生活，誰個不愛這樣的狀態。

完全什麽也不做又是否達到真正的開心？唔，這幾年的生活大概就是這樣，蠻享受的。

在我滿足自我『放縱』的念，與此同時『超我』不時提醒要改掉壞習慣。慶幸擁有很強的自省能力，今天做不到不要緊，找尋更好更適合自己的方法，一定能夠達到理想。

如何能夠開啟快樂之門，人人不同，快樂本身就沒有一個定義。它可以是一個過程、可以是一刻、可以是一個狀態。又或者，有能耐去安然接受不快樂，才是快樂的真諦﹗

時常都很渴望喜愛閱讀，但每次都只將書翻閱幾頁便讓一本又一本的塵封瑟縮於不同角落。

這幾天悟到一個可行的方法，跟心靈對話，將好的行為漸漸變成習慣，製定目標遵循訂下的時間表行事。

一個親身的體驗，當我閱讀時曾有頃刻享有那無比的滿足感，我想我到了神仙境界﹗

小比丘的蛻變

~ 正所謂每日一blog  令我人唔會變short ~

首席魔法師經常都以和尚為故事主角，等我又講一個有關小比丘的故事。

話說我有一位十份尊重我的舊下屬，大家分別離開咗舊公司之後，都仍然有聯絡。

佢係一個好勤力、有責任感、富上進心的80後，所以唔好成日淨係帶有色眼鏡去一竹篙打晒啲年青人，以我所認識的人當中，不乏有前途、 有希望的未來主人翁。

有啲乜嘢上司最鍾意呢種人呢，就係嗰啲完美主意、做死人唔駛本的挑雞蛋骨人，佢現任上司正正就係呢款。

咁唔係壞事，兩個人係好合拍的，上司都好喜歡佢。

呢位小牛初先做呢份工的時候仆心仆命，乜都照單全收，咁有乜辦法唔做死。

佢之所以咁愛戴古謙，係因為我經常可以提醒佢，啟發到佢，等佢做人、做事可以更進步，生活更加美滿。

以前，大家的層次相差太遠，我講的佢不能理解，係正路。

但現在，當小牛都開始要做管人的工作，經驗、閱歷增長同豐富咗之後，佢亦能夠明白更多道理，非常好﹗

敎學相長，大家都可以得到成功感。

最近，佢洋洋得意咁話俾我知，公司有一個部門的人奉上司之命要攪一項活動以提高員工士氣，小牛猛咁同我講啲人有幾蠢，佢覺得.......

又預計到上司第日到呢個部門啲人攪唔掂一定嚟揾小牛問意見之類.....

通常由我口中，佢都會聽到出乎佢想像的言論﹗分析完咗成個形勢俾佢知之後，從電話筒的溝通我感覺到佢好似比我當頭棒喝咗一嘢，通訊完畢....over。

今日佢又再打電話嚟，佢話聽完我意見之後，佢喺工作枱前貼咗一張寫咗個『靜』字的紙，我讚佢呢個暗號用得好，冇人知實際用途。每次當佢想多口講啲唔關佢事嘅嘢時，佢就會望住個字，再認真思考應唔應該出聲。孺子可教也。頓時，我覺得佢望住個靜字時，就好似一個小比丘喺度扑木魚....篤....篤.....篤.....篤篤.......

人生真係有趣!

可怒也

我呢兩日都有怒火，平時我係唔會用食嘢嚟發洩，但我尋日有意識地叫咗好多壽司，雖然我能控制到自己在家人面前若無其事，重好似好開心添，但我內心係知道有件事令我憤怒﹗

一個人有七情六慾好正常，嬲就係嬲，冇必要連自己都呃埋，最緊要係能夠了解自己，了解情緒的根源而用有效的方法宣洩出嚟，而唔係發洩喺別人身上。『食物治療』當然唔係最好的方法，但係好多人喺受到壓力或情緒困擾時，好多時都會不自覺地用食物嚟轉移問題以致有暴食或厭食。有啲學說甚至話體型肥胖其實大多數都係與情緒有關。

我知自己發生乜事，我會主動面對，所以有信心可以化解到，負面情緒傷肝傷身，不過佢要嚟時我係唔會抑壓住佢。

寫出嚟都係一個情感抒發的好方法。

我要活出一個更精彩的人生。

電視經

好似我咁鍾意睇電視的人，買一部有錄影功能的機頂盒真係唔錯，錄晒喜歡的節目，飛晒啲廣告又可以等得閒先睇，慳番好多時間又有自主性。

尋日屋企人話想睇寵物Wakaka，睇到一半佢已經話唔想睇，我同佢講開咗個頭咁都要睇埋佢架。

我哋的電視台，只係可以製作到呢啲咁低劣的節目。為一隻沙皮狗女揾仔，五選一分幾個回合，最離譜最後到二選一的時候，係叫個話自己有讀狗心術的女人嚟講出隻狗女的心聲，咁一早唔駛攪唔大壇嘢，叫個女人一開始問隻狗女鍾意邊隻就得啦。

唔知大家有冇睇我上次提過的都市馴狗師，睇呢種節目我覺得學到嘢，而且佢替人解決問題的方法，係比較全面，可能有剪輯所以未必係我哋睇到咁英明神武，但係你會發覺佢知動物的心理同反應係假唔到。好似其中一個例子，有對同志養嗰隻狗好憎其他啲男人，偏偏狗主成日有好多好多男朋友嚟開派對。雖然馴狗師係男人，但係佢對該狗做的行為，神奇地一開始隻狗就已經接納佢，而且到最後隻狗重可以同成班男人共處一室肯俾人摸，真係幫到隻狗同狗主。

如果愛狗人士，我認為係好值得用多啲時間同心思喺訓練犬隻的方面著手，而呢個節目係可以幫到大家，好簡單一樣嘢，我發覺啲狗主成日以為自己可以駕馭到隻狗，出街唔落狗帶，喂，平時冇訓練已經未必可以嗌得掂隻狗，加上有突發事件，例如啲狗遇著發情期，拉都未必拉得住，何況嗌﹗咁樣對途人係非常唔負責任的行為。其實要訓練隻狗喺屋企都要守紀律尤其係應門時唔好狂吠同撲向客人都係要用狗帶，但我發覺好多狗主都冇呢方面的意識。

近期明珠的新紮伊人、醜聞都值得我追看。

昨晚首播的日劇最強名醫，男主角個樣有啲似怪醫秦博士，而劇情都有少少怪醫的影子。

於人以利

早兩日姨甥女話要嚟過宿一宵，佢有哮喘，所以我就好盡力咁將屋企打掃乾淨，打點好啲等佢休息得舒服啲。

有句說話叫做於人以利，意指俾著數人，冇所謂啦。

呢個親戚自細有學音樂~彈琴、中樂都識，今次佢有興趣學小結他，4條弦的的骰骰，幾得意。

以前我曾經學過結他，但隻手太細最主要係我懶，學唔成。

唔知由幾時開始我覺得一個人如果懂玩樂器自彈自唱，係好快樂的﹗

咁好機會喺目前，我梗係唔會放過。

跟住姨甥女送咗以下的禮物給我：

m m f s s f m r d d r m m r r

m m f s s f m r d d r m  r d d

r r m d r m f m d r m f m r d r s

m m f s s f m r d d  r m r d d

臨老學吹打﹗以一個完全唔識音樂又冇記性的人都唔可以對自己太苛求，玩吓著。。。

於人以利，下一句係，其利必反，或反更多﹗

我出發點係沒有望任何回報，但係今次得到的係 ~ ~

貝多芬第九交響曲快樂頌

唔係嘢少，哈哈哈哈哈﹗

糖果魔法屋的謎思

今朝又想食糖，哈哈哈，不過忍住咗。

曾經有人做過呢個實驗，一班幾歲的細路，喺佢哋每人面前放一粒糖，叫佢哋唔好食住，如果喺一段時間內忍到唔食的就會得到多一粒糖作獎勵。

跟住所有大人都走開晒，暗中攝錄住班靚仔靚妹。有啲就梗係忍唔住食咗先算，有啲就睇住粒糖，有時又猶豫攞吓望吓又放番低。咁真係有部份係忍到唔食能夠得到多一粒糖，不過唔係好多人做到。由於呢個實驗係會一路追蹤住啲細路成長過程的，後來發現能夠忍到唔食糖的一群成就比忍唔住要即時享受的人大。

呢個都係相當正路的現象，如果年青時代一味顧住玩，唔好好學習，以後可以有好啲生活相對上難。好了，到出嚟社會做事，有錢消費，儲到錢點用，例如買車定買樓又對以後的富裕程度埋下伏線。買樓係儲資產，就算係自住，變賣時都係一舊錢。而享受駕駛樂趣同優越感就係巨大消費，油錢、泊位、租車位、可能罰款、維修保養、保險、牌費、折舊、然後會壞跟住就乜都冇埋。

套用喺買賣股票方面，見有眼前小利短炒好似見到粒糖就忍唔住要食，但係如果可以忍多一段時間先食，回報可能更豐厚。再加埋另一個結局就係，若然可以忍到一路唔食，原來係可以去到間屬於自己的糖果魔法屋，裡面啲糖係會源源不絶咁食到人好滿足。

但係好可惜，就算我哋知道呢個有可能的結果，礙於忍耐力有限，好多時都去唔到更美妙的境界。

古謙唔會灰心，我相信呢種特異能力唔係天賦，係可以培養的。

就好似練跑，初初只可以跑一佰米，但我要做長跑好手，就由第一個一佰米開始慢慢鍛練，然係再逐啲加上去，跑吓多啲，跑吓歇吓又再長啲，中距離試吓，到自己有足夠的體力和耐力時，再挑戰馬拉松，應該係值得嘗試的美事。

今日有粒糖對我嚟講係好吸引，唔食會唔會冇咗呢？但今次的勢頭，似乎而家唔食可以有多幾粒噃。

大大聲咁講，今天冇任何操作﹗

亂噏一通

我知道的最攪笑買股票方法係用扶乩，嗰個師奶買股票好似入雜貨咁，日日出出入入好多隻股。用孖展倉嚟認購新股，話唔驚。。(如果多人認購一人派一兩手就係囉，一旦冇人認購質晒俾佢睇吓點死法﹗)由幾萬轆到成百萬都唔收手，卒之又打回原形先話感到好徬徨，真係幫佢唔到。

又有人話2012唔係世界末日，係經濟末日~ ~ 楊x命講嘅。

哈，係呀。楊x命批人條命話佢個仔留喺香港有機會做特首，去大陸就做國家領導。做老豆嘅就梗係希望個仔做領導，唔駛好似香港特首咁陰功日日俾人鬧都未靜止，重做乜都唔啱，冇日安寧。2003年香港環境最低迷時都已經有三個單位，千幾萬身家嘅羊牯，就係聽呢個神棍點佢上大陸，生意失敗兼妻離子散。折舊賣番個送子觀音俾神棍都收得番萬幾銀，你話俾人坤咗佢幾多錢呢。觀音都可以循環再用，好環保。

睇見呢啲新聞真係擰擰頭。信啲神棍亂up當秘笈撈到風山水起(係個神棍喎)，作到咁大，又有人信，呢個世界直頭係黐筋到冇麟﹗

警世之言係今日家財億萬，都唔好坐定粒祿，唔到最後都唔好鬆懈﹗

人民幣何去何從

今天追溯回想由那時開始起買人民幣，是在2004 - 2005年間因為打算在內地購房子，當時港幣比人民幣貴~港元一佰可兌一佰零幾個錢，化算好用。

無心插柳的情況下，又將家人託我保管的一筆錢，逐步兌成人民幣。

時至今日，這筆錢未計利息在內大概2X%回報，這不是一項高回報的投資，但以備用錢來看，相比起存港元及其穩定性，不過不失罷。

兩年前正當人民幣一直穩步上揚之際，在飯局期間對舊同事們提及買入人民幣保值，她們當中有個是完全沒有投資經驗兼『唔輸得』的初初哥；一個是股場『損手撻傷客』蔡夫人。結果是初初哥將我這番話銘記在心裡但沒有行動，蔡夫人嫌當時匯率已相當高亦沒有理會。但到了近期，這兩位人姐都不約而同對買人民幣產生興趣來，前者已付諸實行；後者在古謙與她竹戰期間問道於屋主的女兒，此女是一位理財顧問，蔡夫人有沒有買人民幣我不知道，但起碼她已在這貨幣高企的時候開始想買入。

我想闡釋的是，一樣有價值的東西未形成到每個人都看到它的價值時，很多人都是抱著疑惑的心態怕作槍頭鳥，走出第一步從來都不是一件容易的事，但當價值顯現而大家從眾加入洪流，很多時已距該價值回落之時不遠了!

貨幣的起跌由許多不同因素所影響，以我的認知從來沒有人能很清晰地解說到它升跌的原因，但我相信沒有一種貨幣會只升不跌，如果賺息蝕價的可能相對性地高，加上內地經濟負著地方債有機會引致一觸即發的泡沫爆破風險日濃，到人民幣定期存款到期日，我選擇開始部署止賺離場。

爆邊 ~ 爆笑『專家』

斷食過後，現在已恢復過來。這幾天愛吃酸、辣的東西，而且好像股票大升大跌後『回補裂口』般，經常很肚餓﹗

話說酸，今天看創富坊的一個財演就真是盡顯那股吃不到的葡萄之酸溜溜，其實此君的『超能分析』已達我一看見他便不繼續看下去的程度。

今天大市牛皮了一週多後爆邊突破上升。

財演表示沒有散戶可以因此而受惠，因他們一直在中資股跌得很厲害時勸喻散戶不要買入，今次升市主要是中資股。又今天升，明天可能反跌，要明天收市前企穏才。。。。

古謙未聽畢已關上電視，頓時耳根清靜。

要算我沒有統計，除二三線股外，就觀察今天的升市是相當全面，當然中資股升幅尤其顯注。散戶有沒有趁低吸納我不知曉，但這個財演肯定沒有伺機入市﹗

沒有人能預知未來，那多好，我們可以很放心地放棄估市，最重要的是也應不需要別人替你猜。

找對方法加上耐心，我們的回報表現可不會遜於所謂的『專家』。

今天沒有任何操作。

富人心態也須靜待時機

靜靜地又是寫網誌的時候。經常瀏覽談有關理財、投資的網誌，大家異口同聲都說富人心態，財務自由方法。

古謙也曾經鼓勵年青人多學習理財、投資的知識和方法。其中一個最重要的原因是時代大氣候已轉變，如果沒有做好這一環，對往後生活保障會出現佷大問題。

以前我廿多歲時『炒』股，朋友們都認為我投機取考，而當時的我確是什麽都不懂，當然就只有一個結果~輸...好多好多。

幾番嘗試後，我發覺當時的心態能耐都不適宜買股票，就再沒有參與其中，時辰未到不可強求。找一項配合自己性格的方法，現時的資產大部份都是由磚頭得來。

事隔多年，老朋友們都不再用以前的目光去看我，因為他們終於明白到投資的重要性，也有做股票買賣。而且今時今日，對我的理財之道是褒獎有嘉。

在投資/機背後，我經常堅守一個最重要的原則，『量力而行，後果自負』﹗(正如葉問齣戲，呢度係兩個原則) ~但同樣重要。

以前供樓不像現在低息，當時要11釐多。不能仿傚某些財商高的朋友般的方法，以按揭加大自身入息槓桿(用這方法的財技要更高，慎防加息週期)。

另外，在買股票時從來都是實股，總之一定不可能輸至要家人協助償還。

你可以吸取經驗，但一定要自己負得起而不會『一舖清袋』甚至令你欠債疊疊的結果。

大家經常提倡富人心態，我又覺得我們要錢為我們工作，也得靜待時機﹗

有道是聚沙成塔，那麽也一定要由底一層一層起上來，奠好根基的大前題不就是要工作、儲蓄待自己有足夠『彈藥』去實現理想。

所以，請緊記我所指的並不是一朝發達、炒股炒衍生工具借孖展的投機方法。而且每個人的資金、可承受的風險各有不同，決不可孤注一擲，也不可依樣葫蘆，照單全收。

今天操作

每個人在學習或面對考驗時，都有不同的領悟能力。今天未能掌握到也不要緊，最重要的是認為對的堅持下去。當下，找個自己覺得舒服的位置，在現有的能力圈範圍內自在的進行要做的事便好了﹗

今天沽出早前買入的水泥股，照原定計劃購入時不打算作中期持有，如有機會便伺低再入。

斷食2(4)

7月12日

覺得自己精神好少少，想做啲家務。

1 吸塵

2 落雨收衫

加埋呢日終於有便，好吃力先攪得掂。

平時輕而易舉的事，是日做完之後好似去到空氣好稀薄嘅地方咁，歇好耐先平服過嚟。

家人對耳唔靈光，要好大聲先聽到，同佢講嘢時我像啲妖要吐粒內丹出嚟咁，元氣用盡﹗

舌苔超厚同白，清極都唔乾淨。

又嘔咗兩啖嘢出嚟，前幾日啲水、泡係透明，今次就係淺啡色重有啲細小的渣滓。唔明，都冇食嘢咁耐個胃重有嘢？味似我哋醃的酸梅，唔通已經喺個胃發酵咗好耐？

我諗我個胃都好差。

睇咗個節目，原來紐西蘭有啲人專訓練啲狗嚟捉野豬。獵豬犬會包抄圍捕隻豬，追逐完一輪之後，嚇到佢呆企喺度，跟住個獵人就會揪起對豬腳將佢翻轉，再用刀將之殺掉。節目主持人苦苦哀求個獵人放過隻豬，基於獵人的『天性』，僵持咗好耐獵人先肯放。隻豬驚魂未定，好明顯流著兩行眼淚，好可憐。以前我食少啲肉，係因為想健康啲，但而家可能會再食少啲。

斷食2(3) - 好轉反應

7月9日

晚9時許，有人一回家便問我可以食得嘢未，有好正的德國腸。我就入房。唔係瞓，係痛﹗都可算係黑暗10幾小時。

7宗痛
頭痛、牙痛、面痺、手痺、胸口痛、胃酸不停湧上、腳痕同時間出現。

7月10日

凌晨4時許，小解時發覺雙手手背呈土灰色，手掌血管暴現、漲起、紫藍色。跟住打後多次尿液都有泡。整晚都冇睡。真佩服嗰啲斷食期間仍工作的人﹗

但係，有樣疑問，斷食其中一個原理係減低咗消化用的1/3能量，以提供更多力量使身體復修內部機能消除病灶，咁，做唔做嘢好呢？

唔知幾時開始，面痺、手痺、胸口痛的感覺逐漸消失，其實咁快開呢個病歷file我都覺得好奇怪，因為我喺2005-2006年就係工作過勞而成日痺，重有經常流鼻血。據講，在斷食期間係會將以前啲病發番出嚟治癒，係叫做好轉反應。一啲唔明嘅人會好驚，跟住停、食西藥，係會重弊。試想吓就好似台電腦要reset，又突然被干擾咪會攪round晒囉。今日都重係挨挨瞓瞓的一天。

7月11日

半夜2點幾，冇氣冇力咁走出廳。屋企人未瞓，就同佢講我尋日嘅情況，舒服咗好多。把聲又好似有番氣咁，佢話我面色好番啲。

今朝精神好咗，眼圈冇咁 凹陷。仍有胃不舒服。 已經冇肉的渴求，但係就有好多次想即刻停咗斷食，最想飲西瓜汁﹗

還有兩天，要堅持﹗ 

斷食2(2) - 清潔舌苔

今次斷食同上次唔同的地方， 係『肉』念太強。

7月6日

晚，飲完杯橙汁之後，好早上床，但係個腦就不停諗住乳豬、雞翼、黑椒牛柳﹗

7月7日

仍是飲汁日，飲咗芹菜汁同橙汁，沉便一次。屋企人食肉醬意粉又乜又物，我索性佢哋一食嘢，就入房。上次斷食的時候冇咁想食嘢亦冇乜諗。

7月8日

今日睇多啲有關斷食文章。飲 紅蘿蔔汁，下午西芹汁，本來打算一杯菓一杯菜汁，但家人見到芹靚又買，我話俾佢知之後5 日都唔食唔飲，佢話等5 日後先飲呢棵西芹喎， 因為它夠『新鮮』﹗ 把心一橫，都係由今午開始唔再食嘢，想早開始早完，做咗一次意念排毒。晚上家人又問我飲唔飲湯﹗都係入房罷了。幾日都有做腹部按摩， 越嚟越按得深，今晚重有好多度覺得痛。

7月9日

家人再問我食唔食麥皮。今早口苦、尿黃、心跳得好快。以為舌苔很重，但又唔係。﹗自從開始每日清潔舌苔之後，條脷乾淨好多。好簡單，大家都可以試。用一隻湯匙，由舌根向舌尖外刮，但不要用力過猛傷到味蕾。今次口苦，應該都係排緊毒。之後排出的尿，有好強烈的西藥味。又有想嘔的感覺。午，有人 開餐，於是我又入房，畏冷、有酸水由胃湧上來，而且耐唔耐會有痰，我想這些都應該吐出。講住咁多先。

斷食2(1)

今日開始預備做期待已久的斷食第二波。我打算頭尾3日飲蔬果汁，然後5日只喝清水。

前幾日因為要跟同事敍舊，所以就食埋嗰餐先斷。呢幾日都係大魚大肉，食得好暢快。

既然凡心未盡，就嚟又食又排平衡大法，趁未累積到病之前排咁啲毒。

有人可能會問，點解耐唔耐就要攪到自己咁，攞苦嚟身。

要記住表面好似冇樹有幹，但係我有

口氣
體味
熊貓眼
肚腩
越嚟越多癦
以前冇而家皮膚對清潔劑敏感
唔係日日有便便
胃酸倒流
失驚冇神胃痛

車，古謙，都市人十個有九個都有以上情況架啦。

所以咪唔好以為自己好健康囉。防範於未然才是上上之策。

食嘢係我開消之中佔最大支出，如果第日練到可以唔駛食，慳番好多好多，哈哈哈﹗

講笑咋，不過我發覺唔食一輪嘢之後，食番又會滋味啲，呢樣係主菜搭嘅甜品。

主要原因係我希望第日唔駛死得咁辛苦。

(寫呢篇網誌期間去咗兩次洗手間，但我今日只係飲咗一杯乜都唔加的檸水同半杯西芹汁，真係當面見功。)

又在自言自語

有人會認為咁樣留意啲股票上上落落好嘥精神。

係架，基於客觀條件唔係人人都有咁嘅時間，另外人各有志，採用的方法又大不相同。

(1)  月供

   唔想為入價傷腦筋，限住自己嚴守入貨資金的紀律，儲股票長揸，發揮複利的巨大威力。

  唔係我杯茶，手續費太貴，我喜歡盡力捕捉抵價的過程。

(2) 頻密交易

  雖然已成功利用銀行優惠減低交易成本，但密密出入只會令自己容易方寸大亂，出錯機會率提高，睇有啲股友不停追逐爆升股、牛熊證、衍生工具好頻撲， 轉身又要快。 佢哋有佢哋的天地。

  我呢個衍生工具絶緣體都係鍾意慢慢思考 ，或者耐唔耐啱價就短炒吓，拉低吓平均價咁啦。

(3)  到價即入，坐定定等收息

  這又分密密睇住同眼尾都唔駛望個市，後者 要對自己選股很有信心先做得到，問心，有幾多個人入咗股後係唔望個市，此乃已入化境的高人。

  我都希望自己做到儲股票同等收息的能耐，但我唔會長揸唔放，呢個同收息又有好大的矛盾。一切由心出發就唔好理收息住。

  開倉階段貼市好正常。實況又印證咗我細注分段入呢個方法好好，由於今次所選的股出現破完又破底價的情況，全靠呢個方法股均價與現貨價仍在可接受距離， 甚至已收復失地或有微利達安全水平。再者，相比起16000點嗰役，那時我已成功在接近底位撈到小注的貨，但卻只賺若10%。

  今次我傾向當股價向下調時提高注碼，每隻股票都設定投放資金上限，以防自己失控越踩越深。初擬部份待24000點(看勢調整)才沽出手上的貨，給自己一個目標去堅持。

沾手殘股確是要有驚人的忍受能力，全世界都喺度踩佢踩到一個仙都唔值，高位大注入咗的又鬧爆佢，有人又幸哉樂禍地冷言嘲諷話到幾多幾多跳十次樓價先入。入咗又段段蟹貨有排唔升續尋底。

如果唔係有不利因素，又點會咁低價呢。大戶十次有八次弄低之後，入夠貨又唱好再來跳舞亞高高。

生十個仔揾幾個去搭順風車尋寶， 撻傷咗重有其他仔養，又做吓實驗。

醜股大翻身

就算係小注分段吸納，如果買入個股，總會有腦交戰的時候。

暫時嚟講我都好滿意自己近期的操作。

甚至早前一刀劈落去的那支股票，其實我已經等佢由支持位跌咗接近30%先落搭，

但佢未跌夠，所以沽~ 之後升番3%，有人問我會唔會唔開心？

又冇噃，要買番都唔係差好多啫。但以我平時的性格係唔會吃回頭草﹗

不過而家嘅我，似乎同以前係判若兩人。

今早同板塊的殘股升，自己放咗嗰隻都係跌，

跟住呢隻已經令好多散戶心碎又好似俾人行咗腰閘之刑的醜股，

竟然有大盤買入係咁掃，我就喺電光石火之間即入番沽出的股數再加@@咁多股。(低於沽出價入)

跟住就見佢係咁升10%以上。

我心中隻惡魔又喺我個腦叫我沽貨，我就同佢講：『咁有耐性等而家開始漸露曙光就走，你唔係同我玩嘢吓嘛，夠膽蝕唔夠膽俾機會自己追番？』

應該要留心觀察，加注添呀，已經離底部不遠甚至今日係見底回升了﹗

超乎我的想像 ~ 有趣

最近有好多好睇的電視節目，例如週五晚明珠8:30都市馴狗師。

首先要講明我唔係愛狗之人，童年曾經俾自己家犬咬過，而家隻手都重有疤痕，

前兩年又無啦啦俾幾隻大狗追住嚟凶兼差啲被攻擊。

不過我冇怪啲狗，都係啲狗主唔了解、唔識敎同唔負責任才是元兇。

講番都馴師真係型到爆，佢除咗對狗的行為同心理極為了解之外，

我最認同佢的就係馴練隻狗唔難，要啲狗主學識點駕馭自己的愛犬就好花時間，學好耐都唔掂。

我覺得好多時啲人就係自己對件事已經無能為力，先揾有經驗的人幫手，咁好心就聽吓人點講同跟住去做喇，

佢哋偏偏就係駁咀駁舌，如果自己叻晒就唔駛出錢請外援。

另外，就係啲狗主成日將隻狗當咗做人，淨係顧住同溺愛隻狗到唔理其他人死活。

佢會關心要留隻狗喺辦公室日對夜對，而唔理一有人入嚟寫字樓佢隻愛犬為咗保護地盤同主人就一支箭咁撲去咬人。

次次都係咁撲係咁咬，發生咗好多次，你話黐唔黐﹗

如果識敎，狗係好忠誠同可愛的動物，尋日又睇到一個發夢都諗唔到的鏡頭影像，

一隻飢餓的北極熊已經作勢襲擊一頭被綁住的雪撬犬，但係當隻熊見到隻狗笑住咁逗自己玩的時候，

隻熊的眼神一瞬間就由想將隻狗置諸死地而轉為柔和，重兩隻動物一齊玩扭撲遊戲，

跟住隻熊又帶埋自己啲同伴嚟同隻狗一齊玩，

大自然，真係超乎大家想像，乜都有可能發生的奇異世界﹗

手起刀落

今日檢視股票組合，沽了一隻大市升而它倒跌的股票。

其他有些利潤的股票也都不沽。亦有心理準備大市回調，反升為跌，實屬平常事。

多年前曾經遇過一位婆婆慨嘆：『以前的利息還可以支持到生活，但近幾年不可以了﹗』

她獨身，但無論生活多艱苦，也不願意領綜援。

我經常懷疑她可能是『捱義氣』協助友人保管資產而令自己失去取綜援的資格。

理財、管好自己資產的能力該由小培養，

年青人大多都是拍手無塵，有的卻是從工作賺錢的能力和時間，

有機會讓自己在管理資產時犯錯，從而學習改良理財和投資的方法。

資金由少開始，可能蝕的數目少一點，接受程度又大一點。

只要不涉及借貸，在能力負擔得起的情況下，

掌握好這技巧終身受用。

除非閣下的退休金/強積金足以令你退休生活不愁錢銀地活下去，

否則，若果等到退休後才運用有限的退休金去學習投資是一種超高難度十分危險的行為。

但我發覺不少人都會選擇沒有鍛練、沒有安全網的情況下『勇敢』地走綱線，有時甚至連雙眼都矇起來去做。


以前的我，遇到升市會殺綠存紅，死抱著一只持續下跌的股票不放，甚至不停地加碼，直到股價跌到令我心灰意冷然後才沽出，通常是在最低位﹗

今天我的做法是檢討自己有沒有犯錯，如果真的走錯了便承認和作出補救。

股海博奕總不可能百發百中吧。

不為資金不足而套現，而是作好風險管理不讓虧損擴大。

另一方面，升市時有上升動力的股票就讓它們為我的資產進一步增長。

今天的我做得到﹗

錦繡念一生

又摒棄了夜眠甚至不睡的壞習慣，今早起來，看看新聞就開始找尋有關念力的文章來閱讀。

不要小覻念力對自身、心、靈所發揮的強大力量。

既然心理可以影響生理生病，那為何念力不可以避免甚至治癒疾病。

曾經聽過一個驚人的真實個案，某精神病院中的病人令群醫束手無策，即這些病人已經『癲到無得救』﹗

這個世界，惡人自有惡人磨，但是不可理喻的瘋子行為更可悕。

最終，一位醫生奇蹟地將他們全治了。

他用的方法是，每天對著這批病人的病歷頌念著對不起，對各個病人表示歉意和送上祝福。

自己的身體健康、個人修為、去除壞習慣、學習新事物，

都是可以憑一己的意志力和意念驅動以更美好，

從而善念又可以令社會更和諧﹗

古謙除了收集股票外，也希望可以收集各勤勞的股網友的善念，

使社會尤其是年青人懂得適時適地、考慮別人感受的表達訴求，

去戾氣並細心聆聽、思考別人的意見，

尊重別人也有擁有真正的民主和表達的權利﹗

曇花一現

前日媽子無喇喇話要入工行(佢喺股票呢瓣真係乜都唔知嘅 人)，見個價好抵，就幫佢入咗2000股($4.41)。

今朝見有得賺，就問佢放唔放，今次投機走一轉$800($4.81)。

佢開心得嚟話唔知講乜好。

問我有冇買呢隻，冇喎，而且今日本來有微利的股都回番晒。

今日有入貨，而家入市，情緒冇乜起伏。

飲與食

前嗰排認識咗健康飲食新知識之後，有啲迷惘，唔通以後都只係一直飲菓汁、食生菓同生嘅菜糊？

前者都好滋味，但生的菜汁就真係暫時未完全食得到。

而家做法係，每日都有飲菓汁、煮熟啲菜先用攪拌器打爛嚟飲、有食肉。

每餐盡量只食一樣嘢。咬得好爛先吞。

平時一日起碼飲一至兩杯咖啡，蝦，已經兩個禮拜掂都冇掂過喇。

呢方面我真係要俾個credit自己﹗

之前係酒，而家係啡，飲又得，唔飲亦得~～　得咗﹗

嗜甜人須知，白糖唔係身體要嘅嘢，所以係食極都唔夠。轉化過程令身體加重負擔。

如果吸收夠菓醣之後，就較容易搣甩舖癮。

我尋日煮蕃茄就用咗乾甜菊嚟代糖。

啲健康飲食人士真係好花心思將優質食物去扮唔健康食品的口味，

例如一個用咗７００幾蚊嚟做唔駛焗冇麵粉冇蛋冇奶的蛋糕；

幾佰蚊一樽仔我唔記得叫乜名的東西扮檸檬茶。

其實都係為咗滿足想食又唔想吸咁多毒素的心理。

而家的我都係會照食不過食少啲，

會排但唔要求自己太極端去清啲毒為原則。

今日會飲番杯啡﹗

再執平貨

前週末去咗竹戰，今次有向各雀友分享吃生、洗腸和斷食經驗，氣氛似乎比平時輕鬆得多，佢哋都好有興趣聽咁。

鬼咩，見到我只係斷咗兩日幾就成個清減咗，冇前嗰排咁水腫。

吹水期間，有個雀友話因某些優惠同另一半喺工行有個聯名戶口，呢輪工行將香港工行同大陸link埋，工行夠膽死在網上顯示上冇咗人哋個戶口﹗幾番投訴見番戶口資料後，佢哋兩公婆想透過網上買基金時，畫面就只係error。打電話去問又話暫時未得，叫個客遲啲再試。過咗幾日再試又係唔得。但係後來就發現買基金的錢已經扣咗唔止一次，但冇買到﹗
(聽到古謙O晒咀)﹗﹗﹗
最後好彩事主醒目有攝下交易畫面佐證，同銀行續單交易對數﹗


同佢哋講起股票，雀友想得太多就入咗金股。雀友蔡夫人就$5.4x入咗建行，但係就話個市跌到好得人驚，又重複講有乜唔妥都可以要嚟收息。

老實同佢哋講見個市咁跌法我好開心，佢哋話古謙梗係冇貨，冇再回答。
(有貨都未必一定唔開心嘅，不過都唔解釋咁多咯)

我又再問蔡夫人，而家買股票時，知唔知自己買緊啲乜呀，佢支吾以對，我都無謂再傾落去嘞。總之各人有各人的方法就是。

竹戰賽果報捷

今日操作，早前入過的股票運用了第二注資金。另外再買入一些別的。務求做到升市有貨唔嫌少，跌市有錢繼續吸。

斷食1(3)

6月20日

今天很不自在，因一直也未能排便便。近期吃下去的東西排清，積便又未到，有一點難受。

斷食完畢想該像機件重設，由新生嬰食糧開始先喝流質如菓汁類，循序漸進地吃糊狀食物，適應了才吃固體。

今次我復食做得不太好。下次一定要再小心一些，這是很關鍵的時刻，處理得不好可會很大件事﹗

早前約了朋友們下午共敍，也有心理準備有些友人會半信半疑，或覺得太繁複，事實在職人仕要辦到確需佰倍努力和信念。

我的精神憔悴，晚上喝了一碗羅宋湯，也覺得相當滯肚。

待巴士回家時，有虛脫感。

6月21日

早上6 時終於有便了，久違。今次完整且有一些黑色沾著，看見了挺開心，努力好像有小許成果。

隨後幾小時可能因為吃了西瓜蓉(略凍)加生蕃薯葉(洗得不太乾淨)，兩次便(有泡、臭)。

晚上吃固體，將食物咀嚼致漿狀，雖然沒有平時般可口，但吃得慢飽得快，唾液徹底混合食物使胃部能消化更佳又可減低胃部負苛。

這幾天都有持續做肚部按摩，感覺塞在內臟的氣喘動排出，肚部有些地方已較以前柔，田雞肚漸離我而去，開心﹗

小注怡情

今日又有機會小注入貨。下星期有冇再平啲呢，又睇吓點﹗

斷食1(2)

6月18日

早上8時排便一次，但那已是42小時前吃進去的食物

吐酸水多次

渾身乏力

試圖做腹部按摩或意念排毒都做不來

為有隨身體狀況而行，什麽都不做

晚上整夜輾轉反側，尤其是頭痛，應該是由肝燃燒脂肪成酮體輸送血管所做成的不適

6月19日

早上8時停止斷食，慢喝了杯鮮榨橙汁，因為身體還未適應馬上吃固體食物

11時許，吃了一片西瓜，咀嚼很爛才吞下，但也覺得小許難消化

下午2時喝了杯西瓜汁，胃部開始慢慢適應過來

今次合共斷食了64小時

現在精神多了，肚部的漲實也舒緩了些

家財千億也不如有健康的身體，希望自己活得健康快樂

下次再努力

斷食1(1)

排毒、斷食一定是個人意願，樂意而為之。

以下只是本人排毒記錄，屬實驗性質，筆者於事前閱讀有關書籍及請敎過有經驗人仕從而作出適合自身情況的方法，敬請讀者切勿模仿。

敷肝~
前兩晚各一次

今天早上
排便一次

有需要時喝清水

清潔舌苔~
吃生兩日舌苔厚黃

腹部按摩~
肚實，尤其是肝胃位置
胃氣多

脾氣暴躁一次

做舒肝訣兩次以緩解不快情緒

回憶起過往包袱，頓時由胃部吐出一口烏氣

意念想像~
由宇宙接收能量，根據消化系統次序進行清洗
想像得道修行者替瘀塞胃部、腸道的食物殘渣超渡、逐段清洗

感覺反應
咀內生津
胃嗚
冒汗氣血充足
腸子蠕動
排尿量多
放屁
酸液由胃部擁上
舌苔白有齒痕

耐心向家人解說，得到支持

沒有飢餓感覺

晚上9時就寢，按摩肝部

左手無名指發熱


書於斷食25小時後

九唔搭八

有一日狂煲黃子華楝篤笑，其中佢有提到已經係第四次中『冧把降』，聰明的股友讀者怕且都唔駛我多解說何謂冧把降....

吓，唔知....冇奶油喎，大部份曾買股票的人都中過故喎﹗

乜都唔駛知唔駛理，淨係聽人講個冧把買嗰隻股票，黃子華話今次叻咗，有問多一句如果個市塌隻嘢點先，

介紹人話都冇事買得過，黃稱自己今次又輸咗一半身家。<筆者按希望佢今次只係嘩眾取寵攪吓笑﹗>

好深刻印象，97嗰次塌市佢真係由心而發，尤如淌住血地訴說，反省點解會用畢生積蓄去買自己乜都唔知的東西﹗

對某些人來講，歷史確實不斷地重複。

~~~~~~~~~~ ~~~~~~~~~~ ~~~~~~~~~~ ~~~~~~~~~~

記得上次個市升到勘勘聲，有人問我點解唔買股票走去買磚咁麻煩，我冇答佢，唔係我吝嗇而係我知道同佢講都冇用，所以無謂潑人冷水。

一個唔知自己接緊火棒，又因為轉一轉手就贏到錢去旅行花費，炫耀自己有幾叻的人，會聽得入耳咩﹗

結果？嗰位仁兄而家成日都收到好多不同公司寄去的公司年報，又放咗好多隻紙船去大海，等緊啲船自己漂番嚟上岸。

前嗰排我喺市況低迷時談買股，佢冇再答一句嘴。

並非要批評別人，而係身邊有多如天上繁星的例子警惕住自己。

~~~~~~~~~~ ~~~~~~~~~~   ~~~~~~~~~~    ~~~~~~~~~~

又話說，有個在中資公司工作的人講佢啲內地嚟香港工作的同事買咗金條係會諗到用郵寄方式寄回內地，係，你哋冇睇錯，係『金條』﹗聽官當然睜目耳側，佢哋一係蠢、一係唔志在。

但當今日睇完個電視節目，得悉原來舉世知名價值連城的藍鑽『希望之星』曾經都試過俾當時的物主寄去美國捐出嚟做研究時，頓然明白一點，無論物件有幾珍貴，當物主已經視之為身外物而且與佢再無任何瓜葛，在其他人眼中再有價值的東西對原本的物主來說同一幀明信片冇乜分別，運送途中俾人偷咗又如何﹗

近期操作

對於因股息而在臨派息前買貨的人，近期都可算是災難，派完息後股價拾級而下，『偷雞唔到可能蝕咗個雞棚，傷﹗』

但那些為財務自由舖著康莊大道的投資者，立心以股息為被動現金流的朋友，卻不會為短期下跌而憂心慽慽，他們有的是信念。

古謙，兩者皆不是﹗股息高低只作買入的其中一項指標，最終會看價位行動，高追沒有我份兒。

等~~等受傷的獵物筋疲力竭才出擊，到牆角的猛獸誓必會特別凶悍，所以一定要網開一面，不是給狩獵目標，而是給自己留有後著。

找到認為有信心投入資金的股票，前哨資金小注，要嚴守紀律，待股價再跌得更低殘才再度運用第二筆資金，

平注或金字塔式加碼，得要看對該股有多大信心與及對後市趨勢評估，如果看錯，金字塔壓下來後果會很嚴重，事前要明白這風險。

近期優質股才展開跌浪，所以未為所動。沒有任何操作。

今天又放了另一哨兵買入殘股，雖然恒指仍在21xxx，有些殘股幾近海嘯價，個人認為是一個機會。

Phone人都瘋

呢個世界越嚟越變得有趣，以前啲人攞住個啞鈴咁重的大哥大水壺出街就自我感覺良好威過威士忌。

科技發展，跟住人們又追求電話要夠精緻鬥小巧以方便收藏。

家吓就要多功能鴨舌又番轉頭捧住個屏幕通街走都唔覺笨鈍﹗佢哋攰唔攰嘅呢？

還是在職場打滾，工作上有需要、又怕俾人眼望望笑落伍，能力負擔得起，擁有一部智能電話係無可厚非。

我呢啲冇需要、唔從眾的死硬派，從來都唔理會人點睇﹗

咸豐年前的大哥大我買唔起，當時我已經覺得有乜需要成日都守住個電話？

究竟係人用電話定係個電話支配緊大家(靠電話洽談生意的唔計).....

聽過有人曾經跌過電話落馬桶....吹乾再用？如厠都咁唔暢快，為乜？

近期就遇到咁嘅情況，第一時間已經揾到用『原始』電話的朋友E，

跟住打電話俾兩個已經用緊智能手機的朋友A&W約飯局，無獨有偶，都打唔通，W的電話尚且可以留到遺言，另一個就關機狀態。

咁分別留短訊啦，一星期後，W回短訊話剛發現我的短訊問幾時飯局，覆W告知我已經揾咗A成個禮拜都杳無音訊，請佢試吓揾，

又過咗一日，W成功Whatsapp到A，

後來W重叫我以後打唔通電話留口訊嘛﹗﹗(佢自己去咗旅行聽唔到口訊).....再者W重反問我有冇Whatsapp？

但我腦海當時只有What's up﹗

2.88%

話說天氣熱到爆嗰日去到南洋銀行，點知做唔到人仔定存，因為開新戶要3 個月內有效住址證明，不是味兒。

但，原來凡事總有玄機，第二日帶齊文件再去，就俾我遇到個好sharp醒cutety的理財顧問，好過上次手指指，新戶要求十萬話廿萬的理顧多多聲﹗

發現多一樣嘢，南洋唔當由中銀轉來的錢為新資金，所以又要將中銀支票入去第二間銀行過過冷河，想要2.88%都需要好多重耐性。

今次開戶另外一個優惠係三個月內股票交易買賣免佣。

潛龍甦醒來

今日終於的起心肝，問咗不同銀行人仔定期利率，匯豐、工行都冇做呢方面推廣，半年約0.6釐，

相比之下南洋同永隆比較進取吸新資金，下星期又要運轉乾坤開新戶口。

吉倉半年，昨天入咗小小跌到殘晒的股票，沒有天生投資能力，人總要不斷學習、嘗試、檢討、改進。