積極面對抑鬱

 

前幾日已經喺厨房天花附近見到佢,當時用個望遠鏡睇真啲。昨日黃昏淋花時就好開心咁發現佢在蘭花葉底。係呀,呢啲咁小嘅事,同隻喜歡的小生物近距離接觸,諗吓用唔同角度專注咁拍模特兒都可以令人好放鬆。

跟住就傳相畀小石人,又小心翼翼希望保住隻昆蟲唔好郁,等老公可以返嚟影。。。

結果,草蜢仔梗係噗跳去窗上。隔一陣爬爬吓又跳咗出街,我哋住好高架,咁都唔會跌死,真係犀利。

今日睇返2019年頭當時飽受情緒起伏困擾,嗰種自己控制唔到情緒嘅可怕經歷,好彩有寫落嚟,如果唔係就過眼雲煙咁只是發生過而唔記得。然後又有百般思緒,千種念頭閃過湧出。

亦多得啲好網友們嗰時支持鼓勵,分享佢哋自己的經歷,而且真心關心我。當一個人遇到危難時,幫到自己的,那些人就是菩薩。

我哋只能、只會喺文字言語中說到事情的一部份,其中有啲散落的missing puzzles只存在於自己知唔知的狀態下。

知道而冇講,可能係厚道又可能係對自己形象不利又可能冇用三眼你我他角度去睇事物而忽略了一些重要又對事情影響深遠的元素。

歸根到底,令當時人逃出胡同的就只有自己。我一個懂知恩圖報嘅姨甥女喺佢斷然舉家四口移民英國前主動約我於今年6月尾相聚。她是從小到大都經常情緒非常起伏的另一眾生,問我怎樣從那個陰霾中變得情緒穩定。(當時我梗講唔出以下咁多,我只能指出重點~離開現場。)

我想,第一個重要行為就是離開觸動當時人憤怒、無奈、哀傷等情緒的現場或情境。好多時精神病患者在精神病院回歸穩定後康復出院,可是一回到之前至發病的地方接觸那些人和事,就又再精神病復發,說明了人是需要經常有意識地探索內心的情緒變化,對有些人、事、物自己不能承受時,就要斷絕。

傳統的覊絆父母子女人際關係的枷鎖。如果再試圖逼自己去留在其中,跟著可能會發生更災難性的結局,就好像以前我寫過的孽戀中男女發生慘劇。當決定離開時,同時亦要想辦法脫離內疚自責的矛盾。

我有像都巿人打機麻醉自己的時刻又有曾躺在床上什麼都不做又長年累月怪自己沒恒心懶惰想法~其實原來當時我已不知不覺間墮入情緒長期低落的迴圈。啟悟後,當我處於情緒正常狀態時,猶幸有積極尋找有關抑鬱及情緒病資訊,觀照內在情緒問題的核心。

重覆又重覆提及傷害自己的親人所作所為。我不可以在網絡公告天下。幸運地我有小石人。消極的一面是傾訴時只是重覆一次又一次地在回憶及意識中不停加深傷害自己。這樣對自己冇幫助亦使聽者可能越來越煩厭。所以我選取積極地表達而且每次都在事件中擷取正面訊息,一次比一次減少激動。當我訴說時心境平靜如說鄰家的故事時,表示自我心理療癒取得重大成果。不忙讚賞自己多番,加強下次再可能受創傷時正面解決情緒問題的能力和經驗。越來越強;越來越升呢。

有人會認為輔導幫不到人。冇錯,如果當時人觀念係輔導員等於救世者,自己不願意同一言九頂,放軟自己手腳灘喺度等人幫,咁就一定係廢、嘥錢、嘥時間。

一個優秀輔導員的經歷。佢唔會"dump"症,見幾次冇幫助就會請案主另請高明。一次佢同來者做輔導時,個女事主喊喊吓在傾談室內的厠所洗面,點知出嚟時嗰度厠所門壞咗,佢哋都不知所措,攪咗一輪終於出得返嚟,對嗰個人嚟講人生的重要時刻來了:

佢話好多謝輔導員幫咗佢:佢被困時初先用返自己平時方法嗌救命、搵人幫,但出到嚟時佢頓悟到遇困境時只有自己才可幫自己走出困局。

透過當時人搵到一些細微的實際經驗~轉念而找回自己的力量。

我就冇去見心理輔導,我上網睇視頻睇不同文章幫自己。+上理性同思考能力,一在狀態時就做。我覺得如果情況好嚴重又"長"時間情緒狀況冇正向改善,用啲錢見輔導都係好嘅選擇。好似無間道梁朝偉去陳慧琳度放鬆休息吓。畀錢搵樹洞好過無緣無故喊、發脾氣喺老公身上,枕邊人頂得妳幾多鑊,佢唔係儍嘅,正常人都睇得出伴侶成日一時北極一時熱帶反覆無常係有好大問題。自己攪唔掂就要搵專業人事扶一把。

真係技窮,已經完全啟動唔到對任何事物的興趣前,就搵西醫斷吓症做轉介。如果係腦欠傳遞血清素這生理情況就可能考慮用藥。我呢啲人就用自然協助自己釋出快樂荷爾蒙既方法。

用返我哋買賣股票同期權的說法。當規劃長短倉前係咪要諗清楚自己的承受能力,有冇興趣、有冇時間處理。如果攪個project係長短期都要兼顧要好多時間心力,但做咗又唔理,咁同你合伙嘅拍檔就企咗喺度兼要做埋你嗰份,點知原來個戶口冧把又淨係你先知,你又成日情緒化困擾唔理啲倉攪第二啲嘢。咁之前點解要開呢個project,就係missing puzzles只有你先知或你都唔知。

咁個拍檔頂得幾耐呢?你又擔心個拍檔同你拆伙,又惡性循環地擔心但又唔從核心問題著手解決。。。。

點解一個人會唔畀伴侶做佢平時開心的事?

1過份緊張。

2未放得低伴侶有自己的選擇,後果自負這豁達理念。

3情況已變,伴侶有機會危害自己生命,佢有事兩人都要一齊孭。

或者睇吓抑鬱測驗表的癥狀,反其道而行之。

伴侶喜歡見到另一半開開心心。

自己又覺得在家中有貢獻有滿足感。

經常受到讚許禮待。

健康身心愉快人生不是夢。

燒炮仗~我之前都有控制唔到情緒的時候

孽戀~有情緒糾結要察覺,在未發生摧毀性局面前要處理

如果要搵情緒輔導,我會搵呢位女士。