2024年11月15日星期五

破·地獄


 打颱風,11月14日~兩口子入塲睇呢齣近期熱爆的電影。

再試去嗰間上次睇城寨嘅戲院。一見到隔離係兩個貌似比我年紀大的女人喺度傾偈,心知不妙。

前期廣告佢哋都係🐔啄唔斷講講講。

我問小石人點關閉我部三星,因為唔想淨係靜音,生怕有啲app冇閂聲電影播放期間嘈到人。

老公亦不滿嗰兩個女人的交談聲,我在同小石人耳語,等開正場先。

當時後面又有人唔知用手機大聲播緊啲乜X嘢。前面有位觀眾嗌出嚟:"靜音啦!"

估到隔離兩條婆,開正場重講。

我:"麻煩畀個安靜環境等大家欣賞(部戲)"

立時佢哋收咗聲。

有一場女主角(救護員)搓緊個休克病者時,隔離個女人手機響。


戲期間啲電話聲此起彼落。

觀眾質素之低破壞晒入戲院睇戲嘅氣氛。


人哋劇情慘,佢哋笑。難怪有啲舞台劇演員話她演的角色喊到死去活來,啲觀眾當睇笑片!

而家睇戲前,有啲值得深思嘅片我會睇好多影評,我唔介意預先知道劇情的。反而有啲位特別留意到。

今次預先帶定條毛巾入塲抹眼淚又提小石人自己袋定紙巾。我接近喊足大半場戲。


睇畢,同老公話題多多。

下次再有好片都係去IFC。希望好運啲。


4 則留言:

  1. 我唔明點解啲人睇乜戲都會笑一餐。
    戲院環境惡劣,所以我寧願等出 Bluray 或 4K 碟(如果肯定有得上串流仲慳返)才睇,去戲院啲錢不如用來 set 靚屋企啲音響設備。

    回覆刪除
    回覆
    1. 魔兄早晨。

      "啲人睇乜戲都會笑一餐"
      可能佢哋視之為娛樂?
      見到別人折墮就最開心?
      情感反射異於正常反應?
      有啲人物文哥子華神周仔,望其面孔就會自然喪笑?
      真係唔清楚佢哋心理狀態。

      "戲院環境惡劣"
      非常同意。
      今次睇完呢齣戲,有上網去啲討論區(目及)吓,原來冇睇戲manner的群眾已經存在咗喺本土數以十年計,有啲人甚至會帶BB或隻🐕入戲院,係咪夠黐X線!
      記得以前細細個,重係老豆買幾張飛然後全家人入晒去睇獨臂刀猛龍過江時候,戲院外有煨魷魚乾咬碌蔗啲渣有人會四圍lur又有佢年代特式,許冠文有齣戲用咗好長時間煮前幫隻去毛生雞做aerobic,成個過程據講午夜場時全場觀眾佢做幾耐笑足咁耐。(鄒文懷本來之前要許冠文剪短啲嗰場戲,感受完呢個氣氛後都改變咗主意)
      以前拍戲嘅人會按睇午夜場啲人即時反應去修改部戲。
      而家已經改變咗,觀眾都最好可以與時並進,學習為自己和別人設想,要大家都好起來先會締造到更美好社會。

      去戲院睇個感覺好唔同的,而且全個環境黑晒個人會集中專注好多。環迴立體聲確係好正。
      同男/女朋友約會,跟伴侶全程握住手一齊睇別有一番浪漫美好回憶。
      以前大製作如侏羅紀去戲院睇就更震撼。

      雖然往日我好少去睇戲又成日幫襯老翻。現在耐唔耐支持電影業票房支持繼續有戲院。

      刪除
  2. 呢部戲黃子華戲份啱啱好,等其他演員可以大放淚彈

    回覆刪除
    回覆
    1. 衛詩雅聲稱自己好容易喊,但導演要佢唔准喊,係要谷住嗰種苦同痛;有時又要淨係流一滴淚,真係唔容易呀。
      有個youtuber(睇太多唔記得邊個)話黃子華呢齣戲冇乜發揮,我睇係覺得好多場都好有發揮,正如你講恰如其份,貫穿成部片。雙雄 對比,關係反差,生人先人的用心照顧同超渡。

      刪除

喜得人生新目標

很感謝各位, 剛開了另一新網誌就有好友們來訪。 那片樂土是用來紀錄學佛之路;給有興趣多研習的同修;獻對這去煩惱得自在法門多了解的同好。 更考慮到大家連結Coolhim這處原本可能是與財務自由有關。網友們有自己向善的不同信仰,閱文心生歡喜心至為重要,所以我另闢新天...