2022年6月18日星期六

在家安老


 確係唔太理會幅相夾唔夾所說主題,當時想上邊張咪邊張。冇框~

講起呢件墨魚骨來源,係小石人去西貢碼頭影猛禽時順道買咗隻活墨魚的產物。

呢一點我有諗過唔想打爛FA~的齋砵,然而似乎啲雀仔需要補鈣,就做咗。

正題

點解今次裝修咁落本,原因是我哋有共識之後唔會再做,而我一心諗住家中設施可以方便再老啲,身體機能衰退時,仍然可以在家中生活,唔去院舍過下段人生。

尤其我試過咁多次斷食,好清楚身體極為虛弱時,如厠沖涼都係似登高峰咁難嘅事。

老咗,其中一樣重要一環,係保持身體同衣物清潔。

智能厠板具清洗下身同自動掀蓋功能。應該會好幫得手,減少洗手次數(我掀開厠板後通常會洗一次手),又可舒緩痔瘡不適。

在企缸安裝嵌牆摺櫈+雨淋撳掣花灑,只要坐到埋去就清潔到。年紀大咗腳步不穩時,坐著抹身可減低跌倒風險。

有部份燈是體感開關,方便夜間如厠又免忘記熄燈。

裝修前計劃將所有燈掣降低高度,家中沒有小孩,沒有玩燈掣的情況。點知小石人按我構思重做得盡善盡美,而家直情做到唔使舉手就開關到的高度。適合地方設2ways開關燈掣,上咗床唔使再去門口關燈~正。

遙控開關窗簾,預留咗電掣~真周到👍👍👍👍👍

佢親戚嚟幫手安冷氣時問及點解裝冇軌趟門,小石人答佢方便啲轆轆吓。而家燈掣都方便轆轆吓時伸手可及。加之,我一早諗定家中門同櫃門,用到的都會係趟門裝置,慳位好多。

佢親戚又問點解安智能門鎖,小石人就搬出我同佢講有關網友的情況。一個人在家居有意外,只要提供門鎖密碼就不用消防員破門入屋。之後更換密碼就可以。佢親戚笑稱,第二日老到只有能力用手指按平安鐘個掣。。。

本來小石人佢唔想安智能防盜眼裝置。而我認為我哋已經唔安鐵閘,就要加強阻嚇,防止別人取易不取難。而且住我哋對面嗰家人有大耳窿追數,佢哋安咗個監察鏡頭喺門口。我哋都要加強保安。個木工師傅話點解防盜眼開得咁低😄。小石人心諗唔係開畀你睇,係照我老婆高度㗎嘛。事實係我開始骨質疏鬆越嚟越矮,這個是自然現象(裝修好之後真係要啲起心肝做運動)。

近期搭(車立)遇見對面嗰兩公婆,男的問我係咪唔裝鐵閘,我話係呀,唔想嘈到鄰居。(其實間屋苑住戶啲閘門開關就好似舊式路軌火車般嘈得好交關-我覺得好煩,重要戶戶都係咁。。)

門鐘,未裝修前喺房係聽唔到門鐘聲的,叫咗🍕就要開咗房門留心住。而且我聽覺走下坡,所以千叮萬囑佢要喺房安多個門鈴。第二日到我完全聽唔到如還有些少視力,就將門鈴換燈泡,咁樣人哋撳鐘我就睇到著燈。

晾乾衫後最好唔使摺,原衣架掛入衣櫃,收納方法要諗計唔使換季。衣帽間地方擺唔到咁大個衣櫃,我會進一步減少自己物品。仍有能力前處理好自己的東西。。。

我哋好幸運,從冇為洗碗事宜你推我唔做(基本上兩個一齊食完嘢啲碗佢洗😆)。不過,設咗洗碗機就可慳返好多時間,而家食完晚餐都想hea吓。本來會安埋化骨龍減低垃圾量,又慳啲垃圾徵收費。取捨下,而家個大型洗碗鋅盆多功能然而個去水位係方形安唔到化骨龍,真係可惜。小石人話再睇吓個去水位拆唔拆得考量吓安唔安到。

淨係佢先攪到咁嘅陣容,啲師傅大部份係佢工作上累積的人脈,合作無間知道嗰啲人手藝功架先搵。

黃金花大酒店Penelope Wilton所演角色,經常向丈夫抱怨,她不想住在有扶手的家居,似乎佢接受唔到日漸衰老的情況。

呢個現象係必然,視力 聽力 語言 活動能力 身體機能 智力 腦筋 記憶退化,能做的是想清楚自己想怎樣適應 接受 和預先規劃,有尊嚴地與配偶攜手繼續走完這段風光。


16 則留言:

  1. 老咗自己換光管同燈膽都好危險

    回覆刪除
  2. 我以前同亞媽一齊住時,呢啲家居維修同裝修係全部自己想辦法處理。
    我老豆做落用4呎舊式光管,我,企咗上木梯 腳震震 張開雙臂唔夠寬唔夠力更換,於是後來換咗用扭膽。亞媽就係唔明,成日話光管好用。。。
    老咗搵人做換電燈各樣維修,因為唔識個價錢係獅子大開口,都要整。
    識的到體力有限時正如兄說真係有危險。
    小石人而家重用緊行木梯,我要佢家中第日轉鋁梯。而家佢攪嗰啲燈,我唔識換,有時間都要學吓。

    回覆刪除
  3. 我家中兩老都有健康問題,但之前點都唔肯請工人;終於因為咁出事,先最終接受有工人

    到而家佢哋都係未完全接受自己變老同有病的現實,每日都活得不快樂

    回覆刪除
    回覆
    1. 前半世咁辛苦搵錢就係用在此時。
      啲錢唔用係失去佢價值。
      可惜要出事先明白。
      亦體會到米兄的心情,無奈!

      刪除
    2. 錢只係其次,佢地主要係想證明自己無乜老,咩都仍然做到。

      主要係心態,佢哋自己放唔開,無人可以幫到佢地。

      刪除
    3. 以前做長者中心,啲老到不得了的亞婆在中心範圍跌倒。我做當值主任唔畀人扶佢,同話幫佢叫白車。個亞婆係嫌我好煩,起身咪冇事,重要立刻起來。
      長者跌親唔立刻扶佢,係因為佢哋咁脆,要check清楚有冇骨折先,最好由護理員檢查和如有骨折處理好定咗位再用擔架。對骨骼癒合和康復至為重要。但啲亞婆亞伯唔明,最緊要唔好失威衰畀人睇。
      我老母暈到天旋地轉都唔畀我扶,重要自己去厠所同埋洗碗。
      我的情緒病係其中呢啲無奈 憤怒日積月累的,重有其他好多嘢引發。
      現在我明白,要保到自己身心精神健康係最最最重要。如果強行繼續下去,再受傳統孝道的枷鎖覊絆,我會精神崩潰同黐線。經常檢視自己精神狀況,受唔住就唔好再逗留。。。

      刪除
  4. //一個人在家居有意外,只要提供門鎖密碼就不用消防員破門入屋。之後更換密碼就可以。佢親戚笑稱,第二日老到只有能力用手指按平安鐘個掣。。。

    我嚟 😺

    回覆刪除
    回覆
    1. 係呀,未雨綢繆福爾魔👍👍👍👍👍

      刪除
  5. 睇電視, 常見住在老鼠曱甴垃圾屋的都是老人家, 不明白為何人老了便會喜歡儲垃圾

    看到師姐的文章, 要是他們也有這樣住得舒適的一個家, 可能就不會想出街執垃圾了 (笑)

    回覆刪除
    回覆
    1. 龍床不及住慣的地方,尤其係對好多長者嚟講。儲物方面,可能有啲人經歷過好艱苦的時刻,冇嘢食 食樹皮,搵唔到工,物資好矜貴。人們眼中的垃圾,佢哋當係寶。
      有啲人就係與物件背後的回憶有放不下的感情。要佢掉慘過攞佢條命。
      有啲就係未完成的事情,例如嗰個求學時階段未做的習作 未睇過的書同筆記,諗住第二日補返做。
      有啲就係諗住第二時用得著的東西,但通常沒有那一日。
      記得有次睇有關斷捨離的資訊,有個中年男人,畀人炒魷魚,佢由嗰時開始就買啲貴重古玩同畫,攪到屋企堆滿晒嘢,嚴重嗰隻,亦買嘢買到經濟出現問題。佢女兒不勝其煩。背後係佢老豆受不住畀舊公司認為佢冇價值,就以買這類物品填補自己的失落。要解決佢儲物狂的習慣,就要先處理佢呢方面心理障礙。
      人與物件的關係好多時係反映該事主與人的關係。
      近期睇一韓國綜藝,"新穎的整理",有啲煽情同唔知係咪全真實,但喺斷捨離的學習有得著。
      我在家居整潔方面都面對咗好耐問題。其中一個原因係情緒病,沒有能量去處理。
      1997年輸股票後遺症係唔拆信件。
      老公亦有好多物件同逝世及搬走的家人們未處理的舊物。
      我哋都要儲咗好耐能量先開展裝修的一步。
      對我嚟講係整潔和有系統生活的新希望。🍀

      刪除
    2. 沒想到師姐裝修背後還有一連串的心路歷程, 多謝分享

      比起儲物, 我更喜歡掉舊物, 舊的唔去, 新的無位裝, 夾硬塞到滿晒, 反而令物品堆積拿不到出來, 貪字得個貧

      適度處理部份紀念價值低的舊物, 反而方便欣賞其他珍藏, 切記切記

      刪除
    3. 係呀,現在是循著這個方向進行。
      片面在網誌寫的,背後好多嘢係估唔到。
      管好自己,另一半有佢的進度,救老婆時佢掉咗好多嘢😆

      刪除

喜得人生新目標

很感謝各位, 剛開了另一新網誌就有好友們來訪。 那片樂土是用來紀錄學佛之路;給有興趣多研習的同修;獻對這去煩惱得自在法門多了解的同好。 更考慮到大家連結Coolhim這處原本可能是與財務自由有關。網友們有自己向善的不同信仰,閱文心生歡喜心至為重要,所以我另闢新天...