等貓仔·艷羨目光

八月份上晒媒體幾十友一齊在海傍捕佢~長洲🐱仔。

小石人想去影好耐,雖然放假。。。但遇著摩羯,打風前夕那個九月首週二,最終沒成行因為佢影友大隻佬話,🐱仔多數鍾意企船桅俯視覓食,有風喺晚上桅杆郁就更難影得清晰,所以我哋取消該日行程。(嗰日係元氣感謝日,會員八折,好彩冇去唧)
 

好美的夜色

看倌,嚟睇慣的都知我唔係線性敍事。⬆晚間重頭戲提要~🐱仔。

9月11日

前幾日攪掂晒啲銀行嘢,昨午他他條條出發。事先搵咗間好出名小店食蠔仔粥,佢加咗方魚乾滿有潮汕風味。炸雞脾略較為入味。

兒時回憶:細個喺七層徙置區居住時,附近大波地在盂蘭勝節有大鬼王塑像威武非常,坐鎮薄鐵皮臨時竹棚內;有木頭車上個個大玻璃盎內酸木瓜酸菜蕎頭販賣;有處燈泡照耀吊著很多保平安玉器讓街坊競投。鐵絲網外圍有單車租賃,單車舖隔離就係掛滿潮洲打冷食品的路邊檔,嗰度啲蠔仔粥就是相若食味。

長洲食完3點3,四圍行吓搵吓會唔會有墨魚骨(畀亞FA~),雀仔街嗰啲黃黃哋色又成好似伍拾蚊一細件,唔想幫襯。乾貨海味舖係冇嘅。去街市問,個赤裸上身下場抹緊汗的中年卦男士,好好人,自己唔知邊度有得賣都逕自行去海鮮檔幫我哋問。嗰時生墨魚係有的,但老闆娘話內臟係唔會留喇。

其實小石人在我哋住處區內有相熟魚佬,我之前都已叫佢問吓,買啲細隻啲嘅墨魚(肉唔會咁靱),跟住咪有佢嘅骨自己曬,我整過啦。

估計藥材舖都有,上網查話多數炒焗過,亞FA~係生機飲食鳥,我搵生曬嗰啲。

剛搜,哈,原來淘寳竟然有得賣😄。

回到長洲遊記,橫豎冇嘢做都係逛吓混吓吉,有當然好,冇亦無妨。

往東灣方向去海邊,呢間⬇佢有興趣,有冰滴啡賣,五點十五分為最後落單時間。咁就去完海邊坐一陣先回頭飲。

我影1

我影2

飲完非常特味嘅果皮啡,臨走前先發現到門口高掛這棵蕨。

我影3

係時候去海傍睇環境睇位食住嘢捕🐱仔。

去到海傍海鮮食嚐有利位置,已經有3位雀友用晚膳等緊。

我話拿拿聲趁佢哋隔離重有張table for two就佔座先啦。

一埋到去,全日金句就係:

三個唔相識的雀友不約而同對小石人話"咁叻嘅,老婆肯陪你嚟打雀。"眼神係羡。慕。極。了。

小石人:"嚟行吓食吓海鮮"

A:"我咪咁同老婆講。"

B:"我夠係咯。"

C:"我都係喎。"

😄😸😁

點咗餐後,有隻真🐱仔喺餐枱附近下徘徊,老公畀咗隻剝殼蝦佢。

我飲咗支大啤消暑,隊晒。上次睇展覽後去bar用膳,小石人飲完幾啖Margarita之後關公出場(其實佢唔飲酒)。今次畀面我再飲咗一啖唔太冰凍啤酒。

好開心的一天。

歸程

提早取回強積金

小石人影到一對和尚,可能走失咗。(佢話會唔會係放養,我:唔會怕卦。問佢呢對飛入嚟佢會唔會養?佢話會😄。我上網查吓,據稱呢種鸚鵡日間經常吱吱喳喳,亦係會咬人的,,,,都冇乜鸚鵡係唔咬人。再養多對又要隔離以防有病或毆鬥又要處理好佢哋之間關係,又要小心唔好變殺戮戰場,算罷啦。)

 攪咗3日銀行事宜

~開通人民幣戶口以便透過雙櫃枱買港估。

~將不同銀行好耐冇用的戶口解除凍結。兩年或以上冇郁過啲港幣同綜合外幣戶口就會凍結。

~取消一間好耐冇用佢服務的銀行戶口。斷捨離成功。

~年滿60歲之後唔再打工可提早取回強積金。查詢、取表格及翌日接連處理宣誓繼而將相關文件交回受託強積金銀行。佢哋大概一個月會將啲錢入返我提供的戶口。宣誓正本佢哋會收埋。(N年前已將所有強積金戶口整合方便管理)

本來諗住食埋呢次跌浪購入待巿回升沽售港估基金。不過想深一層唔知再要等幾耐,錢入返自己袋,投資/機買賣具靈活性又唔使再畀行政費同手續費。

今次去唔同銀行,好多銀行女職員都好有禮貌,幾可愛。幫咗好大忙。

有位當我指示解凍賬戶時,我要攞幾仟蚊港幣,佢提咗我兩三次解凍戶口唔使攞錢的。

我:"我要攞錢用呀。。。"

另一間入去要等成60幾籌在前面。辦理期間,隔離個亞婆,有另一個女人陪同下話攞一萬蚊留返八佰在戶口。佢戶口要交水電煤同平安鐘,可能某日會有每月長者4仟幾蚊津貼入落戶口卦。個亞婆攞完錢又話自己重有萬幾蚊喺戶口,轉頭又話自己有兩萬蚊喺戶口。。。。

我低聲對幫我辦緊手續嘅女職員說:"真係難為妳哋嘞。"

買賣操作方面

上星期又揼咗少少石仔,沽晒美估反向執幾佰美刀。

9月10日買咗兩佰股趕交所。

颱風中的展覽~30°N Parallel North

 

小石人放兩星期假,從Youtube中得知九月份有呢個咁具創意而又將藝術理想推往極緻的一群人舉辦的展覽。

佢哋做工藝做印刷不計成本的成品係可以癲到做咗個模整十幾廿件陶瓷就掉咗個模,製作過程由於設計難度高不合水準的就棄而重做。figure公仔每款限量幾拾隻,塗層人手逐層上色。

~昨天9月5日~趁未打到嚟~

我哋平時如果見到要排長龍嘅嘢,轉頭就走(兩公婆都係咁),今次去到尖沙咀Harbour City,11點開始,已經有約40人輪候入場。排隊期間後面陸續約20~30人排。

晨早只飲咗杯果菜露,為咗避免好似上次去南生圍中途冇油頂唔順,我就請小石人去買快餐包填肚。佢買返嚟嘅係一個佰幾蚊的漢堡+薯條同杯啡。佢話未試過一路排隊一路食嘢(咪試吓囉,),結果呢餐係全日最好味的。

經過兩個幾鐘後終於入到會場,買咗本睇印刷都抵嘅創意外星人書 Tee 一個figure公仔一個銀做的章(後兩嘢要落單訂造先有貨)。

日期:即日至2024年9月29日

時間:上午11時至晚上10時

地點:海港城美術館

(海洋中心二階207號舖)