F1~電影

週日,早醒。

等小石人瞓醒。

當佢開眼時,

我問:"睇唔睇戲?"

佢答:"去"

即時梳洗起行。

隻嘢又係一見小石人就發出不滿聲音,啄晒木。。。➡札炮。要等我哋出完街回家先餵lu

佢問我點解咁有興緻睇戲?

(本來是週日大隻佬約咗佢去馬料水搭船時影海鷗,去到塔門唔上岸原船回程,問我去唔去?我表示以前份工成5年每日搭來回兩個鐘頭船,冇乜興趣齋搭船陪攝。後來因為隻特別鷗已冇出現,活動取消。

事前我有提過問佢如天氣許可<又打颱風>,有冇興趣去睇戲,畀足心理準備佢。)

我:"估你會鍾意睇呢齣"

去到睇戲場地,因為都算尚早,間商場好少舖開,呢度出名三尖八角又九曲十三彎難搵,佢有少少忟憎。

我:"出埠去旅行都係咁,有好多不確定性。"

問商場職員,佢哋預備緊開場,都好有禮貌,其中一位女職員非常主動話帶我哋去搭電梯(該時段有電梯女郎)

去到高層電影院,咦,只得自助售票,好彩有老公喺身旁,順利買到。離開場約半小時,跟唔到原定計劃去該地庫茶餐廳,改去星巴。
 

齣戲好好好睇。佢果然表示非常滿意。原來佢以前都有跟開F1賽事。本來我以為重有4DX,哈,上畫咗咁耐,一早冇咗,都好,可以更集中精神睇戲。

(冇冷場嘅商業片,值得入場感受氣氛。回家後又係照例睇好多相關youtube片。

話題又多咗好多。

小石人以前識個在街飈車的人,據講該人有參加澳門賽事,作為乘客的小石人都跟車刺激過一番。自己揸電單車又係體驗過速度嘅爽。車 槍 軍事 攝影嘢,講有關型號 知識好似知好多,我就0兼冇乜興趣。不過佢想講我都會聽。)

散場後我話去食牛河,我指戲院附近越菜,佢以為我講近排食嗰間泰菜。

去到附近越店,當然係要排隊,唔,咁少機會嚟到附近,我想食呢間喎。。。

春卷右下角小碟係碌冧,呢間有放白同紅蘿蔔。

今次坐呢個位可以影到另一幅畫。

教宗選戰·贖夢

前晚家中中庭發現,小石人用電筒照完就話要留嚟影相。影後放生。

(睇戲車程中佢send畀大隻佬睇,對面重以為小石人去咗影微攝。兩人約咗明天出洞影小生物。)

昨天(週日)早上問佢去唔去睇教宗選戰。

佢:"冇興趣"

頃刻,佢:"我可以陪老婆去睇。"

冇興趣可以唔去,好自由。上次問佢去唔去睇贖夢,佢唔想去我咪自己去。其實呢兩齣我都知佢唔會有興趣睇。

贖夢

主要睇之前瀏覽youtube,張家輝話呢次佢一定要拍自己想拍的東西,所以好多嘢喺呢齣戲特別堅持。可能之前幾部執導作品都要融入巿場元素,有票房先有機會繼續。

畫面感好重,極盡感官刺激功能。佢想營造做夢時那種天🐎行空飄渺氣氛好成功。陳法拉演出實在令人讚嘆。

網上有人話嫌佢冇注入心理學大師榮格等的理論深入闡釋覺得唔夠深度。"大佬"佢都要顧及入場人士嘅喜好,加得太深我又唔明又冇咗趣味性,一齣戲嘅時間可唔可以咁貪心?做效果燒錢超晒預算連主題曲都自己唱返。

人人都可以"評論",試圖理解人哋拍嘢背後嘅一些內情,可能難過見到好勁嘅外表發現就話呢樣唔夠好嗰樣失望。始終佢哋拍youtube都係評論人哋辛苦做出嚟嘅嘢,最重要有流量有人睇夠爆夠高深夠有見地。

今次張家輝用戲內角色身份在現實生活中做宣傳,真係好有諗頭。

教宗選戰

呢齣想睇咗好耐,幾個月前上畫時在youtube視頻只要有電影亞舒生講過。本來即時唔睇影評住,諗住睇咗戲先觀看。當時冇動力去到咁遠睇事關當時我覺得呢齣值得去IFC級數影院嘆。最後無事(冇去)。
 

前週六又在手機碌吓呢齣戲資料,喂,原來有場18號週日5點幾圓方上影,最正係得十幾個人買咗飛。咁嘅環境,嗰啲聽電話及傾偈嘅觀眾怕且唔會同場出現喇卦。

不過我都冇網上訂位,都係去到有就有,冇就行吓當一個活動。

因為老公都一齊去,又增添咗好多動力。

早到咗好多。

買飛時突然(目立)到長者優惠。個售票員話,自助買票成人有九折。個腦load緊之際。我問老公:"你唔想要個九折優惠?"

Loading中。。。。。。。

最終,超讚呢間影院售票處安排。

個售票員放咗個牌喺案頭。出咗嚟喺佢櫃位隔離個自動售票機幫我哋撳撳撳。我連放信用咭嘟位都搵唔到😁。

如果我網上購票,分分鐘就畀正價$220,而家$169。

係咪要耐唔耐出吓街適應吓個世界。其實之前兩次網上購票後,到戲院取票機攞飛又係要攪一輪,因為好耐先做一次,未成為長久記憶,比較🐷鈍。

之後好多時間,行吓有乜想食的食肆或者睇完戲後睇情況決定喺唔喺嗰度食埋晚餐。長車程來回出唔到街太耐,以至未必喺街食。而家喺屋企食嘢舒服好多好多。

前嗰排睇咗一些坐墊想買畀老公,未執行去實體店試吓先,試到適合才買。

點知:入完Osim後想買普通墊事宜一切就改寫。答應售貨員當我哋睇完戲回頭買貨。

因為電影就開場,入場前佢重話要買嘢食。(經常本來大把時間就變成臨尾急趕)

剛坐下唔夠幾秒就入正場。

冇興趣宗教話題的,可以以權鬥爭上位題材嚟看待。

因為講教庭,取景古雅宏偉;色彩配襯耀目亮麗;配樂令文戲增添緊湊節奏。

我的疑竇是究竟男主角是處心積累登寶座,定係做做吓選新教宗統籌人在過程中勾起爭奪嘅野心呢。

完成買按摩產品後,戲院內吃的東西重未落格。

回家途中買外賣回家,我睇多一次只要有電影相關影評。因為睇完齣戲,老公都變得有興趣食住晚餐睇視頻。佢欣賞舒生做影評嘅認真,介紹導演及演員們過往經歷及作品,資料搜集充足。鏡頭運用嘅解說。

尾部十分鐘扭橋,舒生覺得又係左膠DEI文化令齣戲功虧一簣。

呢一點喺呢部份我就唔認同,齣戲有呢樣特別情節作結尾先有話題同爭議性,令觀眾印象更深刻。

破·地獄

 打颱風,11月14日~兩口子入塲睇呢齣近期熱爆的電影。

再試去嗰間上次睇城寨嘅戲院。一見到隔離係兩個貌似比我年紀大的女人喺度傾偈,心知不妙。

前期廣告佢哋都係🐔啄唔斷講講講。

我問小石人點關閉我部三星,因為唔想淨係靜音,生怕有啲app冇閂聲電影播放期間嘈到人。

老公亦不滿嗰兩個女人的交談聲,我在同小石人耳語,等開正場先。

當時後面又有人唔知用手機大聲播緊啲乜X嘢。前面有位觀眾嗌出嚟:"靜音啦!"

估到隔離兩條婆,開正場重講。

我:"麻煩畀個安靜環境等大家欣賞(部戲)"

立時佢哋收咗聲。

有一場女主角(救護員)搓緊個休克病者時,隔離個女人手機響。

戲期間啲電話聲此起彼落。

觀眾質素之低破壞晒入戲院睇戲嘅氣氛。

人哋劇情慘,佢哋笑。難怪有啲舞台劇演員話她演的角色喊到死去活來,啲觀眾當睇笑片!

而家睇戲前,有啲值得深思嘅片我會睇好多影評,我唔介意預先知道劇情的。反而有啲位特別留意到。

今次預先帶定條毛巾入塲抹眼淚又提小石人自己袋定紙巾。我接近喊足大半場戲。

睇畢,同老公話題多多。

下次再有好片都係去IFC。希望好運啲。

The First

 

週一端午節喺FA~房安裝咗層架專擺牠的物品,呢項構思想咗好耐,要等Mr Almost fix Everything隻腳好返啲先完成到👍👍👍👍👍👍,重用得返上次裝修時搬裂咗的雲石,非常好,襯晒。

佢又清理吸咗塵,乾淨。今次將亞FA~附近的簾封好等佢睇唔到就唔驚,適當時放咗牠出廳的紫膠櫈。

跟小石人取經,吼隻🐦的表情好啲先影,似唔似笑緊?

睇佢前主人幫佢改乜名就知對隻雀仔幾有期望。。。上帝創造的第一個女人,唔怪得知咁霸道咁惡!

近期睇的兩齣戲:

The First omen

The First slam dunk

兩齣都係N年前經典作品,近期拍前傳。

佢哋的共通點係暗暗滲入咗現代元素,前者更有很多向舊作致敬位。學小石人話齋,要諗點殺死一個人已經唔易。重要係同一死法唔同場景死咁多件。以前又連修女神父都煙不離手。後者場波打得精彩,雖然你會發覺櫻木花道跌到條Pan骨都已經觸電地痛楚非常但仍在緊急關頭次次都見到佢助攻搶到個球~好好笑。睇動畫又唔使咁在意佢嘅合理性。佢哋隊友間的鼓勵都係講英文"nice",哈,咁多年前日本人唔會咁啦,幾有現代感與時並進。呢齣重要係宮城良田做主軸,由頭帶到尾😄

九龍城寨

 近期圍繞住呢樣有兩單城中熱話,大家又知唔知曾出土咗呢個牌匾,佢查實係叫九龍寨城。

橫睇豎睇,九龍城寨之圍城,都係一齣值得去戲院觀賞的電影,就問小石人有冇興趣,佢都係向我問嚟問去,似乎唔係前兩次咁一問就應承。

咁我話:"你有興趣就假期一齊去,你唔想睇我會自己一個去睇早場。"

呢齣戲叫好叫座,想有好啲位,一係等遲少少,一係要早啲買飛。

買飛前佢問咗我想要乜嘢位,我答咗之後補句,其實都係睇場戲,我唔會因為你買飛唔啱心水鬧你嘅。又問,你以前細個做"錯嘢"係咪畀人鬧得好甘。佢話係,我又估中佢家人中係邊個好似霸王咁鬧佢。好品性唔想損感情的人就係時時在忍讓。

我通常睇戲都係水過鴨背,佢呢,選片好揀擇,唔係我約佢基本上唔會主動睇戲。對佢有興趣睇的在畫面情節方面好有記憶,今次佢一見王九的武打就話"胯好鬆"。(係細細聲喺我耳邊講)

睇戲期間,後面有啲女人在不停講嘢,隔我兩個位的兄台,兩次叫佢哋唔好再傾偈。

點知啲人唔知係咪條件反射控制唔到把口,小石人兩次望後佢(哋)都繼續咁傾。

完場後,同場加映睇完戲畀人X。

隔兩個位嗰位男士在戲院一著燈,佢就企起轉身望住我哋後面班女人講:

"叫咗你哋唔好再傾偈都係唔聽,要傾出去傾啦。咁X老土。"

我一路望住呢位兄台露出我燦爛笑容。

佢望咗我幾眼繼續:

"人哋隔離左右都係費事話妳哋咋。"

後面重有其中一個女人細細聲駁嘴:

"黐線,唔畀人講嘢咩。"

講返戲:

睇完有興趣的片我會上網搵多啲資料。睇戲前就會留意吓佢值唔值得去戲院觀看。呢齣在還原一比一寨城風貌好仔細,搭出嚟的景係好似lego加轆可以推嚟推去,演員又可以在立體景上打鬥走動,由樓上跌落樓下就算二樓地面係穿窿都唔覺怪。入面士多雪櫃飲品、四仔AV帶、公仔書都係真的。

好多Youtuber都話主角陳洛軍係由內地偷渡嚟,但我印象中佢係由越南偷渡返嚟。咁我查看到一條片,導演鄭保瑞明明親口話佢來自越南。

今日小石人放工,我問佢有冇印象,佢又記得喎。喚醒我記起,陳洛軍被送咗入醫院之後被發現非法入境然後係先送入難民營,再有職員幫佢甄別時話佢有兩條路,一係遣返越南;一係申請去其他國家。

另外原來拍咗好多片,如四仔個角色查實有好多新穎招式拍咗而被剪走咗。王九同大老闆合謀殺人嗰場又係剪走咗。

陳洛軍身世,本來係由案中一警察搵到料告知大老闆的,該警察亦想用呢啲料嚟威脅龍捲風退出寨城,呢啲因為某方面的考量又係剪埋。所以有啲情節如龍捲風點知陳洛軍係故人之子就變成唔知點解佢會知?幾時知?

已經成兩個鐘有多,料又咁豐富真係好難取捨。

兩公婆約會完,之後又有好多共同話題。

ENnio配樂大師

 兩個幾月前,睇舒琪視頻"只要有電影",介紹呢位配樂界巨頭的人物傳記式影片。

好想睇。

小石人放工回來,問佢有冇興趣一齊欣賞,即時扑鎚網上買飛。又係去坐得舒服嗰間戲院,三次去嗰度睇戲都係訂有震動效果的椅子。嘻,今次看的電影終於感受到聽交響樂時現場體感。

呢齣接近3小時的長片,很多跟ENnio合作過的導演s、電影監製s、演員s、歌手s、錄音師等等的訪問片段s。因為唔識音樂又有大量唔識的出鏡者,未睇過之陳舊意大利片,資訊又超多。全片大部份都係講意大利文,要集中精神睇晒全片幾蝦人。

不時望吓小石人有冇瞓著~咦,有留心睇咕喎。

佢隔離個男仔就頂唔順早走離場,我隔離個女人就猛咁睇夜光錶、再隔離個女人,喂,妳覺悶就及早離去啦,不停睇大屏幕手機,啲光騷擾住我喎。畀咗好多次機會,我開始忍唔住想出聲之前,在黑漆漆中用凌厲眼神凝視住佢。。。奏效,佢一睇到我面部表情及反光鏡片就立時冚埋部機冇再打開。😎

我哋嘅優勢係事先知道咗齣戲一些有趣情節,我有憶述給老公知道,咁比較有共鳴感有助專注地睇。

ENnio Morricone

開首音效原來係模仿郊狼叫聲,奇連伊士活話,ENnio嘅配樂令佢好戲咗😄。

片中有一段話,ENnio同義薄雲天嘅導演講,佢想全齣戲都用晒排笛配樂,個導演當然話唔可以啦。

義薄雲天,現時Disney+有播,我唔太識欣賞,片非常長,分咗幾次我都睇唔晒,當時想放棄,就係因為睇咗舒琪視頻而將會再睇ENnio咁就完成咗套戲嘅觀看。

有啲情節覺得唔係幾合情理,例如女主角成半世人都鍾意男主角(羅拔迪尼路),又好憎(占士侯活帶壞心愛的人),男主角要決擇時都係以跟隨占士為首選。但係劇情為咗出人意表最終女主角冇名份咁跟咗呢個好憎嘅人。以女主角嘅高傲性格同咁好條件,佢唔使咁做卦。

男主角在長轎車上強女女女主角嗰場又係攞嚟做的。佢非常鍾意男主角,又明知男主角由細細個就為佢瘋狂地著迷咗咁多年,佢主動錫人,撩起咗人哋又拒絕,唔係好講得過去。

話返配樂,原來拍攝時本身演員就係經常聽住主題曲,羅拔迪尼路更要求聽住嚟拍,稱使他更能入戲。

外國人拍片非常重視配樂,多數在開拍前已找配樂師商討。

片中有導演形容ENnio的原創作曲配樂令戲同電影配樂雙軌並行。

排笛表達哀怨之愁緒。大家認為係咪好配合呢?

擅長試驗用不同器具、樂器變奏、人聲、口哨聲、皮鞭聲、鐵罐聲、敲擊樂、生活遇到又唔起眼東西(如:古舊梯子搖動吱吱聲)發出的聲響,用吹口琴嚟做角色對白(不喜歡說話的人),多元化音效配樂。

佢試過用巴哈Bach個名化為音符加西西里風嚟作曲。

4個音符的不同組合。有冇啲似霑叔笑傲江湖構思。

多產又天才橫溢,創意無限。

原本ENnio係想做醫生,佢父親係小號手,強迫ENnio學小號以維持生計。

佢跟師父學作曲,而當時作曲家做電影配樂被視為叛徒同似賣淫般。

最終,ENnio走入作交響樂的殿堂,贏得業界認同讚譽推崇,後來年輕的一代更以他為仰望宗師,又常常將ENnio的曲加入自己的歌內。

對於不懂音樂的Cool,欣賞呢齣戲好有刺激大腦接觸"新"事物的喜悅。

好睇

 呢齣戲似乎啱去戲院一齊睇,講古典音樂聽樂團部份有好的音響效果,見小石人有時都有聽古典。是以聽咗舒琪介紹咗該戲少少就唔聽住,呢齣想入去睇先發掘戲劇內容及情節發展。

昨天一早醒來,等佢醒咗就問佢。。。

經過一輪對答終於答應放工肯去睇。(後來先知原來佢有啲原因。)

佢返工後我就話畀亞FA~知一陣要出街,會晏啲返。通常在我哋外出後FA~都靜靜企喺紫膠椅pan上,天黑就瞓覺,呢方面好好。

攪完一輪網上購票。到通訊約匯合時間時,我話想早啲去攞飛兼搵定地方食嘢,因為齣戲成兩個幾鐘,佢放咗工後要食啲嘢先再在戲院小賣部買杯啡入去一路睇一路嘆,唔使餓住個肚。

是日免強制戴口罩,我哋都不約而同地唔戴,九乘九的人戴,我哋咪相對安全,到第日佢哋唔戴,我哋就戴返😆😸

真係要學習同做吓唔同的新程序,去到戲院喺刷卡攞飛都整咗好耐,因為唔知佢要將咭放的方向與上下。

搵食嚐問吓保安,去到間店舖見咁耐冇人畀餐牌同招呼就問吓人,原來又係已經用緊掃曲落單,個侍應話唔掂再搵佢。好彩之前喺元氣堂食用過好幾次。老公來到食店話上次去旺角食燒烤都係用掃曲的。

食完重有時間偕他去睇食麵湯碗,睇完戲可以去買,終於有自己兩公婆喜歡的食具瓷碗,而家用緊的都係老爺奶奶留低,我哋唔嘥嘢咁用落去。

齣戲頭嗰唔知幾多分鐘,總之覺得好長-------時間,就係有個女人哼嗰幾句歌,畫面就係要觀眾睇製作團隊名稱字幕。

心諗:"瀨嘢"又不時望吓佢的反應。

睇完之後佢話好睇,跟住兩人由昨晚到今朝至午間通訊的話題都係環繞住呢齣戲。

因為齣戲講嘅題材、對話內容都比較複雜同冷門,覺得好唔好睇估計都幾兩極化。我有啲部份睇唔明,要回家再睇影評才更了解。

以同業角度,舒琪就好推崇例如十幾分鐘一take長鏡和一些他從未見過的拍攝手法。

主角演技就算有些地方我不太明白導演想表達的深層信息都會讚嘆她演繹精湛,值得欣賞。

睇戲

前幾日,舊同學約飯聚。

咁我問佢哋有冇興趣吃過午餐後一齊睇毒舌大狀。其中一位友人答應邀請。

上次自己去睇尚氣後,呢次又試吓同人一齊入戲院。事關想支持有質素的電影繼續在戲院公映。

其實自從買電視送D+之後,呢半年睇咗唔少戲。近期驚喜係年三十晚已經有神探大戰上影了。連續睇咗兩次。好導演最令人印象深刻的就是在短短個幾兩個小時內,能有條理地處理多條故事線而且環環相扣從中又畀線索觀眾思考。

電影鐵三角由杜琪峯主理的部份,fing頭丸 金片肚兜 現金用同樣的膠袋分別裝住,幾幫人為咗各自所求爭奪時換來換去,呢部份真係拍得好有創意。

講返2月8日佢哋約喺港島區食嘢,咁我就建議去IFC睇戲,超舒服的座位,令我回憶年青時去碧麗宮睇gone with the wind,咁多年我都重記得呢個體驗。

回家後我同小石人講,第二日我哋遇到大家有興趣的電影時都可以一齊去IFC睇。

之前買飛時問售票員畫位屏幕紫色座位代表什麼,她答電影如有音效時該座椅會震盪,可能呢齣戲冇乜特別音效,所以唔多覺。

催眠大師

東坪洲一隅迷離富水墨色彩又如置身深層意識般疑幻似真。

近期看過難得的好電影~催眠大師。劇情引人入性之處是猜測不到。看此戲時請摒棄劇中人物的專業稱呼不乎現實,甚或治療過程完全不合常理,不寫實。看心理治療師與不願接受治療的患者互相催眠"格鬥"。。埋下伏線的佈局。

看畢此片,一些影評告訴大家有不為意的隱藏劇情,令我又再連續重看一次,都不察覺所說的隱藏劇情有足夠理據支持成立。

以前曾參加過一次催眠課程,真實情況是專注放鬆導入。催眠師不能令接受催眠者做不願意的事。電影很多時過份神化了這回事。但確實,深層意識潛藏了很多意想不到的資訊、情緒、創傷。胡亂地發掘是有機會令受者失控、歇斯底里、休克,不可不察。

同日又看另一齣催眠裁決,平舖直述,追看性、精彩程度遠不及

催眠大師。